Azəbaycan diasporu gənc olmasına

baxmayaraq indiyə qədər çoxlu işlər görüb

Firəngiz Bağırova: “Hollandiyadakı Azərbaycan

diasporunun vəziyyəti məni hərtərəfli şəkildə qane edir”

Bu gün Azərbaycan diasporunun fəaliyyət göstərdiyi ölkələrdən biri də Niderland Krallığıdır. Hazırda bu ölkədə onlarla Azərbaycan diaspor təşkilatı, cəmiyyət və birliklər fəaliyyət göstərir. Belə təşkilatlardan biri də “Odlar Yurdu” Cəmiyyətidir. “Odlar Yurdu” Cəmiyyətinin yaradılması istiqamətində təşkilatlanma işlərinə 2004-cü ildən start verilib. 2007-ci ildə isə cəmiyyət rəsmi olaraq qeydiyyatdan keçib. “Odlar Yurdu” Cəmiyyəti fəaliyyət göstərdiyi bu illər ərzində Azərbaycan həqiqətlərinin dünya ictimaiyyətinə çatdırılması, zəngin tarixi-mədəni irsimizin təbliği, Xocalı soyqırımının Hollandiyada tanıdılması istiqamətində çoxsaylı tədbirlər təşkil edib, layihələr həyata keçirib.

“Odlar Yurdu” Cəmiyyətinin sədri Firəngiz Bağırova ilə söhbətimizdə o rəhbərlik etdiyi qurumun ötən illər ərzində gördüyü işlər və qarşıda duran vəzifələr barədə danışıb. Firəngiz Bağırova “OLAYLAR”-a verdiyi müsahibədə Niderland Krallığındakı Azərbaycan diasporunun vəziyyətindən də danışıb.

-Firəngiz xanım, rəhbərlik etdiyiniz “Odlar Yurdu” Cəmiyyəti nə zamandan fəaliyyət göstərir və təşkilatınızın əsas fəaliyyət istiqamətləri nədən ibarətdir?

-“Odlar Yurdu” Cəmiyyəti 2007-ci ildən rəsmi qeydiyyatdan keçərək təşkilat kimi yaradılıb. Ancaq bu vaxta qədər də təşkilatın yaradılması istiqamətində müəyyən işlər gedirdi. Daha dəqiq desək 2004-cü ildən təşkilatın yaradılması istiqamətində işlərə başlamışıq. Təşklilatın əsas məqsəd və vəzifələrinə gəlincə isə, əsas məqsədimiz ondan ibarətdir ki, hollandları Azərbaycan, Azərbaycan mədəniyyəti ilə tanış etsin. Məlumat üçün qeyd edim ki, bu istiqamətlərdə ötən müddət ərzində çox böyük işlər görülüb, tədbirlər təşkil olunub, layihələr həyata keçirilib. Belə layihələrdən ən yadda qalanı “Sarı gəlin” layihəsidir. Belə ki, hollandlardan ibarət xor qrupu ilə “Sarı Gəlin” musiqisinin Azərbaycan dilində məşqlərini etmişik. Nəticədə Hollandiyanın müxtəlif şəhərlərində holland xoru ilə birlikdə həmin musiqini ifa etmişik. Onu da deyim ki, bu proses 8 ay davam etdi. Çünki hollandlara Azərbaycan dilini öyrətmək lazım idi. Həmin layihəni İsveçrədə də həyata keçirmişik. Eyni zamanda fevral ayında ölkənin müxtəlif yerlərində Xocalı faciəsinə aid səhnəciklər nümayiş etdirilib. Bu layihə isə holland məktəblilərinin iştirakı ilə baş tutub. Səhnəciklərin hazırlanmasına 40-45 holland məktəblisi cəlb edilib. Bütün bunlarla yanaşı Azərbaycanın milli bayramları, Bayraq Günü, Müstəqillik Günü, 15 iyun-Milli Qurtuluş Günü də hər zaman təşkilatımız tərəfindən qeyd edilir. Əsas məqsədim ondan ibarətdir ki, keçirilən bütün tədbirlərə hollandları cəlb edək və onlar da keçirdiyimiz tədbirlərdə bizimlə birlikdə iştirak etsin.

-Keçirdiyiniz tədbirlərə hollandların marağı nə dərəcədədir? Təşkilatınızın keçirdiyi tədbirlər Hollandiyanın kütləvi informasiya vasitələrində işıqlandırılırmı?

