Harada bir Türk varsa, biz oradayıq

Bülənt Gürcam: “Məqsəd həm Türk Cümhuriyyətlərini bir-birilərinə daha

sıx tanıtmaq, həm də onların Avropaya inteqrasiyasına kömək göstərməkdir”

“Diaspor daxilində bir sıra problemlər mövcuddur”

Azərbaycanı Avropada layiqincə təmsil edən diaspor təşkilatlarından biri də “Belçika-Azərbaycan Evi” təşkilatıdır. Yarandığı gündən ölkəmizin üzləşdiyi problemlər, Dağlıq Qarabağ münaqişəsi, eləcə də Xocalı soyqırımının Belçika və dünya ictimaiyyətinə çatdırılması, zəngin tarixi-mədəni irsinin təbliği istiqamətində çalışan “Belçika-Azərbaycan Evi” ötən müddət ərzində qeyd edilən istiqamətlərdə bir sıra uğurlu layihələr də imza atıb. Bir müddət əvvəl isə “Belçika-Azərbaycan Evi” təşkilatı və onun sədri Bülənt Gürcamın rəhbərliyi ilə daha bir yenilik edilib. Belə ki, təşkilat sədri Türkiyədə beynəlxalq əhəmiyyətli bir mətbu orqanın nəşrinə nail olub. Həm yeni işıq üzü görən qəzetin çap edilməsi səbəbi, həm rəhbərlik etdiyi “Belçika-Azərbaycan Evi” təşkilatının mövcud və gələcək fəaliyyəti, həm də Belçikadakı Azərbaycan diasporunun hazırkı durumu barədə adı çəkilən təşkilatın sədri Bülənt Gürcamla söhbətləşdik.

-Bülənt bəy, "Belçika Azərbaycan Evi" olaraq 2014-cü il üçün iş planı tərtib etmisinizmi və təşkilat olaraq cari ildə hansı tədbirlər, layihələr həyata keçirməyi düşünürsünüz?

-“Belçika-Azərbaycan Evi” öz fəaliyyəti ilə Azərbaycanı istər Avropada, istərsə də Türk Dünyasının mərkəzi sayılan Türkiyədə tanıtdırmağa devam edir, Təşkilat olaraq yarandığımız gündən qarşımıza qoyduğumuz məqsəd və vəzifələr də məhz bundan ibarətdir. Fəaliyyət göstərdiyimiz müddətdə qarşımıza qoyduğumuz məqsəd və vəzifələrin reallaşdırılması istiqamətində bir sıra layihələr, tədbirlər həyata keçirmişik. Məlum olduğu kimi bu il Belçikada Avropa Parlementinə seçkilər keçiriləcək. Bunu nəzərə alaraq biz Belçikada Avropa Parlamentinə namizəd olacaq şəxslərlə görüşlər keçirməyi düşünürük Həmin görüşlərdə başlıca məqsədimiz və hədəfimiz isə Avropa Parlamentinə namizədlər arasında Azərbaycanla əlaqədar ciddi işlər görməkdir. Görüşlərin nəticəsi olaraq həmin namizədlərlə ciddi işlər aparılacaq, onlara Azərbaycan ərazilərinin erməni işalına məruz qalması barədə məlumatlar veriləcək. Nəticə etibarilə həmin namizədlərin Avropa Parlamentinə seçiləcəyi təqdirdə Azərbaycana, onun üzləşdiyi problemlərin həllinə nə kimi yardım edəcəkləri barədə təsəvvürlər yaranacaq. Bir sözlə bu kimi görüşlərlə çalışırıq ki, Avropa Parlamentinin üzvü olacaq gələcək deputatlar Azərbaycanın haqq işinə dəstək versinlər.

-Qarşıdan Xocalı soyqırımının 22-ci ildönümü gəlir. “Belçika-Azərbaycan Evi” olaraq Xocalı soyqırımı ilə əlaqədar tədbir keçirəcəksinizmi?

