Azərbaycan diaspor

təşkilatlarından Türkiyəyə dəstək

Bu günlərdə Türkiyənin Manisa vilayətinin Soma şəhərindəki kömür mədənində baş vermiş partlayış və çoxsaylı insan tələfatı təkcə qardaş ölkədə deyil, bütün dünyada, xüsusilə Azərbaycanda dərin hüznə səbəb olub. Türkiyənin Azərbaycandakı fövqəladə və səlahiyyətli səfirliyinə ünvanlanan başsağlığı mesajları, eləcə də rəsmi və qeyri-rəsmi şəxslərin səfirliyə gələrək türkiyəli diplomata bilavasitə başsağlığı vermələri deyilənləri təsdiqləyir. Bu arada dünyanın müxtəlif ölkələrində fəaliyyət göstərən Azərbaycan diaspor təşkilatlarının rəhbərləri də Soma faciəsi ilə bağlı həmin dövlətlərdəki Türkiyə səfirləri və konsulları ilə görüşərək onların dərdinə şərik olub, başsağlığı veriblər. Bəzi ölkələrdəki diaspor təşkilatlarımız isə Soma faciəsi i8lə əlaqədar hətta müəyyən aksiyalar da təşkil ediblər.

Nyu-York Amerika Azərbaycan Qadınlar Assosiasiyası Türkiyənin qərb əyaləti Somada baş verən kömür mədənindəki partlayış və yanğın nəticəsində yüzlərlə mədən işçisinin həyatına son qoyan və ölkə tarixinə mədən fəlakəti kimi daxil olan bu hadisə ilə əlaqədar Türkiyənin BMT-dəki nümayəndəliyinə və Türkiyə Respublikasının Amerika Birləşmiş Ştatlarındakı Səfirliyinə məktub ünvanlayaraq Türkiyə dövlətinə dərin hüznlə başsağlığı bildiriblər. Texas Azərbaycan Cəmiyyəti də baş vermiş hadisə əlaqədar Hyuston Türk Assosiasiyasına məktub ünvanlayaraq Türkiyə xalqına başsağlığı verib. Avropa Azərbaycanlıları Konqresi Türkiyənin Soma şəhərində baş vermiş qəza nəticəsində yüzlərlə insanın həlak olması ilə bağlı Türkiyə Cümhuriyyətinin Almaniyadakı böyük elçisi Hüseyin Avni Karslıoğluya, Türkiyə Cümhuriyyətinin Berlindəki baş konsulu Ahmet Başar Şene, Türkiyə Cümhuriyyətinin Kölndəki baş konsulu Hüseyn Emre Engine, o cümlədən Türk diasporu nümayəndələri və mətbuatına başsağlığı məktubu ünvanlayıb. Bundan başqa “Alm.az Drezden” Cəmiyyəti, Bielefeld NRW-Alman-Azərbaycan Mədəniyyət Cəmiyyəti də Türkiyənin Almaniyadakı səfirliyinə başsağlığı məktubu göndərib.

Türkiyənin qərbində yerləşən Manisa vilayətinin Soma şəhərindəki kömür mədənində çoxsaylı insan tələfatı ilə nəticələnən partlayışla əlaqədar olaraq ÜmumUkrayna İctimai Təşkilatı olan “Ukrayna Azərbaycanlıları Birləşmiş Diaspor”unun sədri Hikmət Cavadov Türkiyə Respublikasının Ukraynadakı səfiri Yenet Can Tezelyuya dərin hüznlə başsağlığı verib. Hikmət Cavadov baş vermiş faciə ilə əlaqədar olaraq dərin sarsıntı keçirdiklərini nəzərə çatdırıb və həm öz adından, həm də Ukrayna Azərbaycanlıları Birləşmiş Diasporu adından dünyasını dəyişənlərin ailələrinə və yaxınlarına, bütün qardaş türk millətinə səbr diləyib.

