“Bizim güclü diasporumuz olmalıdır”

Vüqar Əhmədov: “Diasporumuzun qarşısında duran ən vacib məsələ Qarabağ münaqişəsində haqlı mövqeyimizin dünya birliyinə çatdırılması və lazımi dəstəyin alınmasıdır”

Bu gün Azərbaycan diasporunun inkişaf etməsi, müəyyən nailiyyətlərə imza atmasında müxtəlif ölkələrdə yaşayan və təhsil alan gənclərin də rolu müstəsnadır. Xüsusilə, Dünya Azərbaycanlı Gənclər Birliyinin yaranmasından sonra bu istiqamətdə müsbət irəliləyişlər baş verib və gənclərin diaspor sahəsində iştirakı nəzərəçarpacaq dərəcədə artıb. Azərbaycan-Amerika Gəncləri İctimai Birliyinin sədri Vüqar Əhmədov da bu qənaətdədir. İctimai Birliyin sədri deyir ki, Dünya Azərbaycanlı Gənclər Birliyinin yaranmasından çox da uzun bir müddət keçməsə də təşkilat ötən müddət ərzində bir sıra uğurlu layihələr, tədbirlər həyata keçirib.

Vüqar Əhmədov bildirib ki, gələcək planlarla bağlı isə növbəti toplantılarda müzakirələr aparilacaq: “Dünya Azərbaycanlı Gənclər Birliyinin əsas hədəfi dünyada təhsil alan azərbaycanlı tələbələrlə, xaricdə yaşayan gənclərimizlə fəal işin aparılması, onları yaşadığı ölkələrdə diaspor işinə cəlb etmək, öz aralarında şəbəkələşərək, yaşadıqları ölkələrin ictimai-siyasi sferalarında fəal olmalarıdır. Eyni zamanda başlıca hədəflərdən biri də Azərbaycan həqiqətlərinin, Qarabağ münaqişəsində haqlı mövqeyimizin dünyaya çatdırılmasıdır”. Vüqar Əhmədov deyir ki, Azərbaycan gəncliyinin diaspor fəaliyyətindəki rolunu yeni bir səhifənin açılması kimi qiymətləndirmək daha doğru olardı: “Bu nəsillə bağlı olan bir prosesdir. 12 il bundan əvvəl keçirilən Dünya Azərbaycanlıların I Qurultayında əsasən 50-60-cı illərdə Sovet dönəmində Azərbaycandan getmiş və Güney Azərbaycandan xaricə köçmüş insanlar iştirak edirdilər ki, onların da Azərbaycanla bağlı o qədər də dərin məlumatları yox idi. Amma, bu gün milli ruhda böyüyən, intellektual, vətənpərvər, Azərbaycanın sözünü deyə bilən, dünya ictimaiyyətini dost olaraq Azərbaycanın işinə cəlb etməyi bacaran yeni bir təbəqənin, nəslin yetişməsinin şahidi oluruq. Hesab edirəm bu Azərbaycan gəncliyinin diaspordakı fəaliyyətinin yeni bir mərhələsidir və diasporaya yeni nəfəs verir. 3-5 ildir başlanan bu işin perspektivdə çox böyük nəticələrinin olacağını düşünürəm. Burada prezident İlham Əliyev tərəfindən Azərbaycan gəncliyi ilə bağlı qəbul etdiyi dövlət proqramları, ötən illər ərzində yüzlərlə Azərbaycan gəncinin xarici ölkələrdə təhsil almağa göndərilməsi də böyük rol oynayır. Bu gün Azərbaycan gəncliyinin diaspor işi qısa zamanda köhnə ənənələr şəkilində formalaşan diasporanı əvəz edəcək, lobbiçilik, effektli diasporanın formalaşmasına öz təsirini göstərəcək. Mən bunu real olaraq görürəm”.

