Diaspor təşkilatları 20 Yanvar

faciəsinin ildönümünə hazırlaşırlar

Soydaşlarımız xarici ölkələrdə müxtəlif səpkili tədbirlər keçirəcəklər

Azərbaycan xalqının tarixində baş vermiş faciələrlə əlaqədar xarici ölkələrdə fəaliyyət göstərən diaspor təşkilatları zaman-zaman müxtəlif tədbirlər, konfrans və dəyirmi masalar keçirirlər. 20 Yanvar faciəsinin növbəti ildönümü ilə də əlaqədar olaraq dünyanın bir sıra ölkələrində Azərbaycan diaspor təşkilatları tərəfindən müxtəlif formatlı tədbirlər keçiriləcək. Belə ki, Amerika Birləşmiş Ştatları, Kanada, Latın Amerikası ölkələri, Avstraliya və Yeni Zelandiya da daxil olmaqla dünyanın bir çox ölkələrində 20 Yanvar faciəsinin qurbanları yad edilir. Məlumata görə, yanvarın 19-dan başlayaraq Birləşmiş Ştatların paytaxtı Vaşinqtonda, həmçinin Hyuston, Nyu-York, San Fransisko və azərbaycanlıların kompakt yaşadığı digər şəhərlərdə 20 Yanvar faciəsi qurbanlarının xatirəsinə həsr olunan anım mərasimləri, dəyirmi masaların keçirilməsi, faciəni əks etdirən video çarxların və sənədli filmlərin nümayişi nəzərdə tutulur. Almaniya Federativ Respublikasının müxtəlif subyektlərində də 20 Yanvar faciəsi ilə bağlı müxtəlif formatlı tədbirlər təşkil olunur. Hazırda Almaniyanın Maqdeburq, Berlin və digər şəhərlərində silsilə tədbirlərin keçirilməsi davam etdirilir.

