Hollandiyada yeni bir

diaspor təşkilatı yaradıldı

Elxan Mirhəşimli: “Məqsədimiz Hollandiyada Azərbaycan diasporunu sözün həqiqi mənasında birlik və həmrəylik şəklində fəaliyyətə gətirməkdir”

“Çalışacağıq ki, Azərbaycan diasporasına maksimum dərəcədə öz töhfələrimizi verək”

Bu günlərdə Niderland Krallığında daha bir Azərbaycan diaspor təşkilatı fəaliyyətə başlayıb. “Hollandiya Azərbaycan Evi” adlı yeni təşkilat krallığın şimal hissəsini əhatə edir. Təşkilatın yaranma zərurəti, qarşısına qoyduğu məqsəd və vəzifələr, eləcə də yaxın vaxtlarda həyata keçirəcəyi tədbirlər barədə “Hollandiya Azərbaycan Evi” Təşkilatının sədri Elxan Mirhəşimli ilə söhbətləşdik. “OLAYLAR”-a verdiyi müsahibədə Elxan Mirhəşimli Niderland Krallığındakı Azərbaycan diasporunun vəziyyəti, diasporumuzun Holland cəmiyyətinə inteqrasiyası istiqamətində atılan addımlar, eləcə də Azərbaycan həqiqətləri, Ermənistan-Azərbaycan, Dağlıq Qarabağ münaqişəsinin dünya ictimaiyyətinə çatdırılmasında diaspor təşkilatları tərəfindən atılması vacib olan addımlar barədə də danışıb.

-Elxan bəy, “Hollandiya Azərbaycan Evi” Təşkilatının yaradılması hansı zərurətdən meydana çıxdı?

‑Niderland Krallığının şimal bölgəsində 100-ə yaxın həmvətənlərimiz yaşayır. Ancaq onlari bir yerə yığmaq üçün bir təşkilat yoxdur. Təşkilatlar əsasən Rotterdam, Den Haaq, şəhərlərində yerləşdiyi üçün gediş-gəliş bir qədər çətin olur. Təxminən 600 kilometr məsafəni qət edə bilmədikləri üçün bir çox insan tədbirlərə qoşula bilmirlər. Mən də ayrı- ayrılıqda bu bölgədə olan həmvətənlərimizlə görüşüb söhbətlər etdim və bu bölgədə “Holllandiya Azərbaycan Evi” Təşkilatını təsis etməyə qərar verdim. Həmyerlilərimiz bunu çox müsbət qarşıladılar.

-“Hollandiya Azərbaycan Evi” Təşkilatı olaraq qarşınıza qoyduğunuz başlıca hədəflər, məqsədlər, fəaliyyət istiqamətləri hansılardır?

-Məqsədimiz Niderland-Azərbaycan arasında dostluq körpüsü yaratmaqdır. Avropalılara öz mədəniyyətimizi, tariximizi, kimliyimizi tanıtdırmaq, Azərbaycan haqqında pozitiv rəy formalaşdırmaqdır. Burada yaşayan azərbaycanlıların, əsasən gənclərin öz kimliklərini unutmamalarına çalışmaq istəyirik. Çünki gənc nəsil yetişir. Biz də Hollandiyada onları təşkilatımıza cəlb edib gənclərin potensialından yararlanmağı düşünürük.

-Yəqin ki, Azərbaycan həqiqətləri, Dağlıq Qarabağ problemi, Xocalı soyqırımı kimi məsələlərin dünya icimaiyyətinə çatdırılmasına da diqqət ayrılacaq?

