Cavanşir Feyziyevin “Türk dövlətləri

birliyi” kitabının təqdimatı keçirilib

Mətbuat Şurasının İdarə Heyətinin üzvü, millət vəkili Cavanşir Feyziyevin müəllifi olduğu “Türk dövlətləri birliyi” kitabının təqdimat mərasimi keçirilib. Mərasimdə millət vəkilləri, tanınmış ziyalılar, Azərbaycan Mətbuat Şurasının rəhbərliyi, eləcə də KİV nümayəndələri iştirak edib. Təqdimat mərasiminin iştirakçıları arasında Türkiyənin sabiq xarici işlər naziri Hikmət Çətin də olub.

Tədbiri giriş sözü ilə açan Azərbaycan Mətbuat Şurasının sədri Əflatun Amaşov kitabın məziyyətlərindən danışıb. Bildirib ki, millət vəkili Cavanşir Feyziyevin bu kitabı bir daha türk dövlətləri birliyinin vacibliyini önə çəkir: “Monoqrafiyanın vacib cəhətlərindən biri də yeni dünya düzənində türk toplumunun vahid orqanizm halında fəaliyyət göstərməsi zərurətinin konkret faktlarla isbatlanmasıdır. Məlumdur ki, zaman-zaman türklərə münasibət birmənalı olmayıb və eyni tendensiya yaşadığımız dövr üçün də aktuallığını saxlamaqdadır. İslami dəyərlərin praktik fəaliyyət müstəvisində tətbiqinin uğurlu modelini ortaya qoymuş türklərin simasında dinimiz bir çox xüsusisyyətləri ilə özünü göstərən fanatiklik və ehkamçılıq kimi yanlış yöndəki təqdimatlardan müəyyən qədər sığortalanıb, nümunəvi həyat tərzinin normasına çevrilib. Bəli, türklərin tarixi saxtalaşdırılıb, türk milli kimliyi məsələsi şübhə altına alınıb və digər xoşagəlməzliklər yaşanıb”. 70 il Sovet İmperiyasının idarəçiliyi altında olan türkdilli respublikaların bir-birindən ayrı düşdüyünü diqqətə çatdıran Əflatun Amaşov günümüzdə türkdilli respublikalar arasında münasibətlərin, əlaqələrin inkişaf etdiyini diqqətə çatdırıb. Bildirib ki, müstəqillik illərindən sonra bir qədər də inkişaf edən bu əlaqələr yeni-yeni qurumların yaranması zərurətini meydana çıxardı. Nəticə etibarilə TÜRKSOY, Türkdilli Ölkələrin Əməkdaşlıq Şurası, TURKPA kimi yeni-yeni qurumlar yaradıldı. Əflatun Amaşov kitabın müxtəlif dillərə tərcümə olunması təklifini irəli sürüb. “Onun həm də türk dövlətləri arasında yayılması vacibdir”.

Millət vəkili Yaqub Mahmudov da əsəri yüksək dəyərləndirib. Bildirib ki, bu gün bu əsərin çap olunmasını Azərbaycan siyasətşünaslıq elminin qələbəsi hesab edilməlidir. Millət vəkili çıxışında dünyada mövcud olan ədalətsizlikdən də söz açıb: “Dünyanın elə ölkələri var ki, heç orada demokratiya yoxdur. Amma onu dünyanın hər yerində ən yüksək demokratiya mövcud olan ölkə kimi təqdim edirlər. Tarix boyu soyqırımlar türklərə qarşı törədilib. Əsl soyqırımları xaç yürüşlərindən başlayıb. Terrorçuluq, soyqırım Qərbdən Şərqə doğru başlayıb. Həmin dövlətlər bir də baxırsan ki, gəlir Ermənistanda yalançı soyqırım məzarlığının üzərində əklil qoyurlar. Yalançı erməni soyqırımı tanıyanlar, tarix boyu soyqırım törətdiyi xalqlardan üzr istəmələdirlər”. Türk dünyasının dirçəlişinin başladığını deyən Y. Mahmudovun sözlərinə görə, bu da çox siyasətçi, ölkə liderlərini təlaşa salıb. “Bu gün türk dövlətlərinin yenidən dirçəlişi var. Vaxt var idi deyirdik ki, yox, ermənilər heç nə edə bilməzlər. Amma onların ardındakı qüvvələri saya salmırdıq. Belə-belə Qarabağı itirdik”. Yaqub Mahmudov deyib ki, ortaq türk dilinin yaradılmasına getməliyik: “ Bu, kitab arzudur. Amma bu arzunu gerçəkləşdirmək üçün çətin yolumuz var. Türk dünyası olmadan tarix yoxdur. Odur ki, bu kitabı alqışlayıram və onun türk dünyasının hamısında çap olunmasını təklif edirəm”. Millət vəkili Nizami Cəfərov da kitabı yüksək dəyərləndirib. O bildirib ki, istənilən kitab qələmə alınanda arzu ilə yazılır. Sabir Rüstəmxanlı isə Əli bəy Hüseynzadədən sitat gətirərək qeyd edib ki, “biz demirik ki, hamı bir çatıya yığışıb bir yaşasınlar”. Onun sözlərinə görə, böyük hədəf olmalıdır. “Heç kim bizi millətçilikdə qınamasın. Hətta töküntümüzə belə sahib çıxmalıyıq. Avropa dəyərlərinə yox, türkçülüyə, türk dəyərlərinə sahiblənməli, meyllənməliyik”.

Sonda çıxış edən kitabın müəllifi, millət vəkili Cavanşir Feyziyev natiqlərə təşəkkürünü bildirib. “Biz bir şeyə əmin olmalıyıq ki, türk dövlətlərinin birliyi labüddür. Əks halda 100-200 ildən sonra türk dövlətlərindən danışmaq olmayacaq”. Tədbir çərçivəsində Cavanşir Feyziyevə Mətbuat Şurası və Dialoq Avrasiya Platforması ilə birgə təsis edilən “Həqiqətdə xidmətlərinə görə” mükafatı ilə təqdim olunub. Sonda Əlibəy Hüseynzadəyə həsr olunmuş film nümayiş olunub. Film Mətbuat Şurasının dəstəyi ilə çəkilib.

Süleyman

Olaylar.- 2014.- 19 mart.- S.9.