Korrupsiyaya qarşı mübarizə tədbirləri genişləndirilir

Elektron imza mexanizmi sadələşdiriləcək

Azərbaycanda korrupsiyaya qarşı aparılan mübarizə tədbirləri öz müsbət nəticəsini verməkdədir. Baxmayaraq ki, ölkədə hələ də korrupsiya və rüşvət halları müşahidə olunur, ancaq fakt odur ki, bu sosial problemlərə qarşı effektli mübarizə aparılır. Təsadüfi deyil ki, prezident İlham Əliyev bəyan edib ki, Azərbaycanda korrupsiyaya qarşı mübarizədə çöx böyük uğurlar əldə edilib: “Azərbaycanda demokratiyanın inkişafı ilə bağlı bundan sonra da islahatlar aparılacaq. Biz bu islahatlara hazırıq. Əslində bu islahatların təşəbbüskarı da bizik. Azərbaycanda təhlükəsizlik tədbirləri bundan sonra da təmin edilməlidir. Bizim böyük xoşbəxtliyimiz ondan ibarətdir ki, Azərbaycan vətəndaşları sülh, əmin-amanlıq, təhlükəsizlik şəraitində yaşayırlar. Korrupsiyaya qarşı mübarizədə çox böyük uğurlar əldə edilib. Həm inzibati tədbirlər, həm də sistem xarakterli islahatlar aparılır və öz bəhrəsini verir. Hesab edirəm ki, gələcək illərdə biz bu böyük bəlanın aradan qaldırılmasında daha da böyük uğurlar əldə edəcəyik. Bir sözlə, daxili siyasətin əsas istiqamətləri çoxdan müəyyən edilib. Sadəcə olaraq, biz bu məsələləri daha da məqsədyönlü şəkildə həll etməliyik”. Dövlət başçısının fikirlərindən də aydın olur ki, Azərbaycanda korrupsiyaya qarşı mübarizədə həm inzibati, həm də maarifləndirici tədbirlər həyata keçirilir. Qeyd edək ki, korrupsiya hallarının aşkarlanmasında Baş Prokurorluq yanında Korrupsiyaya Qarşı Mübarizə İdarəsi fəaliyyətini davam etdirməkdədir. Təsadüfi deyil ki, son bir ay müddətində sözügedən idarə tərəfindən bir neçə fakt aşkar edilib. Belə ki, Bakı şəhər sakininin Abşeron-Binə peşə liseyində baş verən qanunsuzluqlar barədə Baş Prokuror yanında Korrupsiyaya Qarşı Mübarizə İdarəsinin 161 saylı "Qaynar xətt" əlaqə mərkəzinə daxil olmuş müraciəti araşdırılıb. İdarənin əməkdaşları tərəfindən liseyin istehsalat təlimi ustası Şərafət Mehdiyevanın xidməti otağına keçirilən baxış zamanı liseydə təhsil alan tələbələrə məxsus və son istifadə tarixi 2013-cü ilin oktyabr ayınadək olan 17 ədəd plastik təqaüd kartları aşkar edilib. Araşdırmalarla həmin kartlarla təqaüdlərin liseyin vəzifəli şəxsləri tərəfindən çıxarılaraq mənimsənildiyi müəyyən edilib. Fakta görə Cinayət Məcəlləsinin 308.1-ci (vəzifə səlahiyyətlərindən sui-istifadə) maddəsi ilə cinayət işi başlanıb. Hazırda cinayət işi üzrə tam, hərtərəfli və obyektiv istintaq aparılmaqla, cinayəti törətmiş şəxslərin tam dairəsinin müəyyənləşdirilərək istintaqa cəlb edilməsi istiqamətində zəruri istintaq tədbirləri davam etdirilir. Digər bir fakt jurnalistin korrupsiya əməli ilə bağlıdır. Belə ki, Bakı şəhəri 36 saylı Texniki yaradıcılıq mərkəzinin direktoru Dilarə Əliyevanın Baş Prokuror yanında Korrupsiyaya Qarşı Mübarizə İdarəsinin 161 saylı “Qaynar xətt” əlaqə mərkəzinə daxil olmuş müraciəti üzrə təxirəsalınmaz əməliyyat-istintaq tədbirləri həyata keçirilib. Müəyyən