Diaspor təşkilatları Heydər

Əliyevin 91 illiyini qeyd ediblər

Hər il olduğu kimi bu il də ümummilli lider Heydər Əliyevin anadan olmasının 91-ci ildönümü dünyanın müxtəlif ölkələrində geniş şəkildə qeyd edilib. Ayrı-ayrı ölkələrdə fəaliyyət göstərən səfirlik və diplomatik nümayəndəliklərimiz, diaspor təşkilatlarının keçirdiyi tədbirlərdə Heydər Əliyevin xatirəsi yad edilib, onun müstəqil Azərbaycanın inkişaf etdirilməsi istiqamətində gördüyü işlərdən bəhs olunub.

Ümummilli liderin anadan olmasının 91 illiyi İsraildə də qeyd olunub. Artıq bir neçə ildir ki, İsrail-Azərbaycan Beynəlxalq Assosiasiyası (“Azİz”) may ayında Azərbaycanın görkəmli dövlət və siyasi xadimi Heydər Əliyevin ad gününə həsr olunmuş tədbirlər təşkil edir. Hər il bu tədbirlər forma və məzmununa görə əvvəlkindən tamamilə fərqlənir. Bu il İsrailin Lod şəhərində yerli bələdiyyənin, Heydər Əliyev Fondunun və İsrailin Miqrasiya Nazirliyinin dəstəyi ilə “Azİz” tərəfindən maraqlı sərgi keçirilib. Sərginin əsasını professor İ.Skvirskinin unikal breloklar kolleksiyası təşkil edib. Professor İ.Skvirski tərəfindən toplanmış Heydər Əliyevin portreti olan 40-dan artıq brelok sərgiyə gələnləri təəccübləndirib və zövq verib. Sərgidə həmçinin Heydər Əliyev haqqında kitablar, fotoalbomlar və müxtəlif çap məhsulları nümayiş etdirilib. Sərginin açılışında Lod şəhərinin meri Yair Ravivo, şəhərin baş ravini Avraam Xazan, şəhər şurasının deputatı Elvira Kolixman, Azərbaycan Mədəniyyət Mərkəzinin direktoru Yeganə Salman, “Azİz”in şəhər şöbəsinin rəhbəri, vəkil İlana Laytman çıxış ediblər.

Almaniyanın Köln şəhərində isə ümummilli lider Heydər Əliyevin 91 illiyi ilə əlaqədar Alman Azərbaycan Mədəniyyət Evi tərəfindən anım tədbiri keçirilib. Tədbirdə 100-ə yaxın soydaşımızla bərabər türk dərnəklərinin təmsilçiləri, Almaniyada fəaliyyət göstərən yəhudi icmasının təmsilçiləri iştirak edib. Tədbiri giriş nitqi ilə açan Alman Azərbaycan Mədəniyyət Evinin icraçı direktoru Ağa Ağayev ümumilli liderin keçdiyi həyat yolundan, Azərbaycan Respublikasının dünyada öz mövqeyini əldə etməsi beynəlxalq arenada söz sahibi ölkələrdən biri olması üçün yürütdüyü uğurlu xarici siyasətdən söz açıb: “Xalqımızın və dövlətimizin ağır məqamında ümümmilli liderin hakimiyyətə gəlişinin Azərbaycan üçün doğurdan da tarixi bir an olduğunu deyərdim. O zamanlar ölkədə hökm sürən hərc- mərcliyin, mənfur qonşumuz olan Ermənistan dövlətinin öz “havadarlarına”, “böyük qardaşlarına” söykənərək torpaqlarımızı işğal etdiyi bir dövrdə Heydər Əliyevin hakimiyyətə gəlişi olduqca zəruri idi. Nəhayət Heydər Əliyev hakimiyyətə gəldi və ölkəmiz öz stabil, möhkəm əsaslara söykənən bir siyasət ortaya qoydu. Qısa zaman ərzində dövlətimizin əsasları sürətlə möhkəmləndi. Məhz onun qurduğu güclü dövlətin vətəndaşı kimi mən həqiqətən şəstlə, vüqarla bu gün deyə bilirəm ki, Mən Azərbaycanlıyam”. Daha sonra çıxış edən Alman Azərbaycan Mədəniyyət Evinin sədri Altay Rüstəmli çıxışında ümummilli liderin diaspora siyasətinə yer ayırıb . O qeyd edib ki, 2002-ci ildən mərhum prezidentin sərəncam ilə Xarici Ölkələrdə Yaşayan Azərbaycanlılarla İş üzrə Dövlət Komitəsi təsis edildi: “Məhz bu ildən etibarən diasporamızın fəaliyyətində dönüş yarandı və xaricdəki soydaşlarımızın təşkilatlanması prosesi başlandı. Bu gün ümummilli liderin siyasətini uğurla onun davamçısı, hazırkı prezident İlham Əliyev uğurla davam etdirir. Bu gün bu anım tədbirini keçirməkdə məqsədimiz bizim mövqeyimizin açıq aydın ortada olduğunu göstərir. Yolumuz dövlət və dövlətçiliyimizə xidmətdən ibarətdir. Sevindirici haldır ki, dövlətin də fəal dəstəyi ilə diasporamız uğurla inkişaf edir. Bu son illərdə Heydər Əliyevin Fondunun dəstək verdiyi layihələr nəticəsində ölkəmizin xaricdə müsbət imici formalaşıb. Xaricdə ölkəmizin təbliğatı istiqamətində YUNESKO-nun və İSESKO-nun xoşməramlı səfiri, ölkəmizin birinci xanımı Mehriban Əliyevanın uğurlu layihələrini misal göstərmək olar. Bundan başqa Heydər Əliyev Fondunun Moskva nümayəndəliyinin rəhbəri Leyla xanım Əliyevanın, Avropa Azərbaycan Cəmiyyətinin rəhbəri Tale Heydərovun diaspora və lobbiçilik istiqamətində atdığı addımlar Azərbaycan haqqında Avropada və dünyada müsbət fikir formalaşdırır və artıq Avropa Azərbaycanı özünün bir hissəsi olaraq qəbul edir. Əlbəttə bütün bunlar torpaqlarımızı işğal edən Ermənistan diasporasını narahat etməyə bilmir. İnanırıq ki, biz apardığımız işlər nəticəsində Almaniya və Azərbaycan arasında körpü rolunu fəal şəkildə həyata keçirə biləcəyik”. Daha sonra tədbir qeyri rəsmi hissə ilə davam edib. Mədəniyyət Evi tərəfindən hazırlanmış tort kəsilib, ümummilli liderin həyatını əks etdirmiş film nümayiş olunub. Tədbir musiqi proqramı ilə davam edib.

