“20 Yanvar Azərbaycanın müstəqilliyini doğdu”

Ankarada 20 Yanvar faciəsi ilə bağlı tədbir keçirilib

Qanlı 20 yanvar 1990-cı il hadisələri nəinki Azərbaycanda, ölkə hüdudlarında da həmyerlilərimiz tərəfindən xatırlanır, tədbirlər təşkil olunur, erməni-rus işğalları tarixi şəkillər və videolentlər vasitəsilə təqdim edilir, kitablar verilir və s. Qardaş Türkiyə də Azərbaycan-erməni məsələsinin adının gəldiyi hər məqamda ayağa qalxıb bizə dəstək olduğunu nümayiş etdirir.

Belə mühüm tədbirlərdən biri 20 Yanvarla bağlı paytaxt Ankarada “İlci” Residence-də oldu. Bu, Eko Avrasiya Məsləhət Şurası və Azərbaycanın Türkiyədəki səfirliyinin birgə təşkilatçılığı ilə “Qarabağ problemi: hardan hara?” adlı seminar-tədbirlər silsiləsinin ilk pilləsi idi. Türkiyə və Azərbaycan himnlərinin səslənməsindən sonra layihənin koordinatoru Dr. Can Ünvərin giriş çıxışı etdi, sonra Giresun Universitetinin rektoru professor Aygün Attar, Azərbaycan Milli Məclisinin üzvü və Qeyri-Hökumət Təşkilatları Şurasının sədri Azay Quliyev, Azərbaycanın Ankaradakı səfiri Faiq Bağırov erməni-Azərbaycan problemlərinin həm köklərindən, həm son 25 ildə törədilən faciələrdən, həm beynəlxalq aləmin gözlə, açıq-aşkar görünən bu hadisələri qulaqardına vurmasından danışdılar. Millət vəkilləri Dr. Rəşad Doğru (Tokat Millət vəkili), İsmayıl Safi (İstanbul Millət vəkili), professor dr. Necdet Ünüvar (Adana Millət vəkili) “əlbəttə bu işdə başlıca dəstək Türkiyədir və bundan sonra da olacaq” ana fikri əsasında çıxış etdilər. Türkiyədə Avropa Birliyi sədr köməkçisi dr. Ələddin Böyükkaya “Mən Türklüyü Azərbaycanda gördüm” deyərkən göz yaşlarını saxlaya bilmədi. “2013-cü ilin ən məhsuldar millət vəkili” adını qazanmış İsmayıl Safi isə çıxışında 20 Yanvar hadisəsini faciə kimi qəbul etmədiyini aydın şəkildə dilə gətirdi, onu doğan qadına bənzədərək “20 Yanvar qanla, min bir ağrı ilə Azərbaycanın müstəqilliyini doğdu, dünyaya yenidən bir varlıq gətirdi, dəstək olan dostları və sevinməyən düşmənləri göstərdi bir daha”.

Tədbirə Türkiyənin ayrı-ayrı bölgələrindən – Qaradəniz, Toros, Karabük, Kırıkkalə və başqa yerlərin Universitetlərindən professorları, müəllimləri və tələbələr gəlmişdilər.

Olaylar.- 2014.- 22 yanvar.- S.15.