“Azərbaycan diasporunun

fəaliyyəti məni az da olsa qane edir”

Tengis Sade Baron zu Romkerhall: ” Almaniyadakı Azərbaycan Diasporunun Mərkəzi Şurası Ukraynadakı və Antalyadakı diaspor təşkilatları ilə sıx əlaqədədir”

Bu gün Avropa məkanında Azərbaycan diasporunun ən güclü olduğu ölkələrdən biri də Almaniyadır. Soydaşlarımızın sayı baxımından da Almaniya digər Avropa ölkələrindən fərqlənir. Hazırda Almaniyada onlarla Azərbaycan diaspor təşkilatı fəaliyyət göstərir ki, onlardan da biri Azərbaycan Diasporunun Almaniyadakı Mərkəzi Şurasıdır. Azərbaycan Diasporunun Almaniyadakı Mərkəzi Şurası 2007-ci ilin yanvar ayından fəaliyyət göstərir.

Mərkəzi Şuranın məqsədi – Almaniyanın bütün həyat əhatəsində yardıma ehtiyacı olan Azərbaycan diasporuna kömək göstərilməsi, onların bərabər hüquqa olmalarının təmin edilməsi, xüsusilə praktiki yolla həyat üçün gərəkli olan yardımın göstərilməsi, hüquqi məsləhətlərin verilməsi və göstərilməsi, vətəndaşlarımızın maraqlarını bütün ictimai səviyyələrdə təmsil edilməsi və həmçinin Almaniya Federativ Respublikasında yaşayan əhalinin Azərbaycan mədəniyyəti, musiqisi, tarixi və siyasəti ilə tanış etmək, digər dövlət və qeyri dövlət idarələrilə Azərbaycan Respublikası arasında sıx əlaqələrin yaradılmasıdır. Almaniyadakı Azərbaycan Diasporunun Mərkəzi Şurasının prezidenti həmyerlimiz cənab Tengis Sade Baron zu Romkerhalldır. Təsadüfi deyil ki, məhz yuxarıda sadalanan istiqamətlər üzrə uğurlu fəaliyyət göstərdiyinə görə Almaniyadakı Azərbaycan Diasporunun Mərkəzi Şurası Almaniyadakı ən aktiv diaspor təşkilatlarından biri hesab edilir. “OLAYLAR”-a verdiyi müsahibədə Tengis Sade Baron zu Romkerhall rəhbərlik etdiyi qurumun qarşısında duran vəzifələr, yaxın vaxtlar üçün həyata keçirəcəyi layihələr və tədbirlər barədə danışıb.

-Almaniyadakı Azərbaycan Diasporunun Mərkəzi Şurasının qarşısına qoyduğu başlıca vəzifələr hansılardır və Mərkəzi Şuranın yaxın aylar üçün nəzərdə tutduğu layihələr, tədbirlər nədən ibarətdir?

-Almaniyadakı Azərbaycan Diasporunun Mərkəzi Şurasının məqsədi Almaniyanın bütün həyat əhatəsində yardıma ehtiyacı olan Azərbaycan diasporuna kömək göstərilməsi, onların bərabər hüquqa malik olmalarının təmin edilməsi, xüsusilə praktiki yolla həyat üçün gərəkli olan yardımın göstərilməsidir. Bununla yanaşı Almaniyada yaşayan azərbaycanlılara məsləhətlərin verilməsi, onlara maddi və hüquqi yardımın göstərilməsi, soydaşlarımızın maraqlarının bütün ictimai səviyyələrdə təmsil edilməsi, həmçinin Almaniyada yaşayan əhalinin Azərbaycan mədəniyyəti, musiqisi, tarixi və siyasəti ilə tanış etməkdir. Eyni zamanda Mərkəzi Şuranın məqsədi digər dövlət və qeyri-dövlət idarələri ilə Azərbaycan arasında sıx əlaqələrin yaranmasıdır. Yaxın aylar üçün nəzərdə tutulan layihələrə gəlincə isə, ermənilər tərəfindən zəbt edilmiış torpaqlarımızın azad olunması və Almaniyanın bu məsələdə daha fəal iştirak etməsilə əlaqədar Almaniyanın Yever şəhərində imza toplanması aksiyası nəzərdə tutulur. Toplanılan imzalar birbaşa Almaniyanın Bundestaqına göndəriləcək. İyulun 19-u tarixində isə Almaniyanın Ebersüalde şəhərində keçiriləcək beynəlxalq boks çempionatında 2015-ci ildə Bakıda keçiriləcək ilk Avropa Olimpiya Oyunlarının keçirilməsi barədə təbliğat aksiyası keçiriləcək. Aksiya çərçivəsində burada videostend quraşdırılacaq, bukletlər və sair paylanacaq.. Həmçinin Milli Qəhrəman Çingiz Mustafayevə həsr edilmiş xatirə gecəsi, Almaniyanın Maqdeburq şəhərindəki Dövlət Musiqi Konservatoriyasında bəstəkar Üzeyir Hacıbəyovun doğum gününə həsr edilmiş xatirə gecəsi keçiriləcək.

