“Diaspora prosesi hər

zaman hərəkətdədir”

Bu günlərdə Alman-Azərbaycan Forumunun nümayəndə heyəti Azərbaycanda səfərdə olub. Səfər çərçivəsində Diasporla İş üzrə Dövlət Komitəsində görüş keçirən nümayəndə heyəti görüşdə iki ölkə arasında münasibətlərin perspektivləri, Almaniyada Azərbaycan həqiqətlərinin yayılması, Almaniyadakı Azərbaycan diasporunun fəaliyyətinin inkişaf etdirilməsi və digər məsələləri müzakirə edib. Bəs görəsən bu kimi səfərlər istər Azərbaycan həqiqətlərinin Almaniyada yayılması, istərsə də diasporumuzun bu ölkədəki fəaliyyətinin daha da gücləndirilməsi üçün nə dərəcədə əhəmiyyətlidir. Bu və ya digər məsələlərlə bağlı Avropa Azərbaycanlıları Konqresinin prezidenti, Almaniyadakı Azərbaycanlıların Koordinasiya Mərkəzinin rəhbəri Samira Patzer-İsmailova ilə söhbətləşdik

-Samira xanım, bu günlərdə Almaniya-Azərbaycan Forumunun nümayəndə heyəti Azərbaycanda səfərdə olaraq bir sıra görüşlər keçirdi. Almaniyada fəaliyyət göstərən diaspor təşkilatının rəhbəri olaraq bu səfəri necə qiymətləndirirsiniz? Sözügedən səfər Almaniyada fəaliyyət göstərən Azərbaycan diaspor təşkilatları üçün hansı yeni imkanlar açır?

-Bu günlərdə Alman-Azərbaycan Forumunun nümayəndə heyəti Azərbaycanda səfərdə oldu. Məlumat üçün deyim ki, həmin nümayəndə heyətinə tərkibinə Alman ictimaiyyətinin həm siyasi, həm də iqtisadi qurumlarının elitar üzvləri daxil idi. Heç şübhəsiz ki, keçirilən bu cür ikitərəfli görüşlər Almaniyada fəaliyyət göstərən Azərbaycan diasporu üçün çox böyük əhəmiyyətə malikdir. Yəni, almanlar Azərbaycanı nə qədər yaxından və nə qədər obyektiv tanısalar Azərbaycan diasporunun Almaniyada ölkəmizin həqiqətlərini daha çox yayılmasına bir o qədər xeyirli olar. Eyni zamanda bu istiqamətdə effektli nəticələr əldə edilə bilər. Bu nöqteyi nəzərdən bizim də diaspor təşkilatları olaraq Almaniyada göstərdiyimiz fəaliyyət ona hesablanıb ki, alman ictimaiyyəti, siyasi dairələrinə Azərbaycan haqqında məlumat verək. Eyni zamanda ölkəmizin müasir dövrdəki inkişafı, əldə etdiyi nailiyyətlər, Dağlıq Qarabağ problemi, Ermənistanın təcavüzkar siyasəti, Xocalı soyqırımı kimi hadisələr barədə almanları geniş şəkildə məlumatlandıraq. Bütün bunlarla yanaşı Azərbaycan mədəniyyətini Almaniyada tanıtmaqla zəngin tarixi-mədəni irsimizi təbliğ edək.

-Yaxın vaxtlarda qht-lər, KİV-lər və diaspor nümayəndələrinin Almaniyaya oxşar səfəri baş tuta bilərmi? Ümumiyyətlə, təşkilat olaraq belə bir təşəbbüslə çıxış etməyi düşünürsünüzmü?

-Əlbəttə ki, belə səfərlər təşkil etmək olar. Məlumat üçün deyim ki, Almaniyaya səfər etmiş bir neçə qeyri-hökumət təşkilatını qəbul etmişik. Xüsusilə, Xocalı soyqırımının tanıdılması istiqamətində çalışan qeyri-hökumət təşkilatlarının Almaniyada silsilə tədbirləri keçirilib. Həmin tədbirlərdə təşkilat olaraq biz də iştirak etmişik və onlara z dəstəyimizi nümayiş etdirmişik. Bundan başqa Dağlıq Qarabağın Azərbaycan İcması İctimai Birliyinin nümayəndələri tez-tez Almaniyada keçirilən tədbirlərə təşrif buyururlar. Təbii ki, bu kimi görüşlər və səfərləri gələcəkdə də davam etdirmək olar.

