”Vətən” Cəmiyyəti Danimarkada Azərbaycanın

təbliği istiqamətində aparıcı rol oynayır

Səfər Sadiqi: “Azərbaycan Evinin fəaliyyəti Danimarkadakı diasporamızın inkişafında mühüm rola malikdir”

Azərbaycanı Avropada layiqincə təmsil edən diaspor təşkilatlarından biri də Danimarkada fəaliyyət göstərən “Vətən” Cəmiyyətidir. Adi çəkilən təşkilat fəaliyyət göstərdiyi 7 il ərzində ölkəmizin təbliği istiqamətində bir sıra layihələrə imza atıb. Cəmiyyətin sədri Səfər Sadiqi “OLAYLAR” verdiyi müsahibədə rəhbərlik etdiyi qurumun qarşısında duran vəzifələrdən danışıb

-Səfər bəy, rəhbərlik etdiyiniz “Vətən” Cəmiyyətinin yaxın vaxtlar üçün nəzərdə tutduğu layihələr, tədbirlər nədən ibarətdir?

-“Vətən” Cəmiyyəti 2007-ci ildə Hillerod şəhər bələdiyyəsinin rəsmi qeydiyyatından keçərək fəaliyyətə başlayıb. Cəmiyyətimizin əsas məqsədi, azərbaycanlıları bir araya gətirib, danimarkalılara və şəhərin qonaqlarına Azərbaycan torpaqlarının işğal olunması, BMT-nin qərarlarını erməni işğalçıları tərəfindən yerinə yetirilməməsi, bir milyon insanın öz dədə-baba torpaqlarından məcburi çıxarılması, Xocalı soyqrımı, Azərbaycanın müstəqiliyi uğrunda mübarizə aparan 20 yanvar şəhidləri haqqında, həmçinin Azərbaycanın mədəniyyəti və incəsənəti barədə geniş məlumat verməkdir. Cəmiyyətimiz Azərbaycana qarşı olan yalan məlumatlara cavab olaraq hər zaman öz etirazlarını rəsmi qaydada bildirir. Cəmiyyətimizin təşkil etdiyi hər bir tədbirimiz barədə internet səhifəmiz olan www.vetencemiyyeti.com-da məlumat verilir. Bildiyiniz kimi ermənilər 2015-ci ildə ” yalançı erməni soyqrımını” geniş surətdə qeyd etməyə hazırlaşırlar. Buna qarşı olaraq Cəmiyyətimiz bir çox tədbirlər planı hazırlayıb. Kopenhagen Universitetlərində erməni işğalını əks etdirən foto sərgilər, kitablar və sənədli məlumatları danimarkalı tələbələrin ixtiyarına verməyi planlaşdırmışıq. Cəmiyyətimizin təşəbbüsü ilə bu yaxında Kopenhagendə Türkdilli Cəmiyyətlərin Koordinasiya Şurası yaradılacaq. Artıq bu istiqamətdə işlər gedir. Bundan başqa Danimarka Parlamentində türk mənşəli millət vəkilləri ilə sıx əlaqəmiz var və onlarla gələcəkdə Xocalı soyqrımını geniş müzakirəyə çıxarmaq üçün müzakirələr aparırıq.

-Cəmiyyətinizin Danimarkadakı azərbaycanlı uşaqlar üçün təşkil etdiyi kurslar üçün lazım olan əyani vəsaitlər, kitabların alınmasında problemlər mövcud idi. Həmin problemləri aradan qaldıra bildinizmi?