18-23 yanvar tarixlərində Niderland Krallığının Haaqa, Amsterdam və Rotterdam şəhərlərində digər xalqların diaspor nümayəndələrinin də iştirakı ilə 20 Yanvar faciəsi qurbanlarının xatirəsinə həsr olunan anım tədbirlərinin keçirilməsi, o cümlədən, Niderland Krallığının, Belçika Krallığının və Lüksemburqun siyasi partiyalarına Faciə ilə bağlı bəyannamələrin göndərilməsi planlaşdırılır. Yanvarın 19-da 20 Yanvar faciəsi ilə əlaqədar Türkiyə Respublikasının Kocaeli şəhərində də regional televiziya kanalı olan 41 TV kanalında 20 Yanvar faciəsi ilə bağlı Federasiyasının sədri Bilal Dündarın iştirakıyla brifinq keçiriləcək. Brifinqdə milli azadlığı və ölkəsinin ərazi bütövlüyü uğrunda mübarizəyə qalxmış dinc əhaliyə qarşı Sovet rejiminin törətdiyi kütləvi terror haqqında ictimaiyyətə ətraflı məlumat veriləcək. Yanvarın 20-də isə Türkiyə Respublikasının Kocaeli şəhərində 20 Yanvar faciəsinin iyirimi dördüncü ildönümü ilə əlaqədar tarixçi - yazıçı Abdulla Köktürün iştirakı ilə konfrans, Kültür Evində fəaliyyət göstərən Azərbaycan Muzeyində fotosərgi, Adana şəhərində isə “Azərbaycan tarixinin Qanlı səhifəsi” mövzusunda elmi-praktik konfrans keçiriləcək. Yanvarın 19-da Birləşmiş Ərəb Əmirliyində 20 Yanvar faciəsindən bəhs edən sənədli filmlərin nümayişi, yerli qəzetlərdə isə bu barədə ətraflı məlumatların çap olunması nəzərdə tutulub. Bundan başqa Birləşmiş Ərəb Əmirliyində fəaliyyət göstərən “Azərbaycan” Cəmiyyəti 20 Yanvar faciəsi ilə əlaqədar konfrans təşkil edəcək. Həmçinin 19-20 yanvar tarixlərində Gürcüstanın Qardabani, Marneuli, Tbilisi Rustavi şəhərlərində də faciə ilə bağlı anım mərasimləri, konfrans, dəyirmi masa, şəhidlərin xatirəsinə həsr olunmuş fotosərgi keçiriləcək. Rusiya Federasiyasının paytaxtı Moskvada, eləcə də Sank-Peterburq, Yekaterinburq şəhərlərində və Rusiya Federasiyasının digər müxtəlif subyektlərində 20 Yanvar şəhidləri anılacaq. Ukraynanın paytaxtı Kiyevdə, Xarkov və Denepropetrovsk şəhərlərində, eyni zamanda Belarus Respublikasının Minsk şəhəri və Moldova Respublikasının Kişinyov şəhərində də faciənin iyirmi dördüncü ildönümünə həsr olunmuş anım mərasimləri təşkil olunacaq. Silsilə tədbirlərin davamı olaraq yanvarın 20-də Misir Ərəb Respublikasının Qahirə şəhərində də 20 Yanvar faciəsi qurbanlarının xatirəsinə həsr olunan anım mərasimi keçiriləcək və “Şəhidlərimiz” mövzusunda fotosərgi nümayiş olunacaq. 20 Yanvar faciəsinin iyirmi dördüncü ildönümü ilə bağlı Qırğızıstan Respublikasının Bişkek şəhərində “20 Yanvar faciəsinin Azərbaycan xalqının milli azadlıq hərəkatında yeri və rolu”mövzusunda konfrans keçiriləcək. Konfrnsa çərçivəsində fotosərgi və sənədli filimlərin nümayişi təşkil olunacaq. Həmçinin “20 Yanvar qəhrəmanlıq tariximizin səhifəsi” mövzusunda dəyirmi masa keçiriləcək. Qazaxıstan Respublikasının Astana şəhərində “Azərbaycan xalqının azadlıq uğrunda qəhrəmanlıq mübarizəsi” mövzusunda elmi-praktiki konfrans, Almatı şəhərində isə “20 Yanvar faciəsi Azərbaycan xalqına və insanlığa qarşı törədilmiş dəhşətli cinayət” mövzusunda konfrans və fotosərgi təşkil olunacaq. 20 Yanvar faciəsinin 24-cü ildönümü ilə bağlı bir sıra digər ölkələrdə də tədbirlərin keçirilməsi nəzərdə tutulub. Yanvarın 19-da isə Alman Azərbaycan Mədəniyyət Evində “20 yanvar tariximizin qanlı və şanlı səhifəsidir“ mövzusunda anım tədbiri və konfrans keçiriləcək. Tədbirdə Almaniyada yaşayan soydaşlarımız, diaspora nümayəndələrimiz, türkiyəli dərnək və mətbuat nümayəndələri iştirak edəcək. Tədbirdə 20 yanvar gününə həsr edilmiş dinləmələr keçiriləcək, o gün baş vermiş hadisələri əks etdirən film nümayiş etdirləcək və şəhidlərimiz üçün ehsan veriləcək. Tədbirin sonunda şəhidlərimiz üçün dualar oxunacaq.

