“Getdikcə daha güclü

diasporumuz formalaşacaq”

Vüqar Abbasov: “Azərbayandan kənarda yaşayan hər kəs özünə bir diaspor təşkilatı yaratmalı deyil”

Bu gün özünün inkişaf dövrünü keçən Azərbaycan diasporuna müxtəlif ölkələrdə yaşayan soydaşlarımızın da dəstəyi böyükdür. Hansısa cəmiyyət və ya təşkilatda təmsil olunmamalarına baxmayaraq bir diaspor təşkilatı qədər aktiv olan bu kimi soydaşlarımız yaşadıqları ölkənin kütləvi informasiya vasitələri ilə də yaxından əlaqələr quraraq müntəzəm olaraq Azərbaycanın problemlərini həmin media qurumlarında işıqlandırırlar. Belə dəyərli insanlardan biri də uzun illərdir ki, Niderland Krallığında yaşayan soydaşımız Vüqar Abbasovdur. “OLAYLAR”-a verdiyi müsahibədə soydaşımız fərdi qaydada apardığı mübarizə, Niderland mətbuatı ilə qurduğu əlaqələr barədə danışıb.

-Vüqar bəy, müntəzəm olaraq xarici mətbuatda məqalələr, yazılarla çıxış edir, Azərbaycanı təbliğ edirsiniz. Bu kimi addımlar, təbliğat üsulu Azərbaycanın dünyada tanıdılmasına nə kimi müsbət təsirini göstərir?

-Xarici mətbuat deyəndə ki, Niderland mətbuatı artıq mənim üçün xarici hesab olunmur. Sizə maraqlı bir məqamı deyim ki, bəzi niderlandlı dostlarım arada Azərbayan mətbuatı üçün yazdıqlarımın Niderland dillində qısa xülasəsini istəyir, yaxud internet üzərindən pis-yaxşı tərcümə edərək oxumağa çalışırlar. Hərdən də mənə zarafatla deyirlər ki, Niderlandı Azərbaycana təbliğ edirsən. Doğrudur, Niderlandın buna bir o qədər ehtiyacı yoxdur və bəlkə bunun heç marağında da deyillər. Ancaq Azərbaycan haqqında bunu demək olmaz. Bizim bəzi, bizə məlum olan həqiqətlərimiz var ki, bu həqiqətləri dünyaya, həmçinin Niderland siyasilərinə, niderlandlılara çatdırmaq lazımdır. Heç kimə də sirr deyil ki, bu işdə mətbuatın rolu danılmazdır. Təvazökarlıqdan uzaq səslənsə də, deməliyəm ki, mənim fürsət düşdükcə Niderland mətbuatına yazdığım yazılar dediyiniz məsələdə az da olsa rol oynayır. Ancaq təkrar edirəm ki, bunlar hələ damlalardır. Böyük işlər görmək üçün geniş imkanlar lazımdır. Bəzi məsələlərlə bağlı müəyyən düşüncələrim var, hələlik bu barədə danışmaq istəmirəm. Alınarsa təbii ki, bu barədə mətbuata məlumat verilməsi mümkün olan qədər veriləcək. Sadəcə onu deyə bilərəm ki, siyasi partiyaların birindən olan dostlarla bu barədə məsləhətləşmələr aparıram. Gələcəkdə daha fərqli mənzərəni görəcəyimizə ümid edirəm.

-Fəal diaspor nümayəndəsi kimi deyə bilərsinizmi ki, diaspor nümayəndələrimiz xarici KİV-lərə çıxmağa nə dərəcədə maraqlıdırlar və həmin mətbu orqanlarla Azərbaycan diasporu səmərəli əməkdaşlıq edirmi?

