İbrahim Əhrarinin

diasporun inkişafında xidmətləri

Tarixin müxtəlif dövrlərində rejimin təqib və təzyiqlərindən xilas olmaq üçün Avropa ölkələrinə üz tutan cənublu soydaşlarımız da bu gün Azərbaycan diasporunu təmsil etməkdədir. Müxtəlif xarici ölkələrdə elmi və mədəni fəaliyyətlərlə məşğul olan həmin cənublu soydaşlarımız paralel olaraq yaşadıqları ölkələrdə Azərbaycanın təbliği, onun haqq səsinin dünya ictimaiyyətinə çatdırılması prosesində də yaxından iştirak edirlər. Belə şəxslərdən biri də İbrahim Əhraridir.

İbrahim Əhrari 1938-ci ildə Cənubi Azərbaycanın Urmiya şəhərində anadan olub. O, 1956-cı ildə Təbrizdə rəssamlıq məktəbinə daxil olur. Lakin o dövrdə İranda yaranmış siyasi vəziyyət və valideynlərinin təkidi ilə İbrahim Əhrari rəssamlıq sənətindən uzaqlaşır. 1966-cı ildə İbrahim Əhrari Almaniyaya mühacirət edir və burada Berlin İncəsənət Ali Məktəbinin rəssamlıq, qrafika-dizayn fakultəsini bitirir. İbrahim Əhrari 1975-ci ildən etibarən Almaniya Rəssamlar Təşkilatının işcisi kimi fəaliyyət göstərməyə başlayır. İbrahim Əhrari 1973-1975-ci illərdə Tehran Universiteti incəsənət fakültəsinin və Tətbiqi İncəsənət Ali Məktəbinin dosenti olur. O, 1975-ci ildə Tehran Hote İnstitutunda Almaniya-İran Mədəniyyət Əlaqələri çərçivəsində şərgilərin təşkilatçısı kimi fəaliyyət göstərir. İbrahim Əhrari 1975-ci ildə Berlin Azad Universitetində İncəsənət Tarixi üzrə təhsil alır. 1976-2003-cu illərdə isə cənublu soydaşımız Berlin Təsviri İncəsənət üzrə Sənətkarlar Cəmiyyətinin çap atelyesində ofort atelyesinin rəhbəri olaraq çalışır.

Almaniyada yaşadığı müddətdə İbrahim Əhrari müntəzəm olaraq Azərbaycanın təbliği məqsədilə müxtəlif mədəni tədbirlərin keçirilməsinə təşəbbüs göstərir və həmin tədbirlərə təşkilatçılıq edir. 1988-ci ildə İbrahim Əhrari Almaniyada Azərbaycan mədəniyyətinə həsr olunmuş silsilə tədbirlər keçirir. 2008-ci ildə isə Azərbaycan Dövlət Təsviri İncəsənət Akademiyasinın fəxri doktoru adına layiq görülür. İbrahim Əhrari rəssam olmaqla yanaşı, həmçinin müxtəlif illərdə Azərbaycan Alman Mədəniyyətinin İnkişafı Cəmiyyətinin, Alman- Azərbaycan Mədəniyyəti Dostları Cəmiyyətinin sədri, Berlin-Bakı Qalereyasının (MMM) qaleristi kimi də fəaliyyət göstərir. Həmyerlimiz 2007-ci ildən etibarən Berlin-Bakı Qalereyasının (MMM) icraçı direktoru olaraq Azərbaycan və alman sənətkarlarının Berlində və Bakıda sərgilərinin təşkili işləri ilə məşğul olur. İbrahim Əhrari indiyə qədər İran, Əfqanıstan, Azərbaycan, Hindistan, Almaniya, Moskva, Fransa, Hollandiya, İspaniya, Belçika, Polşa, İngiltərə, Şimali İrlandiya, Braziliya, Argentina və Meksikada çoxsaylı sərgiləri keçirib. İbrahim Əhrari “Mən hər zaman varam”, “Xocalı ağırlığı” (rəsm, kətan üzərində yağlı boya və akril), “Mərd və Namərdin nağılı” (illustrasiya), “Əmin-amanlıq sorağında” (oyma, sulu murəkkəb), Dr.h.c. İbrahim Əhrari (litoqrafiya) və s. əsərlərin müəllifidir. Ümumiyyətlə, Azərbaycan diasporunun inkişafı, xalqımızın zəngin tarixi-mədəni irsinin təbliği, mədəniyyətimizin tanıdılması istiqamətində İbrahim Əhrarinin müstəsna xidmətləri olub. Məhz bütün bunların nəticəsidir ki, 2011-ci il, iyulun 4-də Azərbaycan Respublikası Prezidenti İlham Əliyevin müvafiq sərəncamı ilə mədəniyyət və incəsənət sahəsindəki nailiyyətlərinə görə İbrahim Əhrari “Əməkdar incəsənət xadimi” fəxri adına layiq görülür.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 18 mart.- S.10.