Gürcüstandakı soydaşlarımızın üzləşdiyi

əsas problemlərdən biri işsizlikdir

Fazil Həsənov: “Gənclərin və orta yaşlı insanların işlə təmin olunma probleminin həlli üçün müxtəlif iş yerlərinin açılması zəruridir”

“Gürcüstanda yaşayan azərbaycanlılar bu cəmiyyətə inteqrasiya olunmalıdırlar”

Bu gün Gürcüstanda yaşayan 500 mindən artıq azərbaycanlı zaman-zaman bu ölkədə müxtəlif problemlər, çətinliklərlə üzləşir. Soydaşlarımızın üzləşdiyi problemlərin həlli, həmin problemlərin Gürcüstanın rəsmi dairələrinə çatdırılması istiqamətində fəaliyyət göstərən Azərbaycan təşkilat və cəmiyyətləri müəyyən mənada bəzi çətinliklərin aradan qaldırılmasına nail olurlar. Bu sırada Gürcüstandakı Azərbaycanlıların Mədəniyyət Mərkəzinin fəaliyyətini xüsusi qeyd etmək yerinə düşər.

Mərkəz fəaliyyət göstərdiyi müddət ərzində azərbaycanlıların gürcü cəmiyyətinə inteqrasiyası, gənc nəslin gürcü dilini öyrənməsi, azərbaycandilli məktəblərin dərs vəsaitləri ilə təmin olunması, eləcə də zəngin mədəni irsimizin təbliği istiqamətində bir sıra layihələr, tədbirlər həyata keçirib. AMM sədri Fazil Həsənovla söhbətimiz də məhz yuxarıda qeyd edilən istiqamətlərdə oldu. Mərkəz sədri “OLAYLAR”-a verdiyi müsahibədə Gürcüstanda yaşayan azərbaycanlıların günümüzdə üzləşdiyi əsas problemlərdən də danışıb.

-Azərbaycanlilarin Mədəniyyət Mərkəzinin cari ilin sonuna qədər həyata keçirməyi nəzərdə tutduğu layihələr, tədbirlər nədən ibarətdir?

-Ötən illərdə olduğu kimi, bu il də əsas istiqamətimiz gənclərimizin təhsili ilə bağlı olan layihələri davam etdirməkdir. Mədəniyyətimizin təbliği istiqamətində bir sıra layihələr, tədbirlərin keçirilməsi nəzərdə tutulur. Azərbaycan həqiqətlərinin Gürcüstanda yayılması və təbliği istiqamətində düşündüyümüz tədbirləri reallaşdıracağıq. Qarşıdan gələn yeni mövsüm və növbəti il çoxşaxəli layihələrlə yadda qalacaq. Əsas məqsədimiz insanlarımıza dəstək vermək və mədəniyyətimizi təbliğ etməkdir.

-Bəs Azərbaycanlıların Mədəniyyət Mərkəzi olaraq Gürcüstanda yaşayan azərbaycanlıların gürcü cəmiyyətinə inteqrasiyası istiqamətində hansı addımlar atır, layihələr həyata keçirirsiniz?

-Gürcüstan Azərbaycanlılarının Mədəniyyət Mərkəzinin əsas məqsədi bu ölkədə yaşayan azərbaycanlıların gürcü cəmiyyətinə inteqrasiyasına nail olmaqdır. İnteqrasiyanın isə yolları çoxşaxəlidir. Əsas işimiz gənclərimizin maarifləndirilməsi, mədəniyyətimizin təbliği və inkişaf etdirilməsidir. Azərbaycan həqiqətlərini yaşadığımız cəmiyyətə təbliğ edərək mədəniyyətimizi də təmsil edirik. Bu istiqamətdə bir çox layihələr həyata keçirilir. Həmin layihələr Diasporla İş üzrə Dövlət Komitəsinin dəstəyi ilə azərbaycandilli məktəblərdə gürcü dili kurslarının açılması, tələbələrə aylıq təqaüdlərin verilməsi, mədəniyyət festivallarının, aşıq sənətinin inkişafı ilə bağlı tədbirlərin keçirilməsidir. AMM-nin nəzdində “Sarvan” folklor rəqs ansamblının fəaliyyətində həm gürcü, həm də Azərbaycan mədəniyyəti nümunələrinin, rəqslərinin təbliği və əhali arasında yayılması, gənclərin Gürcüstanın bir çox tarixi yerlərinə ekskursiyalarının təşkili, gürcü və Azərbaycan ədəbiyyatı axşamlarının keçirilməsi, kitabların tərcümələri, təqdimatları, Gürcüstanın və Azərbaycanın tarixi günlərinə həsr olunan tədbirlərinin qeyd olunaraq anılması, gürcü və Azərbaycan jurnalistləri arasında əməkdaşlıq məqsədilə müxtəlif layihələrin və tədbirlərin keçirilməsi və bu kimi işlərimiz azərbaycanlıların gürcü cəmiyyətinə inteqrasiya olunmasından başqa iki xalq və dövlət arasında əlaqələrin daha da möhkəmlənməsinə xidmət edir. Bundan başqa nəşr etdiyimiz mətbu orqanlar da buna xidmət edir.

-Gürcüstanda yaşayan azərbaycanlılar özləri gürcü cəmiyyətinə inteqrasiya prosesində maraqlıdırlarmı?

-Gürcüstanda yaşayan azərbaycanlılar bu ölkənin vətəndaşıdırlar və ölkəmizin bütün imkanlarından istifadə edərək layiqli vətəndaş olmaq üçün təbii ki, bu cəmiyyətə inteqrasiya olunmalıdırlar. Gürcüstan cəmiyyətinə inteqrasiya zamanı isə milli mənəvi dəyərlərimizi qoruyub saxlamalıyıq. Əhali tərəfindən dövlət dilinin öyrənilməsinə böyük maraq var. Xüsusən də gənclər arasında bu proses intensiv şəkildə davam etdirilir.

-Zaman-zaman Gürcüstanda yaşayan azərbaycanlıların müxtəlif problemləri, çətinlikləri meydana çıxır. Günümüzdə azərbaycanlıların Gürcüstanda üzləşdiyi əsas problemlər nədən ibarətdir?

-Soydaşlarımızın üzləşdiyi əsas problemlərdən biri işsizlikdir. Gənclərin və orta yaşlı insanların işlə təmin olunma probleminin həlli üçün müxtəlif iş yerlərinin açılması zəruridir. Ən böyük problərimizdən biri azərbaycandilli məktəblərdə kadr çatışmamazlığıdır. Məktəblərdə çalışan müəllimlərin yaşı və ixtisası çərçivəyə uyğun deyil, gənc kadrların hazırlanması üçün isə Gürcüstan ali təhsil müəssisələrində məktəblərimiz üçün zəruri fakültələr yoxdur.

Süleyman İsmayilbəyli

Olaylar.- 2014.- 21 noyabr.- S.4.