-Bu sual diaspor təşkilatlarına ünvanlansa daha yaxşı olar, deyə düşünürəm. Ancaq diaspor təşkilatlarımızın Azərbaycan mətbuatına olan marağını nəzərə alsaq, deyə bilərəm ki, Niderland mətbuatına da biğanə olmazlar (gülümsəyir). Ən azından bu, növbəti dəfə Azərbaycan mətbuatına çıxmağa əsas verər və bunu da təbii görürəm. Mənim də yerli mətbuatda bir yazım gedən kimi Azərbaycandakı sizin kimi jurnalist dostlarımızın marağına səbəb olur və bu da öz növbəsində başa düşüləndir. Mən də bir başqası tərəfindən ölkəm haqqında yazılan bir yazını görsəm sevinər və bunu mətbuata çıxarmağa çalışaram. Necə ki, buradakı təşkilatların ən balaca işlərini belə imkanım qədər mətbuata xəbər kimi verməyə çalışıram. Yerli, sırf Niderland mətbuatının təşkilatlarımızla münasibətlərinə gəlincə, deyim ki, bu, doğrudan asan məsələ deyil. Bilirsiz, bu gün çıxıb Azərbaycan əleyhinə, iqtidarın əleyhinə istənilən qədər yazılar verdirmək olar. Siz də jurnalistsiniz. Razılaşarsız ki, jurnalistlər bir çox halda intriqa, tənqid və.s. axtarır və oxucu üçün bunun maraqlı olacağını düşünürlər. Niderland mətbuatı barədə də bunları demək mümkündür. Bəlkə də ümumilikdə deyil, çoxluq belədir.

-Hollandiyada yaşayan soydaşımız olaraq hazırda bu ölkədə Azərbaycan diasporunun durumunu necə xarakterizə edərdiniz?

-Təxmini rəqəmlərə görə burda hazırda 10 000-ə yaxın həmyerlimiz yaşayır. Ancaq bizlər burada kompakt halda yaşamırıq. Bilmirəm bu yaxşı, yoxsa pisdir, sadəcə belədir. Bu isə təbii ki, aramızdakı ünsiyyəti bir qədər azaldır. Niderlandın müxtəlif yerinə səpələnmiş insanlarımız hər hansı bir tədbirə gəlməkdə çətinlik çəkirlər. Bizdə isə şükür ki, tədbirlər çox olur. Eyni bir mövzu ilə bağlı bəzən bir neçə təşkilat ard-arda tədbir keçirdirlər. Lap ayrı-ayrı mövzular olsun, ard-arda düşüncə insanlarımıza çətin olur. Bu, bir ərazidə yaşamamağımızla bağlıdır. Bundan başqa qeyd etmək istəyirəm. Azərbaycan adına sevindirici bir haldır ki, burda böyüyən və yerli təhsil ocaqlarında, o cümlədən universitetlərdə təhsil alan çoxsaylı gənclərimiz var. Ümid edirəm ki, bir neçə illərdən sonra artıq buranın dövlət idarələrində həmyerlilərimizi görə biləcəyik.

-Bu gün yaşadığınız ölkədə çoxsaylı diaspor təşkilatımız fəaliyyət göstərir. Onlar arasında sözün əsl mənasında birlik və həmrəylik varmı?

-Baxın bu sualınıza cavab versəm intriqa yaratmış olacaqsız ki, bu da bir az öncə mənim dediklərimi təsdiq etmiş olacaq (gülümsəyir). Mən də onların bir olmasını istərdim. “Birlik” deyəndə mən təşkilatların birləşməsini nəzərdə tutmuram. Demək istəyirəm ki, dost olmaq şərt olmadığı kimi, düşmən olmaq da şərt deyil. Bölünə bilməyəcək nə var axı? Yalandan “həmrəylik var” deyə bilmərəm. Bu ikiüzlülük, yalançılıq olar ki, bu, mənim xarakterimə yaddır. Ümid edirəm ki, gələcəkdə bunun əksini deyə biləcəyik. Ancaq bir şeyi qeyd etməsəm haqsızlıq etmiş olaram ki, bəzi təşkilatlarımız var ki, heç bir intriqalara qoşulmur, sadəcə öz işləri ilə məşğuldurlar və bunu alqışlamağa dəyər. Bir məsələni də qeyd etmək istəyirəm. Təşkilatlarımız arasında mənəm - mənəmliyə son qoymaq lazımdır. Kiminsə adının haradasa hallanmasından önəmli ölkəmizin adının hallanmasıdır. Kimsə məndən inciməsin, bir tədbir keçirir bir neçə ay onu müzakirə edirik. Bir-birindən incimələr və.s. İnanın, tam səmimi deyirəm, bu kimi hallar heç də xoş deyil və xüsusi xahiş edirəm ki, bu müsahibəni oxuyan dostlarım sonradan günahkar axtarışına çıxmasınlar. Hər kəs, özümüz də həqiqəti bilirik, qalır onu etiraf etməyi bacarmaq.

-Sizcə, bu gün Azərbaycan diasporunda çatışmayan cəhətlər hansılardır və nələri təklif etməklə diaspor işini bir qədər də irəli aparmaq olar?

