15 iyun-xalqın xilas tarixi

Azərbaycanın müstəqillik tarixində müstəsna yeri olan 15 İyun-Milli Qurtuluş Günü ölkəmizin həyatında yeni dövrün başlanğıcı kimi xarakterizə edilir. Məhz 15 iyun tarixindən sonra dövlətçiliyimiz daha da möhkəmləndi, müstəqilliyimiz dönməz və əbədi xarakter aldı. Həmin tarixə qədər olan müddətdə böyük bir imperiyanın çökməsi səbəbindən müstəqillik qazanmaq kimi tarixi fürsəti əldə edən Azərbaycan qısa vaxtdan sonra onun itirilməsi təhlükəsi ilə üzləşdi. Həmin dövrdə iqtidarda olanların səriştəsizliyinin məntiqi nəticəsi olan hakimiyyət böhranı 1993-cü ilin iyununda kulminasiya həddinə çatdı. Ölkəni bürüyən vətəndaş müharibəsi müstəqilliyimizin itirilməsi təhlükəsini yaratmışdı. Yaranmış vəziyyətdən, ölkəni parçalanmaq təhlükəsindən isə yalnız Heydər Əliyev xilas edə bilərdi. Beləliklə, 1993-cü ilin 15 iyununda xalqın təkidi ilə yenidən hakimiyyətə qayıdan Heydər Əliyev müdrik siyasəti ilə Azərbaycan dövlətçiliyini məhv olmaq təhlükəsindən xilas etdi.

Heydər Əliyevin qayıdışı ilə başlanan Qurtuluş Azərbaycanı faciələrdən, parçalanmaqdan xilas etməklə yanaşı, ölkəmizin sonrakı sürətli, dinamik inkişafının etibarlı əsasını yaratdı. Heydər Əliyevin qayıdışı ilə Azərbaycan başının üstünü almış real təhlükələrdən, hərc-mərclik və xaosdan, iqtisadi tənəzzüldən xilas oldu. Ulu öndər Heydər Əliyevin gərgin səyləri nəticəsində 1994-cü il mayın 12-də atəşkəs sazişi imzalandı. Həmin il sentyabrın 20-də tarixə “Əsrin müqaviləsi” kimi daxil olan neft müqaviləsinin imzalanması ilə Azərbaycanın iqtisadi inkişafının, dünya iqtisadi sisteminə inteqrasiyanın əsası qoyuldu. Bu gün böyük fəxr hissi ilə qeyd edirik ki, ölkəmiz ümummilli lider Heydər Əliyevin müəllifi olduğu neft strategiyasının uğurlarını yaşayır. Çoxlarına əfsanə kimi görünən BTC və BTƏ neft-qaz layihələrinin reallığa çevrilməsi ilə iştirakçı, eyni zamanda dünya dövlətlərinin uzunmüddətli iqtisadi inkişafına zəmin yaradıldı. Heydər Əliyevin hakimiyyətə qayıdışından sonra fəaliyyətinin əsas istiqamətlərindən biri məhz Azərbaycanın ətrafında informasiya blokadasının yarılması oldu. Dahi şəxsiyyətin xarici ölkələrə elə bir səfəri yox idi ki, Azərbaycan həqiqətləri, Dağlıq Qarabağ münaqişəsinin əsil mahiyyəti faktlar əsasında beynəlxalq ictimaiyyətə çatdırılmasın. Azərbaycan beynəlxalq təşkilatlara üzv qəbul olunmaqla həqiqətlərinin dünya ictimaiyyətinə çatdırılması üçün tribunalar əldə etdi. Ümummilli lider Heydər Əliyev faktlar əsasında erməni yalanlarını ifşa edir, onların əsil simasını dünyaya nümayiş etdirirdi. Aradan 21 il ötməsinə baxmayaraq Azərbaycan xalqı hələ də həmin tarixi şərəflə qeyd edir, bu günü Azərbaycana bəxş edən ümummilli lider Heydər Əliyevə öz dərin ehtiramını bildirir. Çünki 15 iyun-Milli Qurtuluş Günü Azərbaycan dövlətçiliyinin, xalqının xilas günüdür. Qurtuluş günü Azərbaycanın xaosdan, anarxiyadan, hərc-mərclikdən, özbaşınalıqdan, parçalanma təhlükəsindən qurtulduğu, sabitliyə, əmin-amanlığa, demokratiyaya qovuşduğu gündür. O gündən etibarən başlanan inkişaf bu gün də Heydər Əliyev siyasi kursunun davamçısı İlham Əliyev tərəfindən uğurla davam etdirilir. Təsadüfi deyil ki, müasir dövrümüzdə Azərbaycanın müxtəlif sahələrdə əldə etdiyi nailiyyətlər birbaşa Heydər Əliyevin adı ilə bağlıdır. Elə bunun nəticəsidir ki, bu gün Azərbaycan regionun lider dövlətinə çevrilib. Artıq yerləşdiyimiz regionda Azərbaycanın iştirakı olmadan heç bir layihə həyata keçirilmir. Dünyanın aparıcı maliyyə qurumları öz hesabatlarında Azərbaycanın iqtisadi sahədə ciddi nailiyyətlərə imza atdığını qeyd edirlər. Bütün bunlar onu deməyə əsas verir ki, 15 iyun-Qurtuluş Günündən etibarən başlanan inkişaf bundan sonra da davam edəcək və Azərbaycan daha böyük zirvələrə yüksələcək.

F. Məhəmməd

Olaylar.- 2014.- 14-17 iyun.- S.9.