Gənclərin diaspor işinə marağı yüksəkdir

Bu gün Qırğızıstanda fəaliyyət göstərən çoxsaylı Azərbaycan diaspor təşkilatlarından biri də Türkdilli Dovlətlərin Siyasətinə Dəstək Fondudur. Türkdilli Dövlətlərin Siyasətinə Dəstək Fondu 2005-ci ildən Bişkekdə rəsmi şəkildə fəaliyyətə başlayıb. Fondun fəaliyyətinin əsas istiqaməti türkdilli dövlətlərin liderlərinin müxtəlif ölkələrdə geniş təbliğatını təşkil etmək, xalqlarımız arasında birlik və əlaqələrin formalaşmasında dahi siyasətcilərin rolunu daha geniş auditoriyaya çatdırmaqdır. Fondun bu günə qədər gerçəkləşdirdiyi tədbirlər həm rəsmi, həm də ictimai dairələrdə böyük maraqla qarşılanıb. Eyni zamanda, fondun Azərbaycanda da filialı var. Türkdilli Dövlətlərin Siyasətinə Dəstək Fondunun sədri Nüsrət Məmmədovdur.

Məlumat üçün qedy edək ki, Nüsrət Məmmədov 1957-ci ildə Şəki rayonunda anadan olub. 1975-ci ildə həqiqi hərbi xidmətə çağırılıb. 1977-ci il hərbi xidməti başa vurub Qazaxıstanın Çimkənd vilayətinə gedib. 1980-ci ilin may ayına kimi Çimkənddə yaşayıb və təsərrüfatın müxtəlif sahələrində çalışıb. 1980-ci ildə Qırğızıstanın paytaxtı Bişkek şəhərindəki Pedaqoji İnstitutun Filologiya fakültəsinə qəbul olub. Nüsrət Məmmədov 1990-cı ildə Qırğızıstan Dövlət Universitetinin Hüquq fakültəsinə qəbul olub. O, 1996-cı ildə həmin universiteti müvəffəqiyyətlə başa vurub. Nüsrət Məmmədov hazırda diaspor sahəsində aktiv fəaliyyət göstərir və “Türkdilli dövlətlərin siyasətinə dəstək fondu”nun prezidenti olaraq bu işi uğurla icra edir. Qırğızıstandakı diasporumuz arasındakı əlaqələrə toxunan fond rəhbəri deyir ki, bu ölkədə bir neçə Azərbaycan diasporu var ki, rəhbərlik etdiyi fond onlarla sıx əlaqədə çalışır: “Məsələn, “Türkdilli dövlətlərin siyasətinə dəstək fondu” olaraq biz Qırğızıstan Azərbaycanlıları Konqresi, Qırğızıstan Azərbaycanlılarının Əlaqələndirmə Mərkəzi, “Xəzər” İssık-Kul Azərbaycanlıları İctimai Birliyi, “Sodrujestvo” bölgə milli etnik diasporlar şurası ilə sıx əməkdaşlığımız var. Qeyd edim ki, biz Diasporla İş üzrə Dövlət Komitəsi ilə sıx əməkdaşlıqda işləyirik. Bu yaxınlarda, biz ulu öndər, Heydər Əliyevin anadal olmasının 91 illiyi ilə əlaqədar Bayalinov adına Respublika Uşaq kitabxanasında böyük bir tədbir keçidik. Həmin tədbirdə Qırğızıstanın mədəniyyət və informasiya naziri K. Taliyeva ilə yanaşı bir çox tanınmışlar da iştirak etdilər. Fond olaraq kitabxanaya nəşr etdirdiyimiz kitablar da hədiyyə etdik. Tədbirdə çıxış edən nazir K. Taliyeva Türkdilli Dövlətlərin Siyasətinə Dəstək Fondunun Qırğızıstanın ictimai-siyasi həyatındakı böyük rolundan danışdı. O, bütün qeyri-hökumət təşkilatlarına “Türkdilli dövlətlərin siyasətinə dəstək fondu” na bənzəməsini tövsiyə etdi. Bundan başqa iki il bundan əvvəl “Həyat” hotelində “Prezident İlham Əliyev” üçcildliyinin təqdimatını keçirmişdik. Tədbiri Azərbaycanın Qırğızıstandakı səfiri vəzifəsini, səfirliyin müşaviri İlqar Cabbarov