Milli Həmrəylik Günü diaspora

təşkilatlarımıza əlavə güc verir

Milli birliyimizin rəmzinə çevrilmiş 31 dekabr - Dünya Azərbaycanlılarının Həmrəyliyi Gününü hər il bütün soydaşlarımız ən əziz bayramlarından biri kimi qeyd edirlər. 1991-ci ilin dekabrında ümummilli lider Heydər Əliyevin təşəbbüsü ilə Naxçıvan Muxtar Respublikasının Ali Məclisi tərəfindən təsis edilmiş və az sonra bütün ölkə miqyasında qəbul olunmuş bu bayram hər bir azərbaycanlıda öz ana Vətəninə məhəbbət, xalqına sədaqət, tarixi və mədəniyyətinə hörmət kimi nəcib hissləri gücləndirir, bizi birləşdirən mənəvi-əxlaqi dəyərlərin sonrakı nəsillərə ötürülməsinə xidmət edir. Artıq 31 dekabr Dünya Azərbaycanlılarının Həmrəylik Gününə sayılı günlər qalmasına baxmayaraq xarici ölkələrdə yaşaçayan həmvətənlərimiz milli birlik nümayiş etdirməkdədir.

Belə ki, dünyanın ən müxtəlif ölkələrinə səpələnmiş soydaşlarımız bayram ərəfəsində cəmləşərək həmrəylik nümayiş etdirirlər. Məhz bu həmrəylik öz-özlüyündə diaspora fəaliyyətinin təşəkkül tapması deməkdir. Yeri gəlmişkən artıq Azərbaycan Respublikasının Prezidenti İlham Əliyev həmvətənlərimizi dünya azərbaycanlarının Həmrəylik Günü münasibəti ilə təbrik edib. Məlumat üçün qeyd edək ki, dövlət başçısının bu təbriki xarici ölkələrdə yaşayan soydaşlarımız üçün bir fəaliyyət proqramı kimi qəbil edilə bilər. Ona görə ki, təbrikdə xaricdəki soydaşlarımızla yanaşı, Azərbaycan dövlətinin də üzərinə düşən vəzifələr əksini tapıb: “Azərbaycan dövləti dünyanın müxtəlif ölkələrində yaşayan azərbaycanlılar arasında birlik və həmrəyliyin möhkəmləndirilməsini, onların mütəşəkkil, çevik və təsirli qüvvəyə çevrilməsini vacib vəzifə olaraq daim diqqətdə saxlayır, bu mühüm prosesə hərtərəfli dəstək verir. Diaspor quruculuğu sahəsində aparılan işlər artıq öz müsbət nəticələrini verməkdədir. Bu gün soydaşlarımız yaşadıqları dövlətlərin sosial-iqtisadi, ictimai-siyasi və mədəni həyatına hərtərəfli inteqrasiya olunur, ölkəmizin beynəlxalq əlaqələrinin genişlənməsinə fəal yardım göstərirlər. Azərbaycan reallıqlarının dünyaya təqdim olunmasında, zəngin və çoxşaxəli mədəni irsimizin təbliğində, erməni millətçilərinin qərəzli ideoloji fəaliyyətinin qarşısının alınmasında diaspor təşkilatlarımızın rolu danılmazdır. Biz xaricdəki həmvətənlərimizin dost ölkələrin lobbi və diasporları ilə sıx əməkdaşlığının qurulmasına da ciddi önəm verir, bu sahədə irəli sürülən təşəbbüsləri, atılan addımları həmişə birmənalı şəkildə müdafiə edirik”. Etiraf edilməlidir ki, Azərbaycan prezidentinin bu fikirləri dünya azərbaycanlılarının yaşadıqları ölkələrdə cəsarətli fəaliyyəti üçün stimul vermiş olur. Daha dəqiq, soydaşlarımız dövlət başçısının dilindən səslənən bu fikirləri analiz etdikdə özlərində bir arxa, dayaq hiss etmiş olurlar: “Müstəqil Azərbaycan Respublikası bütün dünya azərbaycanlılarının doğma yurdu və etibarlı dayağıdır. Onu göz bəbəyi kimi qorumaq və gücləndirmək hər birimizin ümdə vəzifəsidir. Hazırda ölkəmiz öz inkişafının keyfiyyətcə yeni mərhələsinə qədəm qoymuşdur. Ötən illər ərzində həyata keçirilən islahatlar sabit və dayanıqlı hüquqi-siyasi sistemin, güclü iqtisadi potensialın yaranmasına gətirib çıxarmışdır. Bu il Azərbaycan iqtisadiyyatı dövrün çətin sınağından uğurla çıxmış, bütün dünyanı bürüyən ağır böhrana baxmayaraq yüksələn xətlə irəliləməkdə davam etmişdir. İndi biz cəsarətlə bəyan edirik ki, ölkəmizdə sosialist iqtisadiyyatından bazar münasibətləri sisteminə keçid dövrü başa çatıb, həmin mərhələyə xas olan problemlər həll olunmuşdur. Bütün bunlar xalqımızın rifah halının yüksəldilməsinə, sosial tələbatlarının ödənilməsinə, elm və mədəniyyətimizin tərəqqisinə, vətəndaşlarımızın hüquq və azadlıqlarının davamlı təmin olunmasına münbit şərait yaradır”. Etiraf edilməlidir ki, artıq Azərbaycan dövləti dünyada söz sahibinə çevrilib və xaricdə yaşayan soydaşlarımız da bunu dərk edırlər. Bu isə həmvətənlərimizin daha da fəal və prinspial fəaliyyətinə stimul vermiş olur. Soydaşlarımız dərk edir ki, artıq Azərbaycan dövləti qarşısına çıxan bütün çətinlikləri uğurla dəf edə bilir. Məhz dövlətlə xarici ölkələrdə fəaliyyət göstərən diaspora təşkilatlarımızın “çəkici bir zindana vurması” nəticəsində Azərbaycanın ümummilli problemi olan Dağlıq Qarabağ məsələsini həll etmək mümkün olacaq: “Bu gün bizi narahat edən yeganə problem Ermənistan-Azərbaycan, Dağlıq Qarabağ münaqişəsinin aradan qaldırılmaması, ölkəmizin ərazi bütövlüyünün bərpa olunmamasıdır. Biz bu mürəkkəb, ağrılı məsələnin sülh yolu ilə ədalətli həllinə nail olmaq üçün bütün zəruri tədbirləri görürük. Düşünürəm ki, gənc respublikamızın inkişafı yolunda əsas maneə olan bu problemin tezliklə həlli Azərbaycan dövləti ilə yanaşı bütün həmvətənlərimizin də qarşısında mühüm vəzifə kimi durur. Buna görə də ürəyi Vətən sevgisi ilə döyünən dünya azərbaycanlıları bu istiqamətdə öz səylərini gücləndirməli, problemin mahiyyətini xarici ölkələrin hökumət və ictimaiyyətinə, beynəlxalq təşkilatlara çatdırmaq üçün daha məqsədyönlü fəaliyyət göstərməlidirlər”. Dövlət başçısının bu tövsiyyələrindən sonra qalır diaspora təşkilatlarımızın daha da fəallaşaraq hücum taktikasını həyata keçirmək istiqamətində əməli addımlar atması. Məhz bundan sonra diaspor təşkilatlarımız dünyadakı proseslərin nəbzini tutaraq öz çevikliyini artırmalı, digər xalqların diaspor mərkəzləri ilə səmərəli əməkdaşlığın yeni formalarını tapmalı, ölkəmiz əleyhinə yönəlmiş təxribatlara qarşı operativ və adekvat addımlar atmalıdırlar. Artıq bunun üçün həm mənəvi, həm də maddi imkanlar kifayət qədərdir. Soydaşlarımızın Milli Həmrəylik Gününü birlikdə təntənəli şəkildə qeyd etmələri buna əyani sübutdur.

