Azərbaycan üçün vətənpərvər olaq

"Vətənpərvərəm" deməklə iş bitmir. Hər bir insan vətənpərvərliyi əməlləri, gördüyü işlərlə sübut etməlidir

Azərbaycanın hiss olunan inkişafı və Dağlıq Qarabağ münaqişəsində sərgilədiyi mövqeni gördükcə, ermənilərin özləri də başa düşürlər ki, “Böyük Ermənistan” xülyası boş və mənasızdır. Ermənistanın üzləşdiyi problemlər xaricdəki erməni diasporasının planlarını da alt-üst elədi. Diaspora qondarma “erməni soyqırımı”nın 100 illiyi ilə əlaqədar heç bir iş görə bilmədi. Çünki erməni diasporasının qarşısında Azərbaycan dövlətinin xarici siyasəti və diasporası dayanır. Ermənistan cəmiyyətində bu fikir yaranıb ki, o Dağlıq Qarabağda qala bilməyəcək. Ermənilərin gəldikləri qənaətə görə, qısa müddətdən sonra Ermənistanın dövlət kimi varlığı sual altına düşəcək. 1993-cü illə müqayisədə indi Azərbaycan cəmiyyətində bir fikir hakimdir ki, torpaqlarımızı geri qaytarmalıyıq. Cəmiyyətdə müharibə əhval-ruhiyyəsi var, vətənpərvərlik hissləri yüksək səviyyədədir. Bu dövlətin apardığı sistemli işin nəticəsidir. Ordu quruculuğu yönündə aparılan işlər, şəhid və müharibə əlillərinin mənzillərlə təmin edilməsi, veteranlara diqqətin ayrılması cəmiyyəti daha da ruhlandırır. Azərbaycan atəşkəsi bir dəfə pozacaq, onda da torpaqlarını işğaldan azad edəcək. Ali Baş Komandan, cənab Prezident İlham Əliyevin Silahlı Qüvvələrə, onun şəxsi heyətinə göstərdiyi diqqət və qayğı gənclərdə vətənpərvərlik hissinin artmasına öz müsbət təsirini göstərir. Gənclərin vətənpərvərlik səyləri xalqımızın qüdrətli, yenilməz hərəkatı ilə birləşir və tariximizin əzəmətli, unudulmaz və misilsiz qəhrəmanlıq səhifələrinin yaranmasına və yazılmasına səbəb olur. Bu isə, öz növbəsində, insanlarda milli borc, torpağa bağlılıq, milli şüur və iftixar, vətəndaşlıq hissinin yaranmasına gətirib çıxarır. Milli mənlik şüuru, milli özünüdərk vətənlə, torpaqla, mədəniyyətlə, incəsənətlə bağlı gerçəkliyin təzahürü olub, sosial-iqtisadi, mədəni və mənəvi mühitin qavranılması, dərk edilməsi və təsdiqidir. Milli mənlik şüuru formalaşmış və tərbiyə olunmuş hər bir insan, vətəndaş, öz xalqının mənəvi sərvətlərinin tarixi inkişaf xüsusiyyətlərini, sosial-etnik cəhətlərini bütün dolğunluğu ilə dərk edir, ona düzgün qiymət verir. Əslində Ali Baş Komandan, cənab prezident İlham Əliyevin orduya ayırdığı diqqət dünya tərəfindən qibtə və qısqanclıqla qəbul edilir. Çünki ordumuz qidasından, yaşayış şəraitindən tutmuş ailə-məişət şəraitinə qədər tam təmin olunub. Bu da təbii ki, milli mənlik şüurunun inkişaf etdirilməsi və vətənpərvərlik hisslərinin tərbiyəsinə öz töhfəsini verir. Bu gün Azərbaycan ordusunun bir problemi var ki, o da Qarabağın işğal altında olmasıdır. Əminliklə qeyd etməlitik ki, sülh danışıqları nəticə verməyəcəyi təqdirdə Azərbaycan Silahlı Qüvvələri işğal altında olan torpaqlarımızı azad edəcək və o gün uzaqda deyil. Burada bir məqama diqqət çəkmək lazımdır. Belə ki, bu siyasət və həyata keçirilən məqsədyönlü tədbirlərin əsası ümummilli lider Heydər Əliyev tərəfindən qoyulub. Belə ki, 2002-ci ildə qəbul olunmuş “Gənclər siyasəti haqqında” AR Qanununun 2007-ci ildə əlavə olunmuş 5.5-ci bəndinə uyğun olaraq “Gənclər arasında vətənpərvərlik işinin gücləndirilməsi, onların ahəngdar inkişafı və asudə vaxtının təşkili, gənclərə psixoloji reabilitasiya, hüquqi və informasiya yardımlarının göstərilməsi məqsədi ilə müvafiq icra hakimiyyəti orqanı tərəfindən müəyyən edilmiş qaydada “Gənclər evi” sosial xidmət müəssisələri şəbəkəsi yaradıldı. 