Gənclər diaspor hərəkatının

potensial qüvvəsi kimi

Azərbaycan gəncliyi daim ölkədə gedən ictimai-siyasi proseslərin aparıcı qüvvəsi olub, respublikamızın inkişafında mühüm rol oynayıb. Təsadüfi deyildir ki, ümummilli lider Heydər Əliyev gənclərə hər zaman xüsusi diqqət və qayğı ilə yanaşıb, yüksək intelektual səviyyəyə, müasir dünyagörüşünə malik gənc nəslin yetişməsinə xüsusi önəm verib. 1970-ci illərdə ümummilli liderin təşəbbüsü ilə SSRİ-nin 50-dən artıq böyük şəhərinin 170-dən çox ali təhsil müəssisəsində 15 mindən artıq azərbaycanlı gənc təhsil alırdı. Bu gün Azərbaycan diasporunun ən fəal üzvlərini məhz həmin gənclər təşkil edir.

1993-cü ildə xalqın təkidli tələbi ilə hakimiyyətə qayıtdıqdan sonra ümummilli lider Heydər Əliyev gənclərə daim diqqət və qayğı ilə yanaşırdı. Heydər Əliyevin təşəbbüsü ilə gənclərlə iş sahəsindəki fəaliyyətini əlaqələndirməki məqsədilə 1994-cü ildə Gənclər və İdman Nazirliyi yaradıldı. Ümummilli liderin sərəncamı ilə 1996-cı il, fevral ayının 2-də Azərbaycan Gənclərinin I Forumu keçirildi. Forum gənclərlə iş sahəsində dövlət orqanlarının, qeyri-hökumət təşkilatlarının qarşısında duran vəzifələri müəyyənləşdirərək, gənc nəslin hərtərəfli inkişafına zəmin yaradan qərarlar qəbul etdi. Ümummilli lider Heydər Əliyev forumun əhəmiyyətini və gənclərin çoxsaylı müraciətlərini nəzərə alaraq 1997-ci ildə imzaladığı sərəncamla forumun keçirildiyi günü-fevralın 2-ni “Azərbaycan Gənclər Günü” elan etdi. 2002-ci il, may ayının 6-da Azərbaycan Respublikasında gənclər siyasətinin məqsədlərini, istiqamətlərini, təşkilati-hüquqi əsaslarını müəyyən edən “Gənclər siyasəti haqqında” Azərbaycan Respublikasının Qanunu qəbul edildi.

Azərbaycan Respublikasının Prezidenti cənab İlham Əliyev bu siyasətə sadiq qalaraq gəncliyə həmişə böyük diqqət və qayğı ilə yanaşır. Cənab Prezidentin imzaladığı “Azərbaycan Gəncliyi Dövlət Proqramı” (2005-2009-cu illər), “Azərbaycan Gəncliyi Dövlət Proqramı” (2011-2015-ci illər), “2007-2015-ci illərdə Azərbaycan gənclərinin xaricdə təhsili üzrə Dövlət Proqramı”, həmçinin gənclərin təhsil səviyyəsinin yüksəldilməsi, sosial müdafiəsinin yaxşılaşdırılması sahəsində imzaladığı digər sənədlər bunun parlaq nümunəsidir. Azərbaycan dövlətinin göstərdiyi diqqət və qayğı sayəsində bu gün Azərbaycan gəncliyi ictimai-siyasi proseslərin fəal iştirakçısına çevrilərək, ölkəmizin milli maraqlarının müdafiəsi, respublikada həyata keçirilən sosial-iqtisadi inkişaf proseslərinin sürətləndirilməsinə öz töhfəsini verir. Azərbaycan gəncliyi intelektual potensialı, vətənpərvərliyi, ictimai fəallığı ilə əsl vətəndaş mövqeyi nümayiş etdirir. Təqdirəlayiq haldır ki, xarici ölkələrdə yaşayan və təhsil alan azərbaycanlı gənclər bu prosesin ən fəal iştirakçısı kimi çıxış edir. Son illərdə xarici lkələrdə yaşayan azərbaycanlı gənclərin ictimai-siyasi fəallığının yüksəlməsi, diaspor quruculuğu işində iştirakının genişlənməsi bu sahədə əhəmiyyətli nailiyyətlərin əldə olunması ilə nəticələnib. “Azərbaycan Gəncliyi Dövlət Proqramı”na uyğun olaraq 2010-cu ilin noyabr ayında Almaniyanın Frankfurt şəhərində Dünya Azərbaycanlı Gənclərinin I Konqresi bunun bariz təzahürlərindən biri oldu. Dünya Azərbaycanlı Gənclərinin I Konqresinin Qətnaməsinə uyğun olaraq gənclər təşkilatlarının diaspor quruculuğu, Azərbaycan həqiqətlərinin dünya ictimaiyyətinə çatdırılması, milli-mənəvi dəyərlərimizin qorunması, mədəni irsimizin təbliği istiqamətində fəaliyyətinin koordinasiya edilməsi məqsədilə Dünya Azərbaycanlı Gənclər Birliyinin təsis edilməsi ilə əlaqədar təşəbbüs qrupu yaradıldı. 2011-ci il, iyul ayının 5-də Bakı şəhərində keçirilmiş Dünya Azərbaycanlılarının III Qurultayının Qətnaməsində Dünya Azərbaycanlı Gənclər Birliyinin təsis edilməsi təşəbbüsü dəstəkləndi və bu prosesin sürətləndirilməsi üçün müvafiq tədbirlərin görülməsinin zəruriliyi qeyd edildi. 2012-ci il, mart ayının 12-də Bakı şəhərində keçirilmiş Dünya Azərbaycanlı Gənclər Birliyinin təsis qurultayı Azərbaycan gəncliyinin həyatında mühüm hadisələrdən biri oldu. Qurultayda aparılmış müzakirələr, irəli sürülmüş təklif və tövsiyyələr yeni dövrdə Azərbaycan gəncliyinin qarşısında çox mühüm vəzifələr qoydu.

