Diaspor təşkilatları milli

musiqimizi layiqincə təbliğ edirlər

Dünyanın müxtəlif ölkələrində fəaliyyət göstərən Azərbaycan diaspor təşkilatları, ayrı-ayrı cəmiyyət və birliklər təkcə ölkəmizin həqiqətləri deyil, eləcə də zəngin tarixi-mədəni irsimiz və musiqimizin təbliği sahəsində aktiv fəaliyyət göstərirlər. Məhz soydaşlarımızın bu istiqamətdəki uğurlu fəaliyyəti nəticəsində dünyanın əksəriyyət ölkələrində milli musiqimizə olan maraq artır.

Azərbaycan mədəniyyətinin təbliği sahəsində uğurlu fəaliyyət göstərən təşkilatlardan biri də Danimarka-Azərbaycan Dostluq Cəmiyyətidir. Xüsusilə cəmiyyətin Mədəniyyət Mərkəzi milli musiqimizin təbliğinə ciddi diqqət yetirir. Danimarka-Azərbaycan Dostluq Cəmiyyətinin Mədəniyyət Mərkəzinin sədri, tanınmış pianoçu Kəmalə Hüseynova milli musiqimizin təbliği sahəsində görülən işlərdən danışıb. Əvvəlcə Danimarkaya getməyi və oradakı fəaliyyətindən söhbət açan Kəmalə Hüseynova deyib ki, 1965-ci ildə anadan olub və 6 yaşında o vaxtkı Dzerjinski adına 11 illik orta ixtisas musiqi məktəbi və eyni zamanda Bakı şəhəri 12 №-li orta məktəbinə qəbul edilib: “1982-ci ildə oranı fərqlənmə ilə bitirmişəm. 1986-cı ildə isə indiki N.Tusi adına Pedaqoji Universitetinin musiqi fakültəsini qırmızı diplomla bitirmişəm. Onu da qeyd etmək istərdim ki, Adil Bəbirov, Eldar Mansurov, Kamilə Qarabağlı, Gülarə Axundova, Dilarə Əliyeva kimi istedadlı bəstəkar və musiqiçilərin tələbəsi olmuşam. Əldə etdiyim uğurlarda onların əməyi böyükdür. Həmin ildən etibarən ixtisasım üzrə əmək fəaliyyətinə başlamışam. 1988-ci ildə ailə qurmuşam və həyat yoldaşım sovet ordusunun zabiti olduğu üçün Macarıstanda, Rusiyada, Ukraynada orta və musiqi məktəblərində çalışmışam. Təbii ki, sovet dönəmində hərbi orkestrlərlə, çoxmillətli uşaq və gənclərlə apardığım işlərlə böyük təcrübə əldə etmişəm. 1991-ci ildə ermənilərin Azərbaycana təcavüzü başlayan kimi həyat yoldaşım Vətənə dönərək döyüşlərə qatıldı. Mən isə Bədii Gimnastika Federasiyasında musiqi tərtibatçısı və pianoçu kimi fəaliyyət göstərməyə başladım. 2003-cü ildən Danimarkanın Fredensborq şəhərində yaşayıram. Danimarka dili məktəbini bitirmişəm. Hazırda özəl Danimarka məktəbində, ixtisas musiqi məktəbində və özəl türk məktəbində musiqi, xor və fortepiano dərsləri verirəm. Bundan başqa, Danimarkanın qədim Renessans xorunda da fəaliyyət göstərirəm. Hələ cəmiyyətimiz fəaliyyət göstərməmişdən əvvəl milli bayramlarda orada yaşayan azərbaycanlılarla bir yerə toplanıb maraqlı vaxt keçirirdik. Belə tədbirlərdə təbii ki, mahnı və rəqslərimiz xüsusi yer tuturdu. Mən həmişə piano çalırdım, rəfiqələrim xalq mahnılarını, rəqslərimizi ifa edirdi. Cəmiyyətimiz təşkil olunduqdan sonra isə belə bir mərkəzin yaranması artıq qaçılmaz idi. Çünki bir milləti, ölkəni tanıtmaq üçün onun milli dəyərlərinin, mədəni irsinin, folklorunun təbliği çox vacibdir. Xarici ölkələrdə yaşayan azərbaycanlıların əsas vəzifələrindən biri məhz budur”.

