“Ali Baş Komandanımız

gəncliyimiz üçün parlaq örnəkdir”

Əkbər Qoşali: ““Prezidentimizin vətənpərvəliyi, Azərbaycanı layiq olduğu yüksək yerlərə çıxarmaq üçün ürəkdən gələn səyləri, xalqsevərliyi öyrənilməli, öyrədilməlidir”

“Milli mənlik şüuru olmayan bir gəncliyin olmasından olmaması yaxşıdır”

Gənc nəslin milli mənlik şüurunun inkişaf etdirilməsi, gənclərin vətənpərvərlik ruhunun artırılması bütün dövrlərdə vacib istiqamətlərdən biri hesab edilib. Xüsusilə, müstəqillik illərindən sonra, bir qədər də konkretləşdirsək ümummilli lider Heydər Əliyevin ikinci dəfə hakimiyyətə qayıdışından sonra bu istiqamətlərə diqqət artıb. Hər halda bu məqsədlə qəbul edilən dövlət proqramları, imzalanan fərman və sərəncamlar belə deməyə əsas verir.

Gənclərin milli mənlik şüurunun inkişaf etdirilməsi və onların vətənpərvərlik hisslərinin artırılmasında qeyri-hökumət təşkilatları və gənclər təşkilatlarının da üzərinə müəyyən vəzifələr düşür. Bu gün ölkədə fəaliyyət göstərən əksəriyyət gənclər təşkilatları əsas etibarilə fəaliyyətlərində qeyd edilən istiqamətlərə diqqət yetirirlər. Belə təşkilatlardan biri də Dünya Gənc Türk Yazarlar Birliyidir. Birliyin məsləhət şurasının başqanı, Azərbaycanda Atatürk Mərkəzi İctimai-siyasi şöbəsinin müdiri, Milli Qeyri-Hökumət Təşkilatları Forumu İdarə Heyətinin üzvü Əkbər Qoşalı ilə söhbətimizdə gənclərin milli mənlik şüurunun inkişaf etdirilməsi və vətənpərvərlik hisslərinin artırılmasında həyata keçirilən tədbirlər, görülən işlər barədə danışdıq.

-Əkbər müəllim, Azərbaycan gənci bu gün nə dərəcədə vətənpərvərdir və gənclərin vətənpərvərlik hissi qaneedici səviyyədədirmi?

- Gəncliyimizin mənəvi-psixoloji obrazı, sosial-mədəni durumu da, ümumən hər yan-yönü ilə durumu da öz mahiyyəti ilə, mövzular üzrə üstün mövqeyi ilə vacibliyini saxlayan bir mövzudur. Məsələ ondadır ki, gənclik mövzusu, demək olar, həmişə, hər ölkədə vacib, əsas mövzu olub. Lakin ərazi bütövlüyü pozulmuş, zəngin təbii ehtiyatlara, o cümlədən karbohidrogen ehtiyatlarına malik olan, yaxın-uzaq ölkələrdən çox fərqli dini, ideoloji-siyasi qrupların maraq göstərdiyi, əhalisinin çox önəmli faizi gənclərdən ibarət Azərbaycan Respublikası üçün bu durum özəl mahiyyət daşıyır, deyə bilərik. Əlbəttə, heç təsadüfi deyil ki, ulu öndər Heydər Əliyev hələ ali hakimiyyətə döndüyü il, respublikanın ictimai fəal gəncləri, ayrı-ayrı gənclər təşkilatlarının rəhbərləri ilə 1993-cü ilin sentyabr ayında Milli Məclisdə yaddaqalan görüş keçirdi; 1994-cü ilin 26 iyulunda gənclər-idman siyasətini həyata keçirən mərkəzi icra hakimiyyəti orqanını yaratdı; 2 il sonra, 1996-cı ilin yanvar ayında Müstəqil Azərbaycan Respublikası Gənclərinin I Forumunun keçirilməsi barədə Sərəncam imzaladı, ölkəyə başçılıq etdiyi müddətdə gənclərlə bağlı çoxsaylı tədbirlərdə şəxsən iştirak etdi, proqram xarakterli çıxışlarında gənclərin problemlərini hakimiyyət orqanları qarşısında “1 saylı vəzifə” olaraq müəyyənləşdirdi. Prezident İlham Əliyevin dövlətə başçılıq etdiyi dövrdə daha da inkişaf etdirilən dövlət gənclər siyasəti daha yeni Sərəncam, Fərman və Qanunlarla zənginləşdirildi, Dövlət Proqramları qəbul edildi, Gənclər Fondu təsis olundu, Gənclər-İdman Nazirliyinin büdcəsi önəmli ölçüdə artırıldı və s. Bütün bunlar dövlətin gənclər mövzusuna verdiyi önəmin bariz göstəriciləri olub, dediyiniz mənəvi-psixoloji, sosial-mədəni obrazın, durumun, konkret olaraq, Azərbaycan gəncinin bugünkü vətənpərvərliyinin səviyyəsinin dövlət qatında necə bir diqqət görməsinin ifadəsidir.