-Hazırda Almaniyada Azərbaycan diasporunun vəziyyətini necə dəyərləndirirsiniz?

-Diaspor fəaliyyəti heç vaxt bitib tükənməyən, uzun sürən bir prosesdir. Ona görə də bu sahənin yalnız hansısa mərhələlərini dəyərləndirmək olar. Ümumiyyətlə, diaspora prosesi hər zaman hərəkətdədir. Azərbaycan diasporu çox gəncdir. Ancaq onu da qeyd etmək lazımdır ki, gənc olmasına baxmayaraq diasporumuz son 10-12 ildə özünü böyük işlər görməklə təqdim edə bilib. Təkcə Almaniyanın özündə 50-yə qədər diaspor təşkilatı, müxtəlif cəmiyyət və birliklər fəaliyyət göstərir. Müsbət hal ondan ibarətdir ki, həmin təşkilatlar yalnız paytaxt Berlin və ona yaxın digər iri şəhərləri əhatə etmir. Eyni zamanda Almaniyanın müxtəlif əyalətlərində də Azərbaycan cəmiyyət və təşkilatları fəaliyyət göstərir. Sevindirici haldır ki, bu kimi cəmiyyət və təşkilatların yaranması halı getdikcə artır. Artıq Almaniyada təhsil alan və yaşayan gənclərimiz də xeyli fəallaşıb. Onu da qeyd edim ki, soydaşlarımız fərdi şəkildə də Azərbaycanla bağlı tədbirlər keçirirlər. Yaxud Azərbaycanla bağlı bu və ya digər məsələdə fəallıq göstərirlər. Bütün bunları nəzərə alaraq deyə bilərəm ki, diasporumuzun inkişafı çox müsbət və yüksələn templə davam edir. Heç şübhəsiz ki, diasporumuzun belə bir inkişafa nail olması da Azərbaycan dövləti və onun prezidenti cənab İlham Əliyevin bu sahəyə göstərdiyi diqqət və qayğı ilə əlaqədardır.

-Bəs Almaniyada fəaliyyət göstərən diaspor təşkilatlarımız vahid mövqedən çıxış edib, birlik və həmrəylik nümayiş etdirə bilirlərmi?

-Mən deyərdim ki, bu proses də özünü ildən ilə daha mütəşəkkil surətdə büruzə verir. Elə Almaniyadakı Azərbaycanlıların Koordinasiya Mərkəzinin 6 il bundan əvvəl yaradılmasının da başlıca məqsədi bu idi. Məhz bizim Koordinasiya Mərkəzi vasitəsilə Almaniyadakı Azərbaycan təşkilat və cəmiyyətləri bir-birini yaxından tanıyır, qarşılıqlı əlaqlər yaradırlar. Eyni zamanda onlar nəzərdə tutduqları tədbirləri birgə koordinasiya etməyə nail olurlar. Xüsusilə, Xocalı soyqırımının ildönümünə həsr olunmuş tədbirlər, eləcə də digər ağrılı problemlərimizin ildönümündə hamımız birlikdə, əlaqələndirilmiş surətdə tədbirlər keçiririk. Təkcə bu il Almaniyanın 10-dan artıq vilayət və şəhərində Azərbaycan təşkilat və cəmiyyətlərinin 30-a yaxın birgə tədbiri keçirilib. Türkiyə-Azərbaycan Birliyi, Atatürk Düşüncə Mərkəzi və Almaniyadakı Azərbaycanlıların Koordinasiya Mərkəzi hər il Almaniyada Xocalı soyqırımına həsr olunmuş konfranslar təşkil edir. Həmin konfranslar Almaniyanın müxtəlif vilayət və şəhərlərində keçirilir. Bununla qeyd etmək istəyirəm ki, biz yalnız Azərbaycan diaspor təşkilatları ilə deyil, eyni zamanda Türk diasporu ilə əlaqələndirmə işini apararaq çoxsaylı tədbirlər həyata keçiririk. Bu da heç şübhəsiz ki, öz-özlüyündə yaxşı bir formada təşkilatlanmanın göstəricisidir.

