Qırğızıstandakı Azərbaycan

diasporundan daha bir yenilik

Qırğızıstanda fəaliyyət göstərən Türkdilli Dövlətlərin Siyasətinə Dəstək Fondu Azərbaycan mədəniyyətinin təbliği istiqamətində daha bir yeniliyə imza atıb. Belə ki, paytaxt Bişkekdəki Çingiz Aytmatov adına kitabxanada Qırğızıstanın məşhur simalarının iştirakı ilə Bakı Dövlət Universitetinin professoru Leyla Gərayzadənin “Mir Çinqiza Aytmatova” kitabının təqdimatı keçirilib.

Türkdilli Dövlətlərin Siyasətinə Dəstək Fondunun sifarişi və maliyə dəstəyi ilə rus dilində nəşr edilən kitabın təqdimat mərasimində mərhum qırğız yazıçısı Çingiz Aytmatovun qardaşı akademik İlgiz Aytmatov, yazıçının oğlu Askar Aytmatov və Qırğızsatnın tanınmış simaları; Qırğızstan yazıçılar İttifaqının birinci katibi Nurlan Kalıbayev, xalq yazıçısı Kazak Akmatov və başqaları iştirak ediblər. Tədbirdə çıxış edən dünya şöhrətli qırğız yazıçısı Çingiz Aytmatovun qardaşı Akademik İlgiz Aytmatov, yazıçının oğlu Askar Aytmatov, qohumu Şamşıbek Medetbekov, YUNESKO-nun mədəni irsinin qorunması Orta Asiya ölkələri üzrə nümayəndəsi Asan Torokulov, Qırğızstanın xalq yazıçısı Kazak Akmatov və başqaları kitabın əhəmiyyətindən danışıblar. Kitabı öz vəsaiti hesabına nəşr etdirən Türkdilli Dövlətlərin Siyasətinə Dəstək Fondunun rəhbərinə minnətdarlıq ünvanlanıb. Mərasimdə çıxış edən Türkdilli Dövlətlərin Siyasətinə Dəstək Fondunun prezidenti Nüsrət Məmmədov bildirib ki, bu, fondun nəşr etdirərək pulsuz yaydığı 54-cü kitabdır. Kitabların nəşr edilib pulsuz yayılmasında isə əsas məqsəd Ulu Öndərimiz Heydər Əliyevin irsinin təbliği, Azərbaycan Qırğızstan mədəni əlaqələrinin inkişafıdır. 500 nüsxə ilə nəşr edilən kitabın Qırğızıstanın kitabxanalarına və təhsil ocaqlarına verilməsi nəzərdə tutulub.

Qeyd edək ki 2013-cü ildə dünyaşöhrətli qırğız yazıçısı Çingiz Aytmatovun 85 illik yubileyi keçirilib. Türdilli Dövlətlərin Siyasətinə Dəstək Fondu tərəfindən yazıçının yubileyinə töhfə edilən bu ikinci kitabdır. Bir müddət əvvəl Qırğızıstanda keçirilən İssık-Kul forumu çərçivəsində baş tutan “Çingiz Aytmatov: Mən Manas oğluyam” kitabının təqdimat mərasimdə isə dünyanın 17 dövlətindən tanınmış şəxslər və qırğız rəsmiləri iştirak edib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 8 yanvar.- S.15.