Qırğızstandakı Azərbaycan diasporlarının rəhbərləri: -Türkdilli dövlətlərin siyasətinə dəstək fondunun Prezidenti Nüsrət Məmmədov , Qırğızstan Azərbaycanlıları konqresi İctimai birliyinin prezidenti Çingiz Ələsgərov, Qırğızstan Azərbaycanlıları əlaqələndirmə mərkəzi ictimai birliyinin Prezidenti Cəbi Rəsulov, “Xəzər” İssık-Kul azərbaycanlıları ictimai birliyinin Prezidenti Ziyəddin Hüseynov və “Sodrujestvo” bölgə milli etnik diasporlar şurasının Prezidenti Mirzəli Rzayev Türkiyənin Qırğızstandakı fövqaladə və səlahiyyətli səfiri Mətin Kılıçla görüşüblər. Görüş zamanı diaspor rəhbərləri Türkiyənin Manisa vilayətinin Soma əyalətindəki kömür mədənində baş vermiş partlayış nəticəsində çoxsaylı insan tələfatı münasibəti ilə başsağlığı veriblər. Diaspor rəhbərlərini çox isti qarşılayan səfir öz məmnunluğunu bildirib, başsağlığını Türkiyə dövlətinə çatdıracağını vurğulayıb. Azərbaycanla Türkiyə arasındakı qardaşlığ əlaqələrindən, Azərbaycanın Prezidenti İlham Əliyevlə isti münasibətləri olduğunu, Azərbaycanın sürətli inkişafından danışan səfir Azərbaycanın bölgədə müstəqil siyasət yürütdüyünü deyib. Türkiyənin Qırğızstandakı fövqaladə və səlahiyyətli səfiri Mətin Kılıçla Qırğızstandakı türk və azərbaycan diasporlarının birgə fəaliyyət göstərmələrini fövsiyə edib, gələcəkdə birgə layihərin həyata keçirilməsini müzakirə ediblər. Qeyd edək ki, başsağlığının mətnində deyilir ki, Manisa vilayətinin Soma əyalətindəki kömür mədənində baş vermiş partlayış nəticəsində çoxsaylı insan tələfatı xəbəri bizi son dərəcə sarsıdıb: “Biz Qırğızstanda yaşayan Azərbaycanlılar çətin anlarda da, ən xoş günlərdə də Türkiyə ilə birlikdə olub, qardaş türk xalqının kədərini öz kədəri, sevincini öz sevincimiz saymışıq. Bu faciə ilə əlaqədar kədərinizi bölüşür, sizə, həlak olanların ailələrinə və yaxınlarına, bütün Türkiyə xalqına şəxsən öz adımızdan və Qırğızstanda yaşayan Azərbaycanlılar adından dərin hüznlə başsağlığı verir, yaralananlara və xəsarət alanlara şəfa diləyirik”.

Türkiyənin “Cihan” xəbər agentliyinə müsahibə verən Ümumrusiya Azərbaycan Konqresinin icraçı direktoru İlqar Hacıyev isə faciədən dərin sarsıntı keçirdiyini bildirib. Rusiyada yaşayan azərbaycanlıların hadisədən çox kədərləndiklərini vurğulayan İlqar Hacıyev qardaş ölkənin böyük itkiyə məruz qaldığını vurğulayıb: "Biz Somada kömür mədənində baş verən faciədən çox kədərləndik. Rusiyadakı Azərbaycan diasporu faciəvi hadisədə zərərçəkənlərə lazımı köməyi göstərməyə hazırdır". Qardaş ölkənin bü günlərdə nə qədər böyük itki verdiyini anladıqlarını bildirən İlqar Hacıyev Azərbaycan xalqının Türkiyə xalqının kədərini özününki kimi qəbul etdiyini söyləyib: "Biz qardaş xalqımızın ağrı və kədərini bölüşürük. Rusiyadakı Azərbaycan diasporu adından Türkiyə xalqına və faciəvi hadisə zamanı yaxınlarını və əzizlərini itirənlərə dərin hüznlə baş salığı verir və yaralılara tezliklə Allahdan şəfa diləyirik".

