“Xaricdə yaşayan hər bir soydaşımız

diaspor məsuliyyəti daşıyır”

Fuad Hüseynzadə: “DJB-ın yaradılması həm də

onu göstərir ki, Azərbaycan jurnalistikası beynəlxalq

jurnalistika ənənələrinə uyğun olaraq inkişaf edir”

Diaspor Jurnalistləri Birliyinin sədri Fuad Hüseynzadənin “Olaylar”-a müsahibəsi.

- Diaspor Jurnalistləri Birliyinin yaradılması hansı zərurətdən irəli gəldi?

- Birliyin yaradılması illərin təcrübəsinin nəticəsidir. Çünki illərdir ki, biz diaspor mövzusunda müxtəlif səpkili yazılarla mediada çıxış edirik. Artıq, diaspor mövzusunda yazan jurnalistlər profilləşib. Biz tez-tez görüşüb diasporla bağlı fikir mübadiləsi edir, təcrübəmizi bölüşür, müzakirələr aparırdıq. Ötən ilin sonunda, Dünya Azərbaycanlılarının Həmrəyliyi Günü ərəfəsində isə bir araya gələrək DJB-ni yaratmaq qərarına gəldik. Bu, Azərbaycanda diaspor mövzusunda yazan jurnalistləri bir araya gətirəcək təşkilatdır. Qurumda ölkənin müxtəlif qəzet və portallarında fəaliyyət göstərən mətbuat nümayəndələri təmsil olunur. Onu da deyim ki, DJB-ın yaradılması Azərbaycanda sahəvi jurnalistikanın inkişaf göstəricidir. Bu da ümumiyyətlə, jurnalistikamızın inkişafının bir nümunəsidir. Nəzərə çatdırım ki, beynəlxalq jurnalistikada jurnalistlərin sahəviləşməsi vacib amil hesab olunur. DJB-ın yaradılması həm də onu göstərir ki, Azərbaycan jurnalistikası beynəlxalq jurnalistika ənənələrinə uyğun olaraq inkişaf edir.

- Əsas məqsəd və fəaliyyət istiqamətiniz hansılardır?

- DJB-ın məqsədi ölkə mediasının diaspor mövzusuna diqqətini artırmaq, xaricdəki Azərbaycan diaspor təşkilatları ilə əlaqələr qurmaq, onların fəaliyyətini cəmiyyətə çatdırmaqdır. Bundan başqa təşkilat xarici ölkələrin nüfuzlu KİV-lərində çalışan jurnalistlərlə əlaqələr qurmaq, bu yolla Azərbaycan həqiqətlərinin ayrı-ayrı ölkələrin KİV-lərində yayılmasına nail olmaq istiqamətində də fəaliyyət göstərəcək. Biz inkişaf etmiş ölkələrin diaspor jurnalistlərinin təcrübəsini kompleks şəkildə araşdırıb və onlardan Azərbaycan şəraitində istifadə yollarını müəyyənləşdiririk. Çalışacağıq ki, Azərbaycanın diaspor təşkilatları ilə intensiv media əlaqələri quraq. Diaspor sahəsində tədris, maarifçilik sisteminin yaradılması ilə bağlı fəaliyyətlər nəzərdə tutmuşuq. Bununla yanaşı, diaspor sahəsinə dair ədəbiyyatların, xüsusi kitabçaların və s. nəşr materiallarının hazırlanması, eləcə də dəyirmi masa, forum və konfransların keçirilməsi də nəzərdə tutulub.

- Bu yaxınlarda Xocalı soyqırımının 22-ci il dönümü qeyd olundu. DJB olaraq siz hansı təbirlər keçirdiniz?