Dünya Azərbaycanlı Gənclər Birliyi yuxarıda qeyd edilənləri nəzərə alaraq Azərbaycan həqiqətlərinin dünya ictimaiyyətinə çatdırılmasında gənclərin daha fəal iştirakını təmin etmək, xarici ölkələrdə yaşayan azərbaycanlı gənclərin təşkilatlanması istiqamətində keyfiyyət dəyişikliyinə nail olmaq, Azərbaycan Respublikasının diaspor quruculuğu sahəsindəki siyasətinə dəstək olmaq, dünya azərbaycanlı gənclərinin hüquq və azadlıqlarının təmin edilməsi istiqamətində daha təsirli tədbirlər görmək, mədəni irsimizin təbliği işini genişləndirməyi prioritet vəzifələr kimi qəbul edir. Dünya Azərbaycanlı Gənclər Birliyi Azərbaycan Respublikası Prezidentinin Dünya Azərbaycanlılarının III Qurultayındakı nitqindən irəli gələn tövsiyyələri, qurultayın qəbul etdiyi sənədlərin tələblərini, Dünya Azərbaycanlılarının Həmrəylik Xartiyasında öz əksini tapan müddəaları, Dünya Azərbaycanlı Gənclərinin I Konqresinin qərarlarını nəzərə alaraq aşağıdakı fəaliyyət istiqamətlərini müəyyən edir. Dünya Azərbaycan Gənclər Birliyinin başlıca məqsədi Azərbaycan Rеspublikasında və xarici ölkələrdə yaşayan azərbaycanlı gənclərin hərtərəfli inkişafının təmini, elm, təhsil, mədəniyyət, sahibkarlıq, idman, könüllülük işinin inkişafı və vətənpərvərlik sahəsində fəaliyyətin qurulması istiqamətində işlərin aparılması dünya azərbaycanlılarının milli-mənəvi dəyərlər əsasında səfərbər olmasıdır. Bundan əlavə dünyanın müxtəlif ölkələrində yaşayan azərbaycanlı gənclərin Azərbaycan Rеspublikasının milli maraqlarının qorunması, xalqımızın zəngin mədəni irsinin təbliği, Azərbaycan həqiqətlərinin dünya ictimaiyyətinə çatdırılması, soydaşlarımızın hüquq və azadlıqlarının müdafiəsi işinə cəlb olunması və beynəlxalq səviyyədə əməkdaşlığın təmin olunmasıdır. Ölkədən kənarda təhsil almış vətəndaşlarımızın uyğun fəaliyyətlərini təşkil etmək, gənc kadrlar bazasının təşkili, ölkədən kənarda yaşayan azərbaycanlı gənclərin şəbəkələşmə işinin təşkil edilməsində fəal rol oynamaq da birliyin məqsəd və fəaliyyətlərinə daxildir. Eyni zamanda Dünya Azərbaycanlı Gənclər Birliyi xarici ölkələrdə yaşayan azərbaycanlı gənclərin yaşadıqları cəmiyyətə intеqrasiyası, ictimai-siyasi həyatda daha fəal iştirakının təmin olunması məqsədilə layihələr həyata kеçirmək, habеlə bu cür layihələrin həyata kеçirilməsinə dəstək vеrmək istiqamıətində də fəaliyyət göstərir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 25 iyul.- S.15.