aparırdı. Tədbiri səfirliklə birlikdə keçirirdik. Orada bir neçə nazirin, Qırğızıstanın ən tanınmışlarının, Rusiyanın, Amerikanın və bir sıra dövlətlərin səfirliyinin müşavirləri iştirak edirdilər. Tədbir, respublikanın kütləvi informasiya vasitələrində də geniş işıqlandırılmışdı. Təqdimatdan bir gün sonra Azərbaycanın Qırğızıstandakı səfir əvəzi İlqar Cabbarov mənə zəng edərək dedi ki, kitaba böyük maraq var, o kitablardan 100 komplekt verə bilərsinizmi? Cavabında dedim ki, biz kitabları məhz oxunması üçün nəşr etdirmişik. Maşın göndərin problem yoxdur, nə qədər lazımdır kitab verək. Onlar maşın göndərdilər, kitablardan 100 komplekt səfirliyə verdim. Səfirlik də öz növbəsində bütün maraqlananlara kitabları payladı. Yeri gəlmişkən, İlqar Cabbarov çox gözəl bir insandır, peşəkar diplomatdır. Öz Vətənini, xalqını, Prezidentini sevən bir adamdır. Biz onunla bir neçə tədbir keçirmişik. Mən görürdüm o, bu tədbirlərin yüksək səviyyədə keçirilməsi üçün necə can yandırır”. Fond rəhbəri gənclərin diaspor işinə verdiyi töhfələrdən də danışıb. Bildirib ki, rəhbəri olduğu Türkdilli Dövlətlərin Siyasətinə Dəstək Fondunun nəzdində gənclər təşkilatı var: “Təcrübənizi hansı formada bölüşdürürsünüz” deyəndə gənclərimiz fondun fəaliyyətində bilavasitə iştirak edirlər. Fondun tam fəaliyyəti onların təcrübələridir - desək yanılmarıq.

-Ümumiyyətlə, gənclərimizin diaspor işinə marağı olduqca yüksəkdir. Gənclərimizin çoxu burada həyata göz açanlardır. Onlar mədəniyyətimizi, tariximizi, ədəbiyyatımızı, Azərbaycanda gedən prosesləri öyrənmək, bilmək istəyirlər. Bir neçə dəfə gənclərimiz Azərbaycanın bayrağını, nəşr etdirdiyimiz kitabların onlara verilməsini xahiş ediblər. Əlbəttə, biz onların xahişlərinə biganə qalmamışıq”. Nüsrət Məmmədov Qırğızıstandakı əsas fəaliyyət istiqamətlərinə də toxunub. Bildirib ki, rəhbərlik etdiyi fondun əsas məqsədi Azərbaycanın tarixini, mədəniyyətini, ədəbiyyatını, Azərbaycanda gedən ictimai-siyasi prosesləri, ulu öndərimizin irsini, Prezidentimiz İlham Əliyevin apardığı uğurlu daxili və xarici siyasətini təbliğ etməkdir: “Bu istiqamətlərdə Türkdilli Dövlətlərin Siyasətinə Dəstək Fondu olaraq indiyə qədər 59 kitab nəşr etdirib pulsuz yaymışıq, bir çox tədbirlər keçirmişik. Keçən ilin fevral ayında Vahid Mustafayevin müəllifi olduğu “Xoca” filminin geniş şəkildə təqdimatını keçirdik və Qırğızıstanda fəaliyyət göstərən bir çox kanallar filmi göstərdilər. Tamaşaçı kütləsi tərəfindən film böyük rəğbətlə qarşılandı. Bunu nəzərə alaraq filmi qırğız dilində dublyaj etdirdik. Belə bir hadisəni də xatırlatmaq istəyirəm. 