-Sizcə, gənclərin milli mənlik şüurunun inkişaf etdirilmısi, onların vətənpərvər ruhda böyüməsi istiqamətində hansı addımlar atmaq lazımdır?

- Bax, bayaqdan dediklərimiz, əslində məhz gəncliyimizin milli mənlik şüurunun formalaşmasına, dərinləşməsinə, zənginləşməsinə, yeni üfüqlər qazanmasına hesablanmış düzgün dövlət siyasətinə həsr olunmuşdu, deyə bilərik. Milli mənlik şüuru olmayan bir gəncliyin olmasından olmaması yaxşıdır. Özünü tanımayan, milli özünəməxsusluğunu bilməyən, mənsub olduğu xalqın, ölkənin bəşər mədəniyyətinə verdiyi töhfələrdən xəbərsiz, xalqımızın dünənini, bugününü və sabaha baxışını idrak etməyən gənclik nəyə yarardı? Dövlət başçımızın tarixi Azərbaycan torpaqları ilə bağlı dəfələrlə ifadə etdiyi tarixi fikirlər gəncliyimiz üçün bir yolgöstəricisi, rəhbərdir. “Azərbaycan -2020: Gələcəyə baxış” proqramı, dövlətin gənclərlə bağlı proqramı, bütün bunlardan öncə, Konstitusiyamız, milli-mənəvi dəyərlərimiz, gəncliyimizin “Nə etməli? Necə etməli? Niyə etməli? Nə zaman etməli?” anlamlı suallarına cavab tapmasını təmin edir. Deyirsiz, hansı addımları atmaq lazımdır? İlk növbədə, hər gəncin özünə verməli olduğu sualdır bu. Hər kəsin bacardığı bir iş vardır. Hər kəs öz bacardığı işlə vicdanla məşğul olsa, bu özlüyündə şüurlu və peşəkar vətəndaşlıq demək olur. Əlbəttə, gənclərlə işə məsul olan nazirliyimizdəki məmurlar da öz üzərlərinə düşən məsuliyyətə daha yaxından vaqif olduqca, Prezidentimizin qarşıya qoyduğu vəzifələrdən irəli gələn məsələlərə yüksək diqqət göstərdikcə, əhalinin həssas təbəqəsi ilə işlədiklərinin fərqinə dərindən vardıqca ölkənin gənclik mənzərəsi, necə deyərlər, daha rəngarəng, cilvəli, daha anlamlı olur.

- Sizcə, QHT-lər və özəlliklə, gənclər təşkilatlarının bu sahədəki fəaliyyəti hansı səviyyədədir?

-Təşkilatlanmış gənclərimiz yaxud gənclərimizin qurduğu təşkilatlar əgər gəncliyin problemləri ilə məşğul olmasaydı, onda həmin qurumlar çoxdan sıradan çıxmış olardı, ictimai fikirdə öz yer(lər)ini tuta bilməzdi.

