“Yerlərdə fəaliyyət göstərən diaspor təşkilatları

ilə sıx əlaqələrin qurulmasına nail olmaq istəyirik”

Ramin Məmmədov: “Bir çox ölkədə biz buna yüksək səviyyədə nail olmuşuq”

Azərbaycan diasporunun formalaşıb inkişaf etməsində xarici ölkələrdə təhsil alan gənclərimiizin də rolu az deyil desək yanılmarıq. Xüsusislə, son illər, bir qədər də konkretləşdirsək Dünya Azərbaycanlı Gənclər Birliyinin təsis olunmasından sonra bu müsbət tendensiya özünü daha qabarıq şəkildə göstərir. Elə Dünya Azərbaycanlı Gənclər Birliyinin sədri Ramin Məmmədov da eyni fikirdədir. Rəhbərlik etdiyi qurumun 2 illiyi ərəfəsində DAGB sədri Ramin Məmmədov “OLAYLAR”-ın suallarını cavablandırıb.

-Ramin müəllim, bu günlərdə Dünya Azərbaycanlı Gənclər Birliyinin təsis olunmasının iki ili tamam olur. Birliyin sədri olaraq qurumun iki illik fəaliyyətini necə qiymətləndirirsiniz və Dünya Azərbaycanlı Gənclər Birliyi bu müddət ərzində özünü istər daxildə, istərsə də beynəlxalq aləmdə tam mənada tanıda bildimi?

-Artıq iki ilə yaxın bir müddətdir ki, Dünya azərbaycanlı gənclərini öz sıralarında birləşdirən, onların birgə platforma çərçivəsində fəaliyyət göstərməsini təmin edən bir birlik yaradılıb. Dünya Azərbaycanlı Gəncvlər Birliyinin yaradılması təsadüfi bir hal deyil. Birliyin yaradılması gənclərin sadəcə birlik yaratmaq istəyindən meydana çıxmamışdı. Bu birliyin yaradılması üçün böyük bir zərurət vardı. Bu zərurət Azərbaycan Respublikasının müstəqilliyin ilk illərindən diaspor hərəkatı, xaricdə yaşayan azərbaycanlılara yönəlik siyasət, onlara verilən önəm və göstərilən dövlət qayğısından irəli gəlir. Hər kəsə məlumdur ki, ümummilli lider Heydər Əliyev xalqın tələbi ilə ikinci dəfə Azərbaycanda hakimiyyətə qayıtdığı ilk illərdən etibarən bütün xarici səfərlərdə Azərbaycan diasporunun nümayəndələri ilə görüşmüş, onlarla mütəmadi söhbətlər aparmışdı. Həmin söhbətlər, keçirilən görüşlər və atılan addımların nəticəsi kimi Dünya Azərbaycanlılarının I Qurultayı keçirildi. Ondan sonra bu sahə ilə bağlı xüsusi bir dövlət qurumunun yaradılması, həmin qurum vasitəsilə dünya azərbaycanlıları ilə Azərbaycan Respublikası arasında əlaqələrin daha da genişlənməsi onun konseptual əsaslara uyğun olaraq həyata keçirilməsinin vacibliyi ortaya çıxdı. Dünya Azərbaycanlı Gəncləri ümumi diaspor hərəkatının bir tərkib hissəsi olaraq hər zaman nəzərdən keçirilməlidir. Bunlar hər hansı fərqli bir siyasi konsepsiyanın tərkib hissəsi deyillər. Müsbət məqamlardan biri ondan ibarətdir ki, son illərdə həm xaricdə yaşayan azərbaycanlıların, həm də müxtəlif ölkələrdə doğuluib həmin ölkələrin vətəndaşlığını əldə etmiş gənclərin sayının artmasının şahidi oluruq. Digər bir tərəfdən Azərbaycan Respublikasının iqtisadi, sosial, siyasi mövqeyinin inkişaf etdirilməsi, xaricdə Azərbaycanın təmsil olunmaq səviyyəsinin dəyişdirilməsi, xaricdə təhsil Dövlət Proqramının şərtlərinə uyğun olaraq dünyanın 300-yə yaxın şəhərində Azərbaycan tələbəsinin təhsil alması, həmin dövlətlərdə ölkəmizin təmsil olunması ondan xəbər verirdi ki, son illər Azərbaycan diaspor hərəkatında gənclərimizin rolu getdikcə artır. Bu artım, inkişaf sadəcə gənclərin enerjili olmağı ilə kifayətlənmirdi. Dünyanın nüfuzlu universitetlərində təhsil alan azərbaycanlı gənclərimizin bilik və bacarıqlarının diaspor hərəkatına da töhfə vermək istəyi ilə üst-üstə düşməsi ona gətirib çıxardı ki, müxtəlif ölkəkləridə yaşayan və təhsil alan gənclər vahid bir təşkilat çərçivəsində birləşmək arzusunu ortaya qoydular. Bununla əlaqədar olaraq da 2012-ci il, mart ayının 12-də Bakı şəhərində Dünya Azərbaycanlı Gənclərinin Birliyi təsis edildi. Dünya Azərbaycanlı Gənclər Birliyinin zaman kəsimindəki fəaliyyəti qısa olmasına baxmayaraq qarşımıza ilk gündən qoyduğumuz əsas məqsədlərdən biri dünyanın müxtəlif ölkələrində yaşayan azərbaycanlılar arasında vahid şəbəkənin yaradılması, onlar arasında əlaqələrin güclənməsinə nail olmaqdır. Bu hər hansı bir qeyri-hökumət təşkilatı deyil. Bu təşkilat çərçivəsində dünyanın müxtəlif ölkələrində məskunlaşmış azərbaycanlılar həm öz doğma vətənləri, həm də yaşadıqları ölkələrlə sız əlaqələrin qurulmasına nail ola bilərlər. Düşünürəm ki, fəaliyyət göstərdiyimiz iki il ərzində əsas məqsədlərimizdən biri olan Dünya Azərbaycanlı Gənclər Birliyinin Gənclər Şəbəkəsinin yaradılması istiqamətində çox mühüm addımlar atılıb. Bir çox ölkələrdə olan azərbaycanlı gənclər artıq bir-biriləri ilə sıx əlaqələr qurur, bir-birilərinin keçirdikləri tədbirlərdə iştirak edir, birgə aksiyaların keçirilməsinə nail olurlar. Bundan başqa gənclər artıq yaşadıqları və təhsil aldıqları ölkələrdə baş verən siyasi, iqtisadi proseslərdə getdikcə daha aktiv rol oynayırlar.