Azərbaycan-Amerika Gəncləri İctimai Birliyinin sədri hesab edir ki, bu gün Azərbaycan gəncləri, eləcə də diasporumuzun qarşısında duran ən vacib məsələ Qarabağ münaqişəsində haqlı mövqeyimizin dünya birliyinə çatdırılması və lazımi dəstəyin alınmasıdır: “Həm gənclər, həm də diaspor təşkilatları olaraq maksimum çalışaraq, münaqişənin həllinə təsir edə biləcək qüvvələri öz tərəfimizə çəkməliyik. Bunun üçünsə bizim güclü diasporumuz, daha sonra lobbimiz olmalıdır”. İctimai Birlik sədrinin sözlərinə görə, xüsusilə Birləşmiş Ştatlarda aktivlik nümayiş etdirilməlidir: “Bu məsələ ilə bağlı hesab edirəm ki, Amerikada Azərbaycanın təbliğ olunması, oradakı nüfuzlu şəxslərin Azərbaycanın dostuna çevrilməsi, Azərbaycan diasporunun güclü təsir imkanlarına malik olması kimi istiqamətlərdə səylərimizi artırmalıyıq. İctimai Birlik olaraq okeanın o tayında keçirdiyimiz görüşlər, tədbirlər onu göstərir ki, Birləşmiş Ştatlardakı diasporumuz başqa ölkələrin və millətlərin diasporu ilə müqayisədə müəyyən qədər zəif çıxış edir. Zəif olanda isə, təbii ki, hansısa arqumenti inandırmaq çətindir. Qarabağ münaqişəsində biz haqlı tərəfik və dünya da bunu bilir. Lakin, müəyyən mənada sözümüz eşidilmir. Sözümüzün eşidilməsi üçünsə, güclü olmaq, güclü tərəflərə daha yaxınlaşmaq lazımdır. Reallıqdan çıxış edərək bu istiqamətdə daha çox iş aparmalıyıq”. Vüqar Əhmədov bildirib ki, diasporumuz dünya ölkələrinin cəmiyyətlərinin bütün tərəfləri ilə fəal şəkildə işləməli, təbliğat aparmalıdır: “Amma, nə qədər ki, gücümüz yetərincə deyil, nə qədər ki, müəyyən istiqamətlərdə axsamalar müşahidə olunur, səsimizin eşidilməsi də bir o qədər çətin olacaq. Təbii ki, bütün bunlar vaxt tələb edir. Bu istiqamətdə bizim təşkilat da fəaliyyətini davam etdirir. Məhz bu səbəblərdən Avropa ilə müqayisədə Amerikada daha çox işin aparılmasına ehtiyac var”. Vüqar Əhmədov rəhbərlik etdiyi Azərbaycan-Amerika Gəncləri İctimai Birliyinin fəaliyyəti və həyata keçirdiyi layihələr barədə də məlumat verib. Bildirib ki, İctimai Birliyin əsas hədəfi Azərbaycan həqiqətlərinin dünyada təbliğ olunmasıdır: “Təşkilatımız əsasən Birləşmiş Ştatlarda fəaliyyət göstərir, yəni bu ölkənin təşkilatları, oradakı Azərbaycan diasporu, tələbələri ilə işləyir. Bu məqsədlə də əsas fəaliyyətimizi və son layihələrimizi həqiqətlərimizin təbliği istiqamətinə yönəltmişik. Son illərdə Azərbaycan Respublikasının Prezidenti yanında Qeyri Hökumət Təşkilatlarına Dövlət Dəstəyi Şurasının dəstəyi ilə həyata keçirilən layihəmiz xaricdə təhsil alan azərbaycanlı gənclərin diaspor fəaliyyətində rolunun gücləndirilməsi ilə əlaqədar olub. Layihələrimizdən biri isə Vaşinqtonda Qarabağ forumunun keçirilməsi ilə bağlı idi. Bu layihə isə, Amerikanın “İrs” (Heritage) Fondu ilə əməkdaşlıq sayəsində həyata keçirildi. Forumda amerikalı ekspertlər, beyin mərkəzləri, strateji araşdırmalar mərkəzlərinin nümayəndələri, azərbaycanlı tələbələr, millət vəkilləri iştirak edirdi. Burada əsas araşdırmamız azərbaycanlı gənclərin Qarabağ münaqişənin həlli ilə bağlı mövqeyi və bu