-Diasporumuzun gələcəyini indikindən daha parlaq olacağını düşünürəm. Səbəbi çox sadədir. Bizlərin Avropaya gəlişi çox da uzaq illərə gedib çıxmır. Türkiyədən gələrək burada yaşayan və onların qurduqları təşkilatlarla Azərbaycanı təmsil edən təşkilatların arasında fərq böyükdür. Bunların başlıca səbəblərindən biri də dil məsələsidir. Yerli dili mükəmməl bilməyin üstünlükləri təbii ki, çoxdur. Belə ki, bu yerli insanlar, siyasilər, mətbuat, iş adamları ilə ünsiyyət qurmaqda yardımçı ola bilər. Bir az öncə də qeyd etdim ki, hazırda mənim tanıdığım bir neçə gənc burada yüksək təhsil alır. Təbii ki, mənim tanımadığım yetərincə gənclərimiz var ki, təhsillərinə üstünlük verirlər. Bir neçə ildən sonra bizlər burda tam formalaşmış olacağıq. Həmin gənclərə dəstək verilməsini istərdim. Ümid edirəm ki, getdikcə daha güclü diasporumuz formalaşacaq. Fürsətdən istifadə edib bir məqamı sizlərlə bölüşmək istəyirəm. Bir az öncə məni Macarıstanda yaşayan dostum Ramiz Əmirli aramışdı və sevindirici bir xəbər verdi. Onun oğlu Rüstəm Əmirovun Macarıstanda şerlər kitabı çap olunub və həmin ölkənin ən gənc şairi adını qazanıb. Digər oğlu Davud isə yerli partiyaların birində olduqca aktiv fəaliyyətdədir və gələcəkdə oranın parlamentində təmsil olunmağı qarşısına məqsəd kimi qoyub. Təbii ki, bunun bir başa mənim hazırda yaşadığım ölkəyə heç bir aidiyyatı yoxdur. Ancaq hər hansı bir həmyerlimiz dünyanın istənilən ölkəsində hansısa uğur qazanıbsa, buna sevinməliyik.

-Hollandiyadakı Azərbaycan diasporu digər ölkələrə nisbətən bir sıra uğurlara imza atıb. Belə ki, bu ölkədə Xocalı soyqırımı ilə bağlı abidə qoyulub və s. Bütün bunlar Hollandiyadakı erməni diasporunu narahat edirmi və Azərbaycan diasporunun fəaliyyətinə mane olmaq üçün hansısa cəhdlərə əl atırlarmı?

-Düzdür, Niderlandın Den Haaq şəhərində Azərbaycan Türk Kültür Dərnəyinin təşkilatçılığı ilə Xocalı soyqrımına abidə qoyulub. Həm həmin təşkilatın rəhbərliyindən, həm də abidənin qoyulması zamanı burada olan digər həmyerlilərimizdən eşitdiyimə görə o ərəfədə ermənilər həmin abidənin qoyulmasından ciddi narahat olublar. Bu barədə daha ətraflı sözü gedən insanlar danışsa daha yaxşı olar. İndiki durumda kiminsə bizim fəaliyyətimizdən narahatçılıq keçirtdiyini görmürəm. Bəlkə ayrı-ayrı təşkilatlar bunu görür, hiss edirlər, deyə bilmərəm. Ancaq ümumilikdə deyə bilərəm ki, bizlərin hər bir hərəkətinin erməniləri narahat etdiyini düşünürəm. Sadəcə hələlik açıq hərəkət etmirlər.

-Uzun illərdir ki, Azərbaycandan kənardasınız. Nə üçün özünüz diaspor təşkilatı təsis etməmisiniz?

-Azərbayandan kənarda yaşayan hər kəs özünə bir diaspor təşkilatı yaratmalı deyil axı. Onda gərək hazırda burada yuxarıda dedyim qədər təşkilat olardı. Gündəmi zəbt edə biləcək qədər təşkilatımız var (gülümsəyir). Hesab etmirəm ki, buna ehtiyac var. Məni bir neçə təşkilat bərabər fəaliyyət göstərməyə dəvət edib. Sonuncu dəfə dəvəti “Hollandiyada Azərbaycan Evi” təşkilatından aldım. Mən özümü jurnalist kimi daha çox xeyir verə biləcək biri kimi görürəm. Təşkilat işi o qədər də asan deyil. Hər bir halda bu günə qədər buna ehtiyac görməmişəm. Gələckdə nə olacaq, indidən bir söz deyə bilmərəm.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 22 aprel.- S.15.