Dünyanın hər bir yerində

diasporumuz tərəfindən

Azərbaycan mədəniyyəti təbliğ olunur

Azərbaycan diasporu ölkəmizin həqiqətləri, Dağlıq Qarabağ problemi və Xocalı soyqırımının tanıdılması istiqamətindəki fəaliyyətlə yanaşı zəngin mədəni irsimizin, tarix və mədəniyyətimizin təbliği sahəsində də çoxsaylı fəaliyyətlər göstərir. Ötən dövbr ərzində Diasporla İş üzrə Dövlət Komitəsinin təşkilatçılığı ilə xarici ölkələrdə yaşayan azərbaycanlı uşaqlara və gənclərə müasir informasiya texnologiyaları vasitəsilə Azərbaycan dili, ədəbiyyatı, tarixi, mədəniyyəti və coğrafiyasının tədris edilməsi, soydaşlarımızın milli ruhda tərbiyə olunmasına xidmət etmək məqsədilə Distant təhsil üzrə layihə reallaşdırılıb.

Belə ki, il ərzində həmvətənlərimiz və xaricdə fəaliyyət göstərən diaspor təşkilatları tərəfindən Vətənimizin zəngin mədəni irsininin təbliğ olunması istiqamətində 204 mədəni-kütləvi tədbir təşkil olunub. Xarici ölkələrdə fəaliyyət göstərən diaspor təşkilatlarımız, o cümlədən burada yaşayan həmvətənlərimiz Azərbaycanın əlamətdar tarixi hadisələrinin, milli bayramlarının, milli-mənəvi dəyərlərinin, qədim mədəniyyətinin təbliğ olunması ilə bağlı tədbirlər həyata keçiriblər. Bundan başqa, Azərbaycan tarixində silinməz izlər buraxmış görkəmli şəxsiyyətlərin yad edilməsi məqsədilə bir sıra mühüm bayram tədbirləri, konsert proqramları təşkil edib, ölkəmizi dünya festivallarında və sərgilərdə layiqincə təmsil ediblər. Hesabat dövründə Azərbaycan Respublikası Prezidentinin 2013-cü il 21 yanvar tarixli 2679 nömrəli Sərəncamı ilə təsdiq edilmiş Tədbirlər Planının 2-ci bəndinə uyğun olaraq Azərbaycanın xarici ölkələrdə fəaliyyət göstərən diasporları vasitəsilə dünyanın müxtəlif ölkələrində Azərbaycan xalqının ümummilli lideri Heydər Əliyevin 90 illik yubileyinə həsr olunmuş müxtəlif formatlı tədbirlər, elmi konfranslar, dəyirmi masalar, fotosərgilər keçirilib. Almatı şəhərindəki K.Satpaev adına Qazaxıstan Milli Texniki Universitetində Qazaxıstan Azərbaycanlıları Milli Mədəniyyət Mərkəzləri İttifaqının dəstəyi ilə Azərbaycan xalqının ümummilli lideri Heydər Əliyevin 90 illik yubileyi münasibəti ilə elmi-praktiki konfrans keçirilib. “Azərbaycan-Qazaxıstan əlaqələrinin inkişafında və möhkəmlənməsində Heydər Əliyevin rolu” adlı elmi-praktiki konfransda universitetin professorları, elmlər doktorları və tələbələri, türk, ərəb, özbək, çeçen, qırğız milli mərkəzlərini təmsil edən alimləri ümummilli lider Heydər Əliyevin Şərq dünyasındakı şəxsiyyətinin dəyəri, onun siyasi baxışları və başqa xüsusi keyfiyyətləri haqqında məruzə ilə çıxış ediblər. Qazaxıstan Azərbaycanlıları Milli Mədəni Mərkəzləri İttifaqının sədri Vidadi Salahov, Almatıdakı Azərbaycanlıların “Ozan” İctimai Birliyinin sədri Qərib Məmmədov, həmçinin professor və akademiklər, tələbələr Heydər Əliyevin müstəqil, müasir Azərbaycanın yaranması və möhkəmlənməsi istiqamətindəki müstəsna xidmətindən danışıblar. Tədbirdə iştirak edənlərə ümummilli lider Heydər Əliyevin həyat və yaradıcılığını əks etdirən buklet və Qazaxıstan Azərbaycanlılarının milli dərgisi olan “Turan Times” qəzetinin Ümummilli liderə həsr olunmuş xüsusi buraxılışı paylanıb. Almaniyada Berlin “Azərbaycan Evi”nin təşkilatçılığı ilə ümummilli lider Heydər Əliyevin anadan olmasının 90 illik yubileyi münasibətilə futbol üzrə mini-turnir keçirilib. Turnirdə Almaniya, Çexiya, Sloveniya, Danimarka təmsilçiləri ilə yanaşı, Almaniyada yaşayan azərbaycanlılardan təşkil olunmuş “Azəri” komandası da mübarizə aparıb. On komandanın çıxış etdiyi turnirdə 150 uşaq iştirak edib. Qərara alınmışdır ki, ümummilli lider Heydər Əliyevin anadan olduğu 10 may tarixində hər il Berlin şəhərində analoji turnir təşkil olunsun.

