Azərbaycan diasporunun görkəmıi

şəxsiyyətlərindən Sabit Orucov

Azərbaycan diasporunun görkəmli şəxsiyyətlərindən biri də Sabit Orucovdur.

Görkəmli dövlət xadimi, neft və qaz sənayesi üzrə mütəxəssis Sabit Atababa oğlu Orucov 1912-ci il, may ayının 31-də Bakı şəhərində anadan olmuşdur. O, 1936-cı ildə Azərbaycan Sənaye İnstitutunun (indiki Azərbaycan Neft Akademiyası) bitirdikdən sonra neft mədənlərində bir sıra rəhbər vəzifələrdə çalışmışdır. Ali məktəbi bitirdikdən sonra Sabit Orucov neft və qaz yataqlarının işlənilməsi sahəsində tədqiqat işləri aparmış, hava vurmaqla (aerasiya) dərin neft quyularının mənimsənilməsi üsulunu işləyib hazırlamışdır.1949-1957-ci illərdə qısa fasilə ilə o, SSRİ neft sənayesi nazirinin müavini, 1957-1959-cu illərdə Azərbaycan SSR Xalq Təsərrüfatı Şurasının sədri və Azərbaycan SSR Nazirlər Soveti sədrinin müavini işləmişdir. 1959-1962-ci illərdə Sabit Orucov SSRİ Nazirlər Soveti nəzdində Azərbaycan SSR Nazirlər Sovetinin daimi nümayəndəsi olmuş, 1962-1965-ci illərdə isə SSRİ Kimya, Neft və Yanacaq Sənayesi Dövlət Komitəsinin sədr müavini, SSRİ Dövlət Plan Komitəsi nəzdində Dövlət Neftçıxarma Sənayesi Komitəsi sədrinin birinci müavini, sonralar isə SSRİ Neftçıxarma və neft sənayesi nazirinin birinci müavini kimi məsul vəzifələrdə çalışmışdır. 1972-ci ildən ömrünün sonuna kimi (1981-ci il) Sabit Orucov SSRİ Qaz sənayesi naziri olmuşdur. O, Neft Daşlarındakı yataqların kəşfi və mənimsənilməsində bilavasitə iştirak etmiş və bir sıra iri bloklu dəniz buruq əsaslarının konstruksiyasını təklif etmişdir. Onun fəal iştirakı ilə Qərbi Sibir, Orenburq vilayəti, Türkmənistanda və Özbəkistanda bir sıra neft və qaz yataqları istifadəyə verilmişdir. SSRİ-də qaz sənayesinin yeni texnika ilə təchiz olunmasında Sabit Orucovun böyük xidmətləri olub. Sabit Orucov bir sıra qiymətli elmi işin və ixtiranın müəllifidir. Bu gərgin elmi axtarışlarının nəticəsi kimi o, 1962-ci ildə texnika elmləri doktoru elmi dərəcəsi almış,1966-cı ildən isə professor elmi adına layiq görülmüşdür. O, Yaponiya, İngiltərə, Kanada, ABŞ, Almaniya və başqa ölkələrdə Ümumdünya və Beynəlxalq Neft və Qaz Konqreslərində məruzələr etmiş, 8-ci Moskva Neft Konqresində Dünya Neft Konqreslərinin vitse-prezidenti seçilmişdir. Sabit Orucov iki dəfə SSRİ Dövlət Mükafatı, Lenin mükafatı laureatı olmuş, 1980-ci ildə Sosialist Əməyi Qəhrəmanı adına layiq görüllmüşdir. Üç dəfə “Lenin” ordeni, 4 dəfə “Qırmızı Əmək Bayrağı” ordeni vəbir sıra medallarla təltif olunmuşdur. Sabit Orucov 1981-ci il, aprelin 20-də Moskvada vəfat etmişdir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 29 oktyabr.- S.15.