Bu il diaspora həyatında

yadda qalan hadisələr

Hər il olduğu kimi cari ildə də bütün sahələr kimi diaspora sahəsində də bir sıra uğurlar əldə edilib, yeni-yeni təşkilatlar təsis olunub. Bir sözlə başa vurmaqda olduğumuz 2014-cü ili də diaspora sahəsində görülən işlərin səmərəliliyi və zənginliyi baxımından müsbət qiymətləndirmək olar.

******

Belə ki, cari il, fevralın 3-də İstanbulda Türkdilli Ölkələrin Əməkdaşlıq Şurası Təmas qrupunun növbəti toplantısı keçirilib. Toplantıda həmçinin 2014-cü ildə Bakıda “1918-1920-ci illərdə Azərbaycanla Türkiyə arasında hərbi əməkdaşlıq” mövzusunda tarixçi alimlərin iştirakı ilə elmi-praktiki konfransın keçirilməsi barədə də qərar qəbul olunub. 2015-ci ilin aprel ayında Fransada türkdilli ölkələrin diaspor təşkilatlarının birgə toplantısının keçirilməsi barədə təklif də iştirakçılar tərəfindən müsbət qarşılanıb.

******

Finlandiyada fəaliyyət göstərən “Dostluq” Cəmiyyəti bu ölkənin parlamenti qarşısında “Xocalıya ədalət!” kampaniyası çərçivəsində Xocalı soyqırımının 22-ci ildönümünə həsr edilmiş mitinq təşkil edib. Aksiya iştirakçıları əllərində “Xocalıya ədalət!” yazılmış plakatlar və Türkiyə, Azərbaycan bayraqları tutublar. “Dostluq” Cəmiyyətinin sədri Təranə Nəzərova mitinqdə çıxış edərək Xocalı soyqırımının ermənilərin insanlıq əleyhinə törətdiyi ən dəhşətli cinayət olduğunu bildirib. Daha sonra Xocalı soyqırımının qurbanları bir dəqiqəlik sükutla yad edilib. Tədbir zamanı Xocalı soyqırımı ilə bağlı videomateriallarla birgə imzalanmış petisiya Finlandiya Xarici İşlər Nazirliyinə və Finlandiya Parlamentinə göndərilib.

******

Avropa Azərbaycanlıları Konqresi "1992-ci ildə Xocalı sakinlərinə qarşı törədilmiş soyqırımın cinayət kimi tanınması və Dağlıq Qarabağ münaqişəsinin sülh yolu ilə həlli"nə dair Avropa Parlamentinin Xarici siyasət komitəsinin sədri Elmar Brok və Insan hüqüqları komitəsinin üzvü Elizabet Yeqqleyə bəyanat və sorğu ilə müraciət edib. Eyni zamanda AAK Avropa Parlamentinin 300-ə qədər üzvünə ünvanlanmış müraciətdə Avropa Parlamentindən Dağlıq Qarabağ münaqişəsinin müvafiq beynəlxalq normalara uyğun olaraq həllinə münasibət bildirmək, 26 fevral 1992-ci ildə ermənilər tərəfindən Xocalı sakinlərinə qarşı həyata keçirdiyi soyrıqırım aktının müharibə zamanı törədilmiş cinayət kimi qiymətləndirməsini tələb edib. Müraciətdə həmçinin Xocalı soyqırımının beynəlxalq ekspetlər komissiyası tərəfindən araşdırılması, ATƏT-in Minsk Qrupuna üzv olan ölkələrin başçılarından münaqişənin həlli yolunda və sülhün əldə edilməsində cəhd göstərmələri istənilib.

******

Niderland Krallığının şimal hissəsində “Hollandiya Azərbaycan Evi” adlı daha bir Azərbaycan diaspor təşkilatı fəaliyyətə başlayıb. Təşkilatın yaradılmasında əsas məqsəd Niderland-Azərbaycan arasında dostluq körpüsü yaratmaq, bu bölgədə yaşan soydaşlarımızın təşkilatlanması, onların cəmiyyətə inteqrasiyasını təmin etməkdir. Bundan başqa Azərbaycan həqiqətləri, Ermənistan-Azərbaycan, Dağlıq Qarabağ münaqişəsinin dünya ictimaiyyətinə çatdırılması da mühüm vəzifələrdəndir. Bu ölkədəki digər Azərbaycan diaspor təşkilatları kimi yeni yaranmış Hollandiya Azərbaycan Evi də ermənilərin işğalçılıq siyasəti, hazırda 20 faizə yaxın ərazilərimizin erməni işğalı altında olması və Xocalı soyqırımının beynəlxalq miqyasda tanıdılması istiqamətində müvafiq tədbirlər keçirməyi plnalaşdırır.

