“Diaspor təşkilatlarının fəaliyyətlərinin gücləndirilməsində

gənclərin rolu danılmazdır”

Xaricdə təhsil alan gənclərimizin öz enerjilərini vətənimiz üçün sərf etmələri, ölkə xaricində Azərbaycanla bağlı həqiqətlərin çatdırılması, Azərbaycan tarixi və mədəni dəyərlərinin təbliğ olunmasında bilavasitə mühüm rol oynayır. Bu işdə əlbəttə ki, xaricdə və Azərbaycanda fəaliyyət göstərən diaspor təşkilatlarının, tələbə və gənclərlə bağlı olan qeyri-hökümət təşkilatlarının müstəsna rolu vardır. Məhz bu tip təşkilatların olması xaricdə təhsil alan tələbələrimizin gücünün vahid mərkəzdən idarə olunaraq Azərbaycanın maraqlarına uyğun istifadə olunmasında mühüm əhəmiyyət kəsb edir. "Şərqi Avropada Təhsil Alan Azərbaycanlı Tələbələr və Məzunlar" İctimai Birliyi məhz bu tip təşkilatlardandır. Məqsədi Şərqi Avropada oxuyan tələbələri şəbəkələndirmə, ölkələr arasında münasibətləri genişləndirib, gücləndirilməsinə öz töhfəsini vermək olan təşkilat Azərbaycan tarixinin və mədəniyyətinin təbliği, tarixi həqiqətlərin Şərqi Avropaya çatdırılması, dövlət əhəmiyyətli müxtəlif tədbirlərin, forumların keçirilməsi istiqamətində də fəaliyyət göstərir.

“Şərqi Avropada Təhsil Alan Azərbaycanlı Tələbələr və Məzunlar” İctimai Birliyinin baş katibi Tural Hümbətov deyir ki, mürəkkəb qlobal siyasi və iqtisadi proseslərin cərəyan etdiyi müasir dünyada Azərbaycanın milli maraqlarının qorunmasında diaspor təşkilatlarının da üzərinə böyük vəzifələr düşür: “Bu gün diaspor təşkilatlarının fəaliyyətinin gücləndirilməsində gənclərin rolu danılmazdır. Buna səbəb kimi diaspor təşkilatlarında azərbaycanlı tələbələrin üstün qüvvəyə çevrilmələridir. Möhtərəm prezidentimiz İlham Əliyevin qeyd etdiyi kimi günümüzün tələbləri savadlı gəncliyimizin olmasıdır. Yalnız bu halda Azərbaycanın uğurlu gələcəyi təmin olunacaqdır. Bu işdə möhtərəm prezidentimizin imzaladığı 2007-2015-ci illərdə Azərbaycan gənclərinin xaricdə təhsil alması barədə dövlət proqramı gənclərimizin dünyanın öndə gedən universitetlərində təhsil almaları üçün əlverişli şərait yaratmış oldu”. Tural Hümbətovun sözlərinə görə, təşkilat kimi fəaliyyət göstərmələri dövlətin bu kimi təşkilatlara dayaq olmasıdır: “Təşkilatın yarandığı gündən aktiv fəaliyyətə başlaması artıq Şərqi Avropada yaşayan azərbaycanlı gənclərin bir təşkilat ətrafında birləşməsi, yumruğu bir nöqtəyə vurması baxımından əhəmiyyətli rola malikdir. Dövlətimizin Azərbaycan gənclərinin maarifləndirilməsi məqsədi ilə yeritdiyi aktiv siyasət son dövrlərdə regionda azərbaycanlı tələbələrin sayının artmasına səbəb olub. Bu baxımdan regionda tələbələrin bir mərkəzdən ictimai fəaliyyətlərinin əlaqələndirilməsi vacib olan fəaliyyət istiqamətlərdəndir. Dövlətimizin artan qüdrəti, beynəlxalq nüfuzu regionda Azərbaycana olan marağı artırır”. Təşkilat rəsmisi deyir ki, beynəlxalq aləmdə Azərbaycanın dəstəklənməsi yönündə sözü gedən gənc intelektual kapitalın rolu danılmazdır: “Bu kapitalın düzgün istiqamətləndirilməsi, qiymətləndirilməsi və idarə olunması ölkəmizin başlıca konsepsiyalarindandır. Bu prizmadan çıxış edərək