yanaşmaların müzakirəsi idi. Bununla bağlı ingilis dilində böyük bir təqdimat etdik və müzakirələr keçirdik. Böyük maraqla qarşılanan forumda azərbaycanlı gənclərin bölgədəki sülh və təhlükəzilik məsələlərinə, Qarabağ münaqişəsinin həllinə yanaşmaları təqdim edildi. ABŞ ictimaiyyəti və birbaşa Konqreslə əlaqəsi olan ekspertlərin diqqətinə bölgədəki son durumu çatdırdıq və qeyd etdik ki, Gürcüstan-Rusiya münaqişəsindən sonra Qarabağ münaqişəsinin sülh yolu ilə həllindən gözləntilərimiz müsbət deyil. Azərbaycan gəncliyi beynəlxalq təşkilatların və aparıcı dövlətlərin münaqişənin həlli ilə bağlı səylərini nəticəsiz hesab etdiyi üçün, yeganə həll yolunu müharibədə görür. Amerikalı nümayəndələr də ABŞ-ın səylərinin artırılması üçün bu məsələni necə və hansı formada təqdim etməli olduqlarını müzakirə etdi. Biz də öz növbəmizdə münaqişənin həllində Birləşmiş Ştatların rolunun daha çox olmasını gözlədiyimizi dedik. Çünki Azərbaycan Avroatlantik məkana inteqrasiya yolunu seçib və ABŞ-ın regionda, o cümlədən, Əfqanıstanda və İraqda sülhün bərqərar olması üçün həyata keçirdiyi missiyada aktiv iştirak edir. Bildirdik ki, bu səbəbdən də, münaqişənin ədalətli həlli Azərbaycanla yanaşı, Birləşmiş Ştatların da maraqlarında olmalıdır. Təşkilat olaraq bu istiqamətdə fəaliyyətimizi davam etdirməyi planlaşdırırıq. Bununla yanaşı, Avropanın və ABŞ-ın birgə iştirak etdiyi beynəlxalq proqramlarda iştirak edir, Azərbaycandan yüzlərlə gənci beynəlxalq tədbirlərə göndərir, Azərbaycan həqiqətlərinin təbliğ olunması ilə bağlı materiallar, bukletlər çap edərək Amerikaya göndəririk. Bu işi davamlı şəkildə aparırıq. Bu istiqamətdə ABŞ-ın beyin mərkəzləri ilə də işləyirik. Belə ki, Birləşmiş Ştatların Ceymstaun Fondu və bir sıra beyin mərkəzləri ilə əlaqələr quraraq, onları Azərbaycan həqiqətləri ilə tanış etmişik. Onların Azərbaycana səfərlərini təşkil edirik ki, ölkəmiz haqqında məlumatları əyani şəkildə mənimsəsinlər. Dəfələrlə dəvət etdiyimiz nümayəndələr geri dönəndən sonra Azərbaycanla bağlı müxtəlif məqalələr çap edərək, yayıblar. Gənclər təşkilatı olaraq fəal şəkildə Avropa və ABŞ-da yaşayan azərbaycanlı tələbələr, gənclər, həmçinin diaspor təşkilatları ilə əlaqələr saxlayır, layihələrin həyata keçirilməsində, Azərbaycan maraqlarının lobbiçiliyi, xüsusilə oradakı lobbi qrupları, beyin mərkəzləri ilə əlaqələr yaradaraq, Azərbaycan haqqında məlumatların çatdırılmasında birgə işləyirik. Hətta, Avropadakı azərbaycanlı gənclərin iştirakı ilə yeni təşkilatların yaranmasına da dəstək göstəririk”. Vüqar Əhmədov rəhbərlik etdiyi təşkilatın Birləşmiş Ştatlarla yanaşı Avropada da aktiv olduğunu vurğulayıb: “Bizim təşkilat da Avropada işləyir, müxtəlif beynəlxalq proqramlarda iştirak edir. Avropalılar Azərbaycan haqqında daha çox məlumata malikdir və buna görə də, onlarla anlaşmaq daha asandır. Avropada diaspor işimiz, lobbiçilik fəaliyyətimiz, Azərbaycanın təbliği, ölkə maraqlarımızın müdafiəsi baxımından daha bacarıqlıyıq.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 9 oktyabr.- S.3.