Qırğızstanda Dünya

Azərbaycanlılarının Həmrəyliyi Günü

Bu ilin dekabr ayının 23-24-də Azərbaycan Respublikasının Qırğız Respublikasında Səfirliyinin və Qırğız-Türk “Manas” Universitetinin təşəbbüsü ilə Dünya Azərbaycanlılarının Həmrəyliyi münasibətilə “Azərbaycan Günü” adlı tədbir keçirilmişdir.

“Azərbaycan” Günü çərçivəsində “Manas” Universitetinin kinoteatrında Azərbaycan filmləri (“Babək”, “Nəsimi”, “Arşin mal alan”, “O olmasın bu olsun”) nümayiş olunmuşdur. Dekabr ayının 24-də keçirilən tədbirdə Qırğız Respublikası Prezidenti Aparatının, Hökumətinin təmsilçiləri, Parlamentin deputatları, bu ölkədə akkreditə olunmuş diplomatik nümayəndəliklərin rəhbərləri, ictimai-siyasi xadimlər, Universitetin professor-müəllim heyəti, Azərbaycan diasporunun üzvləri iştirak etmişlər. Tədbirin əvvəlində iştirakçılar universitetin foyesində Azərbaycanın tarixi, mədəniyyəti, turizmi, müxtəlif sahələrdə inkişafından bəhs edən və Ermənistan-Azərbaycan, Dağlıq Qarabağ münaqişəsi ilə bağlı kitab sərgisi ilə tanış olmuşlar. Sonra azərbaycanlıların həmrəyliyi günündən bəhs edən sənədli film nümayiş olunmuşdur. Azərbaycan, Qırğızstan və Türkiyənin Dövlət himnləri səslənmişdir. Tədbirin açılışın edən Qırğız-Türk “Manas” Universitetinin rektoru Səbahattin Balcı qardaş Azərbaycan xalqının bayram günün keçirilməsinə görə şad olduğunu, Azərbaycan Respublikasının yüksələn inkişaf tempindən fərəhləndiyini bildirmiş, Heydər Əliyevin öz xalqının və dövlətinin inkişafı naminə gördüyü işlərdən danışmışdır. Azərbaycanın Qırğızıstanda Fövqəladə və Səlahiyyətli səfiri Hidayət Orucov Dünya Azərbaycanlılarının Həmrəyliyi Günü haqqında geniş məlumat vermişdir. Səfir qeyd etmişdir ki, dünya azərbaycanlılarının birliyi, soydaşlarımızın həmrəyliyi ideyası məhz Ümummilli lider Heydər Əliyevin xalqımız və Vətənimiz qarşısında göstərdiyi tarixi xidmətlərindən biridir. 1991-ci ilin sentyabr ayının 3-də Heydər Əliyevin Naxçıvan Muxtar Respublikasının Ali Məclisinin sədri seçilmişdir. Həmən ilin dekabr ayının 16-da Naxçıvan Muxtar Respublikasının Ali Məclisinin birinci iclasında Heydər Əliyevin rəhbərliyi və təşəbbüsü ilə 31 Dekabr – Dünya Azərbaycanlılarının Həmrəylik Günü elan edilmişdir. Ancaq bu qərar Naxçıvan Muxtar Reespublikasının ərazisində keçərli idi. Ulu Öndər Heydər Əliyev Azərbaycan Respublikasının Ali Sovetinə zəmanət verərək bu qərarı qəbul etməyə və dünya azərbaycanlıların birlik və həmrəylik ideyasını dövlət siyasəti səviyyəsinə qaldırmağa nail olmuşdur. Səfir bildirmişdir ki, dünyada əlli milyonluq Azərbaycan xalqının taleyi belə gətirib ki, yalnız doqquz milyona yaxını öz milli dövlətinin vətəndaşıdır, qırx milyondan çoxu isə ya başqa dövlətin ərazisinə daxil edilmiş öz tarixi-etnik torpaqlarında, ya da Qırğızstandakı kimi diaspor şəklində yaşayırlar. O da nəzərə alınmalıdır ki, ölkəmiz hələ də müharibə şəraitindədir, ərazimizin 20 faizi Ermənistan tərəfindən işğal olunub, bir milyondan artıq yurddaşımız isə qacqınlıq həyatı yaşamağa vadar edilib. Xaricdə yaşayan soydaşlarımızın bütün problemləri Azərbaycan Prezidenti İlham Əliyevin diqqət mərkəzindədir, özünün qeyd etdiyi kimi, hər bir azərbaycanlının Prezidentidir, dövlətimiz bu sahədə perspektivli siyasət aparır və yaxşı nəticələr qazanılır. Səfir qeyd etmişdir ki, bu gün həm də Azərbaycan Respublikasının Prezidenti Zati-Aliləri cənab İlham Əliyevin ad günüdür. Prezident İlham Əliyev – uğurlu və nümunəvi ölkə başçısı nümunəsidir. Ölkəmizin başçısı Azərbaycanı siyasi və iqtisadi sahələrdə inkişaf etdirmiş və beynəlxalq arenada ölkəmizə böyük nüfuz qazandırmışdır. Prezident İlham Əliyevin siyasi kursunun və strategiyasının nəticəsi olaraq, Azərbaycan regionun lider dövlətinə çevirmişdir. Azərbaycanın xarici siyasətdə, iqtisadiyyatda, mədəniyyət və idman sahələrində qazandığı uğurlar Prezident İlham Əliyevin adı ilə bir başa bağlıdır. Səfir, Azərbaycan Respublikasının Prezidenti Zati-Aliləri cənab İlham Əliyevin ad günü münasibətilə Qırğız Respublikasının Prezidenti Zati-Aliləri cənab Almazbek Atambayev təbrik məktubu göndərdiyini tədbir iştirakçılarının nəzərinə çatdırmışdır.