2009-cu ildə xalq diplomatiyası çərçivəsində Qırğızıstan Parlamentinin o vaxtkı deputatlarının Azərbaycana səfərini təşkil etmişdik. Nümayəndə heyətinə Qırğızıstan parlamentinin birinci vitse-spikeri Çolpon Bayekova başçılıq edirdi. Mart ayının 13-də bizi Prezident İlham Əliyev qəbul etdi. Görüş zamanı Çolpon Bayekova Prezident İlham Əliyevə dedi: “Biz Azərbaycanın başına gətirilən faciələr haqqında bu kitablardan məlumat almışıq”. Məncə, bizim fəaliyyətimizə bundan yüksək qiymətin verilməsinə ehtiyac yoxdur. Onu da xatırladım ki, cari il, avqust ayının birinci ongünlüyündə “Türkdilli Dövlətlərin Siyasətinə Dəstək Fondu” Bakıda “Azərbaycan, Qırğızıstan, Rusiya, Qazaxıstan, Moldova və İsrail arasında mədəni əlaqələrin inkişafı” adlı beynəlxalq forum keçirəcək. Qeyd edək ki, forumda Rusiya Federasiyası İctimai Palatasının katibi, Kurçatov mərkəzinin Prezidenti, akademik Yevgeniy Velixovun, Qazaxıstandan Muxtar Şaxanovun, Qırğızıstandan İlgiz Aytmatovun başçılıq edəcəyi nüfuzlu nümayəndə heyətləri iştirak edəcək. Xatırladaq ki, forumda, digər tanınmış şəxslərlə yanaşı, deputatların, nazirlərin də iştirakı gözlənir. Həmçinin forum çərçivəsində Muxtar Şaxanovun fondun sifarişi ilə Azərbaycan dilinə tərcümə olunaraq nəşr edilmiş «Həqiqət formulu və məhəbbətin Everest zirvəsi» kitabının təqdimatı, fondun sifarişi ilə RF OOO «AMATUS» kinostudiyasının lentə aldığı «Çingiz Aytmatov- sivilizasiyaların dialoqu» sənədli filminin çəkilmiş hissəsi nümayiş etdiriləcək. Muxtar Şaxanovun «Həqiqət formulu və məhəbbətin Everest zirvəsi» adlı əsərinin böyük bir hissəsi mərhum Prezident Heydər Əliyevə həsr olunub. “Türkdilli Dövlətlərin Siyasətinə Dəstək Fondu”nun sifarişi ilə RF OOO «AMATUS» kinostudiyasının lentə aldığı «Çingiz Aytmatov- sivilizasiyaların dialoqu» sənədli filmində 2008-ci ildə Bişkekdə ulu öndərin 85 illiyi ilə əlaqədar fond tərəfindən keçirilən tədbirdə Çingiz Aytmatovun çıxışı öz əksini tapıb. Bundan başqa, 2008-ci il Qırğızıstanda Çingiz Aytmatov ili elan olunmuşdu. Tale elə gətirdi ki, Çingiz Aytmatovun yubileyi təkcə Azərbaycanda fondun təşəbbüsü və maliyyə dəstəyi ilə qeyd olundu. Fevral ayının 25-də Prezident İlham Əliyev Çingiz Aytmatovu fondun sədri ilə birlikdə qəbul etdi və “Dostluq” ordeni ilə təltif edildi. Həmin görüntülər də filmdə öz əksini tapıb”. Qirğizistanın rəsmi dairələrinin bu ölkədəki Azərbaycan diasporunun fəaliyyətinə olan münasibəti, soydaşlarımıza qarşı sərgilədiyi mövqeyə gəlincə isə fond rəhbəri deyib ki, Qırğızıstanda diasporumuza yüksək səviyyədə münasibət var: “Bildiyiniz kimi Qırğızıstan demokratik bir dövlətdir. Demokratik dövlətin atributu olan hakimiyyətin hər 3 qolu işləyir. Qırğızıstanda diasporumuza yüksək səviyyədə münasibət var. Məsələn, biz fond olaraq hakimiyyətdən ulu öndərimiz Heydər Əliyevin adını əbədiləşdirmək üçün torpaq sahəsinin ayrılmasını, həmin torpaq sahəsində ulu öndərin adını daşıyacaq parkın salınmasını, onun abidəsinin ucaldılmasını xahiş etmişdik. Xahişimizi nəzərə alan dövlət tərəfindən şəhərin ən mənzərəli yerində parkın salınması üçün torpaq sahəsi ayrıldı. Məncə, bu, hakimiyyətin diasporumuza yüksək münasibətinin göstəricisidir”.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 19-21 iyul.- S.15.