-“Belçika-Azərbaycan Evi” olaraq hər zaman Azərbaycan həqiqətləri, Dağlıq Qarabağ problemi və Xocalı soyqırımının Belçika cəmiyyəti, eləcə də dünya ictimaiyyətinə çatdırılması istiqamətində fəaliyyət göstərmişik. Hər il təşkilat olaraq coyqırımla əlaqədar müxtəlif tədbirlər təşkil etmişik. Bu il də Xocalı soyqırımının 22-ci ildönümü ilə əlaqədar müxtəlif tədbirlər üzərində işləyirik. Məlumat çün deyim ki, Türkiyədə çap edilən və beynəlxalq əhəmiyyətli mətbu orqan kimi tanınan qəzetimizdə Xocalı soyqırımı haqqında geniş məlumatlar yerləşdirəcəyik. Həmin mətbu orqan vasitəsilə beynəlxalq birliyi, dünya ictimaiyyətini Xocalı barədə məlumatlandırmaq istəyirik. Avropaya gəldikdə isə bu barədə nə səfirliklərimiz, nə də Azərbaycan Respublikası Disporla İş üzrə Dövlət Komitəsi hər hansı bir hazırlıq görmədiyindən və əlimizdə bununla bağlı informasiyalar olmadığından təssüflər olsun ki, heç bir proqram barədə düşünmürük.

- Belçikada fəaliyyət göstərən Azərbaycan diaspor təşkilatlarının bilik və həmrəyliyi sizi qane edirmi?

-Xeyr. Təssüflər olsun ki, Belçikada yaşayan azərbaycanlılar arasında birlik və bərabərlik yoxdur. Soydaşlarımız tam əksinə olaraq bölünmüş və parçalanmış vəzyyətdədirlər, Hesab edirəm ki, bunun da başlıca səbəblərindən biri Azərbaycanın Belçikadakı səfirliyinin və Diasporla İş üzrə Dövlət Komitəsinin bu məsələyə diqqət yanaşmamasıdır. Həmçinin ayrı-ayrı cəmiyyətlə arasında ayrıseçkilik edilmə tendensiyası soydaşlarımızın parçalanmasına, birlik və bərabərliyin pozulmasına gətirib çıxarır.

-Sizcə bu gün Azərbaycan diasporunda çatışmayan əsas cəhətlər, problemlər hansılardır?

-Diaspor daxilində bir sıra problemlər mövcuddur. Bu sıraya sahibsizlik, onlara lazım olan diqqətin göstərilməməsi və diaspor təşkilatları ilə əlaqələrın olmaması başlıca problemlər hesab edilə bilər. Eyni zamanda diaspor təşkilatları, onların gördüyü işlər barədə informasiyaların olmamasını da bu sıraya aid etmək mümkündür. Azərbaycan Respublikasının Prezidenti cənab İlham Əliyevin dəfələrlə deməsinə baxmayaraq bu işlə məşğul olan müvafiq qurum və təşkilatlar təssüflər olsun ki, öz üzərilərinə düşən vəzifələri yerinə yetirmirlər. Demək olar ki, hər kəs öz işi ilə məşğuldur. Səfirliklər barədə də eyni şeyi söyləmək olar. Səfilriklər sanki '”yan gəlib yatmaq '' yerinə çevrilib, Əgər qeyd etdiyim problemlər süzəlməsə Azərbaycan diasporunda problemlərimiz hər zaman olacaq.

-Bəs siz bir təşkilat rəhbəri olaraq Azərbaycan diasporunun daha güclü və başarılı fəaliyyət göstərməsi üçün nələri təklif edərdiniz?

-Azərbaycan diasporunun daha güclü fəaliyyət göstərməsi üçün ilk növbədə birlik olmalıdır. Paralel olaraq diaspor təşkilatları, müvafiq qurumlarla normal əlaqə yaradılmalıdır. Bu işə məsul olan nazirlik və digər dövlət qurumları qeyd etdiyim məsələyə xüsusi diqqət yetirməlidir. Hamıya məlumdur ki, Bakıda bununla bağlı çoxsaylı kitablar çap olunur, tədbirlər görülür, milyonlarla vəsait sərf olunur. Ancaq xarici ölkələrdə bunun heç bir effekti olmur. Yəni biz işlərimizi xaricilərə və Dünya ictimaiyyətinə göstərməliyik, Bunun üçünsə lazımı işlər görməliyik. Ancaq Belçikada vəziyyət tamamilə fərqlidir. Hər kəs özünün reklamı üçün çalışır. İş isə ikinci planda qalıb.

