“Rusiyada ən güclü diaspora

məhz Azərbaycan diasporasıdır”

Səbuhi Abbasov: “Rusiyanın Azərbaycanlı Gənclər Təşkilatının sədri Leyla xanım Əliyevanın nümunəvi diaspor fəaliyyətinin nəticəsidir ki, artıq soydaşlarımız arasında ciddi təşkilatlanma işi gedir”

Son illər gənclərə göstərilən diqqət və qayğının artması onların müxtəlif sahələrdə aktiv fəaliyyətinə öz müsbət təsirini göstərib. Sevindirici hal ondan ibarətdir ki, bu gün gənclərimiz diaspor işində də yaxından iştirak edirlər. Gənclər tərəfindən təsis edilən yeni təşkilat və mərkəzlər diaspor işinin daha da sürətləndirilməsinə təkan verir. Belə təşkilatlardan biri də Azərbaycan-Slavyan Gəncləri Assosiasiyasıdır. Sözügedən təşkilatın sədri Səbuhi Abbasovla söhbətimizdə Azərbaycan-Slavyan Gəncləri Assosiasiyasının yaranma zərurəti, qarşısına qoyduğu başlıca məqsədlər və gələcək fəaliyyət istiqamətləri barədə danışdıq.

-Səbuhi bəy, Azərbaycan-Slavyan Gəncləri Assosiasiyasının yaradılması hansı zərurətdən meydana çıxdı və assosiasiyanın əsas fəaliyyət istiqamətlərinə nələr daxildir?

- Demokratiyanın, qlobalaşmanın özü ilə gətirdiyi bir sıra vacib məqamlar var. Bunlardan biri də Qeyri-Hökümət Təşkilatlarının yaranması və vətəndaş cəmiyyətində sürətli inteqrasiyadır. Bu proses bizdən də yan keçmədi. Belə deyək, sürətli QHT-ləşmə başladı. Lakin gənclər çox təəssüf ki, QHT-ləşməni yalnız strateji sahələrdə axtarmağa başladılar. Daha dəqiq desək, ABŞ, Avropa, İnsan Haqları, Demokratiya, İnteqrasiya və s. istiqamətlərin daha “məhsuldar” olduğunu düşünərək fəaliyyətlərini bu istiqamətdə qurdular. Lakin bir şeyi unutmaq lazım deyil ki, QHT qeyri-kommersiya təşkilatıdır və burada əsas məqsəd vətəndaş cəmiyyətinin inkişafına nail olmaqdan ibarətdir. Biz bu istiqamətdə fəaliyyətimizlə birbaşa dövlətə, milli maraqlara xidmət etməliyik. Azərbaycan-Slavyan Gəncləri Assosiasiyası İctimai Birliyi də 2006-cı ildə təsis ediləndə çox müzakirələr, danışıqlar oldu. Hər kəs israrla bizi inandırmağa çalışdı ki, bu istiqamətdə fəaliyyət göstərməyin heç bir perspektivi yoxdur. Bəlkə də hansısa məqamda haqlı idilər. Lakin düşünürəm ki, biz kimliyimizi yaxın qonşularımıza yetərincə tanıtmasaq uzaqda fəaliyyətimizin heç bir əhəmiyyəti yoxdur. Təsəvvür edin ki, Çexiyada, və yaxud Polşada Dağlıq Qarabağ problemindən xəbərsizdirlər. Yaxud da dolmanın erməni mətbəxinə aid olduğunu eşidirsən, sən isə ABŞ-da hay-haray salırsan ki, “Dolma” bizimdi. Bu absurddu. 2006-cı ildə ASGA belə bir şəraitdə yarandı. Əsas məqsəsimiz slavyan ölkələrinin gəncləri ilə sıx sosial-mədəni təmasda olmaq, fikir mübadiləsi aparmaq və onları “Azərbaycanin Dostu” etməkdən ibarətdir.

-Bu günlərdə təşkilatınızın Ukrayna nümayəndəliyi təsis edildi. Nümayəndəliyiniz Ukraynadakı diaspor təşkilatları və və digər qurumlarla sıx əməkdaşlıq edəcəkmi?

