“Həsən bəy Zərdabi irsi:

keşməkeşli həyat yolu”

kitabının təqdimatı keçirilib

İyulun 15-də Beynəlxalq Mətbuat Mərkəzində kənd təsərrüfatı üzrə fəlsəfə doktoru, Beynəlxalq Ekoenergetika Akademiyasının ekologiya üzrə professoru Eldəniz Həsənovun “Həsən bəy Zərdabi irsi: keşməkeşli həyat yolu” adlı kitabının təqdimatı keçirilib. Mətbuat Şurasının sədri Əflatun Amaşov, “Kaspi” qəzetinin rəhbəri Sona Vəliyeva, millət vəkili Jalə Əliyeva, eləcə də bir sıra ziyalıların qatıldığı tədbiri Əflatun Amaşov açıb.

Əflatun Amaşov kitab haqqında məlumat verib. MŞ sədrinin sözlərinə görə, hər bir xalqın həyatında az sayda insanlar olur ki, onlar xalqın inkişafında mühüm rol oynayırlar. M.F.Axundov, Həsən bəy Zərdabi, Cavad xan, Əlimərdan bəy Topçubaşov və s. bu kimi insanların adlarını sadalayan sədr onların Azərbaycan xalqının xalq kimi inkişafında mühüm rol oynadıqlarını vurğulayıb: “Azərbaycan tarixinin formalaşmasında, inkişafında nə qədər Bakıxanovun rolu varsa, Azərbaycanın siyasi məfkurəsinin inkişafında Həsən bəy Zərdabinin məhz o qədər rolu var. H.Zərdabi Azərbaycanın siyasi intibahının banisidir. Həsən bəy Zərdabi bizim üçün kimdir? O, 1875-ci ildə “Əkinçi” qəzetini yaratmaq, 2 il onu çap etməklə Azərbaycanda xalqın mənliyi, mövcudluğu, özünüdərki ilə bağlı böyük bir rol oynamışdır”.

Kitabın müəllifi Eldəniz Həsənov kitabı hazırlayarkən üz tutduğu mənbələr, ona kömək edən insanlar haqqında məlumat verib. O, kitabın Həsən bəy Zərdabinin 170 illiyinə həsr edildiyini bildirib. Müəyyən səbəblərlə bağlı Həsən bəy Zərdabinin heç bir zaman yubileyinin keçirilmədiyini deyən müəllif nəşrin redaktorlarından biri olan millət vəkili Jalə Əliyevanın bu məsələni Milli Məclisdə gündəmə gətirməsi və şəxsən Prezident İlham Əliyevə müraciət etməsindən danışıb: “Prezident İlham Əliyev Həsən bəy Zərdabinin 170 illik yubileyinin keçirilməsi haqqında Sərəncam imzaladı”.

Filologiya üzrə fəlsəfə doktoru, “Kaspi” qəzetinin baş redaktoru Sona Vəliyeva tədbirdə çox insanın toplanmasından Zərdabinin hər birimizin doğması olduğunun aydın olduğunu bildirdi: “Mən kitabın müəllifindən də çox həyəcanlıyam. İçimdə Həsən bəy Zərdabinin övladı kimi həyəcan var. İnanıram ki, bizim hər birimizin qəlbində ona böyük məhəbbət yer aldığı üçün bura toplaşmışıq. Zərdabi Azərbaycan maarifçilərinin mətbuat qolunu, eyni zamanda Azərbaycan təhsilini sözün əsl mənasında böyük maarifçi kimi inkişaf etdirən, tarixdə müəyyən sahələrdə ilk olaraq imzasını atan böyük bir şəxsiyyətdir. İlk xeyriyyə cəmiyyəti, ilk qəzet yaradan, ilk məktəb açan Həsən bəy Zərdabi olub. Bu böyük insanın hər sahədə ilklərə imza atması sanki taleyi olub. Moskvada təhsil alan ilk torpaqşünas alim, ilk dəmiryolunun elmi şəkildə izahının necə çəkilməsini verən məhz Həsən bəy Zərdabi olub. Zərdabinin böyük şəxsiyyət olması təkcə onun ilklərə imza atması ilə bitmir, içində daşıdığı millətinə böyük məhəbbətlə ölçülür. Qız məktəbinin açılmasında Həsən bəy Zərdabinin böyük rolu var. O, H.Z.Tağıyev ilə dost olub. H.Z.Tağıyev Zərdabini özünün məsləkdaşı, ideya verəni kimi qəbul etdiyi üçün onun verdiyi məsləhətlərə də əməl edirdi”. S.Vəliyeva vurğulayıb ki, bu cür böyük şəxsiyyətin irsinin araşdırılması vacib və əhəmiyyətli bir işdir.

Daha sonra çıxış edən millət vəkili Jalə Əliyeva Həsən bəy Zərdabinin yaradıcılığı, mətbuatda gördüyü işlər barədə məlumat verib. J.Əliyeva kitabın ərsəyə gəlməsində görülən işlərdən danışıb. Tədbirin davamında təqdimata toplaşan ziyalılar Həsən bəy Zərdabi, eləcə də yeni nəşr haqqında öz fikirlərini bölüşüblər.

Aygün İbrahim

Olaylar.- 2014.- 16 iyul.- S.5.