Bu günlərdə Rusiya paytaxtında 31 Dekabr - Dünya Azərbaycanlılarının Həmrəylik gününə həsr olunan möhtəşəm tədbir keçirilib. Ümumrusiya Azərbaycan Konqresi tərəfindən təşkil olunan tədbirdə ÜAK prezidenti Məmməd Əliyev, Azərbaycanın Rusiyadakı səfiri Polad Bülbüloğlu, Azərbaycan Prezident Administrasiyasının nümayəndəsi Şakir Səlimov və Rusiya regionlarındakı Azərbaycan diasporunun rəhbərləri iştirak ediblər. Tədbirdə şıxış edən Azərbaycanın Rusiyadakı səfiri Polad Bülbüloğlu Rusiyada yaşayan azərbaycanlıları Həmrəylik Günü münasibətilə təbrik edərək il sonunda yekun bayram tədbirinin dekabrın 24-də, Azərbaycan prezidenti İlham Əliyevin doğum günündə keçirilməsinin gözəl ənənə olduğunu vurğulayıb. Səfir Azərbaycan-Rusiya münasibətlərinin gündən-günə inkişaf etdiyini və hazırda yüksək səviyyədə olduğunu söyləyib: “Azərbaycan hər zaman Rusiyanın yanında olub, indi də Rusiyanın yanındadır. Rusiya hazırda çox çətin dövrünü yaşayır. Azərbaycan bu gün Rusiyanı dəstəkləyir. Bu, özünü iki ölkə arasındakı iqtisadi əməkdaşlıqda da göstərir. Rusiyadakı azərbaycanlıların çoxu bu ölkənin vətəndaşlarıdır. Onlar Rusiya ilə birlikdə bu çətinlikləri keçirir”.

