“Azərbaycan diasporu son illərdə

bir sıra sınaqlardan keçib”

Samira-Patzer İsmailova: “Bir çox Avropa qurumları hələ də öz “ermənipərəst” mövqelərində qalırlar və Azərbaycan diasporu onlarla mütəmadi iş aparır”

Bu gün Avropa məkanında uğurlu fəaliyyət göstərən diaspor təşkilatlarından biri də Almaniya-Azərbaycan Koordinasiya Mərkəzidir. Almaniya-Azərbaycan Koordinasiya Mərkəzi 2008-ci ildə Almaniyada fəaliyyət göstərən Azərbaycan diaspor təşkilatları tərəfindən Berlində təsis edilib. Mərkəzdə Almaniyadakı 40-a qədər Azərbaycan cəmiyyəti təmsil olunur. Koordinasiya Mərkəzinin məqsədi bu təşkilatları birləşdirmək, birlikdə layihələr hazırlamaq, illik planlar tərtib etməkdir. Elə Almaniya-Azərbaycan Koordinasiya Mərkəzinin rəhbəri Samira Patzerİsmailova ilə müsahibədə rəhbərlik etdiyi qurumun fəaliyyəti, Azərbaycan diasporunun hazırkı durumu, eləcə də Almaniya-Azərbaycan münasibətlərindən danışdıq.

-Samira xanım, Almaniya-Azərbaycan Koordinasiya Mərkəzinin cari ilin sonuna qədər həyata keçirməyi nəzərdə tutduğu layihələr, tədbirlər nədən ibarətdir?

-İlin sonu payız aylarına təsadüf edir və məhz bu aylar bütün Avropa siyasi-istimai məkanında tədbirlərin « bol, bəhrəli » olan aylardır. Elə Azərbaycan təqvimində də bu aylarda mühüm tarixi hadisələr çoxdur. Tariximiz və mədəniyyətimizə, vətənimizin qırmızı rəngli təqvim olaylarına, qan yaddaşına həsr edilmiş tədbirlər hər il nəzərdə tutulur. Oktyabr ayında AAKM-nin Almaniya üzrə hazırladığı Press Relizdə 20-dən çox tədbir işıqlandırılıb. Oktyabr ayında bütün Almaniya üzrə Azərbaycanın müstəqilliyi günü diaspor tərəfindən müxtəlif növlü tədbirlər, film axşamı, boks turniri, konsert və s. qeyd edilib. Eyni zamanda elə aksiya və tədbirlər vardır ki, onlar gündəlik tələblərə, siyasi-ictimai şəraitdən doğaraq, qısa bir müddətdə düşünülməli və lazımi məqamda olmalıdır. Bildiyiniz kimi, Avropa siyasi dairələrində Dağlıq Qarabağ münaqişəsinə dair müzakirələr yeni mərhələdədir. Bu yaxınlarda Alman Parlamentinin sol partiyası Parlamentə Dağlıq Qarabağ məsələsinin həllinə ciddi diqqət yetirilməsini tələb etdi. Almaniyanın xarici işlər naziri cənab Staynmayer Cənubi Qafqazda, o cümlədən Azərbaycanda işgüzar səfərdə oldu. Almaniyadakı Azərbaycan diasporu da elə bu siyasi zərurətdən doğan növbəti bir aksiya hazırladı. Belə ki, Almaniyadakı diaspor cəmiyyətləri Berlində - Reyxstaqın qarşısında təxminən iki saat davam edən etiraz aksiyası təşkil etdilər. Mitinqdə Almaniyanın müxtəlif şəhərlərindən gəlmiş 300-dən artıq soydaşımız iştirak edərək, bayraqlar, müxtəlif plakatlarla beynəlxalq aləmdən Ermənistanın təcavüzkar, işğalçı siyasətinə dair qətiyyətli mövqe nümayiş etdirməyi, XX əsrin ən dəhşətli insanlıq cinayətlərindən biri Xocalı soyqırımına hüquqi qiymət verməyi tələb etdi. Almaniyada yaşayan azərbaycanlılar Prezident İlham Əliyevin Ermənistan-Azərbaycan, Dağlıq Qarabağ münaqişəsinin həlli istiqamətində siyasətini dəstəklədiklərini, Azərbaycan dövləti ilə həmrəy olduqlarını ifadə etdilər. Oktyabr ayı tələbələrin də fəal olduğu ay olub və sevindiricidir ki, AAKM bu gün tələbələrlə, xüsusilə də ASN cəmiyyəti ilə dinamik bir ünsiyyətdə olub, sıx-sıx əməkdaşlıq edib. AAKM-nin əhəmiyyətli tədbirlərindən biri də başda AMEA-nin prezidenti akademik Akif Əlizadə olmaqla nümayəndə heyətinin Berlindəki Azərbaycan diasporu ilə görüşü idi. AMEA-nın diasporun intellektual potensialına marağı, Azərbaycan gənclərinin təhsilinə və elmi fəaliyyətinə yüksək dəyər verməsi çox müsbət bir hal idi.