edilib ki, 7 may 2013-cü il tarixdə “Korrupsiya və bəşəriyyət” qəzetinin müxbiri Xəyyam Qurbanlı və həmin qəzetin şöbə müdiri Rizvan Mirmövsümov Bakı şəhəri, Çobanzadə küçəsi 49 saylı ünvanda yerləşən 36 saylı Texniki yaradıcılıq mərkəzinə gələrək özlərini Baş prokuror yanında Korrupsiyaya qarşı mübarizə idarəsinin əməkdaşları kimi təqdim ediblər. Bundan sonra mərkəzdə yoxlama aparacaqlarını bildirərək orada ayrı-ayrı sənədlərin fotoşəkillərini çəkmiş və müəllimlərin işə davamiyyəti ilə əlaqədar iradlarını bildirərək aşkar edilmiş nöqsanlarla bağlı tədbir görülməməsi müqabilində 300 manat məbləğində pul tələb ediblər. Mayın 14-də Baş prokuror yanında Korrupsiyaya qarşı mübarizə idarəsinin əməkdaşları tərəfindən aparılmış əməliyyat tədbirləri nəticəsində qeyd edilən məbləğdə pulu mərkəzin direktoru D. Əliyevadan alarkən hər iki şəxs cinayət başında yaxalanıblar. R. Mirmövsümovun idarə etdiyi “Opel Vita” markalı, 90-MF-574 dövlət qeydiyyat nişanlı avtomobilə baxış zamanı ibtidai istintaq üçün zəruri olan sənədlər aşkar edilərək maddi sübut kimi götürülüb, həmçinin avtomaşının qabaq şüşəsinə «KORRUPSİYA» sözləri yazılmış lövhənin yapışdırıldığı müəyyən olunub. Faktla bağlı Cinayət Məcəlləsinin 178.2.1, 178.2.3 (dələduzluq) və 310-cu (vəzifəli şəxsin səlahiyyətlərini mənimsəmə) maddələri ilə cinayət işi başlanmış, X.Qurbanlı və R.Mirmövsümov iş üzrə təqsirləndirilən şəxs qismində cəlb edilməklə barələrində məhkəmənin qərarı ilə həbs qətimkan tədbiri seçilib. Hazırda həmin şəxslər tərəfindən törədilmiş digər cinayətlərin müəyyənləşdirilməsi istiqamətində zəruri əməliyyat-istintaq tədbirləri davam etdirilir. Eyni zamanda, şagirdlərin 1-ci sinfə qəbulu ilə bağlı prosedur qaydalarının kobud pozuntusuna görə Suraxanı rayonunda yerləşən 270 nömrəli məktəbin direktoru Talıb Rəhimov vəzifəsindən azad olunub. Daxili işlər orqanlarına arayışın təqdim edilməsi ilə bağlı qanunvericiliklə müəyyənləşdirilmiş qaydaları pozmuş Təhsil Nazirliyinin mühafizə polisinin əməkdaşı və Xaricdə Şagird, Tələbə, Aspirant və Staj keçənləri iş üzrə Şura Katibliyin bir əməkdaşı tutduqları vəzifədən azad olunublar. Bundan başqa, tələbələrə qeyri-qanuni yolla kömək göstərməyə çalışmış Bakı Dövlət İqtisadi və Humanitar Kollecinin Qiyabi şöbəsinin müdiri A.Quliyeva tutduğu vəzifədən azad olunub. Həmin kollecin direktoru və direktor müavini aşağı vəzifəyə keçiriliblər. Təhsil Nazirliyi mətbuat xidmətinin mayın 16-da yaydığı məlumatda bildirilir ki, bütün bunlar vətəndaşların müraciətləri əsasında aparılmış araşdırma nəticəsində olub. Göründüyü kimi korrupsiya hallarını cəmiyyətin müxtəlif sahələrində müşahidə etmək mümkündür. Məhz belə halların qarşısını almaq məqsədilə vətəndaş-məmur münasibətlərinin minimuma endirilməsi istiqamətində müvafiq tədbirlər həyata keçirilir. Artıq ölkədə “Elektron hökumət” layihəsi uğurla tətbiq edilməkdədir. Elektron imzanın bütün sahələrdə tətbiq olunması üçün maarifləndirmə tədbirləri davam etdirilir.

