Diaspor təşkilatları Ermənistanın təcavüzkar

siyasətini dünya ictimaiyyətinə çatdırır

Azərbaycan diaspor təşkilatları fəaliyyətləri dönəmində hər zaman Ermənistan-Azərbaycan, Dağlıq Qarabağ münaqişəsi haqqında dünya və Avropa ictimaiyyətinin məlumatlandırılması işinə xüsusi diqqət yetirilmişdir. Bu məqsədlə diaspor təşkilatları Avropanın müxtəlif ölkələrində erməni diasporu və lobbisinin təşkil etdiyi anti-təbliğat kampaniyalarının qarşısının alınması və ölkəmiz haqqında obyektiv ictimai rəyin formalaşdırılması üçün müxtəlif formatlı tədbirlər və layihələr həyata keçirirlər.

Belə ki, Avropa regionunda keçirilən məqsədyönlü tədbirlər, milli maraqlarımızın təmin olunması və mədəni irsimizin təbliği istiqamətində təşkil olunmuş təbliğat kampaniyaları dünya ictimaiyyətində ölkəmiz haqqında obyektiv rəyin formalaşdırılmasında mühüm rol oynayır. Ötən il Amerika ölkələrində fəaliyyət göstərən Azərbaycan diaspor təşkilatları da müntəzəm olaraq Azərbaycanla əlaqədar müxtəlif tədbirlər həyata keçiriblər. Əvvəlki illərdə olduğu kimi hesabat dövründə də Ermənistan-Azərbaycan, Dağlıq Qarabağ münaqişəsi barədə həqiqətlərin Amerika ölkələrinin ictimaiyyətinə çatdırılması məsələlərinə daha çox diqqət yetirilib. Hesabat dövründə xarici ölkələrdə fəaliyyət göstərən diaspor təşkilatları tərəfindən həyata keçirilmiş tədbirlər əvvəlki illərə nisbətən həm əhatə dairəsinə görə, həm kəmiyyət, həm də mahiyyət baxımdan əvvəlki illərlə müqayisədə daha da təkmilləşib. 2013-cü ilin fevral ayında Qaradağlı faciəsinin növbəti ildönümü ərəfəsində - Gürcüstanın paytaxtı Tbilisidə "Qaradağlı soyqırımı" kitabının təqdimatı keçirilib və "Azərbaycan Həqiqətləri" adlı video-albom nümayiş edilib.. Təqdimat mərasimində Azərbaycan-Gürcüstan Parlamentlərarası Dostluq Qrupunun rəhbəri Qənirə Paşayeva, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun İdarə Şurasının sədri Ümid Mirzəyev, Azərbaycanda Vətəndaş Cəmiyyətinin İnkişafina Yardım Assosiasiyasının karabakhİnfo.com e-jurnalının redaktoru Zaur Qəriboğlu, Gürcüstan parlamentinin deputatı Azər Suleymanov və kütləvi informasiya vasitələrinin nümayəndələri iştirak edib. Tədbiri giriş sözü ilə açan Azərbaycanlıların Mədəniyyət Mərkəzinin sədri Fazil Həsənov zaman-zaman Azərbaycan xalqının başına gətirilən faciələrin Gürcüstanda daim anıldığını deyib. Millət vəkili Qənirə Paşayeva isə bu məsələdə hamını daha həssas olmağa, tariximizi dərindən öyrənməyə, vətənpərvər ruhda gənclər böyütməyə, üzərimizə düşən vətəndaşlıq və milli borcu məsuliyyətlə yerinə yetirməyə çağırıb. Gürcüstanda “Xocalı ayı”na Marneulidən start verdiklərini deyən Qənirə Paşayeva anım tədbirlərinin ölkənin bir çox bölgələrində keçiriləcəyini qeyd edib. Fevral ayının 23-də isə Vaşinqtonda yaşayan azərbaycanlı icmasının nümayəndələri Ermənistanın Birləşmiş Ştatlardakı səfirliyi qarşısında etiraz aksiyası keçiriblər. Qeyd edək ki, aksiyanın təşkilatçılarından biri ABŞ Azərbaycanlıları Şəbəkəsidir (USAN). Aprelin 17-də Almaniyada yaşayan azərbaycanlılar türk diasporuna dəstək məqsədilə Münhen şəhərində irqi ayrı-seçkiliyə, millətçiliyə qarşı etiraz nümayişi keçirib. Avropa Azərbaycanlıları Konqresi və Almaniyadakı Azərbaycanlıların Koordinasiya Mərkəzinin təşkil etdiyi aksiya Münhen Baş Əyalət Məhkəməsinin qarşısında baş tutub. Təxminən 600-dək soydaşımızın qatıldığı izdihamlı mitinqin iştirakçıları irqi ayrı-seçkiliyi, millətçiliyi pisləyən bəyanatlarla çıxış ediblər. İsveç Azərbaycanlıları Konqresinin (İAK) nümayəndələri Şərqi Avropada “dondurulmuş” münaqişələrə həsr olunmuş seminarda iştirak ediblər. İsveç Beynəlxalq Araşdırmalar İnstitutu tərəfindən təşkil edilmiş seminarda Dağlıq Qarabağ münaqişəsi xüsusi qabardılıb. Seminarda konqres nümayəndələrinə İsveç Beynəlxalq Münasibətlər İnstitutunun jurnalının yeni buraxılışı təqdim olunub. Jurnalda Dağlıq Qarabağ münaqişəsinin indiki vəziyyətinə ayrıca məqalə həsr olunub.

