Rumıniya-Azərbaycan Gənclər və Mədəniyyət

Assosiasiyasının Azərbaycan diasporunun inkişafına verdiyi töhfələr

Əvvəli ötən sayımızda

Rumıniyada fəaliyyət göstərən Azərbaycan diaspor təşkilatlarından biri də Rumıniya-Azərbaycan Gənclər və Mədəniyyət Assosiasiyasıdır. Rumıniya-Azərbaycan Gənclər və Mədəniyyət Assosiasiyası 2001-ci ildə təsis edilib. Assosiasiya həmin il, iyul ayının 4-də Ədliyyə Nazirliyində qeydiyyatdan keçib. Rumıniya-Azərbaycan Gənclər və Mədəniyyət Assosiasiyasının üzvləri əsasən Rumıniyada təhsil alan azərbaycanlı və rumın tələbələrdir. Assosiasiyanın üzvləri Rumıniya kütləvi informasiya vasitələrində vaxtaşırı çıxış edir, Azərbaycan həqiqətlərini rumın ictimaiyyətinə çatdırırlar. Həmçinin assosiasiya üzvləri müntəzəm olaraq Azərbaycanla əlaqədar müxtəlif tədbirlər həyata keçirirlər. Rumıniya-Azərbaycan Gənclər və Mədəniyyət Assosiasiyasının sədri İqbal Hacıyevdir. Qeyd edək ki, İqbal Hacıyev eyni zamanda Heydər Əliyev Fondunun Rumıniya nümayəndəliyinin rəhbəridir.

Müsbət məqamlardan biri ondan ibarətdir ki, Rumıniya-Azərbaycan Gənclər və Mədəniyyət Assosiasiyası bu ölkədə fəaliyyət göstərən digər diaspor təşkilatları, xüsusilə Heydər Əliyev Fondunun Rumıniya nümayəndəliyi və Azərbaycanın Rumıniyadakı fövqəladə və səlahiyyətli səfirliyi ilə sıx əməkdaşlıq şəklində işləyir və fondun təşkil etdiyi tədbirlərə yaxından dəstək verir. Belə tədbirlərdən biri Heydər Əliyev Fondunun Rumıniya nümayəndəliyinin təşəbbüsü ilə 2011-ci ildə Buxarestdə 31 mart azərbaycanlıların soyqırımı günü münasibəti ilə keçirilib. Azərbaycan Respublikasının Rumıniyadakı Səfirliyi və Heydər Əliyev Fondu – Rumıniya nümayəndəliyi tərəfindən keçirilən tədbirdə Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının və Azərbaycan Respublikası Dövlət Neft Şirkətinin Rumıniyadakı nümayəndəliyinin rəhbər və idarə heyəti, ölkədə yaşayan və təhsil alan azərbaycanlılar, İran azərbaycanlıları, kütləvi informasiya vasitələrinin nümayəndələri iştirak ediblər. Azərbaycanlıların Soyqırımı Gününə həsr olunmuş geniş tədbir proqramında azərbaycanlıların soyqırımının tarixi, xüsusi olaraq, 1905-1907-ci illərdə ermənilər tərəfindən Bakı, Şuşa, Zəngəzur, İrəvan, Naxçıvan, Ordubad, Eçmiədzin, Cavanşir və Qazaxda törədilmiş vəhşiliklər, 275 kəndin dağıdılması, 1918-ci ilin mart-aprel aylarında ermənilər tərəfindən Bakı, Şamaxı, Quba, Muğan və Lənkəran rayonlarında 50 min azərbaycanlının öldürülməsi, on minlərlə insanın evlərindən didərgin düşməsi qeyd olunub, Qubada 122 kənd, Dağlıq Qarabağda 150 kənd, Zəngəzurda 115 kənd, İrəvan quberniyasında 211 kənd və Qars vilayətində 92 kəndin dağıdıldığı vurğulanıb. Bundan başqa, 1918-1920 illərdə repressiya zamanı indiki Ermənistanda yaşayan 575000 azərbaycanlıdan 565000 qovulduğu və öldürüldüyü diqqətə çatdırılıb. Çıxış edənlər 1948-1953-cü illərdəki deportasiyadan söhbət açaraq, 1946-47-ci illərdə Suriyadan, Yunanıstandan, Livandan, İrandan, Bolqarıstandan, Fələstindən, Fransadan, Birləşmiş Ştatlardan, Misirdən, İraqdan və Rumıniyadan 86300 erməninin keçmiş SSRİ ərazisinə köçürülməsi və bununla bağlı 1948-50-ci illərdə SSRİ Nazirlər Şurasının qərarları ilə 100000 azərbaycanlının öz yaşayış yerlərini tərk etməyə məcbur olması barədə geniş məlumat veriblər. Yığıncaqda çıxış edən natiqlər Ermənistan-Azərbaycan, Dağlıq Qarabağ münaqişəsi zamanı baş vermiş hadisələrdən danışaraq, Ermənistanın işğalçılıq siyasəti, 26 fevral 1992-ci il tarixində Xocalı faciəsi, 2 aprel 1993-cü il tarixində Azərbaycan Respublikasının Kəlbəcər rayonunun işğal olunması, onların ağır nəticələri və bu soyqırımın mahiyyət etibarilə Ermənistanın separatçılıq, terrorçuluq siyasətinin tərkib hissəsi olduğu barədə konkret faktlarla tədbir iştirakçılarını məlumatlandırıblar. Qeyd olunub ki, 26 mart 1998-ci ildə Azərbaycan xalqının ümummilli lideri Heydər Əliyevin Azərbaycanlıların Soyqırım Gününün 31 mart tarixində qeyd olunmasına dair verdiyi fərman böyük tarixi əhəmiyyətə malikdir və azərbaycanlıların soyqırımına beynəlxalq siyasi, hüquqi qiymət verilməsi dövlətimizin qarşımızda qoyduğu əsas vəzifələrdən biridir. Sonra Azərbaycanlıların soyqırımının dəhşətlərini əks etdirən foto guşə iştirakçılara nümayiş etdirilib. Həmçinin Azərbaycanlıların Soyqırımı Günü ilə bağlı səfirlik tərəfindən hazırlanmış geniş pres-reliz Rumıniyanın dövlət orqanlarına, qeyri-hökumət təşkilatlarına, Rumıniyada fəaliyyət göstərən diplomatik nümayəndəliklərinə də göndərilib

