Xaricdə yaşayan soydaşlarımızın

həmin ölkələrə inteqrasiyası sürətlənir

Bu işdə diaspor təşkilatları daha çox fəallıq nümayiş etdirir

Xarici ölkələrdə yaşayan soydaşlarımızın cəmiyyətə inteqrasiyası, hüquq və azadlıqlarının müdafiəsi işi hər zaman diqqət mərkəzində olan məsələlərdəndir və mütəmadi olaraq bu istiqamətdə silsilə tədbirlər, görüşlər keçirilir. Elə 2013-cü ildə də qeyd edilən istiqamət diaspor təşkilatları və müvafiq dövlət qurumlarının diqqətindən kənarda qalmayıb. Belə ki, il ərzində dünyanın müxtəlif ölkələrində yaşayan soydaşlarımızın hüquq və azadlıqlarının müdafiəsi, Azərbaycan xalqının milli-mənəvi dəyərlərini qorunması və inkişaf etdirilməsi, beynəlxalq aləmdə təbliği məqsədilə bir sıra tədbirlər, elmi-praktiki konfranslar keçirilib.

2013-cü il 1 yanvar tarixində Türkiyənin Kocaeli vilayətinin yerli qəzetlərindən olan Kocaeli qəzeti tərəfindən hər il ənənəvi olaraq təşkil edilən “Doruktakiler 2012”-nin bu ilki təqdimatında 12 nominasiya üzrə qalibləri müəyyən edilərək “ilin qeyri-hökumət təşkilatı” nominasiyasında Türkiyə Azərbaycan Dərnəkləri Federasiyası qalib elan edilib. Həştərxan Gənc Tamaşaçılar Teatrında isə şəhər gənclərinin iştirakı ilə Yeni il bayramı münasibətilə tədbir keçirilib.

Rusiyanın Azərbaycanlı Gənclər Təşkilatının (RAGT) Həştərxan regional bölməsi Həştərxan şəhəri və vilayətinin gənclər təşkilatlarının tədbirlərində fəal iştirak etdiyinə görə şəhər merinin və Dumasının diplomları ilə mükafatlandırılıb. Ümumrusiya Azərbaycan Konqresinin (ÜAK) mərkəzi aparatının nümayəndə heyəti Murmansk vilayətində səfərdə olub. Səfər çərçivəsində ÜAK-ın təşkilatçılığı ilə “Birinci millətlərarası Murmansk forumu” keçirilib. Forumda Rusiyada fəaliyyət göstərən Azərbaycan diasporunun gördüyü işlərdən, planlardan söhbət açılıb. Forumda vilayətdə “Millətlər evi”nin və “Dostluq xiyabanı”nın yaradılması təklifləri irəli sürülüb.

Fevral ayının 10-da Berlin İncəsənət Universitetinin professoru, həmyerlimiz Ləman Dadaşın sinfində təhsil alan tələbələrin iştirakı ilə konsert təşkil edilib. Universitetin “Yosef-Yoaxim konsert zalı”nda keçirilən “Gecənin romansları” adlı konsert proqramında müxtəlif ölkələrin bəstəkarlarının dünya musiqi xəzinəsinə daxil edilmiş əsərləri səslənib.

Kanadanın paytaxtı Ottava şəhərində fəaliyyət göstərən “Qarabağ” Azərbaycan dili məktəbinin şagirdləri parlamentdə keçirilən beynəlxalq tədbirə qatılıblar. “Qarabağ” məktəbinin təsisçilərindən biri, Azərbaycan dilini məktəbdə tədris edən Vüsalə Əhmədovadır.Qeyd edək ki, Qarabağ Azərbaycan dili məktəbi 2011-ci ilin senatyabrından fəaliyyət göstərməyə başlayıb. Məktəb Ottava şəhərində yaşayan qadınlar, Nigar Əliyeva və Vüsalə Əhmədova tərəfindən yaradılıb.