May ayının 14-də Ukraynada yaşayan azərbaycanlılar azərbaycanlı iş adamı Elşən Əzimovun Kiyev şəhərində ermənilər tərəfindən vəhşicəsinə döyülməsi faktına görə Ukrayna Prezident Administrasiyasına, Baş Prokurorluğa və Daxili İşlər Nazirliyinə müraciət ediblər. Ukrayna Azərbaycanlıları Konqresinin (UAK) təşkilatçılığı ilə müraciət Ukraynanın bütün vilayətlərində yaşayan azərbaycanlıların adından rəsmi olaraq ünvanlanıb və bu faktın azərbaycanlılar üçün ciddi narahatlıq yaratdığı qeyd olunub. Litva Azərbaycanlıları Cəmiyyətinin sədri Mahir Həmzəyev və “Litva-Azərbaycan” Assosiasiyasının prezidenti İmantas Melyanas Moldova Respublikasının Ombudsmanı Aurelia Qriqoriuya təşəkkür məktubu göndəriblər. Məktubda Aurelia Qriqoriun iyulun 4-də Ermənistan parlamentindəki çıxışı zamanı Ermənistanım Azərbaycana qarşı təcavüzünü, insanlığa zidd cinayətlər törətdiyini bəyan etməklə göstərdiyi cəsarət və prinsipiallığına görə təşəkkür bildirilib. Danimarkada fəaliyyət göstərən “Vətən” Cəmiyyəti bir qrup danimarkalı parlamentarinin Azərbaycanın işğal altındakı torpaqlarına səfər etməsi və qondarma rejimin rəhbərliyi ilə görüşlər keçirməsinə etiraz olaraq Danimarka parlamentinə məktub göndərib. Danimarkadakı Azərbaycan icması adından Parlamentin Xarici Siyasət Komitəsinin sədri Mette Gjerskova ünvanlanan etiraz məktubunda ölkə parlamentinin iki üzvünün Azərbaycanın işğal altındakı Dağlıq Qarabağ bölgəsinə səfər etməsi haqda Ermənistan kütləvi informasiya vasitələrində yayılan xəbərlərdən narahatlıq bildirilir. Məktubda Dağlıq Qarabağ münaqişəsi haqqında ətraflı məlumat verilərək, 1992-ci ildən bəri Ermənistan silahlı qüvvələrinin işğalı altında olan bölgənin Azərbaycan Respublikasının ayrılmaz tərkib hissəsi olması və bu faktın beynəlxalq hüquqla təsbit edildiyi, Azərbaycanın ərazi bütövlüyünün BMT və digər qurumlar, eləcə də Danimarka hökuməti tərəfindən tanındığı diqqətə çatdırılır.