Məktubda deyilir:

“Qırğızstanda Sizi Qırğız Respublikası ilə Azərbaycan Respublikası arasında dostluğun və qarşılıqlı faydalı əməkdaşlığın inkişafının ardıcıl tərəfdarı kimi tanıyırlar.

Əminəm ki, bizim birgə səylərimiz sayəsində Qırğızstan-Azərbaycan qardaşlıq münasibətləri ölkələrimizin və xalqlarımızın rifahı naminə daha da möhkəmlənəcək.”

Səfir qeyd etmişdir ki, Azərbaycan ilə Qırğızstan arasında əməkdaşlıq münasibətləri təkcə siyasi və humanitar sahədə deyil, həm də iqtisadi sahədə inkişaf etməkdədir və bu xətt Azərbaycan Respublikasının Prezidenti Zati-Aliləri cənab İlham Əliyevin və Qırğız Respublikasının Prezidenti Zati-Aliləri cənab Almazbek Atambayevin siyasətinin prioritet istiqamətlərindəndir.

Qırğız Respublikasının Xarici İşlər nazirinin müavini Erines Otorbayev, Qırğız Respublikası Jokorku Keneşinin (Parlamentinin) deputatı, Qırğızstan-Azərbaycan Parlamentlərərarası dostluq qrupunun sədri Kurmanbek Dıykanbayev, Özbəkistan Respublikasının Qırğız Respublikasında Fövqəladə və Səlahiyyətli səfiri Komil Rəşidov, “Azəri” İctimai Birliyinin sədri Əziz Əliyev, Qırğız-Türk “Manas” Universitetinin prorektoru Asılbek Kulmırzayev və başqaları çıxış edərək azərbaycanlıları bayram münasibətilə və Azərbaycan Respublikasının Prezidenti cənab İlham Əliyevi ad günü münasibətilə təbrik etmişlər.

Sonra azərbaycanlı, qırğız və türk sənətçilərin iştirakı ilə geniş konsert proqramı təqdim olunmuşdur.

Sonda Azərbaycan Respublikasının Qırğız Respublikasında Səfirliyi adından tədbir iştirakçılarına ziyafət verilmişdir.

Olaylar.- 2014.- 26 dekabr.- S.4.