-Bir müddət əvvəl Diasporla İş üzrə Dövlət Komitəsi Avropada, o cümlədən Almaniyada fəaliyyət göstərən diaspor təşkilatları ilə görüşlər keçirdi, müəyyən tapşırıq və tövsiyyələr verildi. Həmin görüşdən keçən müddət ərzində Almaniyadakı Azəırbaycan diaspor təşkilatlarının fəaliyyətində hansı müsbət dəyişikliklər, irəliləyişlər baş verib?

-Sözsüz ki, belə görüşlər olmalıdır və onların əhəmiyyəti çox böyükdür. 2015–ci il siyasi cəhətdən sadə il olmayacaq. Bu il həm də «qondarma erməni soyqırımınin uydurma ildönümüdür ». Bu bir həqiqətdir ki, həqiqi soyqırımı bizim xalqımız yaşayıb və biz də türk qardaşlarımızla birlikdə bu qondarma soyqırımın ifşasına çalışacağıq. Eyni zamanda 2015-ci il Bakıda ilk Avropa Olimpiya oyunlarının keçirildiyi ildir. Avropa Olimpiya oyunlarının keçirilməsi çox şərəfli bir vəzifədir və Azərbaycan sözsüz ki, bunun öhdəsindən bacarıqla gələcək. Amma bizim – Avropa diasporunun artıq « aci » təcrübəsi vardır. Necə ki, Azərbaycanı sevməyənlər Avrovision ilində vətənimizə « media basqını » etmişdisə, eləcə də bu il də eyni hal ola bilər. Biz indidən səfərbər olmalıyıq və bu prosesləri nəzarətdə saxlamalıyıq. Məhz Diasporla İş üzrə Dövlət Komitəsinin keçirdiyi belə görüşlərdə qarşıda duran vəzifələr haqqında fikir mübadiləsi edilir, komitə tərəfindən diaspor cəmiyyətlərinə « Vətən impulsu » verilir, əsas fəaliyyət istiqamətləri müəyyən edilir. Mən Diasporla iş üzrə Dövlət Komitəsinə tək diaspora verdiyi maddi dəstəyə görə yox, xüsusilə bu ideya, mənəvi dəstəyə görə təşəkkür etmək istərdim.

-Almaniya Azərbaycanlılarının Koordinasiya Mərkəzinin rəhbəri olaraq hazırda Azərbaycan və Almaniya arasındakı əlaqələri necə qiymətləndirirsiniz və diaspor təşkilatı olaraq bu əlaqələrin daha da inkişaf etməsi istiqamətində nələri təklif edərdiniz?

-Azərbaycan Almaniya münasibətləri hər zaman dinamik hərəkətdədir, əsasən qarşılıqlı anlaşma və xalqların bir-birinə yaxınlaşması istiqamətində inkişaf edir. Nəzərdən qaçırmayaq ki, Alman siyasəti Dağlıq Qarabağ məsələsində hər zaman Azərbaycanın ərazi bütövlüyünü dəstəkləyir.

