“Nadir şah” teatrımız üçün çox

uğurlu bir əsərdir

“Yazıçı-publisist Yunus Oğuzun “Nadir şah” romanı əsasında hazırlanmış “Nadir şah” tamaşası həm dramaturji mətninə, rejissor, aktyor işinə, musiqisinə, həm də səhnə tərtibatına görə çox dəyərli bir iş olub”.

Millət vəkili, professor Nizami Cəfərov adı keçən tamaşanın premyerasından sonra bu fikirləri açıqlayıb. O, bildirib ki, tamaşada Nadir şahın obrazı bütün mükəmməlliyi ilə görünüb. Belə gözəl tamaşanın ərsəyə gəlməsinin birinci növbədə Yunus Oğuzun xidməti olduğunu vurğulayan millət vəkili tamaşada verilən məqamlarda-yığcamlığa, modelləşdirmələrə, səciyyəvi hadisələrin seçilib verilməsinə görə irəliləyiş hiss etdiyini də bildirdi: “Hətta əsər və obraz üzərində bir xeyli yenidən iş gedib. Nadir şah obrazı çox mükəmməl idi. Xalq artisti Ramiz Novruzov yaxşı oynadı və səviyyəli bir obraz yaratdı. Nadir şahın obrazının görünməsi üçün səhnə məkanı da kifayət qədər mükəmməl idi. Bütün çoğrafiya, tarixi proseslərin təqdimatı üçün imkan var idi. Hökmdarlıq, dövlət başçılığı sona qədər bütün səhnə məkanında göründü. Eləcə də cəmiyyət də göründü. Əlbəttə, bu çox mürəkkəb bir məsələ idi. Nadir şah bir sərkərdə olub və onun obrazı o zaman tamamlana bilər ki, şahın qoşunu, ordusu, müharibələri görünsün. Bu baxımdan o qədər adamı seçmək, səhnəyə çıxarmaq mümkün ola biləcək məsələ deyil. Amma az bir personajla müharibələrin nə şəkildə getməyi, döyüşlərin taleyinin necə həll olunması hiss elətdirildi”.

Millət vəkilinin sözlərinə görə, tamaşada məlumat xarakterli söhbətlərə, tarixin danışılmağına çox az yer verildi. “Göstərilmək baxımından həm də rejissorun uğuru idi ki, olduqca yığcam, amma məzmunlu detallar, səhnə görüntüləri var idi”-deyən professor əslində faciə qəhrəmanı olan Nadir şahın cəngavərliyi, əzəməti, qüruru, sərkərdəliyi ilə yanaşı, insan kimi hissiyatlarının da tamaşanın mətnində yaxşı verildiyini bildirdi: “ Aktyor da çox gözəl oyunu ilə hissiyyatları təqdm etdi. Tamaşada xalqın vəziyyəti, cəmiyyətlə bağlı münasibətlər də gözəl verilmişdi. Bir neçə çox gözəl lirik məişət detalları var idi ki, tamaşanı tamamlayırdı. Əsərin ictimai-siyasi məzmunu ilə yanaşı, insan xarakteri, insan taleyi, hökumət və xalq, dövlət və cəmiyyət kimi məsələlərin də təhlili üçün də çox yaxşı detallar var idi. Səhnədə hadisələrin dinamikası çox yaxşı qurulmuşdu. Sona qədər yorulmaq imkanı yox idi. Məzmunu qəbul etmək asan idi. Dramaturqun, rejissorun mövqeyini qəbul etmək asan idi, həm də məzmunlu idi. Yəni yüngül, üzdən olan məsələ deyildi. Bu da yaxşı bir tapıntıdır. Hər bir tamaşa üçün bu çox əhəmiyyətli məsələdir ki, gərək tamaşaçı həm yorulmasın, həm də informasiya qəbul etsin. Bu baxımdan tamaşada tarixi informasiya çox yaxşı qəbul olundu və kifayət qədər də mükəmməl tamaşa yarandı. Mən belə gözəl bir iş üçün Yunus Oğuzu, tamaşanın müəlliflərini, aktyorları təbrik edirəm. Milli tarixi mövcudluğumuzun elementlərinin çatdırılması, obrazların mükəmməl bir şəkildə yaddaşımıza qaytarılması baxımından teatrımız üçün çox uğurlu bir əsərdir”. “Olaylar”

Olaylar.- 2014.- 27-29 dekabr.- S.4.