Mayın 16-da Avropa Azərbaycanlıları Konqresinin təşəbbüsü ilə Türkiyə Respublikasının Kölndəki Baş konsulu Hüseyn Emre Enginlə görüş keçirilib. Avropa Azərbaycanlıları Konqresinin prezidenti, Almaniyadakı Azərbaycanlıların Koordinasiya Mərkəzinin icraçı direktoru Samira Patzer-İsmailova və Köln şəhərindəki Alman-Azərbaycan Mədəniyyət Evinin icraçı direktoru Ağa Ağayev görüşdə iştirak edib. Görüş zamanı Soma kömür mədənində baş vermiş faciə ilə əlaqədar Konsulluqda yaradılmış xatirə guşəsinə tər çiçəklər qoyulmuş, həlak olanların xatirəsi yad edilmişdir. Daha sonra Almaniyada yaşayan azərbaycanlılar adından başsağlığı kitabına ürək sözləri qeyd edilib: “Somada baş verən ağır faciə və qəza nəticəsində yüzlərlə insanın həlak olması qardaş Azərbaycan xalqını, Almaniyadakı Azərbaycan diasporunu da dərindən kədərləndirmişdir. İki qardaş xalqın sevinci və kədəri hər zaman bir olduğu üçün bu gün də Avropada və Almaniyada yaşayan azərbaycanlılar türk qardaşlarımızın yanındadır.”Baş konsul Hüseyn Emre Engin Azərbaycan diasporu nümayəndələrinə təşəkkürünü bildirib. O, azərbaycanlı icmasının göstərdiyi diqqət və həssaslığın iki xalq arasında dostluğun və qardaşlığın ifadəsi olduğunu vurğulayıb. Almaniya Azərbaycan Mədəni Əlaqələr Mərkəzi Türkiyə Respublikasının Almaniya Federativ Respublikasındakı səfiri Hüseyn Avnı Karslıoğluya başsağlığı məktubu ünvanlayıb. Məktubda bildirilib ki, bu faciəvi hadisə qardaş Azərbaycan xalqını, Almaniyadakı Azərbaycan diasporunu da dərindən kədərləndirib. “Bu gün Biz Avropada və Almaniyada yaşayan azərbaycanlılar – türk qardaşlarımızın yanındayıq və bu qəmi, kədəri ürəkdən bölüşürük.”-deyə məktubda qeyd olunub. Türkiyənin Soma kömür mədənində baş vermiş faciəvi qəza ilə əlaqədar olaraq Azərbaycan-Macarıstan Gənclər Birliyi Türkiyənin Macarıstandakı Səfirliyinə, həmçinin Polşadakı Azərbaycanlı Gənclər Birliyi Türkiyənin Çexiyadakı Səfirliyinə başsağlığı məktubu ünvanlamış və məktublarda Soma kömür mədənində yüzlərlə insanın ölümünə səbəb olan faciədən məyusluq ifadə olunmuş və bu hadisə nəticəsində həyatını itirənlərin ailələrinə, bütün Türk dünyasına başsağlığı verilib.

Almaniyadakı Mədəniyyət evi isə mayın 18-də Türkiyənin Manisa vilayətinin Soma şəhərində baş vermiş faciə ilə əlaqədar olaraq anım tədbiri keçirib. Azərbaycan Mədəniyyət Evinin mərkəzi ofisində baş tutan anım tədbiri zamanı kömür mədənində həlak olanlarla bağlı ehsan süfrəsi açılıb. Anım mərasimində Almaniyada fəaliyyət göstərən Azərbaycan diaspor təşkilatlarının rəhbərləri, bu ölkədə yaşayan soydaşlarımızla yanaşı Türk vətəndaşlar da yaxından iştirak edib. Anım mərasimində Soma faciəsində həlak olanların ruhuna dualar oxunub.

Dünya Azərbaycanlıları Konqresi isə Soma faciəsində həlak olanların ailələrinə, həmçinin Türk xalqına həmrəylik nümayiş etdirib. Bu məqsədlə Türkiyənin Azərbaycandakı fövqəladə və səlahiyyətli səfirliyinin qarşısına yürüş təşkil edilib və matəm mitinqi keçirilib. Təşkilatçılar diplomatik nümayəndəliyin önünə əklil qoyub, Türk xalqına səbr, dözüm arzulayıb.. Bildirilib ki, Azərbaycan xalqı, ayrı-ayrı təşkilat və qurumlar hər zaman Türkiyənin yanındadır və bundan sonra da Azərbaycan və Türkiyə bütün acılı, xoş günlərdə bir yerdə olacaq.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 20 may.- S.15.