Ədliyyə Nazirliyinin Qeydiyyat və Notariat Baş İdarəsinin aparıcı məsləhətçisi Vidadi Mayıl bildirib ki, artıq 355, o cümlədən 300-ə yaxın ədliyyə işçisinin elektron imzası notariusda qeydiyyata alınıb. Elektron imzanın bütün sahələrdə tətbiq edilməsi üçün işlərin davam etdirildiyini deyən baş məsləhətçinin sözlərinə görə, elektron imzadan kütləvi şəkildə istifadə edildikdən sonra aparılan əməliyyatlar daha da sadələşəcək. Prezident Administrasiyasının sənədlərlə və vətəndaşların müraciətləri ilə iş şöbəsinin müdiri Süleyman İsmayılov bildirib ki, Prezident Administrasiyasına vətəndaşlardan daxil olan müraciətlərdə qaldırılan məsələlərin həlli üçün qanunvericiliyə uyğun olaraq müxtəlif araşdırma, nəzarət və təhlil formalarından istifadə olunur: “Prezident Administrasiyasında keçirilən şəxsi qəbullarda vətəndaşları narahat edən problemlərin operativ həlli üçün əlaqədar dövlət orqanları və təşkilatlar qarşısında məsələ qaldırılır. Bu işdə müraciətlərə nəzarətlə baxılması və belə müraciətlərlə əlaqədar görülən tədbirlər xüsusi qeyd olunmalıdır”. Şöbə müdiri deyib ki, Prezident Administrasiyasında nəzarət qaydasında baxılmış müraciətlərin sayı bu il daha da artıb: “Onların bir çoxu müsbət həll olunub, qalanları barədə izahat verilib, qaldırılan bir sıra məsələlərin həlli növbəti illərin inkişaf planlarına salınıb. Məhz vətəndaşların əsaslı müraciətlərinin araşdırılması nəticəsində təkcə bu ilin əvvəlindən ayrı-ayrı vəzifəli şəxslər barəsində inzibati tənbeh tədbirləri tətbiq edilib, bəziləri işdən kənarlaşdırılıb”. S. İsmayılov vurğulayıb ki, Azərbaycan vətəndaşlarının Prezident Administrasiyasına göndərdikləri müraciətlər formasından asılı olmayaraq, hamısında bir fikir qırmızı xətt kimi keçir: “Mən Prezidentə çox inanıram və onun siyasətini dəstəkləyirəm”. Şöbə müdiri bildirib ki, daxil olan məktubların içərisində bir xeylisi problemlərinin həll olunmasına görə minnətdarlıq hissinin ifadə olunduğu məktublardır. S. İsmayılov müraciətlərə baxılmasının yaxşılaşdırılması üçün bəzi yeniliklər edildiyini də vurğulayıb: “Keçən ilin sonlarından başlayaraq hazırlanıb tətbiq edilmiş yeni proqram əsasında vətəndaşların elektron qəbula yazılması təmin edilib. Artıq Bakıya gəlmədən Prezident Administrasiyasının struktur bölmələri rəhbərlərinin qəbuluna yazıla bilirlər. Bunun üçün vətəndaşlar yaşadıqları şəhər və rayondan Prezidentin rəsmi saytı vasitəsilə istədikləri vəzifəli şəxsin qəbuluna yazılır və təsdiq edilmiş cədvələ uyğun qəbula gəlirlər. Bu ilin əvvəlindən yüzlərlə vətəndaş məhz elektron formada qəbula yazılmaq üçün müraciət edib, bir çoxu qəbula yazılıb, yaxud