“Bizim xeyrimizə lobbiçilik fəaliyyəti

göstərmək istəyən insanlar var”

Qafar Əliyev: “Diaspora və lobbiçilik sahəsində dövlət səviyyəsində aparılan mühüm işlərin başlıca istiqamətlərindən biri də ölkəmizdə bu kimi tədbirlərin təşkil olunmasıdır”

Bu günlərdə Bakıda Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzi, Madrid Klubunun təşkilatçılığı, Dünya Elmlər və Mədəniyyət Akademiyası, BMT, İsgəndəriyyə Kitabxanası və digər təşkilatların birgə əməkdaşlığı çərçivəsində II Qlobal Açıq Cəmiyyətlər Forumu keçirilir. Azərbaycan Respublikasının Prezidenti İlham Əliyevin də iştirak etdiyi foruma Misirin İsgəndəriyyə Kitabxanasının direktoru, Nizami Gəncəvi Beynəlxalq Mərkəzinin həmsədri İsmail Serageldin, Finlandiya Respublikasının keçmiş Prezidenti, Nizami Gəncəvi Beynəlxalq Mərkəzinin idarə heyətinin və Madrid Klubunun üzvü xanım Tarya Halonen, Latviya Respublikasının sabiq Prezidenti, Nizami Gəncəvi Beynəlxalq Mərkəzinin həmsədri və Madrid Klubunun prezidenti xanım Vayra Vike-Freyberqa, Ukrayna və Gürcüstanın sabiq prezidentləri qatılıb.

Ümumilikdə tədbirdə 57 ölkədən 200-dək nüfuzlu ictimai-siyasi xadim, rəsmi şəxs, ekspert və elm adamı iştirak edib. Forumun gündəliyinə açıq cəmiyyətlərin əhatə dairəsi və əsasları, iqtisadi dayaqlar, mürəkkəb vəziyyətlərdə münaqişələrin həlli üsulu, davamlı inkişaf prosesinin təmin edilməsi üçün multi idarəetmə və institusional çərçivəyə olan ehtiyac və digər mühüm məsələlərin müzakirəsi daxil edilib. Forum ikinci günü işini sessiyalarla davam etdirib. 2015-ci il və ondan sonrakı mərhələdə dünyanın davamlı inkişafı proqramına həsr olunan beynəlxalq forumda dünyanın müxtəlif ölkələrindən tanınmış ictimai və siyasi xadimlər iştirak edir. İştirakçıların əksəriyyətinin müxtəlif ölkələrin sabiq dövlət və hökumət başçıları, cəmiyyətdə tanınan simaların olması Azərbaycan lobbisinin formalaşdırılması prosesinə də öz müsbət təsirini göstərir. Elə Prezident Administrasiyasının ictimai-siyasi məsələlər şöbəsinin xaricdə yaşayan azərbaycanlılarla iş bölməsinin müdiri Qafar Əliyev də bu qənaətdədir. “OLAYLAR”-a verdiyi müsahibədə Qafar Əliyev Azərbaycan diasporunun hazırkı vəziyyəti, qarşıda duran mühüm vəzifələr barədə də danışıb.

-Qafar müəllim, bu günlərdə Bakıda II Qlobal Açıq Cəmiyyətlər Forumu keçirilir. Forumun Azərbaycanın dünyada daha yaxından tanıdılması baxımından əhəmiyyətini necə qiymətləndirərdiniz?