Xaricdə yaşayan azərbaycanlılar tərəfindən 28 May - Respublika günü, Azərbaycan Respublikasının Dövlət Bayrağı günü, Konstitusiya günü və sair əlamətdar və tarixi günlər münasibətilə bir sıra tədbirlər həyata keçirilib. Konnektikut ştatında Azərbaycan diasporunun təşkilatçılığı ilə 28 may Respublika günü münasibəti ilə bayraq qaldırma mərasimi təşkil edilib. Mərasimdə iştirak edən Azərbaycanlı nümayəndələr öz aktivliyini nümayiş etdiriblər. Niderland Krallığının Assen şəhərində yaşayan azərbaycanlılar 28 May – Respublika gününü qeyd edib. “Odlar Yurdu” Cəmiyyəti tərəfindən təşkil edilən tədbir Assen şəhərinin nüfuzlu tədris ocaqlarının birində - Nassau Kollecdə keçirilmişdir. Əsasən kollecin şagird və müəllim heyətinin iştirak etdiyi gecəyə yerli tədris hissənin məsul isçiləri də qatılmışdır.Tədbirdə ilk çıxış edən məktəbin direktoru İ.Meuldijk ötən il keçirilən və Xocalı faciəsinə həsr olunmuş tədbiri yada salınmışdır. O, Assen şəhərinin ICO konsert zalında keçirilib. 28 May Respublika gününə həsr olunmuş bu tədbirdə uşaqların çəkdiyi rəsmlər sərgilənib, sonra isə Azərbaycan Respublikası və ümummilli lider Heydər Əliyev haqqında filmlər nümayiş olunub. Tədbirin sonunda musiqi nömrələri səsləndirilib.

