“Bizim ətrafımızda birləşən bütün diaspor

təşkilatları dövlətçiliyimizə, Prezidentimizə

tam dəstək nümayiş etdirirlər”

Nüsrət Məmmədov: “Hər şey dövlətimiz üçün, hər şey Prezidentimiz üçün” devizi diaspor təşkilatlarının qarşısında duran əsas vəzifələrdən biri olmalıdı"

Azərbaycanın üzləşdiyi problemlər, Ermənistanın təcavüzkarlıq siyasəti, eləcə də zəngin tarixi-mədəni irsimizin təbliği istiqamətində müntəzəm olaraq yeni-yeni layihələr həyata keçirən, tədbirlər təşkil edən Türkdilli Dövlətlərin Siyasətinə Dəstək Fondu bu günlərdə daha bir yeni layihəyə start verib. “İlham Əliyev Dünya Azərbaycanlılarının prezidentidir” adlı yeni layihənin məqsədləri, layihə çərçivəsində görüləcək işlər, atılacaq addımlar barədə fondun prezidenti Nüsrət Məmmədov “OLAYLAR”-a müsahibə verib. O, hazırda Qırğızıstandakı Azərbaycan diasporunun durumu, rəhbərlik etdiyi Türkidlli Dövlətlərin Siyasətinə Dəstək Fondunun cari il ərzində həyata keçirəcəyi tədbirlər, görəcəyi işlər barədə də danışıb.

-Nüsrət müəllim, Türkdilli Dövlətlərin Siyasətinə Dəstək Fondu olaraq “İlham Əliyev Dünya Azərbaycanlılarının prezidentidir” adlı yeni bir layihəyə start verirsiniz. Bu layihənin başlıca məqsədi nədir və layihə çərçivəsində hansı işlər görüləcək?

-Türkdilli Dövlətlərin Siyasətinə Dəstək Fondu olaraq başladığımız “İlham Əliyev Dünya Azərbaycanlılarının prezidentidir” adlı layihə yəhudi diaspora təşkilatlarının işini ciddi araşdırmağımızın nəticəsidir. “İlham Əliyev Dünya Azərbaycanlılarının Prezidentidir” layihəsi düşünürük ki, Prezidentimizin nüfuz dairəsini daha da genişləndirəcək. Bildiyiniz kimi hazırda dünya ölkələrindən bizi istəyənlər olduğu kimi istəməyənlər də var. Bu layihə çərçivəsində həmin problemi aradan qaldırılacğının şahidi olacağıq. Bu gün dünyanın bir çox ölkələrində Azərbaycan diaspor təşkilatları fəaliyyət göstərir. Layihə bütün diaspor təşkilatlarının Prezidentimiz İlham Əliyev ətrafında daha da sıx birləşməsinə kömək edəcək. Bir sıra dövlətlərdə bizi istəməyən qüvvələrin səyi nəticəsində mətbuatda haqqımızda nəşr edilən neqativ yazılara ciddi şəkildə təpkilər veriləcək. Güclü Prezident, güclü diaspora prinsipi öz əyanı təsdiqini tapacaq. Düzdür bu sahədə Azərbaycan Respublikası Diasporla İş üzrə Dövlət Komitəsi mühüm işlər görür. Düşünürük ki, diaspora təşkılatlarının müstəqil şəkildə apardığı bu layihə komitə tərəfindən də dəstəklənəcək. Çünki biz bir fond olaraq Dövlət Komitəsi ilə birgə çalışırıq. Tədbirlər planımızı da Diasporla İş üzrə Dövlət Komitəsi ilə razılaşdırırıq.

-Yəqin ki, layihə barədə diaspor təşkilatları da məlumatlandırılacaq?

-Əlbəttə, layihənin həyata keçirilməsi üçün biz dünyadakı bütün Azərbaycan diaspor təşkilatlarına layihənin mahiyyəti haqqında məlumat verəcəyik. Eyni zamanda Prezident İlham Əliyevin həyat və fəaliyyəti haqqında olan bir çox materialları sosial şəbəkələrdə yayacağıq. Diaspor təşkilatlarımızdan xahiş edəcəyik ki, onlar da öz növbələrində həmin materialları sosial şəbəkələrdə paylaşsınlar.

-Layihənin icra müddəti nə qədər olacaq?