- Bu artıq bizim xarici ölkələrdə fəaliyyət göstərən 2-ci nümayəndəliyimzdir. Bu ilin iyun ayında biz Azərbaycan-Slavyan Gəncləri Assosiasiyasının Rusiya nümayəndəliyini təsis etdik. Rusiyada aktiv fəaliyyəti ilə seçilən Toğrul Allahverdili qısa zaman kəsiyində nümunəvi fəaliyyəti ilə seçildi. Biz artıq Rusiyada iki beynəlxalq layihəmizi reallaşdırmışıq. Ümumiyyətlə, Rusiyada fəaliyyət göstərmək üçün çox münbit şərait var. Bunun da obyektiv və subyektiv səbəbləri var. Heydər Əliyev Fondunun vitse-prezidenti, Rusiyanın Azərbaycanlı Gənclər Təşkilatının sədri Leyla xanım Əliyevanın nümunəvi diaspor fəaliyyətinin nəticəsidir ki, artıq soydaşlarımız, xüsusən də Rusiyada yaşayan gənclərimiz arasında ciddi təşkilatlanma işi gedir. Qətiyyətlə demək olar ki, Rusiyada ən güclü diaspora məhz Azərbaycan diasporasıdır. Biz artıq Umumrusiya Azərbaycanlıları Konqresi ilə sıx əlaqələr qurmuşuq, birgə layihələr reallaşdırmışıq. Eyni zamanda Rusiyanın məşhur Azərbaycan Mədəniyyətinin İnkişafı və İntibahı Fondu ilə memorandum imzaladıq. Ən sevindirici məqam ondan ibarətdir ki, bütün bu tədbirlərimizin, layihələrimizin icrasına Heydər Əliyev Fondunun Rusiya nümayəndəliyi, Rusiyanın Azərbaycanlı Gənclər Təşkilatı tərəfindən çox böyük dəstək gəldi. Buna görə də ayrıca təşəkkür edirəm. Azərbaycan-Slavyan Gəncləri Assosiasiyasının Ukrayna nümayəndəliyi də yuxarıda qeyd etdiyim tarixi zərurətdən meydana gəldi. Artıq orda da komanda var. Nümayəndəliyin rəhbəri Xəzri Elxanoğlu ilk layihəsini-aksiyasını da reallaşdırdı. Artıq Ukraynada fəaliyyət göstərən bir çox fondlar, təşkilatlarla danışıqlara başlamışıq. İlk olaraq Ümumukrayna Azərbaycanli Gənclər Təşkilati ilə razılaşmalar var. Düşünürəm ki, tez bir zamanda bir çox layihələr reallaşdıra biləcəyik. Bilirsiniz, nümayəndəliyin açılması o qədər də asan məsələ deyil. Bunun üçün maddi-texniki bazanın formalaşması mütləqdir. Dəstəyimiz olsa biz Belarus, Çexiya və Polşada da qısa zamanda nümayəndəlik aça biləcəyik.

Təşkilatınız Azərbaycan həqiqətləri, Dağlıq Qarabağ problemi, Xocalı faciəsinin dünya birliyinə çatdırılması istiqamətində hansı addımlar atmağı, tədbirlər keçirməyi düşünür?

-2006-cı ildən bu günə qədər Dağlıq Qarabağ problemi, Xocalı həqiqətlərinin dünyaya çatdırılması ASGA-nın prioritet istiqaməti olub. Bizim rəsmi veb səhifəmiz olan www.AzSlav.org- da layihələr bölümündə bu barədə geniş məlumat var. Biz ilk növbədə Heydər Əliyev Fondunun prezidenti, Azərbaycanın birinci xanımı Mehriban Əliyevanın və Heydər Əliyev Fondunun vitse-prezidenti Leyla Əliyevanın bu istiqamətdəki fəaliyyətindən çox böyük stimul alırıq. Düşünürəm ki, hər bir gənc QHT rəhbəri bu istiqamətdəki fəaliyyətində Leyla Əliyevanın ətrafında sıx birləşərək sistemli şəkildə fəaliyyət göstərməlidir. Bu bizim təşkilati prinsipimizdir.

-Yaxın vaxtlar üçün həyata keçirməyi nəzərdə tutduğunuz layihələr, tədbirlər nədən ibarətdir?

- Bu günlər üçün çox strateji layihələrimiz var. İlk növbədə “Təhlükəsiz İnternet Media Forumu”, “I Türk-Slavyan Gəncləri Forumu”nu layihə şəklində hazırlamışıq. Media təhlükəsizlik məsələləri ilə bağlı layihəmizi artıq Gənclər Fonduna təqdim etmişik. Digər layihəmiz üçün isə hələ də donor axtarmaqdayıq. Bundan başqa “Mobil Azerbaijan”, “Mədəniyyətə 1 həftəlik səyahət”, “Danışan Ensiklopediya” və s. kimi maraqlı layihələr hazırlamışıq.

-Növbəti mərhələdə hansı ölkələrdə nümayəndəliklərin təsis edilməsi nəzərdə tutulur?

-Maddi-texniki baza məsələləri həll olunduqdan sonra Belarus, Polşa və Çexiyada nümayəndəliklərin açılmasını planlaşdırırıq.

Təşkilatda son olaraq hansı yeniliklər reallaşıb?

