Azərbaycan ordusu –

vətənpərvərliyin poladlaşmış ifadəsi

26 İyun Azərbaycan Silahlı Qüvvələrinin yaranması günüdür

Uşaq ikən dinlədiyimiz nağıllarda həmişə bir qəhrəman axtarardıq. Bizlərə nağılları sevdirən də o qəhrəmanlardı. Əgər o nağılların içərisində ruhumuzu oxşayacaq qəhrəman yoxdursa, nənəmizə ağız büzərdik. Hər kəs ölkəsini divlərin əlindən qurtaran qəhrəman olmaq istərdi. Biz isə burada nağıl danışmırıq.

O, həqiqətən var. Reallıqdır. O hər zaman bizim arxamızdadır. Həqiqətən də yurdumuzun ona ehtiyacı var. Torpaqlarımızda düşmən səsləri kəsilmədikcə, Vətənə qarşı borclu qalmaq psixologiyasına aşacağıq. Ölüm zəncirinin bir həlqəsinə çevriləcəyik. Lakin türk adamının bu düşüncəsi varlığımızın mövcudluğunu xatırladır hər birimizə. Biz varıq. Yurd sevgisi türkün həyat amalıdır, ilk görməli olduğu işdir. Vəzifədir. Borc deyil. Heç bir millət Azərbaycan türkü qədər yurdu üçün canından imtina etməyə hazır deyil. Etmir də. Lakin Azərbaycan ordusu ərdməlikdir, böyük ürəkdir. Azərbaycan ordusu – böyük bir millətin sinəsini qürur duyğusu ilə qabardan şanlı addır. İçdən sevinc yerimizdir. O Azərbaycan vətənpərvərliyinin poladlaşmış ifadəsidir. Ordumuz varlığımızın güvən dayağıdır. Zəfərləri və keçmişi bəşər tarixi ilə yaşıddır. O böyük bir millətin işıqlı gələcəyini irəli daşıyan mayakdır. Azərbaycan ordusu – burada Vətənə xəyanət şübhəsi yoxdur. Şübhə yox ki, düşmənə qan səddi çəkən insanlıq şanıdır. Çünki böyük bir məmləkətin şan və şərəfinə O cavabdehdir. Azərbaycan adamı yalnız iki şeyə güvənir: Biri millətin qərarı, digəri ən əlim və ən çətin şərtlər daxilində dünyanın təqdirlərinə haqqı ilə layiq olan ordusuna. Millət və məmləkətinin şərəfinə dil uzadanların sözünü kəsmək Azərbaycan əsgərinin könül borcudur. Bizi zəif hesab edənlərə güclü olduğumuzu sübut edən də odur, onlardır. Əsgərimiz torpağına əl uzadan düşməni yerində oturdan İlahi qüvvədir. Ordunun başında ölümə gedən, sevə-sevə qanını axıdan, bədənlərini Vətən üçün parça-parça etməkdən zövq alan əsgərlərimiz haqqında danışmaq gərəksizdir. Çünki Vətənin müdafiəsi üçün canlarını ölümə yalnız Azərbaycan əsgəri apara bilər. “Candan şirin heç nə yoxdur” deyənlərə Vətən sərhədində düşmənə bədənindən keçilməz qala tikən Azərbaycan əsgəri örnəkdir. Ordumuz üçün Vətəni qorumaq əmr yox, namus işidir. Şanlı tarix yaratmış Azərbaycan həmişə qarşısında düşmən ordularını görüb. Güclünün düşməni həmişə var. Ən çətin anlarında ordumuz güvən yerimiz olub. Biz ordumuzun tarixdəki qalibiyyətlərilə həmişə öyünə bilərik. O həmişə arxasındakı millətin iradəsinə dayaq taparaq irəli gedib. Ordumuzun qabağında çatılması zəruri olan hədəflər var. Qətiliklə ən çətin mərhələləri arxada qoyub işıqlı hədəflərimizə çatacağıq. Bunun üçün Azərbaycan əsgərinə bir “İRƏLİ!!!” əmri bəsdir. Millət də ordusuna öz idealının qoruyucusu kimi baxır. Azərbaycan ordusu mərdlik rəmzidir. Hünər, ona layiq rəqib olmaqdır. Vətənimin əsgərləri poladdan heykəllərdir. Onların kim olduqlarını bilmək üçün onlarla döyüş meydanına boy ölçmək lazımdır. Ordumuz min illərin yüksək dəyər, qüvvət, qüdrət və məğlubedilməzlik əsəridir. Dünya sevgilərindən ən müqəddəsi də Azərbaycan əsgərinin Vətən sevgisidir. Heç bir Vətən torpağı da əsgərini bu qədər sevmir. Hər zəfərin mayası sənindir. Hər zəfərin ən böyük payı sənindir. O qaçmaq nədir, qovmaq nədir bilməz. Ordumuzun hər əsgəri düşmən üçün Yanardağ mənzərəsidir. Bayramın mübarək, qardaş əsgər!

Mənsur Rəğbətoğlu

Olaylar.- 2014.- 26-27 iyun.- S.8.