-Layihə bir il ərzində davam edəcək. Layihənin sonunda ən aktiv diaspor təşkilatına Türkdilli Dövlətlərin Siyasətinə Dəstək Fondunun fəxri fərmanı təqdim olunacaq. Həmçinin ikinci yerə çıxan diaspor təşkilatı isə qiymətli hədiyyə ilə mükafatlandırılacaq

-Belə çıxır ki, diaspora təşkilatları arasında dovlətçilik və prezidentə qarşı fəaliyyət göstərən insanlar da var?

-Əlbəttə var. Məncə bu böyük sirr deyil, hamıya məlum bir məsələdir. Bu cür diaspor təşkilatlarını başa salmaq lazımdır. Onlara ortaya qoyduqları mövqelərinin xalqımıza, dövlətimizə, prezidentimizə heç bir xeyir gətirməyəcəyini demək lazımdır.

-Bəs layihə çərçəvəsində hansı tədbirlərin keçirilməsi nəzərdə tutulur?

-“İlham Əliyev Dünya Azərbaycanlılarının prezidentidir” layihəsi çərçıvəsində bir sıra tədbirlərin keçirilməsi nəzərdə tutulur. Məsələn, hər ayın axırında yaradılacaq monitorinq qrupunun hesabatı açıqlanacaq. Hesabatın nəticəsi olaraq isə aktiv diaspor təşkilatlarının qeydiyyatını aparmaq nəzərdə tutulur.

-Konkret olaraq Qırğızıstandakı diaspora təşkilatları dovlətçilik və onun prezidentinə tam dəstək nümayiş etdirirlərmi?

-Elə düşünürəm ki, bizim ətrafımızda birləşən bütün diaspor təşkilatları dövlətçılıyimizə, Prezidentimizə tam dəstək nümayiş etdirirlər.

-Türkdilli Dövlətlərin Siyasətinə Dəstək Fondu olaraq cari il uçun hansı addımlar atmaq və tədbirlər keçirməyi düşünürsünüz?