-Almaniyadakı Azərbaycan Diasporunun Mərkəzi Şurası olaraq bu gün Almaniyadakı Azərbaycan diasporunun fəaliyyətini, vəziyyətini necə dəyərləndirirsiniz?

-Mən hər zaman çıxışlarımda bildirirəm ki, əgər bir şəhərdə 50-70 azərbaycanlı yaşayırsa, deməli 9-10 yeni təşkilat təsis etmək olar. Mən bir hüquqşünas kimi, bu təşkilatların təsis edilmələri üçün bütün hüquqi sənədləri təmənnasız olaraq hazırlayıram. Keçən ildən bu günə qədər 15 yeni təşkilat təsis etmişik. Nə qədər çox sayda diaspor təşkilatlarımız təsis olunub fəaliyyət göstərərsə - bu bizim xalqın səsi, gücü deməkdir. Əgər, bir aksiyanın keçirilməsi üçün bir müraciət göndərilirsə və ya hər hansı bir problemin həlli üçün bir təşkilat müraciət edirsə, indi artıq 10 təşkilat müraciət edəcək və bu da yaranan problemin həlli üçün çox keyfiyyətli bir nəticə verə bilər. 1990-cı illərdə Almaniyada təxminəm 250-300 diaspor təşkilatı var idisə, indi isə onların sayi 3500-dən çoxdur. Fəaliyyət barədə onu qeyd etmək istərdim ki, fəallarımız var və getdikcə sayları artmaqdadır. Məsələn, fəallardan Bielefeld şəhərində Alman-Azərbaycan Mədəniyyət Mərkəzini rəhbəri Təranə Tağıyevanı, Hannoferdəki “Xəzər” Cəmiyyətinin rəhbəri Etibar Qəniyevi, Kölndəki Alman-Azərbaycan Mədəniyyət evinin rəhbəri Ağa Ağayevi, Alman-Azərbaycan Gənclər Birliyinin rəhbəri Elnur Rixteri, Alman-Azərbaycan Mədəni Əlaqələr Mərkəzinin rəhbəri Azad Əzizovu və sairələrini nümunə gətirmək olar. Əlbəttə, təşkilat rəhbərləri maariflənməlidirlər. Mənə zəng edəndə, əlbəttə mən bütün nüansları onlara başa salıram. Amma çoxları mənə “əziyyət” verməmək üçün müraciət etmirlər, özləri istədikləri kimi fəaliyyət göstərirlər. Lakin son illərdə Diasporla İş üzrə Dövlət Komitəsi, Azərbaycan Respublikasının Almaniyadakı səfirliyi tərəfindən forumlar, tədbirlər keçirilir. Burada fəallar birlikdə görüşüb məsləhətləşir, bir-birinə məsləhətlər verirlər.

-Ümumiyyətlə, bu gün Azərbaycan diasporunun fəaliyyəti sizi qane edirmi? Diasporumuz Azərbaycanı dünyada tam mənada tanıda bilirmi?

-Bu günkü Azərbaycan diasporunun fəaliyyəti məni az da olsa qane edir. Bir çox təşkilatlar maliyyə dəstəyində çətinlik olmasından bəhs edirlər. Öz qüvvələrilə nə bacarırlarsa onu da edirlər və bu da çox cüzidir. Amma tələb olunan maddi dəstək olsa, təşkilatlar əllərindən gələni əsirgəməzlər. Mən buna inanıram. Hesab edirəm ki, 2011-ci ildəki “Avrovizion” qələbəsindən sonra Azərbaycana olan münasibət yeni eraya keçib. Almaniyada yaşayan əhali xalqımızın tarixi, mədəniyyəti ilə maraqlanırlar. Mən bunu keçirdiyim görüşlərdəki suallardan görürəm.