İsveç Azərbaycan Federasiyası, Finlandiya-Azərbaycan “Dostluq” Cəmiyyəti, Norveçdə fəaliyyət göstərən “Xəzər Yanar” dərnəyi, Hollandiyada Azərbaycan Türk Kültür Cəmiyyəti, Benilüks Azərbacanlıları Konqresi və digər təşkilatlar tərəfindən 20 Yanvar faciəsinin 24-cü ildönümü ilə bağlı tədbirlərin keçirilməsi planlaşdırılıb. İsveçrənin Bern şəhərində Qanlı Yanvar hadisələrinin 24-cü ildönümünə həsr olunmuş tədbir təşkil ediləcək. Həmçinin faciənin ildönümü ilə bağlı Avropa Azərbaycanlıları Konqresi bəyanat yayıb, Latviyadakı “Azəri Vəhdət” Cəmiyyəti, Litva Azərbaycanlıları Cəmiyyəti, Tallin şəhərində “Aydan” Estoniya-Azərbaycan Dostluq Cəmiyyəti tərəfindən 20 Yanvar faciəsinə həsr olunmuş tədbirlər təşkil olunacaq. Rusiya, Ukrayna, Belarus, Bolqarıstan, Türkiyə, Özbəkistan, Qırğızıstan, Qazaxıstan, Gürcüstan, Kanada, Misir, Cənubi Koreya və digər ölkələrdə yaşayan soydaşlarımız tərəfindən də 20 Yanvar faciəsinin 24-cü ldönümünə həsr olunmuş tədbirlərin keçirilməsi tədbirlər planına daxil edilib. Hollandiyada fəaliyyət göstərən “Ana Vətən” Avropa Azərbaycanlı Qadınlar Birliyi, İsrailin Afula şəhərindəki Azərbaycan Mədəniyyət Mərkəzi, İsveçrədəki Azərbaycan Dili və Mədəniyyət Məktəbi, Türkiyənin Manisa şəhərindəki Azərbaycan Kültür Dərnəyi, Çexiyada Təhsil Alan Azərbaycanlı Tələbələr Birliyi, Misir Ərəb Respublikasının Qahirə şəhərində Vətən Tələbə Cəmiyyəti, Birləşmiş Ərəb Əmirliklərinin Dubay Əmirliyində fəaliyyət göstərən Azərbaycan Cəmiyyəti, Yaponiyanın Osaka şəhərində Yaponiya-Azərbaycan Dostluq Cəmiyyəti, Tallində “Aydan” Estoniya-Azərbaycan Dostluq Cəmiyyəti və digər Azərbaycan icmaları tərəfindən də 20 Yanvar faciəsi qeyd ediləcək, şəhidlərin ruhu anılacaq.

Artıq 20 Yanvar faciəsinin 24-cü ildönümünün qeyd olunması, Vətən uğrunda canlarını fəda etmiş şəhidlərimizin ruhlarının anılması tədbirlərinə bir sıra ölkələrdə start da verilib. Belə ki, yanvarın 11-də isə Almaniyanın Bad Salzuflen şəhərində 20 Yanvar faciəsinin 24-cü ildönümünə həsr edilmiş anım mərasimi keçirilib. Almaniyanın Nordrhein-Westfalen federal əyalətində fəaliyyət göstərən Alman-Azərbaycan Mədəniyyət Cəmiyyəti tərəfindən təşkil edilmiş anım mərasimində Hannover, Hamburq, Minden, Herford və Almaniya Federativ Respublikasının digər şəhərlərindən gəlmiş 120-dən çox həmyerlimiz, türk diasporunun nümayəndələri və alman qonaqları iştirak ediblər. Tədbir zamanı qanlı 20 Yanvar hadisələrini əks etdirən fotosərgi nümayiş etdirilib. Alman-Azərbaycan Mədəniyyət Cəmiyyətinin sədri Təranə Tağıyeva tədbiri giriş sözü ilə açıb. Daha sonra 20 Yanvar şəhidlərinin əziz xatirəsi 1 dəqiqəlik sükutla yad edilib. Tədbirdə iştirak edən “Xəzər” Alman- Azərbaycan cəmiyyətinin sədri Etibar Qəniyev, Bielefeld şəhərində yaşayan həmvətənimiz Elşən İsmayıllı, ağsaqqal Ramazan Məmmədov, türk diasporunun nümayəndəsi İsmayıl Nefis, iş adamı Adem Yavuz Tumay, Nordrhein-Westfalen Alman-Azərbaycan Cəmiyyəti İdarə Heyətinin üzvü Faiq Məmmədov və digərləri çıxış edərək Sovet imperiyasına məxsus hərbi birləşmələrin 1990-cı ilin yanvarın 19-dan 20-nə keçən gecə dinc əhaliyə qarşı törətdiyi cinayət haqqında qonaqlara məlumat veriblər. Daha sonra 20 Yanvar hadisələri ətrafında geniş diskussiya və fikir mübadiləsi aparılıb, tədbir iştirakçılarını maraqlandıran suallar məruzəçilər tərəfindən cavablandırılıb. Tədbirin sonunda Nordrhein-Westfalen Alman-Azərbaycan Mədəniyyət Cəmiyyətinin sədri Təranə Tağıyeva qonaqlara öz təşəkkürünü bildirib, gələcəkdə planlaşdırılan tədbirlər, o cümlədən fevral ayında Bielefeld şəhərində keçiriləcək Xocalı soyqırımının 22-ci ildönümünə həsr edilmiş yürüş haqqında həmvətənlərimizi məlumatlandırıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2014.- 17 yanvar.- S.12.