Bir az yaxşı, bir az pis, bəlli bir yol qət edən konstruktiv mövqeli təşkilatlarımız öz boylarına uyğun töhfələr verməkdədirlər. Dövlətin dəstəyindən, üzvlərin etibarından sui istifadə etməyə qalxışanlar olunca da, bu da cavabsız qalmır. Əlbəttə, görülmüş işdən, əldə edilmiş sonucdan daha yaxşısı həmişə mövcuddur. Əgər daha yaxşını əldə etmək istək və cəhdi olmayıbsa, bu haqlı suallar doğurardı. Lakin bacardığını əsirgəməyən, gücünün yetdiyi yerə qədər gedən hüquqi və fiziki şəxslər sayğıya layiqdir. Fürsətdən yararlanaraq, demək istərdim ki, bu il bütün vətəndaşlarımız, özəlliklə QHT-lərimiz, o cümlədən gənclər təşkilatlarımız, ictimai-fəal qüvvələrimiz üçün məsuliyyət əmsalı yuxarı olan illərdəndir. I Avropa Oyunları, parlament seçkiləri və s. məhz 2015-ci ilin payına düşür. İstəyim, inamım bu ilin uğurlarında QHT-lərimizin də, bütün ictimai fəal qüvvələrimizin öz töhfəsi ilə iştirak etməsi ilə bağlıdır. Bu bir növbəti sınaqdır, necə deyərlər, könüllülük meydanıdır. Ümidvaram hər şey yaxşı olacaq.

-Ali Baş Komandanın müntəzəm olaraq hərbi hissələrə baş çəkməsi, hərbi təlimləri izləməsi, əsgər və zabitlərə göstərdiyi diqqət gənclərin vətənpərvərlik hisslərinin artırılmasına nə dərəcədə müsbət təsir göstərir?

- Ali Baş Komandanımız gəncliyimiz üçün parlaq örnəkdir. Prezidentimizin vətənpərvəliyi, Azərbaycanı layiq olduğu yüksək yerlərə çıxarmaq üçün ürəkdən gələn səyləri, xalqsevərliyi öyrənilməli, öyrədilməlidir. Özəlliklə, son illər, düşmənə öz gücünü göstərən ordumuza güvən hissi günbəgün artmaqdadır. Müdafiə nazirimiz əsgərlər qarşısında hər çıxışında Ali Baş Komandanın tapşırıqlarını xatırladır, orduya göstərilən diqqət və qayğının bundan sonra da artan xətt üzrə davam edəcəyini, düşmənin sarsıdıcı zərbələrlə öz haqq etdiyi cavabı alacağını qeyd edir. “Ölmək istəməyən erməni hərbçisi Ağdamda, Qarabağda nə gəzir?” sualı və həyata keçirilən ardıcıl, layiqli tədbirlər artıq bir ağır daş kimi düşmən ordusunun başına düşməkdə, onlarda bədgümanlığı, ruh düşkünlüyünü artırmaqdadır. Ümumən gəncliyimizin hansısa yabançılardan ilhamlanmasına ehtiyac yoxdur. İnanıram ki, gənclik özündə olanlardan xəbərdar olduqca daha da böyüyür, üfüqügenişlik qazanır, sabaha ruhlanaraq gedir.

-Sizcə KİV-lər, televiziya və readiolar bu mövzuya yetərincə diqqət ayırırmı?

-Açığı, televiziya və radiolarımızın bu mövzuya yetərincə diqqət ayırdığını deməyə çətinlik çəkirəm. Birincisi, digər mövzulara ayrılan vaxtla müqayisə etsək, ikincisi, elan olunmamış müharibəyə məruz qaldığımızı nəzərə alsaq, üçüncüsü, gənc nəslin hərbi-vətənpərvərlik tərbiyəsinin vacibliyini, KİV-in bu sahədə yerini, rolunu göz önündə tutsaq, məncə arzuolunan səviyyəni görməyəcəyik. Bütün kütləvi informasiya vasitələrimizə aid olmasa da, bəzi KİV-lərə diqqət etdikdə, adama elə gəlir ki, ölkənin dərdi hansı müğənninin nə geyinib, nə soyunmasından və məişət kriminallarından, hadisəsiz hadisələrdən ibarətdir. Qarabağsız, nə müğənni, nə geyim, nə keçim, nə məişət, nə perspektiv? Elə deyilmi?

Əlbəttə, elədir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2015.- 15 aprel.- S.15.