-Bəzən belə bir fikri irəli sürülür ki, Azərbaycanın haqq işi uğrunda apardığı mübarizəni artıq Avropanın küçə və meydanlarindan dəyirmi masalar çərçivəsinə və konfrans salonlarina keçirməyin zamanı yetişib. Siz bir diaspor təşkilatının rəhbəri olaraq bu fikirlə razısınızmı?

-Tamamilə düzgün yanaşmadır. Biz “Belçika-Azərbaycan Evi” olaraq bunu illərdir ki, deyirik və imkan daxilində biz belə işləməyə üstünlük veririk. Onsuz da bizim problemlərimizin həllinin dəyirmi masalarin arxasında olduğunun fərqindəyik. Biz Qarabağımızı da elə masa arxasında siyasət həyata keçirənlərin günahı üzündən itirmişik, Dünya bu dəqiqə belə işləyir və ona görə lobbiçiliyin gücünə inanırıq. Eyni zamanda xaricdə yaşayan Azərbaycan diasporasının bu işdə rolunun böyük olduğuna inanırıq. Amma bizim inanmamız kifayət etmir. Gərək ölkə daxilindəkilər də bunu qəbul etsin və xaricdəki diasporaya dəstək olsun.

-Siz həm də bir yazar, mətbuat orqanlarının rəhbərləri kimi tanınırsınız. Bu baxımdan Azərbaycan həqiqətləri və Dağlıq Qarabağ problemi barədə yeni bir kitab üzərində işləyirsinizmi?

-“Beliçka-Azərbaycan Evi” və fərd olaraq mən müntəzəm olaraq qeyd edilən istiqamətlərdə də çalışıram. Məlumat üçün qeyd etmək yerinə düşər ki, mən və rəhbərlik etdiyim “ Belçika-Azərbaycan Evi” ötən müddət ərzində 3 kitab çap etdirmişik. Eyni zamanda bir qəzet nəşr etdiririk. İnternet saytımız var. Bütün bunları yalnız öz imkanlarımız hesabına həyata keçiririk. Ancaq buna baxmayaraq bizim çap etdirdiyimiz kitabları bir səlahiyyətli qurum belə dilə gətirməyib. Bunun isə səbəbi bizə açıqca aydındır. Yəni biriləri gərək səndən xeyir görsün ki, onun müqabilində gördüyün işləri təqdir etsin, sənin adını çəksin. Əks halda sənin gördüyün işlərın onlar üçün heç bir faydası yoxdur. Baxmayaraq ki, gördüyün işlər millət, dövlət və Azərbaycan üçündür.

-Yeri gəlmişkən bir müddət əvvəl belə bir məlumat yayıldı ki, “Belçika-Azərbaycan Evi” Türkiyədə “Türkhaber” adlı qəzet təsis edib. Belə bir qəzet təsis etmək hansı zərurətdən meydana çıxdı və adı çəkilən mətbu orqanı təsis etməkdə qarşıya qoyulan məqsəd nədir?

-“Türkhaber” qəzeti “Harada bir Türk varsa, biz oradayıq” devizi ilə yola çıxıb, Bizim bu qəzeti təsis etməyimizdə məqsəd həm Türk Cümhuriyyətlərini bir-birilərinə daha sıx tanıtmaq, həm də onları Avropaya tanıtmaq və inteqrasiyasına kömək göstərməkdir. Bu günə qədər “Türkhaber” qəzetinin 7 sayı işıq üzü görüb. Hələlik həftədə bir dəfə, 3000 ədəd çap olunur ve pulsuz paylanılır, Qəzetimizin başda Azərbaycan olmaqla bütün Türk Cümhuriyyətlərinə paylanması nəzərdə tutulub.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 20 fevral.- S.15.