-Heç şübhəsiz. Ümumiyyətlə, ölkədən kənarda yaşayan hər bir insan kimliyindən, siyasi mənsubiyyətindən asılı olmayaraq Azəbaycanın haqq səsinin dünyaya çatdırılması işində fəal olmalıdır. Dağlıq Qarabağ, Xocalı soyqırımı kimi məsələlər bizim ümummilli problemimiz olduğu üçün hər bir fərd bu istiqamətdə çalışmalıdır. Azərbaycandan kənarda yaşayan hər bir həmyerlimiz bunu özünün vəzifə borcu bilməlidir. Hər kəs bu istiqamətdə əlindən gələni əsirgəməməlidir. Təbii ki, biz də “Hollandiya-Azərbaycan Evi” Təşkilatı olaraq ermənilərin işğalçılıq siyasəti, 20 faizə yaxın ərazilərimizin hazırda erməni işğalı altında olması, Xocalı soyqırımının beynəlxalq miqyasda tanıdılması istiqamətində müvafiq tədbirlər keçirəcəyik. Fəaliyyətimiz dövründə zaman-zaman yuxarıda qeyd edilən məsələlərlə bağlı dəyirmi masalar, konfranslar təşkil edəcəyik. Hesab edirəm ki, Azərbaycandan kənarda fəaliyyət göstərən hər bir diaspor təşkilatı bu kimi məsələlərdə bir qədər də aktivlik nümayiş etdirsə biz daha çox uğurlara imza atmış olarıq. Azərbaycan xalqının başına gətirilən müsibətlərin dünya ictimaiyyətinə çatdırılması, ona hüquqi-siyasi qiymətin verilməsi üçün yorulmadan çalışmalıyıq. Çünki bizim görüləsi işlərimiz hələ çoxdur. Nəyə görə, ermənilər olmayan bir hadisəni soyqırım kimi qələmə verib onu az qala dünyanın hər bir yanında tanıda bilir, ancaq biz yaxın keçmişdə, hər kəsin gözü qarşısında Xocalıda ermənilər tərəfindən törədilən soyqırımı hələ də tam mənada beynəlxalq ictimaiyyətə çatdıra, onun tanınmasına nail ola bilmirik. Deməli, bunun üçün hələ bizim çox işləməyimiz lazımdır.

-Siz “Hollandiya Azərbaycan Evi” Təşkilatı olaraq bir növ diaspor təşkilatı funksiyası yerinə yetirəcəksiniz. Ümumilikdə təşkilat kimi Azərbaycan diasporuna hansı töhfələri verməyi nəzərdə tutursunuz?

-Bəli biz “Hollandiya Azərbaycan Evi” Təşkilatı olaraq diaspora və lobbiçilik fəaliyyətlərini həyata keçirəcəyik. Təşkilat olaraq çalışacağıq ki, Azərbaycan diasporasına maksimum dərəcədə öz töhfələrimizi verək. Biz öz fəaliyyətlərimizlə diaspor hərəkatına töhfələrimizi verməyə çalışacağıq.

-Hollandiyada yaşayan soydaşımız olaraq hazırda Azərbaycan diasporunun fəaliyyətini necə qiymətləndirirsiniz. Diasporumuz sözün həqiqi mənasında birlik və həmrəylik şəklində fəaliyyət göstərirmi?

-Dünyanın hər bir ölkəsində olduğu kimi Hollandiyada da Azərbaycan diasporası fəaliyyət göstərir. Sevindirici hal ondan ibarətdir ki, bu ölkədəki Azərbaycan diaspor təşkilatları ildən ilə daha da güclənirlər. Ancaq onu da etiraf edim ki, diasporumuzun fəaliyyəti məni o qədər də qane etmir. Düzdür təşkilatlar çətin şərtlərdə çalışırlar, maliyyə problemi səbəbindən bir çox layihələrini həyata keçirə bilmirlər. Ancaq bütün çətinliklərə, maliyyə sıxıntılarına baxmayaraq fəaliyyətlərini davam etdirirlər və təmsil etdikləri təşkilatlarını öz güclərinə ayaqda tuturlar. Mən şəxsən bunu çox yüksək qiymətləndirirəm. Bütün təşkilatlara öz gələcək işlərində uüurlar arzulayıram. Bizim yeni yaradılmış bir təşkilat olaraq məqsədimiz də bütün təşkilatlarla bərabər Hollandiyada Azərbaycan diasporunu sözün həqiqi mənasında birlik və həmrəylik şəklində fəaliyyətə gətirməkdir.

-Bəs Hollandiyada Azərbaycan diasporunun fəaliyyətini qənaətbəxş hesab etmək olarmı?