-Məlum olduğu kimi bu günlərdə Bakıda Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzi, Madrid Klubunun təşkilatçılığı, Dünya Elmlər və Mədəniyyət Akademiyası, BMT, İsgəndəriyyə Kitabxanası və digər təşkilatların birgə əməkdaşlığı çərçivəsində II Qlobal Açıq Cəmiyyətlər Forumu keçirilir. Hesab edirəm ki, Azərbaycanın beynəlxalq miqyasda tanıdılması, diaspora və lobbiçilik sahəsində dövlət səviyyəsində aparılan mühüm işlərin başlıca istiqamətlərindən biri də ölkəmizdə bu kimi tədbirlərin təşkil olunmasıdır. Mən buna Azərbaycanın Dostları Klubu deyərdim. Azərbaycana gələn bu insanların hamısı keçmişdə öz ölkələrində prezident, baş nazir, eləcə də digər mühüm strukturlara rəhbərlik etmiş insanlardır. Onlardan bir neçəsinin adını xüsusi qeyd etmək olar ki, həmin şəxslərin fəaliyyətində hər zaman Azərbaycana xoş bir münaibət özünü göstərib. Onlar müntəzəm olaraq daxili və xarici siyasətimiz, xalqımızın yaxın keçmişdə başına gətirilən müsibətlər, Dağlıq Qarabağ problemi, ərazi bütövlüyü ilə bağlı Azərbaycan dövləti və xalqının xeyrinə olan fikirlər söyləyiblər. Məsələn, Moldova Respublikasının Ombudsmanı Aureliya Qriqoriu. Moldovalı ombudsmanın Ermənistan parlamentində etdiyi məlum çıxış Azərbaycan xalqının haqq səsinin işğalçı ölkənin tribunasından dünya dövlətləri, beynəlxalq təşkilatların rəhbərlərinə çatdırılması idi. Azərbaycanın dostları olan bu kimi insanların ildə bir dəfə Azərbaycana dəvət edilməsi, xalqımızın adət-ənənələri, tarixi, mədəniyyəti, ədəbiyyatının, ölkəmizdə əldə edilən nailiyyətlər, inkişafın onlara çatdırılması, öz gözləri ilə görmələri mühümdür. Həmin insanların öz ölkələrində təsiretmə mexanizmlərinin olduğunu nəzərə alsaq deyə bilərik ki, onların yaşadıqları ölkədə Azərbaycan haqqında müsbət imicin formalaşmasında böyük rolu ola bilər. Bu mənada keçirilən tədbirin əhəmiyyətini çox yüksək qiymətləndirirəm. Bundan başqa Azərbaycan bir qədər masştabı böyük olan Beynəlxalq Humanitar Foruma da evsahiblik edir. Həmin foruma əsasən Rusiya, MDB ölkələri, Türkiyə və digər ölkələrdən nümayəndələr dəvət olunursa, ancaq II Qlobal Açıq Cəmiyyətlər Forumunda Azərbaycanı sevən, onun həqiqətən dostu olan bütün dünya dövlətlərindən olan tanınmış ictimai-siyasi xadimlər iştirak edir. Bir daha qeyd edirəm ki, Azərbaycanda belə bir tədbirin keçirilməsi həddən artıq mühüm əhəmiyyət kəsb edir və Azərbaycan Respublikasının daxili və xarici siyasətinin təbliği, onun haqq səsinin dünyada eşidilməsində müstəsna rol oynayır.

-Bu cür tədbirlərdə müxtəlif ölkələrin tanınmış ictimai-siyasi xadimlərinin iştirak etməsi Azərbaycan lobbisinin formalaşmasına nə dərəcədə təsir göstərir?

-Diaspora işi dünya dövlətlərində yaşayan azərbaycanlıların təşkilatlanmasıdırsa, lobbi işi dünyanın müxtəlif ölkələrində Azərbaycanın haqq səsini deyən insanlardan ibarət qrupların formalaşmasıdır. Bu mənada Azərbaycana gələn insanlar dolayısıyla dövlətimizin xeyrinə öz ölkələrində lobbiçilik fəaliyyəti göstərə biləcək insanlardır. Bu həqiqətən belədir. Biz qətiyyətlə deyə bilərik ki, Azərbaycanın haqq səsini dünyada müdafiə edən, Azərbaycan üçün mübarizə aparmağa, açıq-aşkar fəaliyyət göstərməyə hazır olan, bizim xeyrimizə lobbiçilik fəaliyyəti göstərmək istəyən insanlar var.

-Bu günlərdə keçirilən Praqa sammitində Azərbaycan Respublikasının prezidenti İlham Əliyevin Türkiyə Cümhuriyyətini müdafiə edən çıxışı iki ölkənin diaspor təşkilatları arasında əməkdaşlığın daha da genişləndirilməsinə necə təsir göstərəcək?

