Hər bir azərbaycanlının prezidenti

Hər bir ölkənin inkişafı, dünyada söz sahibinə çevrilməsi, beynəlxalq aləmdə nüfuzunun artmasında dahi siyasətçilərin, müdrik dövlət başçılarının müstəsna rolu olur. Bu kimi siyasi liderlərin, dövlət xadimlərinin əldə etdikləri uğurlar həmin ölkənin sürətli inkişafını şərtləndirən amillərdən sayılır.

Müdrik dövlət başçısı

Azərbaycanın son 50 ilə yaxın bir müddətdə bu sahədə bəxtinin gətirdiyini desək yanılmarıq. Belə siyasi liderlərdən biri ümummilli lider Heydər Əliyev olmuşdursa, digəri Heydər Əliyev siyasi kursunun layiqli davamçısı cənab prezident İlham Əliyevdir. Bu günlərdə 53 yaşını qeyd edən cənab prezident İlham Əliyev də sələfi Heydər Əliyev kimi yorulmaq, usanmaq bilmədən, istirahət etmədən gününün böyük əksəriyyətini çalışmaq, xalqla yaxından təmasda olmaqla keçirir. Buna əyani sübut kimi cənab prezidentin öz ad gününü qaçqın və məcburi köçkünlər, cəbhə xəttində yaşayan insanlarla keçirməsini göstərə bilərik.

Məlumat üçün qeyd edək ki, İlham Əliyev 1961-ci il dekabrın 24-də Bakı şəhərində anadan olub. O, 1967-1977-ci illərdə Bakı şəhərindəki 6 saylı orta məktəbdə təhsil alıb. 1977-ci ildə Moskva Dövlət Beynəlxalq Münasibətlər İnstitutuna daxil olan İlham Əliyev oranı bitirdikdən sonra institutun aspiranturasına qəbul edilib, 1985-ci ildə dissertasiya müdafiə edərək tarix elmləri namizədi elmi dərəcəsi alıb. İlham Əliyev 1985-1990-cı illərdə Moskva Dövlət Beynəlxalq Münasibətlər İnstitutunda müəllim işləyib. 1991-1994-cü illərdə özəl biznes sahəsində çalışan İlham Əliyev bir sıra istehsal-kommersiya müəssisələrinə rəhbərlik edib. 1994-cü ildən 2003-cü ilin avqust ayınadək isə o, Azərbaycan Respublikası Dövlət Neft Şirkətinin vitse-prezidenti, birinci vitse-prezidenti olub. İlham Əliyev Heydər Əliyevin neft strategiyasının həyata keçirilməsində fəal iştirak edib.

İlham Əliyevin Azərbaycan siyasətindəki ən aktiv dövrü 1995-ci və 2000-ci illərə, Azərbaycan Respublikası Milli Məclisinə deputat seçildiyi illərə təsadüf edir. 2003-cü ildə Azərbaycan Respublikasının baş naziri vəzifəsinə təyin edilən İlham Əliyev 2003-cü ilin oktyabrında Azərbaycan Respublikasının prezidenti seçilir. İlham Əliyev 2008 və 2013-cü illərdə keçirilən növbəti seçkilər zamanı yenidən xalqın böyük əksəriyyət səsini qazanaraq növbəti dəfə dövlət başçısı seçilir.

Xalqın sevgisini qazanan prezident

Həyat fəaliyyəti birbaşa xalqının taleyi ilə bağlı olan Azərbaycan prezidentinin doğum günü ərəfəsində Azərbaycanın dövlətçilik tarixində dərin iz buraxmış fəaliyyətini, ölkəmizin inkişafı üçün atdığı uğurlu addımları yenidən gözdən keçirmək olduqca vacibdir. Prezident İlham Əliyevin Azərbaycana rəhbərlik etdiyi 2003-cü ildən bu günə qədər olan dövrə nəzər salsaq, qətiyyətlə deyə bilərik ki, xalqın böyük sevgisini qazanan dövlət başçısı İlham Əliyevin həyata keçirdiyi siyasət ölkə vətəndaşları tərəfindən rəğbətlə qarşılanır. Ötən ilin 9 oktyabr prezident seçkilərində Azərbaycan xalqının mövqeyi bir daha sübut etdi ki, ölkəmizdə xalqla hakimiyyətin vəhdəti ən yüksək səviyyədədir.

