Kiçik otağın böyük dünyası,

Ramiz müəllimin “Dədə Heydər” muzeyi

Ramiz Xəlilov: “Mən onda artıq fikirləşirdim ki, Heydər Əliyevi görmək bizə nəsib olacaqmı?”

Cəmisi iki otaqdan ibarət evdir. Təmiri o qədər də göz oxşamır. Beş nəfərdən ibarət ailənin daldanacağıdır. Üz görünüşü yoxsul ev böyük sevgiyə yuvalıq edir. Sahibi, Bakı şəhər sakini Ramiz Xəlilov otaqlardan birini Azərbaycanın keçmiş prezidenti, mərhum Heydər Əliyevə həsr edib. Ramiz müəllimin “Dədə Heydər” muzeyində Heydər Əliyev ailəsinin keçmiş və bu gününü əks etdirən kifayət qədər materiallar var. Müxtəlif fotoşəkillər, rəssam işi portret, əldə toxunmuş xalçalar, büst, mini kitabxana Ramiz müəllimin muzeyini zənginləşdirir. Azərbaycan, Türkiyə və hakim Yeni Azərbaycan Partiyasının bayraqları diqqəti cəlb edən əsas eksponatlardır. O, Mustafa Kamal Atatürkün portretini də “Dədə Heydər” muzeyindən asmağı unutmayıb.

1962-ci ilin yanvarında Qərbi Azərbaycanın Cəlaloğlu rayonunun (Kalinin) Dəmirçilər kəndində fəhlə ailəsində doğulan Ramiz Xəlilov “Dədə Heydər” muzeyini yaratmasını özünə vətəndaşlıq borcu bilir. O, Heydər Əliyevə olan sevgisini belə izah edir: “1969-cu ildə Heydər Əliyev Azərbaycan SSR-nin Mərkəzi Komitəsinin I katibi seçildi. Həmin il birinci sinifdə oxuyurdum. Orta məktəbdə təhsil alanda mətbuatda ulu öndər Heydər Əlirza oğlu Əliyevin çıxışlarını, məruzələrini oxuyurdum. Mətbuatdan tanış olduqca çox sevinirdim ki, azərbaycanlı olan Heydər Əliyev getdikcə məşhurlaşır, sevilirdi. Elə oldu ki, 1982-ci ildə SSRİ Nazirlər Kabinetinə I müavin təyin edildi. Moskvaya getdi. Mən onda artıq fikirləşirdim ki, görəsən Heydər Əliyevi görmək bizə nəsib olacaqmı? Onunla görüşmək mümkündürmü? Görüşməyə çox can atırdım. Vəziyyət elə gətirdi ki, biz Qərbi Azərbaycandan deportasiya olunduq. Azərbaycana gəldik. Burada çox həyəcanlı günlər yaşayırdıq. Elə oldu ki, Heydər Əliyev də həmin illərdə Moskvadan Azərbaycana – Naxçıvana gəldi. 1993-cü ildə xalqın istəyilə hakimiyyətə dəvət olundu və o, Bakıya qayıtdı. Həmin vaxt Azərbaycan parçalanmağa doğru gedirdi. Heydər Əliyev taleyüklü məsələlərin öhdəsindən layiqincə gələrək, Azərbaycanı böhrandan çıxara bildi. Mənim bu insana qarşı böyük sevgim yarandı. Həmin simpatiyam öz evimdə onun adını dayışayacaq muzey yaratmağa sövq elədi. Haqqında yazılan kitablar, şəkillər əlimə keçdikcə toplamağa başladım. Bu günki muzeyi yavaş-yavaş bu vəziyyətə çatdırdım. Həqiqətən ulu öndər Heydər Əliyev xalqımız, dövlətimiz üçün böyük işlər gördü. Azərbaycan üçün ən çətinin öhdəsindən asanlıqla gəldi. Gecəsini gündüzə qatdı. Vətəni üçün hər şeyi etməyə çalışdı və bacardı. İndi həmin siyasi xətti cənab prezidentimiz İlham Əliyev layiqincə davam etdirir. Ulu öndər və prezidentimiz İlham Əliyev həmin kursa uyğun olaraq, Azərbaycanı lazım olan yerə çatdırdılar. İndi Azərbaycan beynəlxalq əhəmiyyətli tədbirlərə ev sahibliyi edir. Ölkəmiz həmin siyasət nəticəsində dünya ölkələrinin imtinaedilməz tərəfdaşıdır. Azərbaycanın prezidentinin məhz İlham Əliyev olması xoşbəxtlikdir. Bu günki Azərbaycan Heydər Əliyev və indiki prezidentimizin gərgin əməklərinin əsəridir. Bu gələcəkdə də dəyişməyəcək”.

- Ramiz müəllim, muzeyinizdə Heydər Əliyevi əks etdirən kifayət qədər nümunələr var. Bu qədərini hardan əldə etmisiniz?

- Ətrafımda olan dostlarım mənim belə bir muzey yaratdığımı bilirlər. Vətəndaş kimi “Dədə Heydər” muzeyini yaratdığım üçün mənə təşəkkür etdilər, ulu öndərin ailəsinə aid olan bir çox kitab, portret, büst və xalçalar bağışladılar. Ümummili liderə aid olan nə varsa, toplamağa özüm də həvəsli idim. Müəyyən qismini dostlarım bağışlayıblarsa, qalanını özüm əldə etmişəm. Belə bir muzeyi yaratmağı özümə vətəndaşlıq borcu bilirdim. Heydər Əliyevin çox gözəl bir kəlamı var: “Bizim hamımızın bir Vətəni var – bu Azərbaycandır. Xalçanı bir dostum, büstü başqa dostum verib, Rəssamlıq Akademiyasından hədiyyələrim var. Məsələn, xalçanın birini Daxili İşlər Nazirliyinin ehtiyatda olan polkovniki hədiyyə edib. Türkiyənin dövlət bayrağı bu ölkənin Azərbaycandakı səfirliyi tərəfindən verilib. Hamısını özüm almamışam, tədbirlə getdikcə, oradan gətirmişəm. Harada əlimə düşübsə, muzeyimə gətirmişəm. Bu mənim borcum idi.

Məktəblilər tez-tez muzeyə Heydər Əliyevlə bağlı kitab almağa gəlirlər. Xatırladaq ki, Ramiz Xəlilov 1994-cü ildə yaratdığı “Dədə Heydər” muzeyinin 20 illik yubileyini qeyd edir.

Mənsur Rəğbətoğlu

Olaylar.- 2014.- 13 may.- S.11.