Danimarka-Azərbaycan Dostluq Cəmiyyətinin Mədəniyyət Mərkəzinin rəhbəri olmaqla yanaşı, eyni zamanda danimarkalılardan ibarət “Hafla” İnstrumental ansamblında çalışan Kəmalə Hüseynova deyib ki, “Hafla2 danimarkalı Lars Bodur tərəfindən yaradılıb: “Mən bu ansamblın həm solisti, həm də pianoçusuyam. Qeyd edim ki, kollektivdə yeganə azərbaycanlı da mənəm. “Hafla” sözünün mənası isə “əyləncə” deməkdir. Repertuarımız əvvəlcə yalnız yerli musiqidən ibarət idi. Daha sonra mən şərq musiqisinin nümunələrindən ifa etməyi təklif etdim. Hal-hazırda isə Azərbaycan mahnıları böyük üstünlük təşkil edir. Onu da diqqətə çatdırım ki, danimarkalılarla Azərbaycan musiqisini ifa etmək, onlara milli musiqimizi öyrətmək elə də asan deyil, bu iş çox vaxt aparır: “Çünki onların musiqisi ilə bizimki arasında hər baxımdan fərq var. İlk növbədə bizim musiqidəki melizmlər onlara yaddır, incəlikləri aşılamaq bəzən çətin olur. Amma mahnılarımızı böyük həvəslə ifa edirlər. Azərbaycanı bircə dəfə də görməyən, bu ölkə haqqında demək olar ki, heç bir məlumatı olmayan bir danimarkalının ifasında “Qubanın ağ alması”, “Aman ovçu”, “Laçın”, “Güləbatın”, “Qaragöz”, “Əsmərim” və s. kimi mahnıları eşitmək doğrusu, insanı fərəhləndirir. Qeyd edim ki, bu əsərlər repertuarımızda xüsusi yer tutur. Hər bir musiqi məktəbində olduğu kimi, Danimarka məktəblərinin proqramları da klassik musiqidən ibarətdir və təbii ki, əsas yeri Avropa klassik musiqisi tutur. Lakin mən öz tələbələrimə Azərbaycan klassik musiqisinin nümayəndələrindən olan Qara Qarayev, Fikrət Əmirov, Arif Məlikovun əsərlərini bu ilki proqrama daxil etməyi planlaşdırmışam. Bu barədə hətta rəhbərliklə də məsləhətləşdim və onlar bu təklifi müsbət qarşıldılar. Arzum danimarkalı tələbələrin Azərbaycan klassik əsərlərindən ibarət konsertini təşkil etməkdir. Məhz bu layihəm həyata keçərsə, Vətənimi tanıtmaq naminə müəyyən bir addım atdığımı deyə bilərəm.

Qeyd edim ki, türk məktəbində işlədiyim üçün türkiyəli tələbələrimin də musiqi həyatında yaxından iştirak edirəm. “Səkkizinci Uluslararası Türkçe Olimpiyat”ının Şimali Avropa finalının Kopenhagendə keçirilməsi zamanı mən də münsiflər heyətinin tərkibinə daxil idim. Fəxr edirəm ki, Danimarkada Azərbaycan adından ilk dəfə mən seçilmişəm. Türkiyəli tələbələrimə olimpiadada ifa etmələri üçün “Sarı gəlin”, “Sən gəlməz oldun”, “Daşlı qala” kimi Azərbaycan mahnıları da seçmişdim. Qeyd edim ki, “Yeddinci Uluslararası Türkçe Olimpiyat2da Şimali Avropa finalının xüsusi diplomu və hədiyyəsinə layiq görülmüşəm. Tələbələrim qalib gəldiyi üçün məni musiqi redaktoru və tərtibatçısı təyin etdilər”. Kəmalə Hüseynova Danimarkada Azərbaycan musiqisinə olan maraqdan da söhbət açıb.Bildirib ki, bir çox avropalılar kimi, danimarkalılar da əsasən müasir estrada, yaşlı nəsil isə dini musiqiyə üstünlük verir: “Danimarkalılar təvazökar, işgüzar və xoşməramlı xalqdır. Hər yeniliyə böyük maraq göstərir. Azərbaycan musiqisinə maraqları gündən-günə artır. Çıxışlar və konsertlərdən sonra mənə tez-tez yaxınlaşıb ifa etdiyim musiqi və mahnıların qaynaqlarını soruşurlar. Azərbaycan bəstəkarlarının CD satışı və ya İnternet ünvanını istəyirlər. Hesab edirəm ki, Azərbaycanımızı geniş tanıtmaq üçün musiqimizin və, ümumiyyətlə, zəngin mədəniyyətimizin təbliği birinci yerdə olmalıdır. Çünki bu protokol tədbirlərdən daha effektivdir”.