Bəs görəsən xalqın cənab prezientə olan sevgisi, etimadı nə ilə bağlıdır?

Milli maraqların təminatçısı

Birincisi, Azərbaycan xalqının dövlət başçısına sevgisinin, inamının belə yüksək səviyyədə olması prezident İlham Əliyevin liderlik keyfiyyətlərindən irəli gəlir. Onu xalqa sevdirən ən mühüm xüsusiyyəti əsl dövlət başçısı kimi qətiyyətli olması, atdığı hər bir addımda milli maraqlarımızı öndə tutmasıdır. Cənab İlham Əliyevin verdiyi hər bir qərar yalnız və yalnız Azərbaycanın milli maraqlarına xidmət edib.

İkincisi, İlham Əliyev ilk dəfə, 2003-cü ildə dövlət başçısı seçilən zaman xalqa verdiyi vədi tam olaraq yerinə yetirib. Bu həqiqəti daha aydın görmək üçün son on ildə həyata keçirilən siyasət, görülən işlər, əhalinin sosial rifah halının yaxşılaşdırılması istiqamətində atılan adımlara qısa nəzər yetirmək lazımdır.

Xəyalları reallığa çevirən prezident

Belə ki, İlham Əliyevin həyata keçirdiyi uğurlu iqtisadi islahatlar nəticəsində iqtisadiyyatda 3,4 dəfə, sənaye istehsalında 2,7 dəfə, kənd təsərrüfatında 1,5 dəfə artım qeydə alınıb. Regionların sosial-iqtisadi inkişafı Dövlət Proqramının uğurlu icrası nəticəsində ölkədə bir milyondan artıq yeni iş yeri açılıb. Ümumilikdə ölkədə işsizlik 5 faiz səviyyəsindədir. Halbuki cənab Prezident ölkədə 1 milyondan artıq iş yeri yaradılacağı vədini verərkən bir çoxları bunu xəyal, reallaşması mümkün olmayan proses hesab edirdilər. Ancaq İlham Əliyev bəzilərinin xəyal hesab etdiyini məhz reallığa çevirdi. Bu illər ərzində ölkədə yoxsulluğun səviyyəsi də xeyli aşağı düşüb. Rəsmi statistik məlumatlara nəzər salsaq, bunu əyanı görərik. Belə ki, dövlət başçısının uğurlu fəaliyyəti nəticəsində Azərbaycanda yoxsulluq səviyyəsi 49 faizdən 5,3 faizə enib. Son on ildə dövlət büdcəmizin 20 dəfədən çox artması uğurlu sosial-iqtisadi islahatların nəticəsidir. Bu gün Azərbaycan beynəlxalq aləmdə iqtisadi möcüzələr ölkəsi kimi tanınır və nüfuz qazanır.

Prezident İlham Əliyevin müəyyənləşdirdiyi Azərbaycanın sosial-iqtisadi inkişaf strategiyasında qeyri-neft sektorunun inkişaf etdirilməsi prioritet istiqamət təşkil edir. Bu sahənin inkişaf etdirilməsinə göstərilən davamlı dövlət qayğısının nəticəsidir ki, son illərdə ölkənin iqtisadi inkişaf dinamikasında qeyri-neft sektorunun çəkisi getdikcə artır. Son 10 ildə respublikamızda qeyri-neft sektoru 2,6 faiz artıb.

Hazırda nəinki bölgənin, hətta dünyanın ən aparıcı ölkəsinə çevrilmək iddiasını ortaya qoyan Azərbaycan bu niyyətini gerçəkləşdirmək üçün siyasi, sosial və iqtisadi prioritetləri tam olaraq yarada bilib. Daha doğrusu, ötən illər ərzində ölkəmiz iqtisadi qüdrətini hərbi, sosial və mədəni gücə çevirməyi bacarıb. Nəticə isə çox qürurvericidir. Prezident İlham Əliyevin rəhbərliyi ilə dünyada nümunə göstəriləcək bir inkişaf modeli formalaşıb: Bu, modern Azərbaycan dövləti modelidir.