Azərbaycanın Qırğızıstan Respublikasındakı Səfirliyinin və Qırğız-Türk "Manas" Universitetinin təşəbbüsü ilə Dünya Azərbaycanlılarının Həmrəyliyi Günü münasibətilə "Azərbaycan Günü" adlı tədbir keçirilib. Tədbirdə Qırğızıstan Respublikası Prezidenti Aparatının, Hökmətinin təmsilçiləri, Parlamentin deputatları, bu ölkədə akkreditə olunmuş diplomatik nümayəndəliklərin rəhbərləri, ictimai-siyasi xadimlər, universitetin professor-müəllim heyəti, Azərbaycan diasporunun üzvləri iştirak ediblər. Tədbirin əvvəlində iştirakçılar universitetin foyesində Azərbaycanın tarixi, mədəniyyəti, turizmi, müxtəlif sahələrdə inkişafından bəhs edən və Ermənistan-Azərbaycan, Dağlıq Qarabağ münaqişəsi ilə bağlı kitab sərgisi ilə tanış olublar. Sonra Azərbaycanlıların Həmrəyliyi Günündən bəhs edən sənədli film nümayiş olunub.Azərbaycanın Qırğızıstanda fövqəladə və səlahiyyətli səfiri Hidayət Orucov Dünya Azərbaycanlılarının Həmrəyliyi Günü haqqında geniş məlumat verib. Səfir bildirib ki, dünyada əlli milyonluq Azərbaycan xalqının taleyi belə gətirib ki, yalnız doqquz milyona yaxını öz milli dövlətinin vətəndaşıdır, qırx milyondan çoxu isə ya başqa dövlətin ərazisinə daxil edilib öz tarixi-etnik torpaqlarında, ya da Qırğızıstandakı kimi diaspor şəklində yaşayırlar.Xaricdə yaşayan soydaşlarımızın bütün problemləri Azərbaycan Prezidenti İlham Əliyevin diqqət mərkəzindədir. Dövlətimiz bu sahədə perspektivli siyasət aparır və yaxşı nəticələr qazanılır.

Texas ştatının Hyuston şəhərində də fəaliyyət göstərən Azərbaycan Amerika Mədəniyyət Alyansı tərəfindən 31 dekabr-Dünya Azərbaycanlılarının Həmrəylik Gününə həsr olunmuş bayram tədbiri keçirilib. Tədbirdə çıxış edən təşkilatın direktoru İsmayıl Əhmədov bu bayramın Hyustonda yaşayan azərbaycanlılar tərərfindən böyük qürurla keçirildiyini bildirib. AACA direktoru çıxışı zamanı qonaqlara Dağlıq Qarabağ problemi, Ermənistanın işğalçılıq siyasəti barədə də məlumatlar verib.

Polşanın Lodz Universitetində təhsil alan bir qrup azərbaycanlı tələbə Azərbaycanın bu ölkədəki səfirliyinin təşəbbüsü və dəstəyi ilə həmin ali təhsil ocağında Dünya Azərbaycanlılarının Həmrəyliyi Gününə həsr olunan tədbir keçirib.Tədbirdə universitetin müəllim və tələbə heyəti, Polşada yaşayan azərbaycanlılar, xarici tələbələr və yerli ictimaiyyətin nümayəndələri iştirak ediblər. Səfir Həsən Həsənov çıxış edərək Həmrəylik Gününün tarixi haqqında məlumat verib. Tədbirdə Azərbaycan haqqında məlumat xarakterli videoçarx nümayiş etdirilib, milli geyimlərimizdə rəqslər ifa edilib. Sonda Azərbaycan milli mətbəxi nümunələrindən ibarət ziyafət verilib.

Bern şəhərinin ən məşhur konsert salonlarından olan Kursaalda Azərbaycanın İsveçrədəki Səfirliyinin təşkilatçılığı ilə Dünya Azərbaycanlılarının Həmrəylik gününə və Yeni ilin gəlişinə həsr olunmuş bayram tədbiri keçirilib. Tədbirdə İsveçrənin dövlət orqanlarının nümayəndələri, deputatlar, diplomatik korpusun rəhbərləri və üzvləri, şirkət rəhbərləri, Bernin tanınmış simaları, o cümlədən İsveçrədə yaşayan Azərbaycanlılar iştirak ediblər. Səfir Əkrəm Zeynallı Azərbaycan-İsveçrə münasibətlərində baş vermiş əsas hadisələrə nəzər salaraq qarşılıqlı dostluq münasibətlərinin ildən-ilə güclənməsini vurğulayıb. O, iki ölkə arasında siyasi, iqtisadi və mədəni sahədə əldə edilmiş uğurların növbəti illərdə də davam etdiriləcəyinə inamını bildirərək, Azərbaycanın təkcə karbohidrogen ehtiyatlarla deyil, həmçinin zəngin mədəni irsə malik olduğunu qeyd edib, Azərbaycan musiqisi barədə qonaqlara geniş məlumat verib.

Göründüyü kimi Dünya Azərbaycanlıların Həmrəylik Günü mədəniyyətimizin təbliği ilə yanaşı, dövlətlər arasında siyasi, iqtisadi və humanitar sahədə əməkdaşlığın artmasına xidmət edir. Bu isə diaspor təşkilatlarımıza Azərbaycan həqiqətlərinin dünya ictimaiyyətinə çatdırılması üçün əlavə imkanlar yaratmış olur.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 27-29 dekabr.- S.4.