Kaliforniyada İrvin universitetində Azərbaycan Respublikasının 95 illiyi münasibətilə tədbir keçirilib. İrvin universitetinin Azərbaycanlı Tələbə Assosiasiyası tərəfindən təşkil edilmiş tədbirə Azərbaycan, türk və yəhudi icmalarının üzvləri qatılıb. Tədbirdə Azərbaycanlı Tələbə Assosiasiyasının üzvü, Dövlət siyasəti üzrə namizədlik dərəcəsi almış Aytən Nəbiyeva və Amerika Azərbaycan Şurasının baş direktoru Cavid Hüseynov çıxış ediblər. İsrail-Azərbaycan Beynəlxalq Assosiasiyası nəzdində Azərbaycan Mədəniyyət Mərkəzində Azərbaycan xalqının ümummilli lideri Heydər Əliyevin vəfatının ildönümünə həsr olunmuş açıq qapı günü keçirilib. Həmin gün mədəniyyət mərkəzinə sovet dövründə və müstəqillik illərində uzun müddət Azərbaycana rəhbərlik etmiş şəxsiyyətə ehtiramını bildirmək istəyən çoxlu İsrail vətəndaşı gəlib. Mədəniyyət Mərkəzinə gələnlər Diasporla İş üzrə Dövlət Komitəsinin təqdim etdiyi, Ulu Öndərin ömür yoluna həsr olunmuş ədəbiyyatla tanış olub, onun maraqlı bioqrafiyasından sətirləri və Heydər Əliyevin sitatlarından ibarət “Müdrik sözlər” məcmuəsində toplanmış “Mən fəxr edirəm ki, mən azərbaycanlıyam!”, “Qürur duyuram ki, Azərbaycan müstəqil, azad və güclü dövlətdir!” kimi məşhur sözləri və aforizmləri dönə-dönə oxuyublar. Misirin İsgəndəriyyə şəhərində fəaliyyət göstərən Misir-Azərbaycan Ticarət Nümayəndəliyi tərəfindən nəşr olunan “EgAz” jurnalının növbəti nömrəsi çapdan çıxmıb. Jurnalın bu nömrəsi oxucuları Azərbaycanın və Misirin siyasi və mədəni həyatında əhəmiyyətli hadisələrlə tanış edilib. Misirli müəllif Zəhi Həvvas “Azərbaycan Odlar Yurdudur” adlı məqaləsində gözəl ölkəmiz, onun qədim və zəngin mədəniyyəti barədə təəssüratlarını bölüşür, Azərbaycan tədqiqatçısı Seymur Nəsirov Azərbaycan ilə Misir arasında tarixi əlaqələrdən, habelə ərəb dünyasının və Misirin tarixində əhəmiyyətli rol oynamış azərbaycanlılardan yazıb. Azərbaycan Respublikasının Almaniyadakı Səfirliyində Almaniyadakı Azərbaycanlıların Koordinasiya Mərkəzi ilə birgə ənənəvi olaraq 31 dekabr-Dünya Azərbaycanlıların Həmrəylik günü münasibətilə Almaniyada fəaliyyət göstərən Azərbaycan diaspor təşkilatlarının rəhbərləri və icma fəalları ilə görüş keçirilib. Görüş zamanı Almaniyadakı Azərbaycan diaspor təşkilatlarının fəaliyyəti və bu fəaliyyətin həmçinin Səfirliklə əlaqələndirilməsi, Almaniyadakı Azərbaycanlıların Koordinasiya Mərkəzinin təşkilatlandırıcı fəaliyyəti, Azərbaycan-Almaniya münasibətlərinin inkişafında Azərbaycan diasporunun rolu, diaspor təşkilatlarının həyata keçirdikləri layihələr, qarşıdan gələn il ərzində keçirilməsi nəzərdə tutulan tədbirlər və digər maraq kəsb edən mövzular ətrafında müzakirələr aparılıb. Tədbirin sonunda diaspor nümayəndələrinə Səfirlik və Heydər Əliyev Fondu tərəfindən alman dilində nəşr edilmiş kitablar hədiyyə verilib və axşam yeməyinə dəvət olunublar. Ümumiyyətlə, il ərzində diaspor təşkilatları tərəfindən 31 Dekabr – Dünya Azərbaycanlılarının Həmrəyliyi Günü ilə əlaqədar olaraq bir sıra tədbirlər həyata keçirilib. Ən yadda qalan tədbirlərdən biridekabr ayının 28-də İsveçdə olub. Belə ki, Azərbaycan Respublikasının İsveç Krallığındakı Səfirliyinin və İsveçdəki Azərbaycan diaspor təşkilatlarının iştirakı ilə Stokholmda Dünya Azərbaycanlılarının Həmrəyliyi Günü ilə bağlı bayram tədbiri keçirilib. Azərbaycanın İsveçdəki səfiri Adış Məmmədov tədbiri açaraq müasir Azərbaycanın memarı və qurucusu ulu öndər Heydər Əliyevin həyata keçirdiyi milli siyasət və azərbaycançılıq ideologiyasından danışıb, ümummilli liderin Dünya Azərbaycanlılarının Həmrəyliyi Gününün qeyd edilməsi ilə bağlı verdiyi Sərəncamın dünyanın müxtəlif guşələrində yaşayan 10 milyonlarla azərbaycanlının Azərbaycan naminə bir yumruq kimi birləşərək əməli işlər həyata keçirmək istiqamətində atılmış tarixi bir addım olduğunu bildirib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 2 may.- S.15.