ATXƏM-in Azərbaycan

diasporunda xidmətləri

Azərbaycan həqiqətlərinin dünya ictimaiyyətinə çatdırılması, xalqımızın zəngin mədəni irsinin təbliği, eləcə də diasporumuzun inkişaf etməsi prosesinə dəstək verən qeyri-hökumət təşkilatlarından biri də Azərbaycanlıların və digər Türkdilli Xalqların Əməkdaşlıq Mərkəzidir. 2007-ci il, dekabrın son günlərində, 31 dekabr-Dünya Azəırbaycanlılarının Həmrəylik Günü ərəfəsində təsis edilən İctimai Birliyin fəaliyyət istiqamətləri, qarşısına qoyduğu məqsədlər də yuxarıda qeyd edilənlər əksini tapıb.

Azərbaycanlıların və digər Türkdilli Xalqların Əməkdaşlıq Mərkəzinin əsas məqsədi Azərbaycandan kənarda yaşayan azərbaycanlılar və digər türkdilli xalqlar arasında əlaqələrin yaradılması və inkişaf etdirilməsinə kömək etməkdən ibarətdir. Ictimai Birlik bu məqsədlərə çatmaq üçün Azərbaycan mədəniyyətini, folklorunu, milli adət-ənənələrini, tarixi abidələrini təbliğ etmək, digər türkdilli xalqların mədəniyyətinin öyrənilməsi və onun təbliğ etməyi başlıca vəzifə hesab edir. Bundan başqa ATXƏM türkdilli dövlətlərin inteqrasiyasına kömək etmək, diaspor təşkilatları arasında əməkdaşlığın yaranmasına çalışmaq, müxtəlif ölkələrdə yaşayan türkdilli xalqların nümayəndələri arasında həmrəyliyin yaranmasına nail olmaq istiqamətində çalışır. Nəzərdə tutulmuş vəzıfələri həyata keçirmək üçün İctimai Birlik elmi araşdırmalar aparır, müxtəlif kurslar və seminarlar, dəyirmi masa və görüşlər, sərgilər təşkil edir, konfranslar, xeyriyyə marafonları, forumlar və sair tədbirlər keçirir.

Azərbaycanlilarin və digər Türkdilli Xalqların Əməkdaşlıq Mərkəzi xeyriyyə məqsədli tədris və təlim mərkəzləri, elmi-praktik mərkəzləri yaradır, Azərbaycan Respublikasının aidiyyəti dövlət orqanları və bələdiyyələri ilə əməkdaşlıq edir. Xüsusilə, İctimai Birlik xarici ölkələrdə fəaliyyət göstərən təşkilatların onun məqsəd və mənafelərinə zidd olmayan tədbirlərinə qoşulur, müxtəlif təşkilatlara üzv olaraq, beynəlxalq təşkilatlarla əlaqələr saxlayır.

Qeyd edək ki, ötən illər ərzində Azərbaycanlıların və digər Türkdilli Xalqların Əməkdaşlıq Mərkəzi ölkə daxilində və müxtəlif xarici ölkələrdə Azərbaycanın təbliği ilə bağlı çoxsaylı tədbirlər həyata keçirib. Sevindirici haldır ki, ölkə xaricində təşkil edilən həmin tədbirlər həmin dövlətlərdəki Azərbaycan diaspor təşkilatları ilə birgə əməkdaşlıq şəklində baş tutub. Belə ki, İctimai Birlik Ayhan Dəmirçinin rəhbərlik etdiyi Azərbaycan- Belçika Dostluq Cəmiyyəti ilə birlikdə Avropa Parlamentində bir neçə Ermənistan-Azərbaycan, Dağlıq Qarabağ münaqişəsinə həsr olunmuş konfrans, eləcə də avropalı parlamentarilərlə görüşlər təşkil edib.

Həmçinin ATXƏM Mustafa Əlincənin rəhbərlik etdiyi “Strasburq Azərbaycan Evi” ilə birlikdə Fransada aksiyalar keçirib. Xocalı soyqırımının ildönümü ərəfəsində təşkil edilən həmin etiraz aksiyaları bu soyqırımın dünya ictimaiyyətinə çatdırılması istiqamətində görülən sistemli işin tərkib hissəsi sayıla bilər. Strasburqda keçirilən həmin aksiyaların möhtəşəmliyi Fransadakı erməni lobbisini ciddi narahat edir və ermənilər hər il Xocalı soyqırımının ildönümü ərəfəsində qabaqlayıcı tədbirlər görmək məcburiyyətində qalırlar.

Son vaxtlar isə ATXƏM Türkiyədəki Azərbaycan diaspor təşkilatları ilə yaxından əməkdaşlıq edir. Bu baxımdan İstanbul Azərbaycan-Türkiyə Dostluq Dərnəyi ilə qurulan əməkdaşlığı xüsusi qeyd etmək lazımdır. İSTAD və ATXƏM-in həyata keçirdiyi bir neçə uğurlu layihə Azərbaycan-Türkiyə münasibətlərinin QHT-lər səviyyəsində daha da inkişaf etməsinə öz müsbət təsirini göstərir. Eyni zamanda bu əməkdaşlıq Türkiyədə Azərbaycan diasporuna yeni imkanlar açır.

Göründüyü kimi, Azərbaycanlıların və digər Türkdilli Xalqların Əməkdaşlıq Mərkəzi öz fəaliyyəti ilə diaspor işinin sürətləndirilməsinə də böyük töhfə verir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 8 may.- S.15.