-Birlik olaraq ötən müddətdə bir sıra layihələrə imza atdınız və fərqli ölkələrdə həmin layihələr həyata keçiridi. Keçirdiyiniz layihələr nə dərəcədə effektli oldu və qarşıdakı müddətdə hansı yeni layihələr nəzərdə tutulub?

-Keçirdiyimiz layihələrin effektivliyini qısa zaman çərçivəsində dəyərləndirmək bir az çətin məsələdir.İlk növbədə ona görə ki, həmin layihələr uzun müddət üçün hesablanmış layihələrdir. Məqsəd həmin ölkələrdə Azərbaycanın yalnız neft, karbohidrat yataqları ilə zəngin olan, son illərdə iqtisadi cəhətdən sürətlə inkişaf etmiş bir dövlət kimi deyil, zəngin tarixi, mədəni, ədəbi, fəlsəfi ənənələrə.malik bir xalq kimi təqdim etməkdir. Bu istiqamətdə dünyaca məşhur yazıçılar, elm adamlarının ev muzeylərində Azərbaycan guşəsinin yaradılması, həmin şəxslərin Azərbaycan dilində dərc olunmuş əsərlərindən ibarət toplunun sərgilənməsinin əsas məqsədi ondan ibarət idi ki, həmin muzeylərə gələn yerli əhali və xarici qonaqlara mesajımızı çatdıraq. Onları məlumatlandıraq ki, Azərbaycanda həmin yazıçı və şairlər, elm adamları tanınır, onların əsərləri Azərbaycan oxucusuna yaxındır. Bununla da Azərbaycan xalqının nə qədər intelektual olduğunu ortaya qoyaq. Təbii ki, bu uzun bir yolun tərkib hissəsidir. Gələcəyə yönəlik layihələrimiz də var. Yaxın zamanlarda BMT-nin gənclərlə bağlı bir neçə platformasında Azərbaycanı təmsil etməyə hazırlaşırıq. Bununla bağlı ciddi işlər aparılır. Güman edirəm ki, yaxın vaxtlarda həmin qurumlarda da Azərbaycanı təmsil etmək bizə nəsib olacaq. Əsas məqsəd ondan ibarətdir ki, Azərbaycan həqiqətlərini həmin vasitə ilə də dünyaya çatdıraq.

-Dünya Azərbaycanlı Gənclər Birliyinin 2014-cü il üçün fəaliyyət istiqamətləri müəyyən edilibmi və cari ildə birlik olaraq hansı istiqamətlərə daha çox diqqət ayıracaqsınız?

-2014-cü il üçün bir sıra tədbirlərin keçirilməsi nəzərdə tutulub. Məlum olduğu kimi hər iki ildən bir Dünya Azərbaycanlı Gənclərinin Konqresinin keçirilməsi öhdəliyimiz var. Bu il Diasporla İş üzrə Dövlət Komitəsi, Gənclər və İdman Nazirliyi, eləcə də Dünya Azərbaycanlı Gənclər Birliyinin birgə təşkilatçılığı ilə Dünya Azərbaycanlı Gənclərinin II Konqresinin keçirilməsi planlaşdırlır. Həmin konqresdə növbəti illər üçün Azərbaycan gəncliyinin inkişaf, fəaliyyət strategiyası ortaya qoyulacaq və bununla bağlı konsepsiyanın müzakirə edilməsi nəzərdə tutulur. Həmin müzakirələrin nəticəsi olaraq bir neçə ölkədə Dünya Azərbaycanlı Gənclər Birliyinin nümayəndəliklərinin təsis olunması məsələsi həllini tapa bilər. Ümumiyyətlə, sözügedən toplantı Konqresin qəbul edəcəyi qərarlar əsasında növbəti illər, o cümlədən 2014-cü il üçün fəaliyyət proqramının tərtib olunmasından ibarətdir. Dünya Azərbaycanlı Gənclərinin II Konqresi çox önəmli bir hadisədir. Çünki bu dünya azərbaycanlı gənclərinin ümumi strategiyasını ortaya qoyan bir hadisə olacaq. Güman edirəm ki, dünya azərbaycanlı gəncləri həmin tədbirə çox ciddi yanaşaraq ötən iki il ərzində fəaliyyət göstərdikləri ölkələrdə reallaşdırdıqları layihələr, ideyalar barədə bizləri tanış edəcəklər.