-Yaxın vaxtlarda istər Almaniyadakı Azərbaycanlıların Koordinasiya Mərkəzi, istərsə də Avropa Azərbaycanlıları Konqresi Almaniyada Azərbaycanla bağlı hansı tədbirlər keçirməyi nəzərdə tutub?

-Əlbəttə ki, Almaniyada Azərbaycanla əlaqədar müxtəlif tədbirlərin keçirilməsi nəzərdə tutulub. Ümumiyyətlə, biz təşkilat olaraq Azərbaycanın təqvimində yer alan bütün əlamətdar hadisələr, eləcə də hüznlü günlərimizi qeyd edirik. Azərbaycanda qeyd olunan bayramlar və matəm günləri də bizim üçün dəyərlidir və həmin tarixlərdə baş verənləri Avropa ictimaiyyətinə təqdim edirik. Avropa Azərbaycanlıları Konqresi də ona rəhbərlik etdiyim son iki il ərzində hər zaman təqvim üzrə bayram günləri və acı tarixləri qeyd edib. Avropa Azərbaycanlıları Konqresi əsasən də akademik istiqamətdə işləyib. Bir qədər də dəqiqləşdirsək, çoxlu sayda bəyanatlar, etiraz məktubları, qətnamələr və müraciətləri Almaniya Bundestaqı, ictimai-siyasi təşkilatlar, insane hüquqları ilə məşğul olan qurumlara göndərib. O ki, qaldı yaxın vaxtlarda keçirilən və ya nəzərdə tutulan tədbirlərə, 31 mart-Azərbaycanlıların Soyqırım Günü bir sıra ölkələrdə olduğu kimi Almaniyada da qeyd edilib. Həmin tədbir zamanı iştirakçılar soyqırım haqqında məlumatlandırılıb, Avropa Parlamentinə soyqırım barədə bəyanat ünvanlanıb. Həmin bəyanatda bir növ Xocalıda ermənilərin törətdiyi vəhşiliklərə də işarə edilib. Qeyd olunub ki, yaxın tariximizdə də soyqırım siyasəti erməni millətçiləri tərəfindən davam etdirilib və 1992-ci ilin fevral ayının 26-da ermənilər Xocalıda azərbaycanlılara qarşı insanlığa zidd olan əməllərdən istifadə ediblər. Onu da qeyd edim ki, 31 mart-Azərbaycanlıların Soyqırım Günü ilə bağlı Almaniyanın paytaxtı Berlindəki Brandenburq qapıları qarşısında etiraz aksiyası da keçirilib. May ayında isə əvvəlki illərdə olduğu kimi Şuşa şəhərinin ermənilər tərəfindən işğal edilməsinin ildönümü qeyd olunacaq və bununla bağlı anım mərasimi keçiriləcək. Eyni zamanda ümummilli lider Heydər Əliyevin anadan olmasının ildönümü qeyd olunacaq. Məlumat üçün qeyd edim ki, həm Avropa Azərbaycanlıları Konqresi, həm də Almaniyadakı Azərbaycanlıların Koordinasiysa Mərkəzi hər il ümummilli liderin ad gününü Almaniyada geniş şəkildə qeyd edir. 28 may-Respublika Gününə həsr olunmuş tədbirlərimiz də nəzərdə tutulur. Ümumiyyətlə, istər Almaniyadakı Azərbaycanlıların Koordinasiya Mərkəzi, istərsə də AAK hər ay demək olar ki, bir tədbir keçirir. Bir məqama da diqqət yetirmək istərdim. Həm Avropa Azərbaycanlıları Konqresi, həm də Almaniyadakı Azərbaycanlıların Koordinasiya Mərkəzi olaraq təşkil etdiyimiz bütün tədbirlərə dəstək alırıq. Həm Diasporla İş üzrə Dövlət Komitəsi, həm də Azərbaycanın Almaniyadakı fövqəladə və səfirliyi hər zaman bizə diqqət və qayğı ilə yanaşıb, öz dəstəklərini veriblər. Göstərdikləri dəstəyə görə Diasporla İş üzrə Dövlət Komitəsi və Almaniyadakı səfirliyimizə təşəkkür edirəm.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 3 aprel.- S.15.