- Biz Xocalı soyqırımının 22-ci ildönümü ərəfəsində silsilə tədbirlər keçirdik. Belə ki, ilk olaraq DJB tərəfindən Bakıda “Xocalı soyqırımının dünyada təbliğ olunmasının yeni formaları” mövzusunda dəyirmi masa keçirildi. Mötəbər qonaqların iştirak etdiyi bu tədbirdə maraqlı təkliflər irəli sürüldü. Yeri gəlmişkən, biz bu təklifləri aidiyyəti dövlət və qeyri-hökumət təşkilatlarına, eləcə də xaricdəki bütün milli diaspor qurumlarına göndərdik. Növbəti işimiz kimi DJB-ın Ukrayna üzrə nümayəndəliyinin rəhbəri Qaraş Tağıyevin Xocalı soyqırımı ilə bağlı çəkdiyi filmi qeyd etmək olar. Filmin əsas süjet xəttini Moldova Ombudsmanı Aureliya Qriqoriunun Ermənistan Parlamentində Xocalı soyqırımı ilə bağlı ədalətli çağırışı, Xocalı həqiqətlərini səsləndirməsi və bunun nəticəsində Ermənistanda üzləşdiyi fəlakətlər, təhlükələr təşkil edir. Bundan başqa 26 fevral günü bizim seçdiyimiz 50 nəfər fəallar tərəfindən elektron məktub aksiyası keçirildi. Bu aksiya zamanı 800-ə yaxın Avropa parlamentariləri, həmçinin dünyanın məşhur KİV orqanlarının elektron ünvanlarına Xocalı soyqırımı ilə bağlı ingilis dilində hazırlanmış yazılar göndərildi. Bütün bunlarla yanaşı, təşkilatın 3 təmsilçisi Almaniyada Xocalı soyqırımı ilə bağlı keçirilən aksiyalarda iştirak etdilər. Eyni zamanda DJB təmsilçilərinin xarici mediada Xocalı həqiqətləri haqda yazları çap olundu.

- Azərbaycan mətbuatı diaspor mövzusuna lazımi diqqət ayırırmı?

- Əvvəlki illərlə müqayisədə bu gün KİV-də diaspor mövzusuna xüsusi diqqət göstərilir. Diasporla İş üzrə Dövlət Komitəsi mütəmadi olaraq diaspor təşkilatlarının gördüyü işlərlə bağlı xəbərləri mediada yayır. Eyni zamanda media orqanları özləri fərdi olaraq diaspor mövzunda materialları dərc edirlər. Xüsusən son illər Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun elan etdiyi KİV layihələri və fərdi jurnalist yazıları ilə bağlı müsabiqələrdə diaspor mövzuna yer verilir. Fondun elan etdiyi KİV layihələri müsabiqəsində diaspor mövzusu istiqaməti üzrə qalib olan media orqanları müxtəlif səpkili yazılar dərc edirlər. Bu da nəticədə diaspor mövzusunun KİV-də daha çox işıqlandırılmasına gətirib çıxarır. Məhz bunun da nəticəsidir ki, artıq, diaspordan yazan jurnalistlər şəbəkəsi yaranıb. Amma diaspordan nə qədər yazılsa da bu, kifayət deyil. Biz bu mövzuya diqqəti daha da artırmalıyıq. Elə DJB-ı yaratmaqda bir məqsəd də bundan ibarətdir. Əslində biz diasporumuzu Azərbaycanda tanıtmaqla yanaşı, onları yaşadıqları ölkələrdə də tanıtmalıyıq. Çünki xaricdə yaşayan elə azərbaycanlı alimlər var ki, onların elmi ixtiraları nəticəsində yeni-yeni zavod və müəssisələr açılıb. Hətta onların ixtiraları Avropada, Amerikada qeydiyyatdan keçən patentlərlə qorunur. Bir çox xarici ölkələr bilməlidir ki, onların elimi, texnikası, səhiyyəsi və s. inkişafında azərbaycanlılar da öz töhfəsini verirlər. Biz bu istiqamətdə hazırda Almaniyada layihə həyata keçiririk. Gələcəkdə digər ölkələrdə də bu kimi layihələr həyata keçirəcəyik. Biz öz yazılarımızla diasporun məsuliyyətini artırmalıyıq. Yəni yazılar elə verilməlidir ki, diaspor öz məsuliyyətini hiss etsin. Ümumiyyətlə, diasporumuz dövlət, xalq qarşısında məsuliyyət hiss etməlidir. Azərbaycanı dünyada tanımaq işində dayanmadan, mütəmadi olaraq fəaliyyətdə olmalıdır. Diasporumuz özünü güclü, müstəqil dövləti olan bir xalqın nümayəndəsi olaraq göstərməlidir. Bu gün milli diasporumuzun güdən-günə çiçəklənən Azərbaycan adlı ölkəsi var. Dünya Azərbaycanlılarının III qurultayında Prezident İlham Əliyevin dediyi kimi dünyada yaşayan bütün azərbaycanlılar həmişə bilsinlər ki, onların arxasında güclü Azərbaycan dövləti dayanır və onlar hər zaman Azərbaycan dövlətinə arxalana bilərlər.

- Fəal diaspor nümayəndələri cəmiyyət tərəfindən o qədər də tanınmırlar. Sizə elə gəlmirmi ki, burada medianın da günahı az deyil?