-Xeyir. Şəxsən mən bir təşkilat rəhbəri olaraq Hollandiyada diasporanın fəaliyyətini qənaətbəxş hesab etmirəm. Düşünürəm ki, diaspor təşkilatları olaraq daha çox işlər görə bilərik. Çünki bunun üçün potensial var. Həmçinin hədəfimizdə məlumdur. Sadəcə görülən işlərə dəstək vermək və daima işləmək lazimdir. Özü də işlər planlı şəkildə olmalıdır, pərakəndə halda deyil. Biz öz problemlərimizi, dərdimizi artıq bilirik. Artıq bağlı qapılar arxasında özümüzün deyib özümüzün eşitdiyi bəs edər. Hesab edirəm ki, bundan sonra qapılari açıb digər holland təşkilatları və qurumlarla çalışmaq zamanıdır. Məlumat üçün qeyd edim ki, Hollandiyadakı erməni diaspor təşkilatları, eləcə də sıravi ermənilər Holland təşkilatları ilə çalışırlar. Hazırda Hollandiyada elə vətəndaşlarımız var ki, onların potensialından nədənsə heç kim faydalanmaq istəmir. Misal üçün soydaşımız Vüqar Abbasovu deyə bilərəm. Vüqar Abbasov bir təşkilatın işini təkbaşına görür. Eyni zamanda başqa həmyerlilərimizin də adlarını çəkmək mümkündür.

-Sizcə Azərbaycan diasporu ölkəmizin üzləşdiyi problemlər, Qarabağ münaqişəsi, Xocalı soyqırımı kimi məsələləri beynəlxalq ictimaiyyətə tam mənada çatdıra bilirmi?

-Ermənistan-Azərbaycan, Dağlıq Qarabaq münaqişəsi bizim ağrılı, bir nömrəli problemimizdir. Ona görə də Azərbaycandan kənarda yaşayan hər bir azərbaycanlı kimi məqsədimiz hər zaman erməni millətçilərinin torpaqlarımızın 20 faizini işğal etməsini, 1 milyona yaxın qaçqın və məcburi köçkünün öz yurd-yuvalarından didərgin düşməsi, ermənilərin Azərbaycan türklərinə qarşı tarixin müxtəlif dövrlərində həyata keçirdikləri terror və soyqırım aktlarını hər zaman holland və Avropa ictimayyətinə çatdırmaqdır.

-Yeri gəlmişkən Xocalı soyqırımının 22-ci ildönümü ilə bağlı təşkilat olaraq hansısa tədbir keçirməyi düşünürsünüzmü?

-Hollandiyada yaşayan azərbaycanlılar olaraq hər il Xocalı soyqırımının ildönümü ilə əlaqədar olaraq anım tədbirləri keçiririk. Bu il də fevral ayının 23-də Den Haag şəhərində Hollandiya-Azərbaycan Türk Kültür Dərnəyinin sədri İlhan Aşkının təşkilatçılığı ilə Xocalı soyqırımının 22-ci ildönümü qeyd ediləcək. Anım tədbirində Niderland Krallığındakı Azərbaycan səfirliyinin nümayəndələri, Hollandiyada fəaliyyət göstərən bütün diaspora təşkilati sədrləri, Mayisə Ağamirzəyeva, Firəngiz Bağırova, Iradə Uluxanlı, “Hollandiya-Azərbaycan Evi” Təşkilatının sədri olaraq mən, eləcə də təşkilat üzvləri iştirak edəcəklər. Bundan başqa Türk Federasiyası və Türk Təşkilatlarındakı yüzlərlə Azərbaycan türkü, ümumiyyətlə bütün vətənsevər dostlarımız Xocalı şəhidlərimizin anma mərasimində bir araya gələcək. Tədbir zamanı Xocalıda amansızcasına qətlə yetirilmiş insanların ruhlarına dualar oxunacaq, onlar yad ediləcək. İnşallah ümid edirik ki, haqq- ədalət tezliklə yerini tapar və bu soyqrımı həyata keçirənlər haqq ədalet qarşısında hüquqi qiymətini alarlar. Qısa müddədə erməni cəlladları öz cəzalarına çatarlar.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 18 fevral.- S.15.