- Biz yeni idarə heyəti formalaşdırdıq. Bir sədr, bir icraçı direktor, 2 müavin, departamentlər və nümayəndəliklər. Ən son açdığımız departament isə “Sorğu-Analitik Mərkəzi” oldu. Biz “İlin Səfiri” adı altında ilk sorğumuzu reallaşdırdıq. Hazırda isə “İlin rayonu (şəhəri)” və “İlin başçısı” sorğusunu reallaşdırırıq. Bəzən deyirlər ki, sizin təşkilatın sorğuya nə aidiyyatı var. Biz slavyan ölkələrində fəaliyyət göstərən bir çox QHT-lərlə fakir mübadiləsi aparırıq. Belə məlum oldu ki, QHT üçün dövlət orqanları ilə əməkdaşlığın ən uğurlu yolu bu orqanların fəaliyyəti haqqında ictimai sorğunun keçirilməsidir. Bu məqsədlə də biz dostlarımızın təcrübəsindən yararlanmaq qərarına gəldik. Hazırda təşkilatın rəsmi saytında sorğu davam edir.

-Sizin təşkilat da bir növ diaspor fəaliyyəti ilə məşğul olan qurum hesab edilir. Bu baxımdan bu gün Azərbaycan diasporunun vəziyyətini necə dəyərləndirərdiniz?

-Diasporla İş üzrə Dövlət Komitəsi dünya azərbaycanlılarının sistemli şəkildə fəaliyyət göstərməsi üçün əlindən gələni edir. Lakin problemlər qalmaqdadır. Bu problemlərin bir çoxunun isə psixoloji məsələlərlə bağlı olduğunu düşünürəm. Belə bir müqayisə edim. Deyək ki, ABŞ-da güclü şəkildə fəaliyyət göstərən bir neçə erməni diaspora təşkilatı var və bəzi məsələlərdə onlar arasında fikir ayrılığı da olur. Hökumətlərini dəstəkləyən də var, dəstəkləməyən də. Lakin ümummilli məsələlərdə onlar birmənalı şəkildə vahidləşirlər. Bizdə isə vəziyyət bir qədər başqadır. Bəzi strateji məsələlərdə bir araya gəlməyimiz demək olar ki, mümkün olmur. Bu işdə düşünürəm ki, hər bir QHT Diasporla İş üzrə Dövlət Komitəsinə yardımçı olmalıdır. Komitə də öz növbəsində QHT-lərə açıq olmalı, birgə müxtəlif layihələr həyata keçirməlidir. Hətta bunu qrant-müsabiqə şəklində etsə daha effektli olar..

-Son zamanlar bir çox QHT-lərin xaricdən maliyyələşərək milli maraqlara zidd fəaliyyəti məlum oldu. Bu barədə nə deyə bilərsiniz?

- Bu məsələlər hər bir ölkədə var, olub olacaq da. Bizim ölkənin digərlərindən fərqi ondan ibarətdir ki, ölkə rəhbəri, şəxsən cənab prezident bu tip təşkilatlara qarşı çox humanist davrandı, onlara düz yola qayıtmaları üçün yetərincə şans verdi. Təəssüflər olsun ki, bu təşkilatlar düzəlmək əvəzinə, bir qədər də irəli gedərək daha böyük məbləğ müqabilində milli dəyərləri satdılar. Məncə bu istiqamətdə fəaliyyət göstərənlər düzəlməyəcəklər. Ən azından bu onların öz əllərində deyil. Onlar sadəcə xarici, qərəzli donorların əsiridirlər.

-Siz həm də media sahəsində çalışırsınız. Bu istiqamətdə hansı işlər görmüsünüz?

- 2005-ci ildən mətbuatdayam. Ayrı-ayrı vaxtlarda “Yeni Azərbaycan”, “Yeni Azərbaycan Gəncləri” qəzetlərində fəaliyyət göstərmişəm. Daha sonra Bakı Slavyan Universitetində yeni açılmış Jurnalistika şöbəsinin müdiri vəzifəsində çalışmışam. Beləliklə media həyatımın ayrılmaz hissəsinə çevrilib. Hhazırda isə www.Xeber1.az, www.Gundem.Az və www.VestiAz.com saytlarının rəhbəriyəm. Bundan başqa internet TV açmaq kimi planlarım var. Bu günkü Azərbaycan mətbuatında çox ciddi problemlər var. Bu problemlərin böyük əksəriyyəti internet medianın üzərinə düşür. Düşünürəm ki, ciddi islahatlar lazımdı. Bu istiqamətdə mən Təhlükəsiz İnternet Media layihəsini təqdim etmişəm. Bu layihədə biz slavyan ölkələrinin təcrübəsini də nəzərə almışıq. Digər bir problem isə bloggerlik fəaliyyətinin zəif olmasıdır.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 31 oktyabr.- S.3.