-Diasporla İş üzrə Dövlət Komitəsinin dəstəyi ilə Kopenhagendə iki ildən çoxdur ki, Azərbaycan Evi fəaliyyət göstərir. Azərbaycan Evinin fəaliyyəti Danimarkadakı diasporamızın inkişafında mühüm rola malikdir. Azərbaycan Evində tədbirlərimizlə yanaşı, bir çox görüşlər, ad günləri, yubileylər keçirilir. Azərbaycan Evinin nəzdində azərbaycanlı uşaqlar üçün ”həftə sonu ”Ana dili” məktəbi təşkil etmişik. Bu şəraiti bizə yaratdıqlarına görə Azərbaycan dövlətinə öz minnətdarlığımızı bildiririk. Bununla arxamızda güclü bir dövlətin olduğunu hiss edirik. Bu da bizim gələcək işlərimizdə yüksək nəticə əldə etməyimizə zəmin yaradır. Bunlarla yanaşı ”Ana dili” məktəbində dərs kitablarının çatışmamazlığı problem olaraq qalır. Biz keçirilən dərsi uşaqlara kitabdan kopiya çıxararaq vərəqələr şəklində paylayırıq. Bu da gələcəkdə vərəqələrin uşaqlar tərəfindən itməsi və ya uşaqların evdə gələcək dərslərə baxmaq marağının qarşısını alır. Inanırıq ki, Təhsil Nazirliyi tərəfindən bu problemimiz yaxın vaxtlarda həll olunacaq. Azərbaycan diasporasının gələcəyi olan uşaqlarımızın öz ana dillərində yazıb oxuması, tarixini və mədəniyyətini bilməsi üçün şəraiti yaratmaq hamımızın borcudur. Ümumiyyətlə, ”Vətən” Cəmiyyəti Danimarkada Azərbaycanın təbliği istiqamətində aparıcı rol oynayır. Yuxarıda qeyd etdiyim kimi Cəmiyyətimiz millət vəkilləri ilə, nazirlərlə, Danimarkada fəaliyyət göstərən başqa cəmiyyətlərlə, media nümayəndələri ilə, Danimarka hökumətinin təşkil etdiyi tədbirlərdə, festivallarda görüşlər keçirib Azərbaycan barədə məlumatlar verir. Cəmiyyətimiz 2008-ci ildən Avropa Azərbaycanlıları Konqresinin idarə heyətinə üzv seçilib . Uşaqlardan ibarət “Cücələrim“ yaradıcılıq qrupu təkil olunub. Azərbaycanin təbliğində böyüklərlə yanaşı uşaqlarımız da aktiv rol oynayırlar.“Cücələrim” yaradıcılıq qrupu, Kopenhagen bələdiyyəsi tərəfindən təşkil olunan “Inteqrasiya Günü” və Helsinqor şəhər bələdiyyəsinin təşkil etdiyi “Kültür festivalda “ iştirak edərək hədiyyələr alıb.

-Danimarkadakı Azərbaycan diaspor təşkilatları arasında birlik və bərabərlik, həmrəylik varmı?

-Danimarkada fəaliyyət göstərən Azərbaycan cəmiyyətləri ilə əlaqələrimiz var. Orhus şəhərində fəaliyyət göstərən Danimarka– Azərbaycan ”Dostluq ”Cəmiyyətinin sədri Yusif bəy. Danimarka – Azərbaycan Mədəniyyət Mərkəzinin sədri Kərimbəy. Kopenhagendə uzun müddətdir fəaliyyət göstərən Danimarka – Azərbaycan Cəmiyyətinin sədri Abbas bəylə sıx əməkdaşlıq şəklində çalışırıq. Bizim bütün tədbirlərimizdə Abbas bəy iştirak edir. Onun təcrübəsindən və məsləhətlərindən istifadə edirik.

-Bəs diasporumuz Azərbaycan həqiqətləri, Dağlıq Qarabağ problemi, Xocalı soyqırımının Danimarka cəmiyyətinə çatdırlması istiqamətində nə dərəcədə aktivdir?

-Azərbaycan torpaqlarının işğalı və Xocalı soyqrımə bizim ən agrılı yerimizdir. Cəmiyyətimizin bu istiqamətdə təbliğatı bir kompaniya formasinda yox, mütamadi şəkildə davam etdirilir. Qarabağ problemi və Xocalı soyqrımına aid olan kitablar Kopenhağen, Hillerod və Bikerod kitabxanalarına paylanaraq geniş kütlə oxucusunu məlumatlandırıb. Xocalı soyqrımı ilə bağlı 2013-cü ilin fevralında Kopenhagenin ən böyük meydanı olan Rodhuspladsda torpaqlarmızın işğalına qarşı etiraz mitinqi keçirdik. 2014-cü ildə isə Kopenhagendə Xocalıyla bağlı 600-dən çox bukletlər danimarkalılara və şəhərin qonaqlarına paylandı. Həmçinin Azərbaycan Evində böyük tədbir təşkil etdik. Tədbir iştirakçılarına sənədli videolar nümayiş etdirildi. Torpaqlarımızın erməni işğalçıları tərəfindən zəbt olunması ilə bağlı məlumatları mütəmadi olaraq uşaqlarımıza da təbliğ edirik. Bu istiqamətdə Azərbaycan Evinin nəzdində fəaliyyət göstərən “Ana dili“ məktəbinin rolu böyükdür.

-Damimarkadakı digər diaspor təşkilatları, xüsusilə Türk diaspor təşkilatları ilə əməkdaşlıq hansı səviyyədədir?

-Türk dilli cəmiyyətləri hər zaman özümüzə arxa bilmişik və onlarla əlaqələrimiz qırılmazdır. Danimarka Ülkü Ocaqlarının sədri Ilhan bəy, Türkmən Yardım Cəmiyyətinin sədri Yurtan bəy, Danimarka Uyğur Cəmiyyətinin sədri Səttar bəylə yaxın əlaqələrimiz var qarşılıqlı olaraq tədbirlərdə iştirak edirik. 2012-ci ildə cəmiyyətimiz Danimarkada ”Turk dilli cəmiyyətlərin birliyini” yaratmaq təklifi ilə çıxış etdi. Artıq birliyimizi yaratmışıq. Bu birlikdə türk, türkmən, uyğur və Azərbaycan diaspora nümayəndələri təmsil olunur. Bu yaxınlarda Türkdilli cəmiyyətlərin Koordinasiya Şurasını yaradacağıq. Koordinasiya Şurasının əsas məqsədi birgə tədbirləri təşkil etmək və əlaqələrin daha da six şəkildə genişləndirməkdir. Eyni zamanda 2015-ci ildə ermənilərin yalançı soyqrımının 100 illiyinə qarşı tədbirlər planının hazırlanması və təşkil olunması qarşımızda duran əsas məqsədlərimizdən biridir.

