“Pis əsər ruhu incidir”

Vüqar Əhməd: “Mövzu yeniliyim, orijinallığım özü elə modernizmdir”

Müsabimiz tanınmış şair, nasir, filologiya elmləri doktoru, prof. Vüqar Əhməddir.

Çağdaş ədəbiyyatımızın tanınmış simalarından olan Vüqar Əhməd özünün dəyərli ədəbi nümunləri ilə ədəbiyyat xəzinəmizi zənginləşdirmişdir. Yazdığı şeirlərə xeyli sayda mahnılar bəstələnmişdir. Vüqar Əhməd az-az şairlərdəndir ki, xalqın sevgisini, məhəbbətini qazanmağı bacarıb. Hər bir şairin, yazarın əsas uğuru, qazancı elə onun xalq məhəbbətini qazanmasıdır.

Dəyərli şairimizlə görüşüb, onun yaradıclığı, müasir ədəbi prosesləri və çağdaş Azərbaycan ədəbiyyatında cərəyanlaşma barəsində fikirlərini öyrəndik.

-Çağdaş Azərbaycan ədəbiyyatında müasir cərəyanlaşma prosesi sizi qane edirmi?

-Yox!

-Bütövlükdə vaxt ayırıb ədəbi prosesi yaxından izləmək imkanınız olurmu?

-İzləyirəm ədəbi prosesi, amma tam halda yox.

-Bir müddət bundan öncə sizin haqqınızda “Mayası poeziyadan yoğrulan nəğməkar şair” adlı məqalə qələmə almışdım. Həmin məqalədə sizin şeir yaradıcılığınızı nəsr yaradıcılığınızdan daha sanballı olduğunu vurğulamışdım. Yazdığım fikirlərlə razılaşdınızmı?

-Onu mən deyə bilmərəm,oxucular və tənqidçilər hökm verər, fkir bildirə bilər. Bəziləri nəsrimi üstün sayır, bəziləri hər iki janrı bərabər qiymətləndirir.

-Yazdığınız şeirlərə çoxlu sayda mahnılar bəstələnib. “Anam mənim” adlı şeiriniz dillər əzbəridir. Bu qədər sevilmənizin səbəbi nədədir?

-Hər bir insan üçün anadan əziz, doğma varlıq yoxdur. Qeyri-təvazökarlıq olsa da yəqin şeir də qüvvətli alınıb. Orijinal deyimlər var nəğmədə. Rauf Məmmədov da gözəl, milli musiqi bəstələyib, şübhəsiz Baloğlan da gözəl oxuyub. Mahnıya şöhrət gətirən müğənnidir.

-Bir çox yazarlar kimi posmodernizmə müraciət etmirsiniz. Səbəbini bilmək maraqlı olardı.

-Posmodernizm mənlik deyil, mən klassik üsluba üstünlük verirəm. Fəqət mövzu yeniliyim və üslub orijinallağım özü elə modernizmdir.

-Son vaxtlar ədəbiyyatımızda posmodernizm adı altında heç bir mənası olmayan, qalaq-qalaq əsərlər qələmə alınır. Düşünürəm ki bu cür əsərlər qələmə alan “yazarlar” ya posmodernizmi başa düşmürlər, ya da düşmək istəmirlər. Buna münasibətiniz necədir?

-Mən artıq öncəki sualda buna cavab verdim. Modernizm ruhuna daha yaxın olduğum üçün elə bu janrı – modernizmi öz yaradıcılığıma tətbiq edirəm.

-Bir müddət bundan öncə Azərbaycan Yazıçılar Birliyinin Natəvan klubunda AXC-nin qurucusu Məmməd Əmin Rəsulzadə haqqında yazdığınız kitabın təqdimatı olmuşdu. Aldığım bilgilərə görə bir neçə yazar bu tədbiri boykot etmişdi, gəlməkdən imtina etmişdi. Bu barədə mümkünsə bir neçə kəlmə deyərdiniz.

-"Natəvan" klubunda Rəsulzadəyə həsr etdiyim romanın təqdimatı yüksək səviyyədə keçdi, həmin gün Bakıya bərk qar yağdı, yollar bağlıydı. Görkəmli alimlərimiz əsər haqqında yüksək fikir söylədilər. "ATV" və "İTV" kanalı tədbir haqqında süjet verdilər. Boykot deyəndə Rəsulzadəni sevməyənlər, kommunist ruhlu yazalar idi onlar.

-Gənc yazarlardan hansı(lar)nın gələcəkləri haqqında daha ümidlisiniz?

-Dilqəm Əhməd, Əsəd Qaraqaplan, Ayxan Ayvaz, Mövlud Mövlud, Kəramət Böyükçöl, Şəhriyar del Gerani, Şamil Sadiq, Qafar Şövqi, Çingiz Babaoğlu, Rüfət Əhmədzadə, Kənan Hacı, Oqtay Hacımusalı və.b.

-İstedadlı şair olmaq üçün nə etmək lazımdır?

-Allahın işlərinə qarışa bilmərəm.

-Sizcə müasir cərəyanlardan hansı çağdaş Azərbaycan ədəbiyyatının ruhuna daha yaxındır?

Yaxşı əsər var, pis əsər var. Pis əsər ruhu incidir. Yazar əsər yazanda qarşısına məqsəd qoyursa mən bunu filan cərəyanda yazıram, onda heç nə.

-Tanınmış şair, nasir, alim kimi ədəbiyyata, bütövlükdə elm aləminə yenicə qədəm qoyan gənc yazarlara nəyi məsləhət görərdiniz?

Oxucu ilə səmimi olsunlar. Onda seviləcəklər. Əllaməçilk olmaz. Əvvəlki ədəbi nəsillərə hörmət etsinlər. Şöhrət dalınca qaçmasınlar, şöhrət özü onları tapacaq. Bir də unutmasınlar ki, əsas xalq məhəbbətidir. Pulla, qonaqlıqla 100-lərlə resenziya yazdırmaq olar tənqidçilərə, boş şeydir. Bir də Vətəni sevsinlər, böyük Anamız vətəndir. Vətən borclu qalmır.

Yeqzar Cəfərli

Olaylar.- 2014.- 4 aprel.- S.12.