Bir müddət əvvəl isə Heydər Əliyev Fondunun dəstəyi ilə Rumıniyanın Buxarest şəhərində fəaliyyət göstərən Rumın-Amerikan Universitetinin nəzdində Azərbaycan Araşdırmalar Mərkəzi açılıb. Açılış mərasimində universitetin rektoru, müəllimlər, tələbələr, Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının, Rumıniya-Azərbaycan Sənaye və Ticarət Palatasının üzvləri, Azərbaycan Respublikası Dövlət Neft Şirkətinin Rumıniya nümayəndəliyinin əməkdaşları, Rumıniyada yaşayan və təhsil alan azərbaycanlılar, türk-tatar icmasının təmsilçiləri, diplomatik korpusun və kütləvi informasiya vasitələrinin nümayəndələri iştirak ediblər. Tədbir Universitet Senatının otağında Heydər Əliyev Fondunun Rumıniya nümayəndəliyi ilə Rumın-Amerikan Universiteti arasında əməkdaşlıq sazişinin imzalanması ilə başlayıb. Sonra tədbirin iştirakçıları Azərbaycan Araşdırmalar Mərkəzinin yerləşdiyi "Bakı" otağının açılışında iştirak ediblər. Heydər Əliyev Fondunun Rumıniya nümayəndəliyinin direktoru İqbal Hacıyev tədbir iştirakçılarına mərkəzin fəaliyyət istiqamətləri barədə məlumat verib. İqbal Hacıyev bildirib ki, mərkəzdə Azərbaycan dili tədris olunacaq, Azərbaycan ədəbiyyatı, mədəniyyəti, tarixi təbliğ ediləcək, ölkədə gedən inkişaf prosesləri barədə rumın tələbələrə məlumat veriləcək. Qeyd olunub ki, Azərbaycan Araşdırmalar Mərkəzinin açılması iki xalq arasında mövcud olan dostluq münasibətlərinin daha da möhkəmlənməsinə xidmət edəcək. Rumın-Amerikan Universitetinin rektoru Ovidiu Folcut Heydər Əliyev Fondunun prezidenti, Azərbaycanın birinci xanımı Mehriban Əliyevaya Rumın-Amerikan Universitetinə verdiyi böyük önəm üçün təşəkkür edib, Fondun Rumıniyadakı nümayəndəliyinin fəaliyyətini yüksək qiymətləndirib. Rektor yeni imzalanmış sazişin və yeni yaradılmış Azərbaycan Araşdırmalar Mərkəzinin iki xalq arasında olan dostluq münasibətlərinin daha da möhkəmlənməsinə xidmət edəcəyini vurğulayıb. Ovidiu Folcut Azərbaycan xalqının ümummilli lideri Heydər Əliyevin və Prezident İlham Əliyevin uğurlu siyasəti nəticəsində yüksək inkişafa malik olan Azərbaycanı təbrik edib. Tədbirin sonunda Azərbaycanın inkişafını əks etdirən "Azərbaycanın inkişafı: Neftdən sənayeyə doğru" filmi göstərilib.

