Avropada diaspor

təşkilatlarımız çoxdur“

Rəşad Quliyev: „Digər Avropa ölkələrindən fərqli olaraq Almaniyada diasporamız daha güclüdür“

Bu gün dünya ölkələrinin əksəriyyətində fəaliyyət göstərən Azərbaycan diaspor təşkilatları, cəmiyyət və birliklər ölkəmizin həqiqətləri, Dağlıq Qarabağ probleminin beynəlxalq ictimaiyyətə çatdırılmasında mühüm rol oynayırlar. Sevindirici hal ondan ibarətdir ki, ildən-ilə bu kimi təşkilatların sayı artır və yeni cəmiyyətlər, birliklər təsis edilir. Yaxın vaxtlarda Avropa məkanını əhatə edəcək daha bir diaspor təşkilatının təsis edilməsi nəzərdə tutulub. Avropa Azərbaycanlıları Assosiasiyası adlanacaq qurumun yaranma zərurəti, qarşısına qoyduğu məqsəd və vəzifələr, eləcə də həyata keçirəcəyi layihələr, tədbirlər barədə Avropa Azərbaycanlıları Assosiasiyasının təsisçisi, Almaniyadakı Azərbaycan Mədəniyyət Evininh icraçı direktoru Rəşad Quliyevlə söhbətləşdik. „OLAYLAR“-a verdiyi müsahibədə Rəşad Quliyev Azərbaycan diasporunun mövcud durumu barədə də danışıb.

-Rəşad bəy, Avropa Azərbaycanlıları Assosiasiyasının yaradılması ideyası hansı zərurətdən meydana çıxdı və qurumun təsis olunması nə zamana nəzərdə tutulub?

-Əvvəla onu bildirmək istəyirəm ki, Avropa miqyasında fəaliyyet göstərən cəmi iki təşkilatımız var. Bunlardan biri Avropa Azərbaycan Cəmiyyetidir ki, həmin təşkilata iş adami, Qəbələ Futbol Klubunun prezidenti Tale Heydərov rəhbərlik edir. Qeyd edim ki, həmin təşkilatın fəaliyyəti sırf lobbiçiliklə bağlıdır və Avropada kifayət qədər uğurlu layihələri və işləri ilə tanınır. Digər təşkilat isə Avropa Azərbaycanlıları Konqresidir. Bu təşkilatın rəhbəri isə Samira Patzer-İzmayilovadır. Samira xanım 25 ildir ki, Almaniyada yaşayan, Almaniyada tam inteqrasiya etmiş, amma eyni zamanda öz dövlətini, millətini unutmayan vətənpərvər bir xanımdir. O, eyni zamanda musiqiçidri. Onun da fəaliyyətini uğurlu hesab edirəm. Qeyd edim ki, bu qurum Diasporla İş üzrə Dövlət Komitəsi tərəfindən dəstəklənən bir təşkilatdır və fəaliyyəti sırf diaspora ilə bağlıdir. Ancaq düşünürəm ki, bununla kifayətlənmək olmaz.

-Avropa Azərbaycanlıları Assosiasiyasının əsas fəaliyyət istiqamətləri nədən ibarət olacaq və hansı sahələrə daha çox diqqət ayıracaq?

-Bizim fəaliyyətimiz isə Almaniyada və Avropada yerli təşkilatlarla əlaqə qurub inteqrasiya siyasətini dəstəkləyəcək, milli azlıq olan soydaşlarımızın huquqlarının dövlət orqanlarından müdafiəsindən tutmuş, milli mədəniyyətimizi təbliğ etməyə qədər bütün sahələri, Avropa ölkələrinin yerli parlamentləri, xarici işlər nazirlikləri ilə əməkdaşlıq edərək, Avropa komissiyası, Avropa parlamenti və NATO kimi beynəlxalq qurumlarla əməkdaşlıq edərək Avropa ilə Azərbaycan arasında əməkdaşlığın, Avropa xalqları ilə Azərbaycan xalqı arasında dostluğun güclənməsinə təkan verəcək. Eyni zamanda bilirsiniz ki, Azərbaycanla Avropa arasında siyasi, iqtisadi əlaqələr, enerji təhlükəsizliyi sahəsində əməkdaşlıq inkişaf etməkdədir. Məhz buna görə də Avropa üçün Azərbaycanın strateji əhəmiyyəti zaman keçdikcə daha da artmaqdadır. Məhz buna görə də bu əməkdaşlığı gücləndirmək və xalqlar arasında da dostluq münasibətlərinin yaranmasına təkan vermək, müasir texnologiya və innovasiyalardan yararlanaraq xalqımızın və respublikamızın xaricdə imicini gücləndirmək məqsədi ilə bu təşkilatı qurmağa qərar verdik