kimə və haraya müraciət etməli olduqları barədə onlara elektron izahat verilib”. Şöbə müdiri qeyd edib ki, Prezidentin rəsmi saytında “Vətəndaşların müraciətləri” menyusu da daim təkmilləşdirilir: “Artıq bir sıra mərkəzi icra hakimiyyəti orqanlarında isə vətəndaşların birbaşa videoqəbulu təşkil edilir”. S. İsmayılov deyib ki, 2012-ci illə müqayisədə bu ilin əvvəlindən indiyədək Prezident Administrasiyasına daxil olan müraciətlərin təhlili göstərir ki, dövlət qulluğuna qəbul, mənzil, tikinti, məhkəmə və hüquq-mühafizə orqanlarının fəaliyyəti, ipoteka kreditlərinin verilməsi ilə bağlı müraciətlərin sayı artıb: “Şəhər və rayon icra hakimiyyətlərinin, o cümlədən onların nümayəndələrinin fəaliyyəti, özəlləşdirmə, ekologiya, sosial müdafiə, qaçqınlar və məcburi köçkünlərlə bağlı məsələlər, məişət və su təchizatı məsələləri üzrə müraciətlərin sayı azalıb. Vətəndaşların qəbulunu bəzən birinci şəxslərin özlərinin aparmadığı, ayrı-ayrı idarələrdə müraciətlərə vaxtında cavab verilmədiyi, qəbul zamanı verilmiş vədlərin heç də həmişə yerinə yetirilmədiyi göstərilir və belə halların aradan qaldırılması xahiş edilir. Müraciətlərin növlərinə gəldikdə isə qeyd etməliyik ki, ötən ilin müvafiq dövrü ilə müqayisədə şikayətlərin faiz nisbəti azalıb”. S. İsmayılov qeyd edib ki, nazir və komitə sədrlərinin bölgələrdə mütəmadi qəbullar keçirməsi də əhali tərəfindən müsbət qarşılanıb: “Təkcə aprel ayında 20 mərkəzi icra hakimiyyəti orqanının rəhbəri 60 şəhər və rayonu əhatə edən qəbullarda 2 min nəfəri qəbul edib, qəbullarda qaldırılan məsələlərin əksəriyyəti nəzarətə götürülüb, əsaslı müraciətlər müsbət həll olunub, qalanları barədə isə lazımi tədbirlər görülür. Bu qəbulların əsas məqsədi yerlərdə əhali ilə birbaşa ünsiyyət yaradılması, real vəziyyətin öyrənilməsi və mümkün olan hər bir məsələnin operativ həll edilməsidir”.

Korrupsiyaya Qarşı Mübarizə Fondunun icraçı direktoru Vasif Mövsümov vurğulayıb ki, Azərbaycanda korrupsiyanın əsas səbəblərindən biri vətəndaş cəmiyyəti və ictimai nəzarətin olmamasıdır. Onun sözlərinə görə, problemi həll etmək üçün ilk növbədə ictimai nəzarət sistemi yaradılmalıdır: “Vətəndaş cəmiyyətinin üzvləri hər zaman məsələlərlə bağlı öz tövsiyələrini versə də, müvafiq dövlət qurumları buna könülsüz yanaşırlar. Bunun nəticəsində də bəzi qurumlardan şikayətlərin sayı artır.”

Alim

Azərbaycanın Bütövlüyü Uğrunda Cəmiyyətin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi “Korrupsiyaya qarşı mübarizədə vətəndaş cəmiyyəti institutlarının və medianın birgə mübarizəsinin təşkili” layihəsi çərçivəsində çap olunur.

Olaylar.- 2013.- 31 may.- S.10.