Arxangelskdə yaşayan soydaşlarımızın

problemləri diasporun daim diqqətindədir

Rusiya Federasiyasının subyektlərindən ən çox azərbaycanlıların məskunlaşdığı vilayətlərdən biri də Atxangelsk vilayətidir. Bu vilayətdə yaşayan soydaşlarımızla koordinasiyalı şəkildə işin təşkili, onların problemlərinin araşdırılıb həll olunması məqsədilə 2001-ci ilin fevral ayında Ümumrusiya Azərbaycanlıları Konqresinin Arxangelsk şəhərində regional təşkilatı yaradılıb.

Əhəd Cəfərovun rəhbərlik etdiyi ÜAK regional təşkilatı tən müddət ərzində bir sıra təqdirəlayiq tədbirlər həyata keçirib. Sevindirici hal ondan ibarətdir ki, Artxangelsk vilayətində yaşayan soydaşlarımız daima Rusiya Federasiyasındakı səfirliyimiz, eləcə də digər diplomatik konsulluqların hər zaman diqqət mərkəzində olub. Belə ki, hələ 2006 il tarixində Baş Konsulluğun nümayəndə heyətinin Arxangelsk vilayətinə rəsmi səfəri təşkil edilib. Səfərin məqsədi Rusiya Federasiyasında son zamanlarda qeyri-leqal miqrasiyaya qarşı aparılan mübarizədə çoxsaylı soydaşlarımızın hüquq və mənafelərinin qorunması ilə bağlı olub. Səfər çərçivəsində baş konsul Arxangelsk vilayəti administrasiyasının başçısı vəzifəsini icra edən birinci müavin Vladimir Voykovla, Rusiya Federasiyası prezidentinin Arxangelsk vilayəti üzrə federal inspektoru Aleksey Yermakovla, parlament sədri Vitaliy Fortıqinlə görüşlər keçirib. Vladimir Voykovla baş konsulun görüşündə Rusiya-Azərbaycan dostluq əlaqələrindən, respublikamızın iqtisadiyyatının yüksək templə inkişafından, müasir Azərbaycan dövlətinin qurulmasında və çiçəklənməsində eks-prezident Heydər Əliyev rolundan danışılıb. Azərbaycan prezidenti İlham Əliyevin ölkəmizin hüdudlarından kənarında yaşayan soydaşlarımıza olan bilavasitə qayğısından və bu qayğı nəticəsində diasporumuzun inkişafından söz açılıb: Vilayət rəhbərliyi ikitərəfli əlaqələrin bərpası, yenidən qurulması və inkişafı üçün böyük potensialın olması, Arxangelsk –Azərbaycan iqtisadiyyat əlaqələrinə böyük biznesin cəlb olunması, biznes forumların keçirilməsini zəruriliyini vurğulayıb. Arxangelsk vilayəti və Azərbaycan hökumətləri arasında iqtisadi-ticarət, elmi-texniki və mədəni sahələrdə sazişin bağlanmasına hazır olduqlarını qeyd ediblər. Bundan əlavə, min nəfərlik şəhər filarmoniyasında Azərbaycan və Sankt-Peterburq incəsənət xadimlərinin iştirakı ilə “Azərbaycan günləri” adlı tədbirin keçirilməsi barədə razılıq əldə edilib. Hüquq –mühafizə orqanlarının rəhbərlikləri ilə aparılan görüşlərdə soydaşlarımızın regionda qarşılaşdıqları problemlərdən bəhs olunub. Arxangelsk vilayətinin Daxili İşlər İdarəsinin rəsmisi cənab Karpeyevin verdiyi məlumata əsasən, bu regionda 8000–ə yaxın azərbaycanlı yaşayır. Vilayət prokurorunun müavini cənab Şperlinq və Rusiya Federasiyasının Federal Miqrasiya Xidməti İdarəsinin Arxangelsk vilayəti üzrə rəisi xanım Carova soydaşlarımızın əksəriyyətinin regionda hüquq qaydalarına riayət etməsinə baxmayaraq, müəyyən faktorların (pasportlarının olmaması, yaşayış statusu almaq üçün Azərbaycandan alınan müvafiq arayışların gecikdirilməsi və bu üzdən qeyri-leqal yaşaması) inzibati qaydaların pozulmasına səbəb olduğunu qeyd ediblər. Arxangelsk meriyası rəhbərliyi ilə keçirilən görüşdə isə Arxangelsk şəhəri ilə Azərbaycanın hər hansı bir şəhərinin qardaşlaşmasını, Arxanqelsk şəhərinin ad günündə Baş Konsulluğun nümayəndə heyəti və Sankt-Peterburqda fəaliyyət göstərən Azərbaycan mədəniyyət xadimlərinin iştirakı ilə konsert proqramının keçirilməsi təklif edilib. Meriya rəhbərliyi bu təklifləri müsbət qarşılayıb. Arxanqelsk şəhərində milli diasporumuzun və Azərbaycan Beynəlxalq Bankının Arxanqelsk vilayətində filialının fəaliyyət göstərməsi üçün binanın ayrılmasına dair şəhər rəhbərliyinə müraciət edilib. Bundan əlavə, baş konsul Azərbaycan diasporunun müxtəlif təbəqələrini əhatə edən 80 nəfərdən ibarət aktiv üzvlərlə 3 saatlıq görüş keçirib. Baş konsul çıxışında, ümummilli lider Heydər Əliyevin tösiyələri əsasında xarici ölkələrdə milli diaspor qurumlarının yaradılması, formalaşması və yerli orqanlarla sıx münasibətlərin qurulmasının böyük əhəmiyyət kəsb etdiyini vurğulayaraq, bunun prioritet istiqamətlərdən biri olduğunu deyib. O, 2002-ci ildə Heydər Əliyevin Sankt-Peterburq milli diaspor numayəndələrinin qarşısında etdiyi çıxışda verdiyi tövsiyələri əldə əsas tutan, bu gün tam formalaşmış Sankt-Peterburq diaspor modelinin Arxangelskdə tətbiq olunmasının vacibliyini qeyd edib. Bunun əsasında görüşdə Azərbaycan diasporunun 19 nəfər fəal üzvündən ibarət Şura yaradılıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 19 mart.- S.15.