Üçüncüsü, prezident İlham Əliyev 2003-cü ilin prezident seçkilərindən sonra baş tutan andiçmə mərasimi zamanı söylədiyi “Mən hər bir Azərbaycan vətəndaşının prezidenti olacam” fikrinə sadiqliyini öz əməlləri ilə sübuta yetirib. Regionlara, eləcə xarici ölkələrə səfərləri zamanı sadə vətəndaşlar, müxtəlif ölkələrdə yaşayan soydaşlarımızla görüşüb onların problemləri ilə yaxından maraqlanan prezident İlham Əliyev məhz bu keyfiyyətlərinə görə hər bir azərbaycanlının etimad və rəğbətini qazanıb.

Prezident İlham Əliyev bu illər ərzində idmançıların, gənclərin, jurnalistlərin, bir sözlə hər bir sahə insanının yaxın dostu, sirdaşı olub. 1997-ci ildən bu günə qədər Azərbaycan Milli Olimpiya Komitəsinin Prezidenti olan İlham Əliyev hər zaman bu sahənin inkişafını prioritet hesab edib. Bu illər ərzində paytaxtla yanaşı regionlarda da çoxlu sayda Olimpiya İdman Kompleksləri, idman sağlamlıq mərkəzləri tikilib istifadəyə verilib ki, bu da gənc nəslin sağlam ruhda böyüməsi, onların idmana marağının artmasına müsbət təsir göstərən amillərdəndir. Dövlətin və dövlət başçısının idmana göstərdiyi diqqət və qayğı beynəlxalq idman federasiyaları tərəfindən də yüksək qiymətləndirilir. Təsadüfi deyil ki, idmanın və Olimpiya hərəkatının inkişafında böyük xidmətlərinə görə İlham Əliyev Beynəlxalq Olimpiya Komitəsinin ali ordeni ilə təltif edilib. Hər il onlarla beynəlxalq idman yarışları və çempionatlarının ölkəmizdə keçirilməsi də bu sahənin inkişafının bariz nümunəsidir. 2015-ci ilin yayında ilk Avropa Oyunlarının Bakıda keçirilməsi ilə Azərbaycan həmçinin idman ölkəsi kimi də tarixə düşəcək.

Güclü və qüdrətli Ali Baş Komandan

Üçüncüsü, İlham Əliyev ölkədə milli vətənpərvərlik ruhunun artırılmasına nail olub. İstər Ramil Səfərovun Macarıstandan ölkəmizə ekstradisiya olunması və onun həbsdən azad edilməsi, istər Mübariz İbrahimovun nəşinin ermənilərdən geri alınaraq ona milli qəhrəman adının verilməsi, istərsə də Azərbaycanın hərbi gücünün artırılması istiqamətində atdığı addımlar gənclərin, ən əsası Azərbaycan xalqının milli ruhunun artırılması, torpaq, Vətən sevgisinin yüksəlməsinə öz müsbət təsirini göstərir. Prezident İlham Əliyevin müntəzəm olaraq cəbhə xəttinə səfər etməsi, Azərbaycan Silahlı Qüvvələrinin təlim-məşq toplanışlarını birbaşa izləməsi, onlarla bir səngərdə olması İlham Əliyevi xalqımız tərəfindən Ali Baş Komandan kimi də sevdirib. Artıq böyükdən kiçiyə qədər hər bir azərbaycanlı İlham Əliyev kimi qüdrətli, güclü Ali Baş Komandan, prezident olmasından qürur duyur. Bu gün Azərbaycan xalqı Silahlı Qüvvələrimizin Ali Baş Komandan, Prezident İlham Əliyevin rəhbərliyi altında tezliklə işğal altında olan ərazilərimizi azad ediləcəyinə böyük inam və ümid bəsləyir. Çünki Prezident İlham Əliyevin rəhbərliyi altında Azərbaycanın son illərdə bütün sahələrdə, eləcə də hərbi sahədə gücünün, qüdrətinin artması bu əminliyi yaradır.

Süleyman İsmayılbəyli

Olaylar.- 2014.- 24 dekabr.- S.2.