Almaniyanın Drezden şəhərində “Kültür Aktiv” təşkilatı tərəfindən keçirilən VI Transqafqaz festivalı çərçivəsində “Kişi və qadınlar arasında gender bərabərliyi” və “Sərhədsiz dünya” mövzularında iki layihə gerçəkləşib. Birinci layihədə altı həftə ərzində Gürcüstan və Ermənistan nümayəndələri ilə yanaşı, Azərbaycanı rəssam Səbinə Şıxlinskaya təmsil edib. Almaniya, Çexiya və Polşanın sərhəddində keçirilən ikinci layihədə isə Səbinə Şıxlinskaya ilə bərabər heykəltaraş Çingiz Babayev də iştirak ediblər. Zaqafqaziyadan olan qadın rəssamların triosu əl işlərini “Qadınların gözü ilə…” adı altında sərgilənib. Yekun sərgi Drezdendə Yohannştadt rayonunun mədəniyyət mərkəzində baş tutub. Mərasimə müxtəlif diasporları təmsil edən yüzdən artıq qonaq qatılıb. Onlar burada rəssamların əl işləri ilə tanış olmaq imkanı, həmçinin Zaqafqaziya mətbəxi layihəsində təqdim olunan Azərbaycan yeməklərindən dadmaq fürsəti qazanıblar. Həmvətənimiz Əlihüseyn Babayev və həyat yoldaşı Yuliana Şneyderman tərəfindən təqdim edilən Azərbaycan mətbəxi həm almanlarda, həm də digər xalqların nümayəndələrində böyük maraq doğurub. Vilnüsdə Litva Müdafiə Nazirliyinin Ağ zalında 1945-1951-ci illərdə Litva xalqının azadlığı və Dövlət müstəqilliyi uğrunda Litva “meşə qardaşları” sıralarında silahlı mübarizə aparmış azərbaycanlı partizan Şakir Sadıqova (1919-1951) Litva ordusunun könüllü qurucusu medalının təqdim olunma (ölümündən sonra) mərasimi olub. Təltifat mərasimində Cəmiyyətin sədri Mahir Həmzəyev çıxış edərək Şakir Sadıqovun mübarizə yolunun tarixi, siyasi və mənəvi əhəmiyyəti barədə danışıb, Litva dövləti və hökuməti tərəfindən həmvətənimizin döyüş fəaliyyəti yüksək qiymətləndirildiyi üçün ölkədə yaşayan azərbaycanlılar adından öz təşəkkürünü bildirib. Berlin şəhərində Almaniya Sosial-Demokrat Partiyasının təşəbbüsü ilə “Almaniya bayramı” adlı tədbir təşkil olunub. Həmin tədbirdə Almaniyada fəaliyyət göstərən Azərbaycanlı Tələbə və Elmi İşçilər Birliyi (ATEB) də Azərbaycan Respublikasının Almaniya Federativ Respublikasındakı Səfirliyinin dəstəyi ilə bu tədbirdə Vətənimizi uğurla təmsil edib. Azərbaycana həsr olunmuş stendi sadə vətəndaşlarla yanaşı, Bundestaqın deputatları və deputatlığa namizədlər də ziyarət ediblər. Bu stend Sosial-Demokrat Partiyasının müxtəlif qurumlarının da xüsusi marağına səbəb olub.

2013-cü il avqustun 21-də Azərbaycan Respublikasının Özbəkistandakı Səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzində görkəmli müğənni və bəstəkar, Xalq Artisti Müslüm Maqomayevin anadan olmasının 71-ci ildönümünə həsr olunmuş konsert proqramı təqdim edilib. Tədbir Daşkənddəki Azərbaycan diasporunun gənclər təşkilatı ilə birgə təşkil olunub. Tədbirdə çıxış edənlər Müslüm Maqomayevin dünya musiqi xəzinəsinə bəxş etdiyi töhfələrdən danışıblar. Azərbaycanlı gənclərdən ibarət “Şən və hazırcavablar klubu” üzvlərinin Müslüm Maqomayevin xatirəsinə ithaf edilmiş və çıxışları iştirakçılar tərəfindən böyük maraqla qarşılanıb. Oktyabr ayında Fransanın Oloron şəhərində keçirilən beynəlxalq foto kulinariya festivalında ilk dəfə Azərbaycan da təmsil olunub. Festivalda müxtəlif ölkələri təmsil edən fotoqraf və aşpazlardan ibarət cütlüklər birinci yer uğrunda mübarizə aparıb. Ölkəmizin yarışda təmsil olunması Parisdə fəaliyyət göstərən Azərbaycan Evinin rəhbəri Mirvari Fətəliyeva və Jalə Babayevanın təşəbbüsü ilə reallaşıb. İki gün davam edən festivalın məqsədi müxtəlif mədəniyyətlərin mübadiləsi, yerli məhsulların və istehsalçıların tanıdılması olub. Azərbaycanlı cütlüyün - Azərbaycan Fotoqraflar Birliyinin üzvü Etibar Cəfərov və Azərbaycan Milli Kulinariya Assosiasiyasının üzvü Ağa Aşurovun təqdim etdiyi “Odlar Yurdu” adlı fotoda milli mətbəximizə aid yemək və odla dalğavarı tüstü əks olunub.