- Qeyd etdiyim kimi bu gün Azərbaycan mediası diaspor mövzusuna və ya diaspor nümayəndələrinin mediada işıqlandırılmasında daha çox maraqlıdır. Çünki bu gün Azərbaycan həqiqətlərinin dünyada təbliği işi prioritetdir. Bu işi də əsas həyata keçirən qüvvə diasporumuzdur. Məhz buna görə də media diasporla işləməyə, onun fəaliyyətindən yazmağa maraqlıdır. Amma bəzən biz praktikada bəzi diaspor nümayəndələrinin mediaya yaxınlıq etmək istəklərinin olmadığının şahid oluruq. Hətta belə diaspor nümayəndələri ölkəyə gələrkən belə, mediaya çıxmağa maraqlı olmurlar.

- Azərbaycan həqiqətlərinin xarici həmkarlarınıza çatdırılması üçün birlik olaraq nələri düşünürsünüz?

- Biz əcnəbi həmkarlarımızla birbaşa və ya DJB-ın xaricdəki özək sədrlərinin vasitəsilə əlaqələr yaradırıq. Onlarda Azərbaycan həqiqətlərinə maraq olsun deyə qarşılıqlı informasiya mübadiləsi etməyi düşünürük. Məsələn, biz hər hansı ölkənin həqiqətlərini öz mediamızda yayacağıq. Onlar da bizim həqiqətlərimizi öz mediasında dərc edəcəklər. Belə olanda əcnəbilər də görər ki, biz onların da hər hansı probleminə biganə deyilik. Həmçinin DJB nəzdində Diaspor Media Mərkəzi yaratmaq fikrimiz var. Bu mərkəz vasitəsilə davamlı olaraq xaricdəki azərbaycanlı və əcnəbi həmkarlarımızı Azərbaycan həqiqətləri ilə bağlı məlumatlarla təmin edəcəyik. Eləcə də onların, ümumiyyətlə, diasporumuzun məlumatlarını Azərbaycan mediasında yayacağıq.

- Diaspor nümayəndələri tərəfindən birliyin yaradılması necə qarşılanır?

- Əlbəttə ki, DJB-ın yaradılması diaspor təşkilatı sədrləri tərəfindən çox müsbət qarşılanır. Biz çalışırıq ki, diasporla birgə əməkdaşlıq çərçivəsində fəaliyyət göstərək. Bu fəaliyyətlə diasporumuzun işinə media dəstəyi vermiş oluruq. Eyni zamanda onlarla birgə Azərbaycan həqiqətlərini xaricdə yaymaq işinə qoşulmuş oluruq. Bütün hallarda məqsəd və qayəmiz Azərbaycanın səsinin xaricdə daha çox eşidilməsidir. Azərbaycan naminə kim çalışırsa, biz onunlayıq və ya buyursun, biz onunla işləməyə həmişə hazırıq.

- Diasporun fəaliyyəti dövlətlərarası əlaqələrin ümumi dinamikasına necə müsbət təsir göstərə bilər?

- Diasporun dövlətlərarası münasibətlərin inkişafında özünəməxsus rolu var. Əgər diaspor öz tarixini, mədəniyyətini, milli-mənəvi dəyərlərini layiqincə tanıdırsa, yaşadığı ölkənin istər yerli, istər rəsmi dairələrinin diqqətini çəkmiş olur. Bunun üçün diaspor yaşadığı ölkənin ictimai-siyasi proseslərində fəallıq göstərməlidir. Eyni zamanda inteqrasiya sürətini artırmalıdır. Öz tədbirlərinə yaşadığı ölkənin daha çox siyasi və akademik elitasını cəlb etməlidir. Belə olduqda diaspor yaşadığı ölkənin marağını qazanar. Xaricdə daimi yaşayan, işləyən, təhsil alan hər bir azərbaycanlı bu kimi münasibətlərin inkişafında əhəmiyyətli rol oynayır. Bu münasibətləri inkişaf etdirmək üçün o demək deyil ki, hər hansı diaspor təşkilatını təmsil edəsən. Azərbaycandan kənarda yaşayan hər bir soydaşımız diaspor məsuliyyəti daşıyır.

- Perspektiv planlarınızı da bilmək istərdik.

- Bizim əsas fəaliyyətimiz xaricdə Azərbaycan həqiqətlərinin təbliğatını aparmağa fokuslanıb. Çalışırıq ki, faciələrimizi özümüzün yox, başqalarının dili ilə dünya ictimaiyyətinə çatdıraq. Belə olduqda təbliğat daha böyük effekt vermiş olar. Biz Azərbaycan həqiqətlərinin təbliğində hədəflərə çatmaq üçün fərqli layihələr həyata keçirəcəyik. Öz təbliğati işimizdə yeni formalara üstünlük verəcəyik.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 13 mart.- S.10.