Ümumrusiya Azərbaycanlılar Konqresinin (ÜAK) Murmansk regional bölməsində də Azərbaycan xalqının ümummilli lideri Heydər Əliyevin anadan olmasının 91-ci ildönümünə həsr edilmiş tədbir keçirilib. Tədbirdə ÜAK-ın Murmansk bölməsinin şura üzvləri, Rusiyanın Azərbaycanlı Gənclər Birliyinin fəalları və yerli KİV nümayəndələri iştirak ediblər. ÜAK-ın Murmansk vilayət bölməsinin sədri və region üzrə İctimai Palatanın üzvü Afil Hüseynov tədbiri açaraq ümummilli lider Heydər Əliyevin Azərbaycan və Rusiya tarixində rolu barədə məlumat verib. O qeyd edib ki, Heydər Əliyevin müdrik siyasəti sayəsində hələ sovet hakimiyyəti illərində Bakıda Cəmşid Naxçıvanski adına hərbi məktəb açılıb. Azərbaycanın müstəqilliyi bərpa ediləndən sonra ölkəmiz öz Silahlı Qüvvələrini yaradıb, onların formalaşmasında bu məktəb xüsusi rol oynayıb..Afil Hüseynov Azərbaycanın sürətli iqtisadi inkişafı və hərbi potensialının möhkəmlənməsi barədə söhbət açaraq qeyd edib ki, Azərbaycan Cənubi Qafqazda lider ölkədir. O, ana dilimizin dövlət dili kimi tətbiq edilməsində, onun imkanlarının genişləndirilməsində və Azərbaycan xalqının ən böyük sərvəti kimi qiymətləndirilməsində Heydər Əliyevin şəksiz mühüm rol oynaması məsələsinə də toxunub. O deyib ki, Azərbaycan mədəniyyətinin və bizim zəngin tarixi irsimizin dünya ictimaiyyətinə təqdim edilməsi Heydər Əliyevin ən dəyərli xidmətlərindən biridir. ÜAK-ın və RAGB-nin fəalları ümummilli lider Heydər Əliyevin qısa müddətdə Azərbaycanı iqtisadi cəhətdən tənəzzülə uğrayan, inflyasiyanın və işsizliyin sürətlə artdığı, ümidsizlik ab-havası yaranmış ölkədən iqtisadi və mədəni inkişaf yoluna qədəm qoymuş, xarici investisiyalar üçün açıq olan və iri beynəlxalq layihələrdə iştirak edən bir dövlətə çevirməyə nail olması haqda söhbət açıblar. Tədbir iştirakçılarına “Azerbaydjanskiy konqress” qəzetinin Azərbaycan xalqının ümummilli lideri Heydər Əliyevin anadan olmasının 91-ci ildönümünə həsr edilmiş nömrəsinin, “Baku” və “İrs-Naslediye” jurnallarının nüsxələri paylanıb. Tədbirdə Heydər Əliyevin həyat və fəaliyyəti haqqında filmlər göstərilib.