Noyabr ayında Birləşmiş Ştatların Ohayo ştatının Deyton şəhərində Deyton Dövlət Məktəbləri Təhsil Şurasına üzvlüyə keçirilmiş seçkilərə Dünya Azərbaycanlılarını Əlaqələndirmə Şurasının üzvü, Amerika Azərbaycanlıları Şəbəkəsinin (USAN) icraçı direktoru Adil Bağırov öz namizədliyini irəli sürüb. 5 noyabr tarixində yekunlaşan səsvermədə Adil Bağırov və digər 3 namizəd seçkilərdə qalib gələrək növbəti 4 illiyə Təhsil Şurasına üzv seçiliblər. Bişkekdə isə qırğız yazıçısı Çingiz Aytmatovun 85 illiyi münasibətilə Türkdilli Dövlətlərin Siyasətinə Dəstək Fondunun sifarişi ilə “Çingiz Aytmatovun dünyası” adlı kitab nəşr olunub. Qırğız xalqının dahi oğlu Çingiz Aytmatova həsr olunmuş kitabın müəllifi Azərbaycan ədəbiyyatşünası, filologiya elmləri namizədi, Bakı Dövlət Universitetinin professoru Leyla Gərayzadədir. Kitabın elmi redaktoru Bakı Dövlət Universitetinin professoru Aqil Hacıyev və redaktoru isə məşhur qırğız şairi, tərcüməçi Mukan Asanalıyevdir. Azərbaycanın İtaliyadakı Səfirliyi, Milan Bələdiyyəsi, Milandakı Azərbaycan Mədəniyyət Assosiasiyası və “Dirçəliş” Gənclərin Sosial-Psixoloji Reabilitasiya Mərkəzinin birgə təşkilatçılığı ilə noyabrın 23-də Milanın “Chiesa Rossa” kitabxanasında gənc rəssamlarımızın sərgisi açılıb. Serginin keçirilməsinə, həmçinin Azərbaycanın Xarici İşlər, Mədəniyyət və Turizm nazirlikləri, “Azal-Azərbaycan” Qapalı Səhmdar Cəmiyyəti də təşkilatı dəstək verib. Milanda ilk dəfə keçirilən Azərbaycan rəssamlarının sərgisini giriş sözü ilə açan ölkəmizin İtaliyadakı səfirliyinin nümayəndəsi Zaur Fərhadov tədbir iştirakçılarına mədəniyyətimiz haqqında ətraflı məlumat verib. Dekabrın 22-də Azərbaycanın Avstriya, Slovakiya və Sloveniyadakı səfirliyi və Sloveniyanın Müdafiə Nazirliyi tərəfindən Sovet İttifaqı Qəhrəmanı Mehdi Hüseynzadənin 95 illik yubileyi keçirilib. Təntənəli mərasim çərçivəsində Sloveniya Poçtu, Rabitə və İnformasiya Texnologiyaları Nazirliyinin nəzdindəki “Azərmarka” şirkəti tərəfindən Mehdi Hüseynzadənin 95 illik yubileyinə həsr edilmiş poçt markasının, həmçinin sloven yazıçısı Peter Amalettinin M.Hüseynzadəyə həsr edilmiş “Mixaylonun qisası” adlı 2 cildli romanın rus dilinə tərcümə olunmuş variantının təqdimatı keçirilib.

Rusiya Federasiyasının paytaxtı Moskvada, eləcə də federasiyanın müxtəlif subyektlərində MDB dövlətlərindən bu ölkəyə iş dalınca gəlmiş miqrantlara qarşı həyata keçirilən tədbirlər, xüsusilə də miqrantlara qarşı göstərilən təzyiqlər Azərbaycanın diaspor təşkilatları tərəfindən etirazla qarşılanıb. Moskvada 25 yaşlı Yeqor Şerbakovun qətlində şübhəli bilinən Azərbaycan Respublikasının vətəndaşı Orxan Zeynalovla bağlı sensasiya xarakterli məlumatların yayılması nəticəsində miqrantlara qarşı yürüdülən diskriminasiya siyasətinə etiraz əlaməti olaraq Ümumrusiya Azərbaycanlıları Konqresi, Benilüks Azərbaycanlıları Konqresi və digər diaspor təşkilatları bəyanatlarla çıxış edib və adi bir məişət cinayətinin millətlərarası, hətta beynəlxalq münaqişə kimi qələmə verilməsindən ciddi narahat olduqlarını bildiriblər. mişlər. Qeyd edək ki, Ümumrusiya Azərbaycanlıları Konqresinin mərkəzi ofisində həmvətənlərimizə hüquqi kömək göstərilməsi məqsədi ilə təcrübəli hüquqşünaslardan ibarət operativ qərargah yaradılıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 10 aprel.- S.15.