Soydaşımız bildirib ki, Danimarka kiçik ölkə olduğu üçün Almaniya, İsveçlə müqayisədə orada yaşayan azərbaycanlıların sayı nisbətən azdır: “Danimarkada yaşayan soydaşlarımız təhsil alır, çalışır və işlərində nailiyyətlər əldə edirlər. Məsafə və insanların məşğul olması hamının bir yerə yığışmsına hər zaman imkan vermir. Buna baxmayaraq, bizim ətrafda yaşayanlar və qonşu şəhərdəki azərbaycanlılar Mədəniyyət Mərkəzin tədbirlərində fəal iştirak edirlər. Xanımlarımız mətbəximizin ən gözəl nümunələrini hazırlayır, əl işlərini nümayiş etdirir, uşaqlar rəsm əsərlərindən ibarət sərgi təşkil edir, mən də öz tərəfimdən mədəni tədbirləri idarə edirəm. Misal üçün deyə bilərəm ki, Fredensborq bələdiyyəsi ilə birgə keçirdiyimiz “Fərqli və Birlikdə2 adlı tədbirə gün ərzində yüzlərlə insan gəlmişdir. Konsert proqramı ilə yanaşı danimarkalılara Azərbaycan milli mətbəxinin nümunələri də təqdim edildi. Azərbaycanlı rəfiqələrimin “Aman ovçu” xalq mahnısını ifa etdiyim zaman yerlərində dura bilməyib rəqs etmələri bütün tədbir iştirakçıları tərəfindən rəğbətlə qarşılandı”. Kəmalə Hüseynova danimarkalıların Azərbayana olan marağı, ölkəmiz barədə fikirlərinə də toxunub: “Danimarkaya yeni gələndə çox insanlar Azərbaycanın harada yerləşdiyini belə bilmirdilər. Hətta bu mənim xətrimə dəyirdi. Artıq bu gün biz Azərbaycanı geniş Danimarka kütləsinə tanıtmaq istiqamətində müəyyən nəticələrə nail olmuşuq. Onlara Azərbaycanın müstəqil, inkişaf etmiş ölkə olduğunu artıq isbat etmişik. Musiqi və yeməklərimiz onlarda maraq oyadır və ən çox da Azərbaycanın təbiətini sevirlər. Bu gün demək olar ki, Hillerod və Fredensborq şəhər bələdiyyələrinin əsas dövlət və mədəniyyət tədbirlərində hər zaman Azərbaycan musiqisi və mahnıları səslənir və hər dəfə alqışlarla qarşılanır”. Kəmalə Hüseynovanın sözlərinə görə, Danimarka hökuməti Danimarka-Azərbaycan Dostluq Cəmiyyətinin fəaliyyətindən razıdır və bir sıra tədbirlərdə yaxından iştirak edir: “ 3 F Həmkarlar İttifaqının sədri, deputat Tyu Torsen bizim bütün fəaliyyətimizi ürəkdən dəstəkləyir. Tədbirlərimizi keçirmək üçün deməkm olar ki, əlindən gəldiyi qədər şərait yaradır. Qeyd etdiyim kimi Fredensborq şəhər bələdiyyəsinin mədəniyyət işləri üzrə rəhbərindən dəfələrlə dəvət almışıq. Danimarkanın müxtəlif şəhərlərində hər ay mədəniyyət günləri keçirilir və biz azərbaycanlılar onların daimi iştirakçısıyıq. Məhz bizim proqramlar xüsusi rəngarəngliyi ilə seçilir. Hər dəfə milli libaslar, yeməklər, əl işləri və rəsm əsərləri ilə bərabər, milli musiqimizdən, xalq mahnılarımızdan ibarət maraqlı bir konsert proqramı da hazırlayırıq. Son zamanlar müşahidə etmişik ki, Azərbaycanı tanıdan proqram yerli əhali arasında xüsusi maraq oyadır. Bu, çox sevindirici haldır”. Danimarkada fəaliyyət göstərən digər diaspor təşkilatları ilə əməkdaşlıq məsələsinə gəlincə soydaşımız deyib ki, təkcə Danimarkada deyil, eləcə də digər dövlətlərdə fəaliyyət göstərən diaspor təşkilatları ilə əlaqələr yaradılır.: “Məsələn, İsveçin Malmo şəhərində yaşayan həmyerlimiz “Xəzər” Azərbaycan-İsveç Dostluq Cəmiyyətinin sədri Leyla Kiani ilə yaxından əməkdaşlıq edirik və həmin ölkədə keçirilən tədbirlərdə biz də fəal olmağa çalışırıq. Əlbəttə ki, Diasporla İş üzrə Dövlət Komitəsi ilə də sıx əlaqələrimiz var. Komitənin əməkdaşları ilə Dağlıq Qarabağ münaqişəsinin, habelə mədəniyyət və incəsənətimizin təbliğatı ilə bağlı bir neçə layihəni birgə həyata keçirmişik.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 17 sentyabr.- S.15.