-Assosiasiyanın yaradılması ideyası belə deməyə əsas verirmi ki, Avropada daha çox fəaliyyət göstərməyə ehtiyac var?

-Bilirsiniz ki, bu gün Avropa dünya siyasətinin aparıcı hissəsidir. Təsadüfi deyil ki, bu gün dünya ölkələrinin taleyi bir çox vaxt məhz Avropada həll olunur. Bundan başqa Avropa kifayət qədər böyük ərazidir, burada dünya əhalisinin 600 milyon insanı məskunlaşıb. Düzdür, son illər Azərbaycanın dünyanın qabaqcıl musiqi, idman, bilik yariışmalarında qalib olması ölkəmizin nüfuzuna əhəmiyyətli dərəcədə müsbət təsir edib. Ancaq bununla yanaşı biz durmamalı, fəaliyyətimizi daha da genişləndirməli, daha da əzmlə mübarizə aparmalıyıq. Bundan başqa Birinci Avropa Oyunları Olimpiadasının Azərbaycanda keçirilməsi təşəbbüsü alqışlanmalıdir. Çünki bunun özü də həm idmanımızın inkişafına, həm də ölkəmizin Avropada təbliğ olunmasına ciddi təsir edəcək. Bu işdə bizim də üzərimizə ciddi iş düşür. Bu oyunların keçirilməsi bizim üçün ölkəmizi təbliğ etməkdə əla fürsətdir. Məhz bu fürsətdən istifadə edərək yaxınlarda Azərbaycanla bağlı Avropanın müxtəlif ölkələrində tədbirlər keçirməyi düşünürük.

-Almaniyadakı Azərbaycan Mədəniyyət Evi ilə əlaqələriniz davam edəcək, yoxsa artıq bütün əlaqələr keçmişdə qaldı?

-Tamamilə xeyr. Bildiyiniz kimi mən Alman Azərbaycan Mədəniyyət Evinin icraçı direktoruyam. Bundan əvvəl də Belçika Azərbaycanlıları Cəmiyyətinin sədri olmuşam. Amma buna baxmayaraq mənim Azərbaycan Mədəniyyət Evi ilə bağlı fəaliyyətim əvvəllər necə idisə indidə o cür davam etdirəcəm. Sadəcə hər bir fəaliyyətə zaman tapıb zamanı uyğunlaşdırmaq lazımdır. Ümid edirəm ki, mən bunu bacaracam.

-Hazırda Almaniyada Azərbaycan diasporunun vəziyyətini necə qiymətləndirirsiniz?

-Avropada diaspor təşkilatlarımız çoxdur. Burada Almaniyanın da önəmli yeri var. Bildiyimə görə qeyri-rəsmi statistikaya əsasən ümumilikdə Almaniyada 300-ə yaxın Azərbaycan təşkilatı mövcuddur. Bunların bir çoxu fəaliyyət göstərməsə də müəyyən hissəsi fəaliyyətini zaman-zaman davam etdirir. Digər Avropa ölkələrindən fərqli olaraq burada diasporamız daha güclüdür. Səbəb isə ondan ibarətdir ki, minlərlə soydaşımız hər il təhsil üçün bu ölkəyə gəlir və Almaniyada obyektiv və subyektiv səbəblərdən on illərdir formalaşmış bir Azərbaycan toplumu var. Burada sayımız digər ölkələrə baxanda çoxdur. Bundan başqa illərdir ki, müxtəlif sahələrə yerləşən soydaşlarımız var. Fəxr edirəm ki, bu gün gənclərimiz bura hansısa böyük şirkətlərə menecer, həkim, mühəndis kimi dəvət olunub işləyirlər. Bu bizim nə qədər elmə bağlı olduğumuzu, intelektual bir xalq olduğumuzun göstərcisidir. Bundan başqa Heydər Əliyev Fondu bu yaxınlarda Kölndə Azərbaycan gecəsi təşkil etmişdi. Həmin tədbirə minlərlə alman, Almaniyada yaşayan müxtəlif xalqlarn nümayəndəsi gəlmişdi. Bir neçə il bundan əvvəl bu cür layihələr üçün yalnız arzu etmək olardi. Amma bu gün bunlar baş verir. Gələcəyə də ümidliyəm. Çünki buna çox potensialımız var.