-Türkdilli Dövlətlərin Siyasətinə Dəstək Fondunun 2014 cü ilin yanvar-iyun ayları üçün keçirəcəyi tədbirlər artıq müəyyənləşib. Göstərilən müddət ərzində fondumuz tərəfindən bir sıra tədbirlərin keçirilməsi nəzərdə tutulur. Artıq həmin tədbirlərin bir neçəsi keçirilib. Belə ki, tədbirlər 20 yanvar faciəsinin 24-cü ildönümü ilə əlaqədar olaraq Bişkek kitabxanalar sisteminin baş ofisində akademik Ramiz Mehdiyevin 20 yanvar hadisələrini özündə əks etdirən “Azərbaycanlılara qarşı soyqırım gerçəkliyi” kitabını oxuculara paylanmasını təşkil etdik. Onu da qeyd edim ki, Bişkek kitabxanalar sisteminə 35 kitabxana daxildir. Akademik Ramiz Mehdiyevin sözügedən kitabı da fondumuz tərəfindən qırğız və rus dillərində nəşr etdirilib. Burada da məqsədimiz Azərbaycan xalqının başına gətirilən müsibətləri təfərrüatı ilə Qırğızstan ictimaiyyətinə çatdırmaqdır. 26 fevral Xocalı soyqırımının 22-ci ildönümü münasibəti ilə bağlı da tədbirlər planı hazırlayırıq. Qırğız dilinə tərcümə olunub dublyaj etdirdiyimiz “Xoca” filminin Qırğızıstan televiziya kanallarında göstərilməsinə nail olmaq istəyirik. Bindan başqa Qırğızıstan oxucularına Azərbaycan Milli Elmlər Akademiyasının müəlliflər qrupu tərəfindən yazılmış və Türkdilli Dövlətlərin Siyasətinə Dəstək Fondunun Bişkekdə ingilis və rus dillərində nəşr etdirdiyi “Ermənilərin Azərbaycan torpaqlarında törətdikləri vəhşiliklər tarixi faktlarla” kitabının qırğız ictimaiyyəti arasında yayılması planlaşdırılır. Mart ayının ikinci ongünlüyündə isə Fond tərəfindən Azərbaycanın xalq yazıçısı Anarın Bişkekdə 75 illik yubileyinin keçirilməsi nəzərdə tutulur. Tədbir çərçivəsində yazıçının atası Rəsul Rzanın seçilmiş əsərlərinin birinci cildinin qırğız dilinə tərcüməsi üzərində iş aparırıq. Məlumat üçün qeyd edim ki, əsərin qırğız dilinə tərcüməçisi Mukan Asanaliyev. Elə həmin ərəfədə yazıçı Kamal Abdullanın “Yarımçıq əlyazma” romanının Türkdilli Dövlətlərin Siyasətinə Dəstək Fondunun və Qazaxıstandakı Azərbaycan Mədəniyyət Mərkəzlər İttifaqının sifarişi ilə qırğız dilinə tərcümə olunub nəşr edilmiş kitabının təqdimatı nəzərdə tutulur. Mart ayının 20-22 də isə ənənəvi olaraq Novruz bayramı münasibəti ilə tədbir keçirməyi planlaşdırırıq. Mart ayının sonu, aprel ayının əvəllərində isə Bakıda Muxtar Şaxanov, Oljas Suleymanov, İlgiz Aytmatov və bir sıra Qazaxıstan və Qırğızıstanın tanınmış şəxslərinin iştirakı ilə “Правдоформула и восхождение на эверест любви” Эссе о друге-брате Ч.Айтматове” ("Həqiqət formulu və sevginin Everest zirvəsindəki təntənə") kitabının təqdimatı keçiriləcək. Fond tərəfindən Azərbaycan dilinə tərcümə edilmiş kitabının Bakıda təqdimatının geniş səviyyədə keçirilməsi nəzərdə tutulur. Hazırda kitab Fondun sifarişi və maliyə dəstəyi ilə Bakıda Azərbaycan dilinə tərcümə olunur. Mart ayının 31-də millət vəkili Adil Əliyevin ideya müəllifi olduğu “Erməni soyqırımı, mif və həqiqətlər” kitabının qırğız dilində nəşri və təqdimatını nəzərdə tuturuq. Aprel ayında isə tanınmış yazıçı və pedaqoq Mir Cəlalın doğum günü münasibəti ilə yazıçının qırğız dilinə tərcümə elətdirib nəşr etdirdiyimiz “Seçilmiş əsərlərinin” 3 cildliyinin oxuculara paylanması planlaşdırılır. Burada da məqsəd Mir Cəlalın Qırğız oxucularına daha da yaxından tanıdılmasıdır. May ayında Ulu Öndərimizin doğum günü münasibəti ilə “Heydər Əliyev və Türk dünyası” elmi nəzəri konfransının keçirilməsi qarşıda duran vəzifələr sırasındadır. Eyni zamanda Fond tərəfindən nəşr edilən Ulu öndərimizə həsr olunan kitabların sərgisini keçirmək və kitabların oxuculara paylanmasını planlaşdırırıq. May ayının sonlarında Azərbaycanın müsəqillik günü münasibəti ilə tarixçi alim Güntəkin Nəcəflinin fond tərəfindən nəşr etdirdiyi “Azərbaycan XVIII-XIX əsrlərdə” kitabının Bişkek kitabxanalar sisteminin oxucularına paylanması nəzərdə tutulur. Görəcəyimiz bütün bu işlər Prezidentimiz İlham Əliyevin dünya Azərbaycanlılarının 3-cü qurultayında səsləndirdiyi müdafiə taktikasından hücum taktikasına keçmək tövsiyyəsinə uyğun olaraq həyata keçiriləcək.

-Sizcə, bu gün Azərbaycan diasporunun qarşısında duran əsas vəzıfe nə olmalıdır?

-“Hər şey dövlətimiz üçün, hər şey Prezidentimiz üçün” devizi diaspor təşkilatlarının qarşısında duran əsas vəzifələrdən biri olmalıdır. Prezidentimizin nüfuzu nə qədər çox olsa, dövlətimiz də bir o qədər güclü olar.

-Qarşıdan Xocalı faciəsinin ildönumu gəlir. Bu məqsədlə Qırğızıstanda hansısa bir tədbir keçirəcəksinizmi?

-Yuxarıda da qeyd etdiyim kimi Türkdilli Dövlətlərin Siyasətinə Dəstək Fondu olaraq ənənəmizə sadiq qalaraq bu il də Xocalı soyqırımının 22-ci ildönümü ilə əlaqədar olaraq Qırğızıstanda bir sıra tədbirlərin keçirilməsi planlaşdırılır.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 12 fevral.- S.15.