2013-cü il 3 oktyabr tarixində Azərbaycan Respublikası Diasporla İş üzrə Dövlət Komitəsinin təşkilatçılığı ilə Avropada yaşayan azərbaycanlılar Brüsseldə Avropa Parlamenti qarşısında etiraz aksiyası keçirilib. Aksiyaçılar Ermənistan-Azərbaycan, Dağlıq Qarabağ münaqişəsinin həll olunmamasına etiraz bildirmiş, münaqişə nəticəsində azərbaycanlılara qarşı törədilmiş qırğın, terror aktları, bir milyondan çox adamın məcburi köçkünə çevrilməsi, və Azərbaycan torpaqlarının 20 faizinin işğal altında olması ilə bağlı şüarlar səsləndirilib. Aksiyanın sonunda işğal edilmiş ərazilərinin azad edilməsi və məcburi köçkünlərin öz torpaqlarına qayıtması üçün Ermənistana qarşı sanksiyalar tətbiq olunmasını tələb edən bəyanat qəbul etmişdilər.

Hesabat dövrünün noyabr ayında İstanbul Türkiyə-Azərbaycan Dərnəyində (İSTAD) keçirilmiş toplantıda erməni təbliğatına qarşı birgə fəaliyyət məsələləri müzakirə olunub. Türkiyədə yaşayan azərbaycanlıların Azərbaycan Respublikası Diasporla İş Üzrə Dövlət Komitəsi və qeyri-hökumət təşkilatları ilə birgə fəaliyyətinin əhəmiyyətini vurğulayan İstanbul Türkiyə-Azərbaycan Dərnəyinin sədri Səfər Karakoyunlu Azərbaycan Prezidenti İlham Əliyevin “bir millətin iki diasporu olmaz” kəlamını xatırladıb. O deyib ki, bu kontekstdə Türkiyənin ən böyük şəhəri olan İstanbulda Azərbaycan həqiqətlərinin təbliği üçün tədbirlər davam edəcəkdir. Toplantının sonunda İqdır bələdiyyə sədrliyinə namizəd Gündüz Günəşə İstanbul Türkiyə-Azərbaycan Dərnəyinin xatirə hədiyyəsi təqdim edilib.

Noyabrın 16-21-i tarixlərində Misir Ərəb Respublikasının paytaxtı Qahirə şəhərində Misir Mədəniyyət Nazirliyi tərəfindən Beynəlxalq Tolerantlıq Gününə həsr olunmuş "VI Beynəlxalq Səmaa Dini Musiqi Festival"-ında Azərbaycanın da iştirak etdiyi 12 ölkə təmsil olunub. Festivalın açılış günüdə 3 nəfərdən 2-i erməni olmaqla Rusiyanı təmsil edən iştirakçıların çıxışı azərbaycanlılar tərəfindən ciddi narazılıqla qarşılanıb. Buna səbəb, Avetis Manukyan tərəfindən ifa olunan milli musiqi alətimiz olan balabanın Ermənistanın nəfəs musiqi aləti kimi təqdim edilməsi olub. Bununla yanaşı, Misir Mədəniyyət Nazirliyi tərəfindən paylanılan xüsusi proqram kitabçasında Rusiya Federasiyasını təmsil edən iştirakçıdan birinin doğulduğu yer kimi Xankəndinin Ermənistan ərazisi kimi qeyd olunması Azərbaycanı təmsil edən nümayəndə heyətinin rəhbəri, Akademik Ziya Bünyadov adına Şərqşünaslıq İnstitutunun Ərəb ölkələrinin tarixi və iqtisadiyyatı şöbəsinin kiçik elmi işçisi Pərvin Əfəndiyevanın, Misirdəki Azərbaycan Diasporu təşkilatının sədri, Dünya Azərbaycanlı Gənclər Birliyinin Mərkəzi Şurasının üzvü Ramil Nifəliyevin və Misirdəki Azərbaycan Diasporu təşkilatının beynəlxalq əlaqələr şöbəsinin rəhbəri Rəşad Əliyevin kəskin etirazına səbəb olub.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 11 aprel.- S.15.