-Azərbaycan səfirlikləri diaspor təşkilatları ilə nə dərəcədə əməkdaşlıq edir? Çünki Dünya Azərbaycanlılarının Qurultayında prezident İlham Əliyev səfirliklərə diaspora ilə yaxından əməkdaşlıq etməyi tapşırmışdı.

-Dünya Azərbaycanlılarının III Qurultayında dövlət başçısı öz çıxışında qeyd etdi “Səfirliklər, cəmiyyətlərlə bir komanda kimi işləməlidilər. Biz artıq müdafiə mövqeyindən çıxıb, hücum taktikasına keçməliyik“. Çox doğru fikirdir. Səfirliklər cəmiyyətlərlə birlikdə fəaliyyət göstərib Azerbaycan diasporasının inkişafına öz töhfələrini verməlidilər. Təssüf ki, Danimarkada Azərbaycan səfirliyi yoxdur. Böyük Britaniyada olan Azərbaycan səfirliyinin fəaliyyəti Danimarkaya da aiddir. Cəmiyyətimizin yüksək nəticələr əldə etməsində səfirliyin böyük rolu olub. Səfirimiz Danimarkaya gələndə mütləq bizim cəmiyyətin nümayəndələri ilə görüşür. Hər zaman cəmiyyətimizin fəaliyyəti ilə maraqlanıb bizə hər bir sahədə dəstək olur. Bildiyiniz kimi Danimarka Avropa ölkələri arasında nüfuza malik olan ölkələrdəndir. Bu ölkədə Azərbaycan səfirliyinin olmaması tək diaspora sahəsində deyil, həmçinin danimarkalıların Azərbaycana turist səfərlərinə getməsi və vizanın alınması baxımından da çətinliklər yaradır. Bu baxımdan danmarkalılar Gürcüstana və Ermənistana getməyə üstünlük verirlər.Təsəvvür edin ki, son illərə qədər Danimarkada erməni diasporası yox dərəcəsində idi. Ermənilər dövlət tədbirlərində heç vaxt iştirak etmirdilər. Ancaq üç ilə yaxındır ki, Kopenhagendə Ermənistanın səfirliyi açılıb. Bunun nəticəsi olaraq ermənilər artıq fəallaşıblar. Azərbaycan səfirliyinin Danimarkada açılması çox vacib və təxirəsalınmaz məsələlədədir. Inanırıq ki, bu məsələ tezliklə öz həllini tapacaq.

-Danimarkada yaşayan azərbaycanlılar bu ölkənin cəmiyyətinə inteqrasiya etməkdə maraqlıdırlarmı?

-Əgər istəyiriksə yaşadığımız ölkənin ictimai və siyasi həyatında öz sözümüzü deyək, o zaman həmin cəmiyyətə inteqrasiya olunmalıyıq. Qapalı şəkildə yaşamağımız ancaq özümüzə ziyan vuracaq. Sevindirici haldır ki, gənclərimizin hamısı təhsil sahələrində oxuyurlar. Insanlarımızın əksəriyyəti ziyalılardir. Danimarkalılar azərbaycanlıları, yüksək intektuala sahib bir insanlar kimi tanıyırlar. Azərbaycanlılar arasinda professor, həkimler, müəllimlər, compüter mühəndisləri, iş adamları fəaliyyət göstərir. Mən və qızım Danimarkada iqtidarda olan Sosial Demokrat Partiyasının üzvüləriyik. Bu partiyanın tədbirlərində bir neçə dəfə Danimarkanın gənclər və təhsil naziri Kristina Antanoli ilə görüşüb, azərbaycanlı gənclərlə baglı məlumatlar vermişik. Yaşadığımız ölkənin cəmiyyətinə inteqrasiya oldugumuz halda hər bir azərbaycanlı öz iş yerində və ya oxuduğu təhsil müəssisəsində danimarklıların Azərbaycan barədə suallarına dolgun və ətraflı cavab verə bilməlidi. Uşaqlarımızın bu suallara cavab verməsi üçün “Ana dili“ məktəbimizin xüsusi rolu vardir. Vətəndən uzaqda yaşasaq da Azərbaycanın hər bir uğuruna sevinir və inanırıq ki, dövlətimizin apardığı siyasət nəticəsində işğal olunmuş torpaqlarımız tezliklə azad olacaq. Hesab edirəm ki, o gün uzaqda deyil və o gün tezliklə gələcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 10 iyun.- S.15.