-Təşkilatımızın keçirdiyi tədbirlər barədə qəzetlər, eləcə də yaşadığım Assen regionunun televiziya, radiosunda məlumat verilir. Onun simasında Azərbaycanı tanıyan hollandların ölkəmizə marağı daha da artır. Xüsusilə, azərbaycanlıların qonaqpərvərliyi hollandlar tərəfindən müsbət qarşılanır və onlar ölkəmiz barədə daha çox məlumat almaq istəyirlər. Onlar Azərbaycanın musiqisini daha çox sevir, mədəniyyətimizlə yaxından tanış olmağa çalışırlar. Bizi hökumət tədbirlərinə dəvət edərək orada Azərbaycan musiqisinin səsləndirilməsini istəyirlər. Ümumiyyətlə, hollandlar Azərbaycanın musiqisi, mədəniyyətini çox sevirlər.

-Bəs rəhbərlik etdiyiniz təşkilatın qarşıdakı planları, həyata keçirməyi nəzərdə tutduğu layihələr, tədbirlər nədən ibarətdir?

-Məlum olduğu kimi 2015-ci ildə Azərbaycanda I Avropa Oyunları keçiriləcək. Bununla bağlı Hollandiyada fəaliyyət göstərən digər Azərbaycan cəmiyyətləri, təşkilatlarla birlikdə müəyyən layihələrimiz, tədbirlərimiz nəzərdə tutulur. Ona görə də hazırda əsas diqqətimizi bu istiqamətə yönəltmişik. Onu da qeyd edim ki, həmin layihə ilə bağlı yaşadığım Assen bölgəsi üzrə də müəyyən planlarım var. Bununla bağlı yerli bələdiyyə ilə məsləhətləşmə aparmışam. Bakıya gəlməzdən əvvəl bələdiyyədə görüş keçirib layihə ilə bağlı fikir mübadiləsi apardıq. Hollandiyaya qayıtdıqdan sonra yenidən yerli bələdiyyədə görüş keçirib qeyd etdiyim layihə barəfə müzakirələr aparacağıq.

-Həyata keçirməyi nəzərdə tutduğunuz layihə nədən ibarət olacaq?

-Belə bir ideyam var ki, 2015-ci il, I Avropa Oyunları ərəfəsində yaşadığım əyalətdə bir həftə müddətində Azərbaycan həftəsi keçirilsin və bütün şəhər Azərbaycana aid nümunələrlə bəzədilsin. Eyni zamanda şəhərin muzeyləri, ictimai nəqliyyatında Azərbaycan haqqında məlumatlar verilsin. Paralel olaraq şəhərdə quraşdırılan geniş ekranlarda Azərbaycanla əlaqədar süjetlər verilsin. Ümumiyyətlə, bu böyük bir layihədir. Onu da qeyd edim ki, bu layihəni həyata keçirmək üçün müəyyən vaxt və bəlli bir miqdarda vəsait lazımdır.

-Hollandiyada Azərbaycan həftəsinin keçirilməsi yalnız I Avropa Oyunları ərəfəsində baş tutacaq, yoxsa bu layihə davamlı olacaq?

-Azərbaycan həftəsi çərçivəsində tədbirlər I Avropa Oyunları başlayan ərəfədə, oyunlar keçirilən günlərdə və ondan sonra təşkil olunacaq. Ümumiyyətlə, biz çalışacağıq ki, mütəmadi şəkildə Hollandiyada Azərbaycan həftəsi qeyd edək.

-Yaşadığınız Assen şəhərində azərbaycanlıların sayı nə qədərdir və sizin fəaliyyətinizə qarşı ermənilər tərəfindən hansısa maneçilik törətməyə cəhdlər olurmu?

-Mənim yaşadığım Assen şəhərində 500 erməni ailəsi yaşayır. Azərbaycanlılara gəlincə isə, orada yaşayan tək azərbaycanlı ailəsi mənim ailəmdir. Buna baxmayaraq biz hər zaman Assen şəhərində Xocalı soyqırımı, 20 Yanvar faciəsini qeyd edirik. Düzdür, ermənilər nəsə etməyə cəhd göstərə bilərlər. Ancaq Hollandiya demokratik bir ölkə olduğu üçün bunu edə bilmirlər. Çünki hollandlar belə məsələlərə qarışmırlar. Düzdür, müəyyən çətinliklərlə üzləşirik, ancaq bu bizim üçün problem deyil. Qarşımıza çıxan hər hansı problemləri həll edə bilirik.