Son zamanlar Almaniyada Azərbaycanı təqdim edən çoxsaylı siyasi-mədəni proqramlar, layihələr yer alır. Burada mən əlbəttə Azərbaycan Respublikasının rəhbərliyinin Alman-Azərbaycan münasibətlərinə diqqətini, Respublikanın birinci xanımı Heydər Əliyev Fondunun Prezidenti Mehriban xanım Əliyevanın rəhbərliyi ilə təşkil edilən mədəniyyət gecələrini xüsusilə qeyd etmək istərdim. Məsələn, Diaspor üçün fərəhli hadisələrdən biri də 13 oktyabr tarixində Almaniyanın paytaxtı Berlində Heydər Əliyev Fondunun təşkilatçılığı və Azərbaycan Respublikasının Almaniya Federativ Respublikasındakı Səfirliyinin dəstəyi ilə “1-ci Avropa Oyunları Bakı 2015” layihəsinə həsr olunmuş tədbirin keçirilməsi idi. Tədbirdə Azərbaycan Respublikasının Birinci Xanımı, Heydər Əliyev Fondunun prezidenti xanım Mehriban Əliyevanın sədri olduğu 1-ci Avropa Oyunlarının təşkilat komitəsinin fəaliyyəti təqdim olundu. Bu tədbirlər həm ikitərəfli münasibətlər üçün vacibdir, həm də Azərbaycan diasporunun fərəh mənbəyidir. Onu da qeyd edim ki, Almaniyadakı Azərbaycan Səfirliyi iki ölkənin yaxınlaşmasında böyük işlər aparır. Və əlbəttə “xalq diplomatiyası” səviyyəsində alman və azərbaycanlıların bir-birilə tanış olmasında son illərdə Azərbaycan diasporunun daha mükəmməl və peşəkar fəaliyyətinin xidməti böyükdür.

-Zaman-zaman Almaniyada istər müəyyən mətbuat orqanlarda, istərsə də ictimai-siyasi təşkilatlar tərəfindən Azərbaycana qarşı qeyri-obyektiv mövqe ortaya qoyulur. Sizcə bu cür mövqe nədən formalaşır ?

-Özünü klassik ənənələrin, bərabərlik və insan hüquqları, dövlətçilik və demokratiya prinsiplərinin banisi hesab edən“Qədim – qoca Avropa” Azərbaycan kimi sürətlə və modern inkişaf edən ölkələri tam rahatlıqla “həzm edə” bilmir, onlar Azərbaycanın müstəqil və balanslı siyasətini kontrola almaq arzusu ilə onu zəiflətməyə çalışır. Avropa Azərbaycandan müəyyən iqtisadi bəhrələnmə məqsədləri güdür və bəzən təzyiq metodundan istifadə edir. Amma Azərbaycan gündən-günə qüvvətlənir, onun potensialı artır. Mən arzu edərdim ki, o Avropa dəyərləri istiqamətində inkişafını davam etdirsin, amma eyni zamanda hər zaman öz milli maraqlarını müdafiə etsin.

-Bəs belə bir mövqenin formalaşmasında Almaniyadakı erməni diasporunun rolu nə dərəcədədir?

-Əvvəla onu qeyd edim ki, Azərbaycan diasporu son illərdə bir sıra sınaqlardan keçib. Artıq biz bilirik ki, erməni təxribatlarına qarşı təkcə “cavab aksiyaları” yox, necə deyərlər “hücüm aksiyaları” da təşkil etmək lazımdır. Biz bilirik ki, ölkəmizdə beynəlxaılq səviyyədə xoş bir hadisə baş verdikdə, bizi sevməyənlər məhz bu anda bizə qarşı “media təxribatlar” hazırlayır. Avrovizion ili biz bu təcrübəni yaşadıq. Sözsüz ki, erməni diasporunun da bu təxribatlarda “əli” vardır. Erməni diasporu artıq 100 ildən çoxdur ki, Avropada Türk dünyasına qarşı təbliğat aparır və azərbaycanlıların Avropada təşkilatlanmasının ilk addımları atıldığı zaman, erməni təbliğatı artıq “ayaq tutub” yeriyirdi. Bir çox Avropa qurumları hələ də öz “ermənipərəst” mövqelərində qalırlar və Azərbaycan diasporu onlarla mütəmadi iş aparır. İllərin təcrübəsi öyrədir ki, bəzən heç belə ermənipərəstlərə vaxt sərf etməyə də dəyməz. Ondansa Azərbaycanın mövqeini dəstəkləyən yeni qurumlarla fəal işləmək daha effektivdir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 18 noyabr.- S.3.