-Konqres harada keçiriləcək?

-Dünya Azərbaycanlı Gənclərinin II Konqresi Bakı şəhərində keçiriləcək.

-Təxminən nə vaxta nəzərdə tutulub?

-Hələlik bu istiqamətdə müzakirələr gedir. Konqresin yaxın aylarda keçirilməsi nəzərdə tutulur.

-Bəs diaspor təşkilatları gənclərin potensialından nə dərəcədə istifadə etməyə, onları diaspora hərəkatına cəlb etməyə maraqlı görünürlər?

-İstənilən cəmiyyətdə hər zaman böyüklərlə kiçiklər arasında müəyyən fikir ayrılığının mövcud olması normaldır. Biz bunu kifayət qədər normal qarşılamalıyıq. Ancaq digər tərəfdən yeni dövrün yeni tələbləri var. Artıq bu gün 20 il bundan əvvəl aparılan fəaliyyət əsasında çalışmaq, müəyyən layihələr həyata keçirmək qeyri-mümkündür. Biz yerlərdə fəaliyyət göstərən diaspor təşkilatları ilə sıx əlaqələrin qurulmasına nail olmaq istəyirik. Bir çox ölkədə biz buna yüksək səviyyədə nail olmuşuq. Bəzi ölkələrdə isə müəyyən çətinliklərimiz var. Hələ də gənclərə kiçik kimi baxan təşkilatlarımız var. Ancaq dünyada gedən inkişaf onu göstərir ki, həm sosial şəbəkələrdə, həm piar kampaniyalarının aparılmasında gənclərimz çox aktiv rol oynamaqdadırlar. Güman edirəm ki, böyüklərimiz də öz təcrübələrini gənclərlə bölüşərək onların daha aktiv fəaliyyət göstərməsinə imkan yaradacaqlar. Onu da qeyd etmək yerinə düşər ki, artıq bir çox yerlərdə gənclərə kiçik kimi yanaşılması aradan qalxır və gənclərimiz həmin təşkilatlarda hətta aparıcı rol oynayırlar. Gənclər bir çox hallarda bəzi diaspor təşkilatlarının rəhbər vəzifələrinə də seçilirlər.

-Bəzən xarici ölkələrdə yaşayan gənclərimiz arasında müəyyən fikir ayrılığı meydana çıxır. Belə ki, xarici ölkələrdəki bəzi gənclər Azərbaycan dövlətinə qarşı müxalif mövqe sərgiləyirlər. Bu kimi halları necə qarşılayırsınız?

-Hər bir azərbaycanlı üçün həyatında ən müqəddəs amillərdən biri Azərbaycan dövləti olmalıdır. Ana vətən yalnız öz evimiz, ailəmiz demək deyil. Həmin ailənin, evin yaşanmasını təmin edən böyük bir məfhum var ki, o da dövlətçiliyimizdir. İstər ölkə daxilində, istərsə də xaricdə Azərbaycan adı gələndə özünü azərbaycanlı hesab edən, damarlarında azərbaycanlı qanı axan, hətta Azərbaycanı özünə dost sayan hər bir şəxs vahid bir qüvvə kimi birləşməlidir. Təssüflər olsun ki, bəzi ölkələrdə bizim gənclərimizin içərisində olan azsaylı quruplar bəzən özlərini Azərbaycana müxalif kimi təqdim edirlər. Onlar Azərbaycanda gedən bəzi proseslər barədə müsbət rəyin formalaşdırılmasından böyun qaçırırlar. Bu bizdə yalnız təssüf hissi doğurur. İstənilən prizmadan yanaşdıqda Azərbaycan dövlətçiliyinin qorunması, inkişaf etdirilməsi hər bir Azərbaycan vətəndaşının borcudur. Azərbaycan dövləti bu gün hər bir vətəndaşın inkişafı üçün kifayət qədər şərait yaratmaqda, yeni-yeni layihələrin həyata keçirilməsinə nail olmaqdadır. Bu proses hər gün davam edir. Biz isə Azərbaycan gəncləri olaraq ümumilikdə Azərbaycan dövlətçiliyi ətrafında birləşmişik. Çalışacağıq ki, Azərbaycan dövlətinin daha güclənməsi, möhkəmlənməsinə biz də öz töhfəmizi verək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 7 mart.- S.15.