biz “Şərqi Avropada Təhsil alan Azərbaycanlı Tələbələr və Məzunlar” İctimai Birliyini təsis etmişik və Ulu Öndər Heydər Əliyevin “Təhsil millətin gələcəyidir” kəlamına sadiq qalaraq ölkəmizin gələcəyi naminə Şərqi Avropada təhsil alan gənclərin daha sıx ictimai fəaliyyətə cəlb edilməsində maraqlıyıq. Müxtəlif elmi konfranslarda, tədbirlərdə azərbaycanlı gənclərin iştirakının artırılması, elmin müxtəlif sahələri üzrə gənclərimizin səmərəli müzakirələrinin təşkil edilməsi, əldə etdikləri yeni bilik və bacarıqların həmkarları arasında bölüşdürülməsi, yeni elmi texnologiyaların ölkəmizdə tətbiqi istiqamətində səmərəli addımların atılması əsas hədəflərimizdəndir. Biz gənclərin ən ümdə vəzifəsi ölkəmiz - Azərbaycanın dünyada tanıdılması yönündə əlimizdən gələnin ən yaxşısını etməkdir. Hamımız azərbaycanlıyıq. Biz gənclər Azərbaycan gələcəyi naminə fəaliyyət göstəririk. Öz fikirlərimizi həmkarlarımızla bölüşürük, onların fikirlərini paylaşırıq, qarşıya qoyulan hər hansı bir işin həyata keçirilməsi üçün birgə fəaliyyət göstəririk. Biz Azərbaycanın təbliği işində bir-birimizlə yarışmırıq, əksinə bu işdə bir-birimizə yardım edirik. Onsuz da beynəlxalq aləmdə bizə maneə olan, bizi istəməyən qüvvələr də var. Bizim işimiz 100 metrlik qaçış yarışı deyil ki, tək başımıza qarşıya qoyduğumuz məqsədə çataq və işimiz bununla bitsin. Bizim yolumuz uzundur və bu yarışda bayrağı biraz biz, bir az həmkarlarımız, yəni hər kəs fəaliyyət göstərməklə daşıyırıq və daşıyacağıq. Fərq sadəcə formadadır, məzmun isə eynidir – Azərbaycan gənclərinin ictimai fəaliyyətinin əlaqələndirilməsi, Azərbaycan həqiqətlərinin dünyaya çatdırılması, Azərbaycan tarixi və mədəniyyətinin təbliği. Bizim məqsədimiz qarşıda qoyduğumuz vəzifələrin layiqincə yerinə yetirilməsidir. Bu işdə möhtərəm prezidentimiz İlham Əliyev başda olmaqla dövlətimizin dəstəyi sözsüz ki, bizlərə qarşıya qoyduğumuz məqsədlərə çatmağa bilavasitə yardımçı olur”. “Şərqi Avropada Təhsil Alan Azərbaycanlı Tələbələr və Məzunlar” İctimai Birliyinin baş katibi Tural Hümbətov deyir ki, bu gün Azərbaycan yüksələn xətlə inkişaf edir və bu danılmaz fakt olaraq qalmaqdadır: “Dünya dövlətlərinin Azərbaycana olan rəğbətinin artmasına və bir çox dövlətlərin Azərbaycanın ərazi bütövlüyünü tanımasına baxmayaraq ikili standartlardan çıxış etməkdə davam edirlər. Bunun bariz nümunəsi kimi bir müddət əvvəl şahidi olduğumuz moldovalı ombudsman Aureliya Qriqoriu və onun ətrafında cərəyan edən hadisələri göstərə bilərik. Moldovalı ombudsmanın Ermənistan parlamentində Qarabağda baş vermiş hadisələrdə erməni vəhşilikləri ilə bağlı məlum çıxışından sonra ona göstərilən təzyiqlər və hədələrə baxmayaraq Aureliya Qriqoriunun da dediyi kimi “Həqiqətə görə üzr istəmədi”. Ermənistanın onun hüquq və azadlıqlarını pozduğuna baxmayaraq Moldova dövləti öz ombudsmanının müdafiəsinə qalxmadı. Əksinə olaraq Moldova parlamentində ombudsmanın səlahiyyət müddətinin oktyabrda başa çatmasına baxmayaraq artıq indidən onun səlahiyyətlərini düzgün yerinə yetirməməsinə görə uzaqlaşdırılması tələbi ilə çıxış