Məcnun Kərimovun

xatirə lövhəsi açıldı

Sənətşünaslıq elmləri doktoru, professor Məcnun Kərimovun Azərbaycan Milli Konservatoriyasında xatirə lövhəsinin açılışı olub. Açılış mərasimində mərhum sənətkarın yaxın dostları, ailə üzvləri iştirak edib.

Tədbiri giriş sözü ilə açan Bakı Musiqi Akademiyasının rektoru Fərhad Bədəlbəyli Məcnun Kərimovla bağlı xatirələrini bölüşüb: “Onunla ilk tanışlığımız Şah İsmayıl Xətai ilə bağlı təşkil olunan məclisdə oldu. Həmin məclisdə söz düşdü ki, hansı musiqi səsləndirilsin. Bu zaman Məcnun Kərimov öz ansamblından söz açaraq gördüyü işlərdən də danışdı. O zaman mənə bəlli oldu ki, bu insan böyük yükü çiyinləri üzərində daşıyır. Qədim musiqi alətlərinin bərpası, onların tanıtımı Azərbaycan üçün çox vacib bir iş hesab edilməlidi. Zaman keçdikcə onun yaratdığı ansanbl məşhurlaşmağa başladı. Dövlət tərəfindən ansambla dövlət statusu da verildi. Onun müəllifi olduğu kitablar məncə bizim böyük silahımızdı. Bu kitabda Azərbaycan musiqi alətləri haqda istənilən məlumatı almaq olar. O son dərəcə təvazökar, mülayim xasiyyət bir insan idi. Professor Vidadi Xəlilov da Məcnun Kərimovla bağlı xatirələrini bölüşüb. O, əvəzolunmaz xidmətə malik olan Məcnun Kərimovun sənətə verdiyi töhfələrdən söz açıb: “O sənətə töhfə vermək, onu dirçəltmək, qədim kökləri bərpa etmək üçün yaranıb. O nəinki dost-tanışlar, ailə üzvləri ilə də mülayim davranardı. Çox təmkinli bir insan idi. Daha sonra Məcnun Kərimovun digər yaxınları, qardaşı Kərəm Kərimov da çıxış edib. Qeyd edək ki, M. Kərimov “Azərbaycan Musiqi Alətləri”, “Tarixi yaşadan musiqi alətləri” kitablarının müəllifi olub.

Xatırladaq ki, Məcnun Kərimov sentyabrın 1-i 1945-ci ildə Zəngəzur mahalının Şəki kəndində müəllim ailəsində anadan olub. 1972-ci ildə Üzeyir Hacıbəyov adına Azərbaycan Dövlət Konservatoriyasının «Xalq çalğı alətləri» şöbəsini bitirib. 1991-ci ildən Bakı Musiqi Akademiyasının «Qədim musiqi alətlərinin bərpası və təkmilləşdirilməsi» elmi laboratoriyasının müdiri vəzifəsində çalışıb. 1995-ci ildə «Azərbaycanın qədim simli çalğı alətləri» (tarixi-nəzəri, bərpa və təkmilləşdirmə məsələləri) mövzusu üzrə dissertasiya müdafiə edib. O, Azərbaycan mədəniyyətinə göstərdiyi xidmətlərinə görə 2006-cı ildə Azərbaycan Respublikasının Əməkdar artisti, 2011-ci ildə Xalq artisti fəxri adlarına layiq görülüb.

Olaylar.- 2014.- 28 fevral.- S.9.