Ümummilli liderin əziz xatirəsi Qırğızıstanda da anılıb. Belə ki, Kasımalı Bayalinov adına Qırğızıstan Respublika uşaq və gənclər kitabxanasında Ulu Öndər Heydər Əliyevin doğumunun 91 illiyi ilə əlaqədar möhtəşəm tədbir keçirilib. Tədbirdə Qırğızıstan Respublikası mədəniyyət, informasiya və turizm naziri Kamila Talıyeva, Qırğızıstan Respublikası prezidenti yanında dövlət dili komissiyasının sədri, xalq şairi Eqemberdi Ermatov, mərhum qırğız yazıçısı Çingiz Aytmatovun qardaşı, akademik İlgiz Aytmatov, SSRİ xalq artisti Bolot Şəmşiyev, Türkiyə Cümhiriyyətinin Qırğızıstandakı səfirinin müşaviri İlham Aytuş, Qırğızıstan Milli Yazıçılar İttifaqının birinci katibi Nurlan Kalıbayev və bir sıra tanınmış yazıçılar, kinorejisorlar, elm adamları iştirak ediblər. Tədbir çərçivəsində fondun Bişkekdə nəşr etdirdiyi kitablardan 2000 (iki min) nüxsədən çox kitabxanaya hədiyyə edilib. Türkdilli Dövlətlərin Siyasətinə Dəstək Fondunun və Kasımalı Bayalinov adına QırğızIstan Respublika uşaq və gənclər kitabxanasının təşəbbüsü ilə keçirilən tədbirdə Fondun sifarişi ilə nəşr edilən “Qırğızstan Azərbaycan əlaqələrinin inkişafında Heydər Əliyevin rolu” kitabının təqdimatı olub. Mərasimdə Qırğızıstan Respublikası Prezident Aparatının, Hökumətin nümayəndələri, bu ölkədə akkreditə olunmuş Türkiyə Cümhiriyyətinin səfirinin müşaviri, tanınmış ədəbiyyat, mədəniyyət və incəsənət xadimləri, Azərbaycan diasporunun üzvləri, jurnalistlər iştirak ediblər. Türkdilli Dövlətlərin Siyasətinə Dəstək Fondunun prezidenti Nüsrət Məmmədov mərasim iştirakçılarını salamlayıb, ulu öndər Heydər Əliyevin həyat və fəaliyyəti haqqında məlumat verib. Nüsrət Məmmədov deyib ki, Azərbaycan türk dünyasına Heydər Əliyevi, Türkiyə Atatürkü, Qırğızıstan Çingiz Aytmatovu bəxş edib: “Dünya şöhrətli siyasi xadim Heydər Əliyevin həyatı və fəaliyyəti bundan sonra da tədqiq ediləcək və öyrəniləcək” Tədbirdə çıxış edən Qırğızıstan Respublikası mədəniyyət, informasiya və turizm naziri Kamila Talıyeva deyib ki, Heydər Əliyev irsinin, Azərbaycan tarixinin və ədəbiyyatının öyrənilməsində fondun nəşr etdirdiyi və kitabxanaya hədiyyə etdiyi kitablar mühüm rol oynayacaq. O, öz çıxışında bir daha xatırladıb ki, kitablar mütləq şəkildə bütün regondakı kitabxanalara bölüşdürülməli və oxucuların ixtiyarına verilməlidir. Nazir çıxışının sonunda fondun prezidenti Nüsrət Məmmədova dərin minnətdarlığını bildirib: “Məndə olan məlumata görə Fond indiyə kimi bir çox kitabxanalara, ali və orta ixtisas təhsili müəssisələrinə küllü miqdarda kitab hədiyyə edib. Fondun rəhbərinin gördüyü bu işlər təqdirəlayiqdir. Başqa ictimai təşkilatlar da Türkdilli Dövlətlərin Siyasətinə Dəstək Fondundan örnək götürsələr yaxşı olar”.

Qırğızstan Respublikası Prezidenti yanında dövlət dili komissiyasının sədri, xalq şairi Eqemberdi Ermatov da Heydər Əliyevin tarixi bir şəxsiyyət olduğunu vurğulayıb. Kasımalı Bayalinov adına Qırğızstan Respublikası uşaq və gənclər kitabxanasının direktoru Roza Sultanqazıyeva, Çingiz Aytmatovun qardaşı, SSRİ dövlət mükafatı laureatı, akademik İlgiz Aytmatov, SSRİ xalq artisti Bolot Şəmşiyev, ictimai xadim, xeyriyyəçi, iş adamı Qiyas Xəlilov, Xəzər İctimai birliyinin sədri Ziyəddin Hüseynov və başqaları Heydər Əliyevin tarixdəki misilsiz rolundan danışıblar. Tədbirin mədəni hissəsində kitabxananın oxucuları Türkdilli Dövlətlərin Siyasətinə Dəstək Fondunun sifarişi ilə tərcümə olunub, nəşr edilmiş kitablardan Heydər Əliyev haqqında şerləri oxuyublar. General mayor Həsən Şirinovun Heydər Əliyevə həsr etdiyi şerin ifaçısı şeri yüksək səviyyədə ifa etdiyinə görə fondun qiymətli hədiyyəsi ilə mükafatlandırılıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 13 may.- S.15.