-Bu gün Hollandiyada onlarla Azərbaycan təşkilatı, cəmiyyəti fəaliyyət göstərir. Azərbaycan təşkilatları arasında birlik, həmrəylik mövcuddurmu?

-Mən də hərdən belə informasiyalar eşidirəm. Bəzən isə facebook sosial şəbəkəsində müəyyən xoşagəlməz yazılarla rastlaşıram. Sadəcə olaraq həmin yazılara münasibət bildirib özümü o səviyyəyə endirmək istəmirəm. “Odlar Yurdu” Təşkilatı olaraq Hollandiyada fəaliyyət göstərən bütün Azərbaycan təşkilat və cəmiyyətləri ilə yaxından əməkdaşlıq edirik. Eləcə də, digər cəmiyyətlər bir-biri ilə sıx əməkdaşlıq edir. Bu əməkdaşlıq istər Xocalı soyqırımının tanıdılması ilə bağlı keçirilən tədbirlərdə, istər Azərbaycana aid hər hansı tədbir və ya konfransların keçirilməsində özünü göstərir. Bu kimi tədbirlərdən əvvəl hər zaman təşkilat və cəmiyyət sədrləri bir yerə toplaşıb vahid mövqedən çıxış edir, birgə tədbirlər keçiririk. Xüsusilə, Novruz bayramı şənliklərində hər zaman bir yerdə oluruq. Ola bilər ki, kimsə bir başqasının sözünü qəbul edə bilmir. Bu sırf şəxsi münasibətlər zəminində ola bilər. Həmin münasibətləri təşkilatlarası münasibətlərə aid etmək lazım deyil. Hesab edirəm ki, şəxsi münasibətləri təşkilatlararası münasibətlərə aid etmək düzgün deyil. Ancaq onu da deyə bilərəm ki, təşkilat kimi Hollandiyada bizim birliyimiz var. Xüsusilə, Mayisə Ağamirzəyevanın rəhbərlik etdiyi “Ana Vətən” Niderland Qadınlar Cəmiyyəti, Ilhan Aşkının sədrlik etdiyi Hollandiya Azərbaycan-Türk Kültür Dərnəyi, Benilüks Azərbaycanlıları Konqresi, Elxan Mirhəşimlinin rəhbərliyi ilə fəaliyyət göstərən Azərbaycan Evi ilə çox sıx əlaqələrimiz var. Digər ölkələrdə də bu cür neqativ hallara rast gəlməmişəm. Mən ifaçı olduğum üçün müxtəlif ölkələrə dəvət alıram və həmin ölkələrdə Azərbaycan təşkilatlarının keçirdiyi tədbirlərdə Azərbaycan musiqilərini ifa edirəm. Almaniyada müntəzəm olaraq keçirilən tədbirlərdə iştirak edirəm. Hər zaman təşkilat və cəmiyyətlərimiz arasında birlik, həmrəylik, sıx əməkdaşlıq müşahidə edirəm. Ümumiyyətlə, mənim bu cür məsələlər barədə danışmaq heç də xoşuma gəlmir. Biz real işlə məşğul olmalıyıq ki, işimiz irəli getsin.

-Bəs bu gün Hollandiyada Azərbaycan diasporunun vəziyyəti, durumunu necə qiymətləndirirsiniz? Bu ölkədəki Azərbaycan diasporunun vəziyyətini qaneedici hesab etmək olarmı?

-Bizim diasporumuz hələ gəncdir. Bu günlərdə Diasporla İş üzrə Dövlət Komitəsi fəaliyyətə başlamasının 12 ilini qeyd etdi. Hollandiyada elə diaspor təşkilatları var ki, yüz illərdir ki, fəaliyyət göstərir. Ancaq Azərbaycan diasporu çox gəncdir. Ancaq Azəbaycan diasporu gənc olmasına baxmayaraq indiyə qədər çoxlu işlər görüb. Ümumiyyətlə, Hollandiyadakı Azərbaycan diasporunun vəziyyəti məni hərtərəfli şəkildə qane edir. Diaspor təşkilatları olaraq Diasporla İş üzrə Dövlət Komitəsindən maddi və mənəvi dəstək alırıq.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 15 iyul.- S.15.