-Birmənalı şəkildə qeyd etmək lazımdır ki, Türkiyə Cümhutiyyəti və Azərbaycan Respublikasının rəhbərləri bu və ya digər beynəlxalq forumlarda açıq şəkildə hər iki ölkənin mənafelərini müdafiə edən çıxışlar edirlər. Praqa sammitində Azərbaycan Respublikasının prezidenti cənab İlham Əliyevin açıq şəkildə Türkiyə Cümhuriyyətinin mənafeyini müdafiə etməsi, qoruması həqiqətən də dövlətlərimiz arasında dostluq və qardaşlıq münasibətlərinin daha da güclənməsi, hər iki ölkənin strateji hədəflərinin, məqsədlərinin həyata keçirilməsində onların birgə fəaliyyət göstərməsinə stimul verəcək. Bu həm də Azərbaycan və Türkiyənin diaspor təşkilatlarının daha da birgə fəaliyyət göstərməsi, eyni zamanda Türkdilli Xalqların Əməkdaşlıq Şurasının fəaliyyətinin canlanmasına müsbət təsir göstərən amillərdən biridir. Bütün bunlarla yanaşı qeyd etdiyim amil türkdilli respubliklarının hamısının diaspor təşkilatlarının birgə fəaliyyətinə müsbət təsir edəcək. Çünki artıq beynəlxalq aləmdə Azərbaycan, Türkiyə və digər türkdilli respublikaların başçıları xarici və daxili siyasət məsələlərində bir-birinin mənafeyini açıq şəkildə müdafiə etməyə başlayıblar. Hesab edirəm ki, olduqca gərgin, ziddiyətli, mürəkkəb dünyamız üçün belə bir siyasətin həyata keçirilməsi bizim üçün həddən artıq əhəmiyyətlidir.

-Azərbaycan diasporunun ölkəmizin həqiqətləri, Dağlıq Qarabağ problemi, eləcə də zaman-zaman başımıza gətirilən deportasiya və soyqırımların dünyaya çatdırlmasında istiqamətindəki fəaliyyətini necə qiymətləndirirsiniz?

-Ölkəmizin həqiqətləri, Dağlıq Qarabağ probleminin dünya ictimaiyyətinə çatdırılması məsələsi Azərbaycan diaspor təşkilatlarının başlıca vəzifəsidir. Dağlıq Qarabağ probleminin həlli və bu problem ətrafında dünyada gedən mübarizədə Azərbaycan dövlətinin mövqeyini dünya dövlətləri, dünyanın beynəlxalq təşkilatları və ictimaiyyətinə daha aktiv formada çatdırmaq, danışıqlar prosesində Azərbaycanın haqlı olduğunu təbliğ etmək bu vəzifələr sırasındadır. Hesab edirəm ki, diaspor təşkilalarımız gecə-gündüz bu istiqamətdə iş aparmalı, Azərbaycanın təbliği ilə məşğul olmalıdırlar. Onlar fəaliyyət göstərdikləri ölkələrin kütləvi informasiya vasitələrində Azərbaycanla bağlı məlumatlar yerləşdirməli, danışıqlar prosesinin gedişi, Azərbaycan dövlətinin bu istiqamətdə apardığı siyasətin mahiyyəti ilə bağlı açıqlamalar verməlidirlər. Həmçinin internet saytları, mətbuat səhifələrində yazılarla çıxış etməlidirlər. Bununla diasporamız Dağlıq Qarabağ problemi, Azərbaycanın haqlı mövqeyi barədə dünyanı geniş və ətraflı məlumatlandırmalıdır. Diaspora sahəsində əsas prioritet məsələlər həmişə olduğu kimi yenə də Dağlıq Qarabağ probleminin mahiyyətini dünya ictimaiyyətinə çatdırmaq, həmçinin bu məsələ ətrafında informasiya, təbliğat işini genişləndirməkdir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 30 aprel.-S.15.