“İslam ölkələrinə toxunmayın. Öz işlərinizlə məşğul olun”

Beynəlxalq Forumda işğal altında olan torpaqlarımızdan da söz açıldı

Azərbaycan Respublikasının Prezidenti İlham Əliyevin himayəsi ilə "Çoxmədəniyyətli dünyada sülh şəraitində birgə yaşama" şüarı altında 2013-cü ilin 29 may -1 iyun tarixlərində Bakıda II Ümumdünya Mədəniyyətlərarası Dialoq Forumu işinə başlayıb.

Ötən gün təşkil edilən mətbuat konfransında Mədəniyyət və turizm naziri Əbülfəs Qarayev çıxış edərək forumun keçirilməsinin rolundan danışıb: “Ötən il də ölkəmizdə bu forum təşkil edilmişdi. Sözsüz ki, bu cür tədbirlərin ölkəmizdə qeyd edilməsində ölkə prezidenti İlham Əliyevin də rolu danılmazdır”. BMT-nin Sivilizasiyalar Alyansının baş katibi Nasir Abdulaziz Əl Nəsir öncə ölkəmizin strateji mövqeyi, zəngin tarixi haqda danışıb: “Mədəniyyətlərarası dioloq forumunun təşkili ilə əlaqədar zəngin tarixə və mədəniyyətə sahib olan ölkənizdə səfərdəyik. Bir çox tarixi yerlərini gördüyümüz bu məmləkətdə olmaq bizim üçün çox əlamətdardır”. İSESKO-nun baş direktoru Əbdüləziz bin Osman əl-Tüveyri isə turizmin miqrasiya, sosial-iqtisadi sahədəki və dinlərarası münasibətlərdəki rolu haqda danışıb. Baş direktor turizmin ölkələrarası sülh və əminamanlığın bərpa edilməsində mühüm rola malik olmasını qeyd edərək müxtəlif ölkələri bu sahəyə xüsusi önəm verməyə səsləyib.

UNESCO-nun nümayəndəsi Katrina Bolko: “Beynəlxalq forum çərçivəsində müxtəlif istiqamətli müzakirələr təşkil edəcəyik. Bu istiqamətdə Səudiyyə Ərəbistanı səfirinin də rolunu yüksək qiymətləndirirəm. Forumun keçiriləcəyi müddətdə mədəni müxtəliflik, birgəlik, ölkələrarası dialoqların təşkili ilə bağlı müxtəlif müzakirələr aparılacaq. Müxtəliflik, birgəlik, ölkələrarası dialoqlar forumun uğurla işini davam etdirməsi üçün çox mühüm amil hesab olunmalıdır”. Daha sonra əcnəbi jurnalistlərin suallarını cavablandıran mədəniyyət və turizm naziri münaqişəli regionda bu cür beynəlxalq tədbirlərin təşkili haqda qərb mətbuatı da məlumatlandırılıb: “Ərazilərimizin bir hissəsi Ermənistanın işğalı altındadır. Bu gün də həmin ərazilərdə müharibə davam edir. Ermənistanın Azərbaycana qarşı işğalçı mövqeyi haqda o qədər də geniş danışmağa ehtiyac görmürəm. BMT-nin dörd qətnaməsi ilə ölkəmizin ərazi bütövlüyü qorunur. Təəssüflər olsun ki, bu cür qətnamələr vaxtında icra olunmur. Lakin biz həmişə sülhü sevən dövlət olmuşuq. Buna görə, gec ya tez aqressiv, işğalçı mövqeyi ilə seçilən Ermənistanın işğalı altında olan torpaqlarımızı azad edəcəyimizə inanırıq. Yaxın gələcəkdə torpaqlarından didərgin düşən qaçqınlarımız doğma el-obalarına qayıdacaq. Azərbaycanın ərazi bütövlüyü təmin edilməyənədək işğalçı dövlətlə heç bir əməkdaşlıq qurmayacağıq. Ölkəmiz istər mədəniyyət, istərsə də digər sahələrdə dünya ölkələri ilə əməkdaşlıq etməkdə hər zaman maraqlıdır. 2015-ci ildə Olimpiya oyunlarının ölkəmizdə keçirilməsi üçün təklifimizi vermişik”. İSESKO-nun baş direktoru Əbdüləziz bin Osman əl-Tüveyri də Ermənistanın işğalçı mövqeyi haqda danışıb: “Qərb mətbuatı işğalçı Ermənistan haqda heç nə yazmır. Niyə? Lakin mütəmadi olaraq islam ölkələrinin daxili işlərinə qarışaraq informasiyalar yaymaqla məşğul ola bilirlər. İslam ölkələrinə toxunmayın. Öz işlərinizlə məşğul olun”. Əbdüləziz bin Osman əl-Tüveyri daha sonra beynəlxalq forumun uğurla öz işini davam etdirmək üçün dövlətləri həmrəy olmağa səsləyib: “Ümid edirəm ki, bu gün də təşkil edilən tədbirdəki siyasi müzakirələrimiz mədəni istiqamətə yönələcək. Bu beynəlxalq tədbirin əsas məqsədi dövlətlərin həmrəyliyini, birgəliyini təşkil etməkdir. Qobustan qayaüstü rəsmləri də qədim insanların ayrılıqda deyil, birgə olduqdan sonra müxtəlif nailiyyətlər qazanmasını özündə əks etdirir. Həmrəy olsaq daha böyük nailiyyətlər əldə edə biləcəyik”.

Nigar Məhərrəm

Olaylar.- 2013.- 31 may.- S.8.