-Bu gün Almaniyada yaşayan azərbaycanlıların üzləşdiyi əsas problemləır hansılardır və sizin rəhbərlik etdiyiniz Mərkəzi Şura həmin problemlərin həlli istiqamətində hansı işlər görür?

-Almaniyada yaşayan azərbaycanlılar arasında o qədər də problem yoxdur. Olan problemləri də mən artıq həll etmişəm və mənə müraciət etdikdə, çalışıram ki, həmin problemləri həll edim. Məsələn: uzun müddət ərzində Almaniya hakimlərinin ermənilərin Dağlıq Qarabağa süni məskunlaşmasına dair verilən qərarların son qoyulması ilə əlaqədar əlimdə olan faktlar əsasında Bundestaqa müraciət etdim. İndi artıq bu barədə heç bir hakim belə bir qərar vermir. Mənə elə gəlir ki, bu mənim ən böyük qələbəm idi Problemlərin həlli istiqamətində peşəkar hüquqşünas olduğum üçün, bu problemləri yalnız biz həll edirik. Facebook sosial şəbəkəsi vasitəsilə hər həftə təmənnasız hüquq məsləhətlərinin verilməsi barədə reklam veririk.

-Bəs, Almaniyadakı Azərbaycan səfirliyi ilə əlaqələriniz hansı səviyyədidir və sizin keçirdiyiniz tədbirlərə səfirlik dəstək verirmi. Çünki cənab prezident İlham Əliyev Dünya Azərbaycanlılarının III Qurultayında səfirliklərə diaspor təşkilatları ilə sıx əməkdaşlıq etməyi tövsiyyə etmişdi?

-Səfirlik rəhbərliyinin və ən əsas Almaniyadakı Azərbaycanlıların Koordinasiya Mərkəzinin rəhbəri xanım Samirə Patzer-İsmayılovanın bu sahədə əməyi çox böyükdür. Ümumiyyətlə, səfirliklə və Koordinasiya Mərkəzi ilə sıx əməkdaşlıqdayıq.

-Almaniyadakı Azərbaycan diaspor təşkilatları arasında birlik və bərabəırlik, həmrəylik varmı?

-Tədbirlərdə, forumlarda tanış olduqda, əlbəttə biri-birimizi dəvət edirik, sıx əlaqə saxlayırıq. Amma elə təşkilatlar da var ki, təsis edildikdən sonra onlara zəng edib təbrik edirik, təmənnasız olaraq bütün məsələlərdə kömək göstərəcəyimizi bildiririk. Onlar da öz növbələrində bildirirlər ki, biz heç kəsdən asılı olmaq istəmirik və heç kimin dəstəyinə ehtiyacımız yoxdur.

-Digər ölkələrin diaspor təşkilatları, xüsusilə türk təşkilat və cəmiyyətləri ilə əlaqələr hansı səviyyədədir?

-Almaniyadakı Azərbaycan Diasporunun Mərkəzi Şurası Ukraynadakı və Antalyadakı diaspor təşkilatları ilə sıx əlaqədədir. Biz Almaniyadakı türk təşkilatlarına məlumatlar göndəririk, istəyən bizə müraciət edir. İstəməyəni isə məcbur edə bilmirik. Amma heç kim bu günə qədər bizə müraciət etməyib.

-Sizcə, diaspor sahəsində hansısa problemlər mövcuddurmu və daha ciddi uğurlara imza atmaq üçün siz nələri təklif edərdiniz?

-Hesab edirəm ki, müntəzəm olaraq forumlar, seminarlar keçirilməlidir. Təşkilatlar bu tədbirlərdə digər fəalların fəaliyyəti ilə tanış olmalıdırlar, məsləhət almalıdırlar. Eyni zamanda görəcək işlərini planlaşdırmalıdırlar. Düşünürəm ki, bu ən çox türkdilli xalqlar arasında olsa müsbət effekti lap çox olar. Ən əsası sizin kimi xalqını sevən, işini sevən jurnalistlər təşkilatlarla əlaqə saxlayıb məqalələr yazsa, şərhlər aparsa, mənə elə gəlir ki, bu təşkilatların fəaliyyətinə ən gözəl bəhrə verə bilər.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 25 iyun.- S.15.