Xaricdəki soydaşlarımız

ana dilimizi unutmurlar

Xarixi ölkələrdə məskunlaşan soydaşlarımızın yaşadıqları ölkələrin ictimai-siyasi həyatında təmsil olunmaları vacib şərtdir. Bunun üçün isə həmin ölkənin dilini, dinini, mədəniyyətini, adət-ənənələrini öyrənmək lazım gəlir. Ancaq bu inteqrasiya prosesinin soydaşlarımızın doğma ana dilini unutması hesabına başa gəlməsi qəbuledilməzdir. Lakin faktdır ki, xarici ölkələrdə daimi məskunlaşan həmvətənlərimiz bu məsələdə bir sıra çatışmazlıqla üzləşirlər.

Bu ilk növbədə hər hansı xarici dövlətdə ictimai yerlərdə dövlət dilində danışılması ilə bağlıdır. Bu isə o deməkdir ki, həmin ölkələrdə Azərbaycan dilində heç kiminlə ünsiyyət qurmaq mümkün olmur. Xaricdə yaşayan azərbaycanlıların əsas gözləntilərinidən biri də Azərbaycan dilində məktəblərin açılmasıdır. Əks halda, azərbaycanlı ailələrin övladları məskunlaşdıqları dövlətlərin dilində fəaliyyət göstərən məktəblərdə təhsil alırlar. Bu da çox vaxt Azərbaycan dilində danışmaq vərdişinin itirilməsi ilə nəticələnir. Elə bu səbədən həmin ölkələrdə diaspora təşkilatları tərəfindən məqsədyönlü şəkildə müxtəlif layihələr həyata keçirilir. Diasporla İş üzrə Dövlət Komitəsindən bildirilib ki, hazırda dünyanın müxtəlif ölkələrində “Azərbaycan həftəsonu məktəbi” fəaliyyət göstərir. Bu məktəblər Rusiya, Ukrayna, Almaniya, Fransa, Türkiyə, İsveç, Böyük Britaniya və digər ölkələrdədir. Həmin məktəblərdə əsasən Azərbaycan dili, tarix və coğrafiya tədris olunur. Belə məktəblərin olmadığı ölkələrdə yaşayan azərbaycanlı uşaqlar isə bizim “Virtual Həftəsonu məktəbi”nin imkanlarından faydalana bilirlər. Məlum olduğu kimi komitənin AMEA İnformasiya Texnologiyaları İnstitutu ilə birlikdə hazırladığı “Virtual Həftəsonu məktəbi” fəaliyyət göstərir. Burada azərbaycanlı uşaqlara və gənclərə ana dili, Azərbaycan tarixi, coğrafiyası, ədəbiyyatı barədə bütün zəruri informasiyalar verilir. Bütün hallarda xaricdə yaşayan azərbaycanlıların təhsil məsələsi istiqamətində işlər getdikcə genişlənir. Bu məqsədlə 2013-cü ildən etibarən Diasporla İş üzrə Dövlət Komitəsinin nəzdində xaricdə yaşayan azərbaycanlılar üçün “Ana dilinin distant tədrisi mərkəzi” fəaliyyətə başlayıb. Layihənin məqsədi xarici ölkələrdə yaşayan azərbaycanlı uşaqlara və gənclərə müasir informasiya texnologiyaları vasitəsilə Azərbaycan dilini tədris etməkdir. Burada həftənin bütün günləri müxtəlif saatlarda ana dili dərsləri tədris olunur. Hazırda bir neçə qrup mövcuddur. Gələcəkdə layihənin genişləndirilməsi, Azərbaycan ədəbiyyatı, tarixi, mədəniyyəti və coğrafiyasının tədris edilməsi nəzərdə tutulub. Bu layihənin əsas məqsədi dünyanın hansı ölkəsində yaşamasından asılı olmayaraq hər bir azərbaycanlı uşağa öz xalqının tarixini, ana dilini, mədəniyyətini öyrənmək imkanı yaratmaqdır.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 7 noyabr.- S.3.