-Assosiasiya olaraq Azərbaycan həqiqətləri, Dağlıq Qarabağ problemi, eləcə də Xocalı soyqırımınının Avropada tanınması ıstıqamətində konkret hansı vasitə və formalardan istifadə etməyi düşünürsünüz?

-Bununla bağlı geniş planlarımız var. Yaxınlarda iclasımız olacaq və bu iclasda biz geniş fəaliyyət proqramı qəbul edəcəyik. Öncədən deyib hadisələri qabaqlamaq istəmirəm. Zamanı gələndə bununla bağlı sizə geniş açıqlama verəcəyik.

-Assosiasiyanın həyata keçirməyi nəzərdə tutduğu layihələr, tədbirlərin maliyyə mənbəyi necə qarşılanacaq?

-Son illər qeyri-hökumət təşkilatlarının inkişafı ilə bağlı mühüm addımlar atılıb. Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının fəaliyyəti buna sübutdur. Bu layihələr çərçivəsində yüzlərlə təşkilatımız maliyyə qaynağı ilə təmin olunur və müəyyən qədər gələcək fəaliyyəti üçün stimul yaranır. Ümid edirəm ki, QHT-lərə Dəstək Şurasının gələcəkdə büdcəsi daha da artacaq və onlar xaricdəki Azərbaycan təşkilatlarının da müxtəlif maraqlı layihələrini dəstəkləyə biləcəklər.

-Xaricdə təhsil alan gənclərimizin diaspor fəaliyyətində iştirakı hansı səviyyədədir?

-Sıravi gənclərimiz, tələbələrimiz arasında ölkəmizin təbliğatı üçün aktiv fəaliyyət göstərən gənclərimiz var. Bunlarla yanaşı ölkəmizdə tanınmış iş adamları olan gənclərimizin, xüsusən də son dövrlər gənclərimizin Azərbaycanın taleyinə biganə qalmaması aktiv fəaliyyəti təqdir olunur. Məsələn ölkə başçısının qızı Leyla Əliyevanın Xocalıya Ədalət kampaniyasını, „Gilan“ Holdinqin prezidenti, Avropa Azərbaycan Cəmiyyətinin rəhbəri Tale Heydərovun Avropada, Ziya Məmmədovun oglu, Anar Məmmədovun Amerikada gördüyü işləri, həyata keçirdiyi layihələri təqdir edirəm.

-Rəhbərlik edəcəyiniz Assosiasiyanın sözügedən təşkilatlarla birgə əməkdaşlığı mümkün görünürmü?

-Ümid edirəm ki, gələcəkdə bizim də fəaliyyətimizin uğurlu olması üçün onlarla əməkdaşlığımız mümkün olacaq və həyata keçirəcəyimiz layihələrdə bu gənc dostlarımız da öz əllərindən gələni əsirgəməyəcəklər. Bizim əsas proritet fəaliyyətimiz isə Avropanın beynəlxalq və yerli qurumları ilə birgə layihələr həyata keçirmək olacaq. Bu gün biz təşkilatımızın yaranmasından, onun zərurətindən danışdıq. Ümid edirəm ki, gələcək müsahibəmizdə təşkilatımızın uğurlu fəaliyyətindən söhbət açacağıq.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 31 iyul.- S.15.