******

Xocalı soyqırımının 22-ci ildönümü ilə əlaqədar 2014-cü il fevral ayının 26-da Nyu York Azәrbaycan-Amerikan Qadinlar Assosiasiyası Ermәnistanın BMT-dәki daimi nümayəndəliyinin vә BMT-nin Baş Assambleyasının binası qarşısında etiraz aksiyası təşkil edib. Aksiya iştirakçıları әllәrində Azәrbaycan, Türk, Amerika bayraqları, Xocalıya ədalət tələb edən, faciәni әks etdirən plakatlar tutublar. Onlar “Ermәnistan terrorçu”, “Ermənistan uşaq vә qadın qatili”, “Ermәnistan, etdiklәrindәn utan!”, “Ermәnistan, Azərbaycandan və Türkiyәdən əlini çәk!” kimi şüarlar sәslәndirib.Mitinq çərçivəsində yerli sakinlərə və turistlərə Xocalı faciәsi haqqında broşürlər paylanılıb.

******

Ümumrusiya Azərbaycan Konqresinin regional bölmələrinə daha biri əlavə olunub. Təşkilatın Moskva vilayətinin Dolqoprudnıy şəhərində yeni regional bölməsi fəaliyyətə başlayıb.Ümumrusiya Azərbaycan Konqresinin mərkəzi ofisində təşkilatın icraçı direktoru İlqar Hacıyev yeni regional bölmənin rəhbəri Namus Nağıyevlə görüşərək ÜAK-ın məqsəd və məramlarından danışıb. Ümumilikdə təşkilatın və regional bölmənin planları, prioritetlərini müzakirə edib. Öz növbəsində fəaliyyət göstərdiyi şəhərdə yaşayan azərbaycanlılar haqqında İlqar Hacıyevə məlumat ÜAK-ın Dolqoprudnıy şəhərindəki yeni bölməsinin rəhbəri Namus Nağıyev də burada belə bir təşkilatın yaranmasının vacibliyini qeyd edib.

******

Niderland və Belçika Krallığının hər bir əyalətində Azərbaycan təşkilatlarının yaradılması prosesinə start verən Benilüks Azərbaycanlıları Konqresinin (BAK) tərkibinə daha iki təşkilat əlavə olunub. Bunlar Hollandiyanın Brabant Əyaləti Azərbaycanlılar Məclisi və Şimalı Hollandiya Əyaləti Azərbaycanlılar Ittifaqıdır. Hər iki təşkilatın təqdimat mərasimi Rotterdam şəhərində baş tutub.

Mərasimdə Benilüks Azərbaycanlıları Konqresinin sədri Sahil Qasımov yeni təşkilatları iştirakçılara təqdim edib, onların rəhbərlərini və üzvlərini təbrik edərək, diaspor fəaliyyətində uğurlar arzuladıqdan sonra tədbirdə Disaporla İş üzrə Dövlət Komitəsinin sədri Nazim İbrahimovun təbrik məktubu oxunub.

******

Ukraynanın ən böyük özəl ali məktəblərinin birində - “Avropa Universiteti”ndə Azərbaycan Mədəniyyət Mərkəzinin təntənəli açılış mərasimi keçirilib. Tədbir “Ukrayna Azərbaycanlıları Birləşmiş Diasporu”nun, Ümumukrayna Azərbaycanlı Gənclər Təşkilatının və Müslüm Maqomayev adına Azərbaycan Mədəniyyət Mərkəzinin dəstəyi ilə baş tutub. Azərbaycan Respublikasının Ukraynadakı səfiri Eynulla Mədətli və "Avropa Universiteti"nin rektoru İvan Timoşenko tədbir iştirakçılarını salamlayaraq, yeni mərkəzə gələcək fəaliyyətində uğurlar arzulayıblar.

******

Hollandiya Azərbaycan Türk Kültür Dərnəyi Hollandiyada artıq ikinci dəfə keçirilən və 15 nominasiyada uğurlu fəaliyyətinə görə seçilmiş adamlara, eləcə də qurumlara verilən “Altın Lalə” mükafatına layiq görülüb. “Altın Lalə” mükafatı hər il holland və türk əhali arasından seçilmiş siyasətçi, idmançı, jurnalist, iş adamı və təşkilatlara uğurlu, səmərəli fəaliyyətinə görə təqdim edilir.Bu dəfə “İlin təşkilatı” mükafatı artıq 20 ildən çoxdur fəaliyyət göstərən Hollandiya Azərbaycan Türk Kültür Dərnəyinə verilib. Təqdimat mərasimində çıxış edən Dərnəyin rəhbəri İlhan Aşkın bildirib ki, təşkilat komitəsi 20 illik fəaliyyətimizi nəzərə alaraq onları bu mükafata layiq görüb.

******

Almaniya tarixində ilk dəfə olaraq bu ölkədəki seçkili orqana azərbaycanlılar seçilib. Drezden bələdiyyəsinə keçirilən seçkilərin nəticəsinə əsasən seçilən 16 nəfərdən 3-ü azərbaycanlı olub. Seçilən azərbaycanlılar Azərbaycan diasporu tərəfindən irəli sürülən namizədlərdir. Bunlar əslən Azərbaycandan olan Almaniya vətəndaşları Azad Məmmədov, Ferman Levenfus və Anjelina Mixayilovadır.