Cari il, iyun ayının 5-də isə Rumıniyanın paytaxtı Buxarest şəhərində Azərbaycan Respublikasının Prezidenti yanında Gənclər Fondunun maliyyə, Azərbaycan-Rumıniya Ticarət Palatasının təşkilati dəstəyi ilə “Gənclərin İqtisadi, Sosial və Mənəvi İnkişafına Yardım” İctimai Birliyi Azərbaycan uşaqlarının rəsm sərgisinin açılış mərasimini keçirilib. Rumıniya Milli Kitabxanasında baş tutan sərgini giriş sözü ilə Heydər Əliyev Fondunun Rumıniyadakı nümayəndəliyinin rəhbəri İqbal Hacıyev açıb və sərginin əhəmiyyətindən danışıb. Açılış mərasimində iştirak edən Prezident Administrasiyasının ictimai-siyasi məsələlər şöbəsinin məsul əməkdaşı Vüsal Quliyev çıxış edərək Azərbaycanda fəaliyyət göstərən gənclər təşkilatlarının ölkəmizdən kənarda dövlətçiliyimizin inkişafına yönəlik müxtəlif tədbirlər təşkil etməsini yüksək qiymətləndirib. Bildirib ki, bütün bunlar ölkə başçısı cənab İlham Əliyevin gənclərə və gənclər təşkilatlarına göstərdiyi etimadın nəticəsidir. Azərbaycan Gənclər Fondunun da öz növbəsində belə layihələri dəstəkləməsi təqdirəlayiqdir. Layihənin koordinatoru, Azərbaycan-Rumıniya Ticarət Palatasının sədri Şahin Nəbiyev Rumıniyada yalnız ticarət layihələri deyil, müxtəlif sosial layihələrə də dəstək verəcəklərini qeyd edib. Tədbirdə Rumıniya parlamentinin deputatları, Azərbaycan Respublikasının Rumıniyadakı səfirliyinin, Heydər Əliyev Fondunun Rumıniya nümayəndəliyinin, Rumıniya-Azərbaycan Dostluq Cəmiyyətinin, Azərbaycan-Rumıniya Mədəniyyət və Gənclər Assosiasiyasının, Rumıniya-Azərbaycan Sənaye və Ticarət Palatasının əməkdaşları, Rumıniyanın elm və ictimaiyyət nümayəndələri, tələbələr, kütləvi informasiya vasitəsi və yerli qeyri-hökumət təşkilatları iştirak ediblər. Qeyd edək ki, 3 gün davam edən sərgidə məcburi köçkün uşaqlarla yanaşı, Tofiq İsmayılov adına Uşaq-Gənclər Yaradıcılıq Mərkəzinin, Nizami adına Uşaq-Gənclər Yaradıcılıq Mərkəzinin, Respublika İncəsənət Gimnaziyasının Uşaq-Gənclər Yaradıcılıq Mərkəzinin və Bakı şəhər gənc turistlər və diyarşünaslıq mərkəzinin şagirdlərinin çəkdiyi rəsmlər nümayiş etdirilib.

Noyabrın 21-də isə Buxarestdəki Rumın-Amerikan Universitetində Heydər Əliyev Fondunun dəstəyi ilə “Azərbaycan – Uğurlu inkişaf modeli” mövzusunda konfrans keçirilib. Konfransda Rumın-Amerikan Universitetinin rəhbərliyi, müəllim-tələbə heyəti, Azərbaycan səfirliyinin əməkdaşları, ARDNŞ-in Rumıniya nümayəndəliyinin təmsilçiləri, Azərbaycan-Rumıniya Gənclər və Mədəniyyət Assosiasiyasının, Azərbaycan-Rumıniya Ticarət Palatasının üzvləri, Qara dəniz və Xəzər dənizi Beynəlxalq Əməkdaşlıq və Tərəfdaşlıq Fondunun, Rumıniyada yaşayan Azərbaycan, türk-tatar icmalarının nümayəndələri iştirak ediblər. Heydər Əliyev Fondunun Rumıniya nümayəndəliyinin direktoru İqbal Hacıyev Azərbaycanın tarixi, mədəniyyəti, iqtisadiyyatı, sürətli inkişafı barədə tədbir iştirakçılarına məlumat verib. O, ümummilli lider Heydər Əliyevin Azərbaycanın müstəqilliyinin qorunması, dövlətçiliyin möhkəmləndirilməsi, qısa müddətdə ölkədə sabitliyin bərqərar olması, sürətli inkişaf proseslərinin başlanması ilə bağlı misilsiz xidmətləri haqqında interaktiv təqdimatla çıxış edib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 23-25 noyabr.- S.15.