edənlər oldu. Bu məsələnin pik nöqtəsi isə Moldova Konstitusiya Məhkəməsinin üzvü Viktor Popanın Moldova parlamenti adından üzr istəməsi və bunun ermənilər tərəfindən əldə bayraq edilməsi oldu. Sözsüz ki, Moldova dövləti Azərbaycanla münasibətlərini qarşılıqlı əməkdaşlıq istiqamətində qurmaqdadır Lakin baş vermiş bu insidentdə dövlətin susma mövqeyində durması onun öz ombudsmanına, öz vətəndaşına qarşı mövqeyinin açıq göstəricisidir. Belə məsələlərin təkrarlanmasının artıq bir neçə dəfə şahidi olmuşuq hər dəfə bunun izahı güclü erməni diasporu və bu kimi bəhanələrlə izah edilməkdədir”. Onun sözlərinə görə, bu gün Azərbaycan həqiqətlərinin beynəlxalq arenada hətta məhz İrəvan parlamentindən belə çatdırılması Azərbaycanın apardığı siyasətin nəticəsidir: “Sözsüz ki, aparılan siyasətin bir parçası olaraq Azərbayan gənclərinin yaşadığı ölkələrdə Azərbaycan həqiqətlərinin bu ölkənin vətəndaşlarına çatdırılması yönündə gördüyü işlər də böyük əhəmiyyət kəsb etməkdədir. Muasir dövrümüzdə ikili standartlardan çıxış edən dövlətlərdə gənclərin Azərbaycan həqiqətlərinin çatdırılması yönündə gördüyü işlər sözsüz ki, bu yöndə həmin dövlətlərin ikili standartlardan çıxış edərək həyata keçirtdikləri fəaliyyətlərinin aradan qaldırılmasına yönəlmişdir. Bu işlərin nəticəsi kimi Azərbaycan həqiqətlərinin dünya ictimaiyyətinə məhz bu ölkələrin nümayəndələri tərəfindən çatdırılması Azərbaycanın haqq işinin məntiqi nəticəsi kimi qiymətləndirilməlidir. Tural Hümbətov təmsil etdiyi təşkilatın fəaliyyət müddətində keçirdiyi layihələr və qarşıdakı hədəflər barədə də məlumat verib: “Layihələrimiz həddindən çox olduğuna görə ən möhtəşəm layihələr haqqında məlumat vermək istərdim. Bunların arasında Bakıda keçən il, Şərqi Avropa ölkələrindən məzun olmuş tələbələr üçün karyera mərkəzinin açılması, Ukraynanın paytaxtı Kiev şəhərində 26 fevral Xocalı soyqırımı günü şəhərin İcra hakimiyyətindən rəsmi icazəsi olmaqla böyük miqyaslı fleşmobun keçirilməsini qeyd etməyə bilmərəm. Ukraynada yaşayan İrəli gənclər təşkilatının fəalı, indi Ukrayna elminin tanınmış simalarından olan fəlsəfə dotoru Azər Əliyevin bu layihədə göstərdiyi fədakarlığı o zaman tələbələrimizi heyrətə gətirmişdir. Minsk şəhərində gənc fəalların vahid şəkildə fəaliyyət göstərməsi erməni lobbisini o qədər qıcıqlandırmışdı ki, ordakı daşnaklar əlindən gələni edərək gənc istedad Orxan Muxtarlını təhsil aldığı universitetdən ixrac olunmasına nail olmuşdurlar. Nəticədə Orxanın istedadı və bizim səylərimizlə Orxan daha üstün universitet tərəfindən təhsil almağa dəvət olundu. Keçən il Bakıda bir Malayziya, Belarus, Ukrayna, Kıprps Türk Cumhuriyyəti və Serbyadan bir sıra mütəfəkkirlər, rektorlar və gənc fəalların qatıldığı elmi seminar məncə ən uğurlu nailiyyətlərimizdəndir. Gələcək planlarımıza gəlincə isə planlarımız çoxdur: “Şəxsən mənim fikrim budur ki, nə ediriksə edək əsas həmmişə pozitiv olmaqdır. Qarşıda bir sıra beynalxalq təşkilatlarla birlikdə edəcəyimiz layihələr durur.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olayalr.- 2013.- 14 noyabr.- S.15.