A. Babayevin sözlərinə görə, 16 nəfərdən ibarət idarəetmə orqanına başqa heç bir qeyri-alman, o cümlədən namizədliklərini vermələrinə baxmayaraq, ermənilər də seçilə bilməyib.

******

Danimarkada fəaliyyət göstərən türkdilli xalqların diaspor təşkilatı rəhbərlərinin toplantısı keçirilib. Paytaxt Kopenhagendə fəaliyyət göstərən "Azərbaycan Evində" baş tutmuş görüşdə Azərbaycan “Vətən” Cəmiyyətinin nümayəndələri və sədri Səfər Sadiqi, Cənubi Azərbaycan Dostluq Cəmiyyətinin rəhbəri Abbas Seidlər, Skandinaviya Ülku Ocaqları sədri Bahadur Gülər, Türkmən Yardım Cəmiyyətinin başçısı Yurtan Karvancı və başqa cəmiyyət sədrləri iştirak edib.Toplantıda "Vətən" Cəmiyyətinin təşəbbüsü ilə "Türkdilli Cəmiyyətlər Birliyinin" koordinasiya şurasının yaradılması müzakirə olunub. Səfər Sadiqi toplantını açaraq bildirib ki, koordinasiya şurasının yaradılması gələcəkdə tədbirlərin birlikdə, planlı şəkildə təşkilinə və əlaqələrin möhkəmləndirilməsinə xidmət edəcək. Səfər Sadiqinin bu təşəbbüsünü dəstəkləyən türkdilli cəmiyyətlərin rəhbərləri koordinasiya şurasının yaradılmasının zəruri olduğunu bildirib.

******

Ukraynadakı Azərbaycan diasporunun internet üzərindən yayımlanacaq televiziya kanalı - “Diaspora TV” fəaliyyətə başlayıb. “Ukrayna Azərbaycanlılarının Birləşmiş Diasporu” tərəfindən təsis olunmuş telekanalının məqsədi Azərbaycan mədəniyyəti, siyasəti, tarixi və dövlətçiliyini dünya ictimayyətinə təqdim etmək, ölkəmiz haqqında yayılan qeyri-obyektiv informasiyaların qarşısını alaraq, Azərbaycan dövlətinin siyəsətini dünya miqyasında təbliğ etməkdir. Kanalın məqsədlərindən biri də müxtəlif ölkələrdə fəaliyyət göstərən Azərbaycan diasporunun gördüyü işləri işıqlandırmaq və onlara informasiya dəstəyi göstərməkdir. Sutkada 18 saat efirdə olacaq “Diaspora TV”-nin xəbərlər buraxılışı hər 3 saatdan bir canlı yayımlanacaq.

******

Ukrayna Nazirlər Kabinetinin tərkibində yeni yaradılan Milli Azlıqlar üzrə Şurada Birləşmiş Ukrayna Azərbaycanlıları Konqresinin (BUAK) sədri, Ukrayna Millətlər Assambleyasının prezidenti Rövşən Tağıyev də təmsil olunur. Ukrayna Nazirlər Kabinetində baş nazir Arsen Yatsenyukun təşəbbüsü və hökumət üzvlərinin iştirakı ilə Şuranın ilk iclası keçirilib. İclasda qurumun tərkibi də təsdiqlənib. Şuranın tərkibində Ukraynada bir sıra milli azlıqları təmsil edən təşkilatların rəhbərləri, mədəniyyət, təhsil və daxili işlər nazirlərinin müavinləri, Nazirlər Kabinetinin etnomilli siyasət işləri üzrə müvəkkili Gennadiy Druzenko, etnosiyasət üzrə ekspertlər, alimlər və mütəxəssislər yer alıb. Onların arasında soydaşımız, BUAK sədri Rövşən Tağıyev də var.

******

Azərbaycan Amerika Qadınlar Assosiasiyasının rəhbəri Münəvvər Vahabovanın rəhbərliyi ilə ABŞ-ın Nyu-York şəhərinin Bruklin səmtində “Azərbaycan Evi” (“Azerbaijan House”) fəaliyyətə başlayıb. “Azərbaycan Evi”nin açılış mərasimində Nyu-Yorkdakı Azərbaycan, türk, yəhudi cəmiyyətlərinin təmsilçiləri, Azərbaycanın ABŞ-dakı səfirliyinin nümayəndələri Emil Səfərov, Vüsalə Muradəliyeva, Azərbaycanın BMT yanında daimi nümayəndəliyinin təmsilçisi Fərid Cəbrayılov və digəriləri iştirak edib.

Olaylar.- 2014.- 29 noyabr-1 dekabr.- S.3.