2005-ci ildə Azərbaycan Respublikasının Prezidenti cənab İlham Əliyev tərəfindən imzalanmış “Azərbaycan Gəncliyi Dövlət Proqramı”nın (2005-2009-cu illər) məqsədinə uyğun olaraq isə gənc nəslin Vətənə məhəbbət, Azərbaycan xalqının tarixinə. mədəni irsinə, dövlət dilinə və rəmzlərinə, milli-mənəvi dəyərlərinə hörmət ruhunda tərbiyə olunması kimi vəzifələr nəzərdə tutulurdu. Həmçinin gənclərin hərbi vətənpərvərlik tərbiyəsi işinin gücləndirilməsi, onların hərbi xidmətə hazırlanması; gənclər arasında hüquq pozuntularının, narkomaniyanın və digər zərərli vərdişlərin profilaktikası sahəsində tədbirlərin həyata keçirilməsi, istedadlı gənclərin aşkar edilməsi, onların öz qabiliyyətlərini inkişaf etdirə bilmələri üçün şəraitin yaradılması kimi proqramda əksini tapırdı. Ölkənin ictimai-siyasi həyatında gənclərin fəal iştirakı, uşaq və gənclər üzrə təşkilatların formalaşması və inkişafı üçün şəraitin yaradılması, gənclərin beynəlxalq əməkdaşlığı sahəsində layihələrin həyata keçirilməsinə, gənclər təşkilatlarının beynəlxalq əlaqələrinin qurulmasına, onların nümayəndələrinin beynəlxalq tədbirlərdə iştirakına köməklik göstərilməsi əsas prioritetlərdən hesab edilirdi. 1994-cü ilin iyul ayında ümummilli liderin imzaladığı sərəncamla Gənclər və İdman Nazirliyinin yaradılması, hər il müntəzəm olaraq Gənclər Forumunun keçirilməsi, Gənclər Gününün təsis edilməsi və s. buna əyani sübutdur. Bunlar çox vacib məqamlardır. Bu islahatların hər birində milli mənlik şüurunun inkişaf etdirilməsi və vətənpərvərlik hisslərinin tərbiyəsi məsələsi hər zaman prioritet olub. Bu siyasətin davamı olaraq cənab Prezident İlham Əliyev tərəfindən kifayət qədər, mən deyərdim ki, dünya üçün bir model ola biləcək islahatlar həyata keçirildi. Belə ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası yaradıldı, Azərbaycan Respublikasının Prezidenti yanında Gənclər Fondu, Elm Fondu, Bilik Fondu təsis edildi. Bütün yaradılan bu imkanların qayəsində milli mənlik şüurunun inkişaf etdirilməsi dayanırdı. Bu istiqamətdə verilən layihələr birmənalı şəkildə dəstəklənir. Məhz bu amilləri götürsək, hər bir Azərbaycan vətəndaşı öz vətəni, torpağı, xalqı, milli-mənəvi dəyərlərilə qürur duymalı, hər zaman harada olmasından asılı olmayaraq, onu yaşatmalıdır. Bu səbəbdən də gənclərimizi milli-mənəvi dəyərlərimizə hörmət ruhunda tərbiyə etmək əsas vəzifəmiz olmalıdır. Məsələ barədə jurnalistlərin fikirlərini də öyrəndik. Təhsil işçilərinə, jurnalistlərə bu məsələdə böyük yük və məsuliyyət düşür. Hər iki təbəqənin nümayəndələrinin əlində kütləni yönləndirmək və formalaşdırmaq üçün böyük imkanlar var. Vaxt ötürmədən bu imkanlardan düzgün və səmərəli istifadə olunmalıdır. Xüsusilə orta məktəblərdə İslam dininin tədris olunması qloballaşmanın gətirdiyi mənfi tendensiya olan kütləvi mədəniyyətin yayılmasına qarşı böyük dirəniş ola bilər. Ümummilli lider Heydər Əliyev deyirdi: “Azərbaycan xalqının qəlbində milli azadlıq ruhu, müstəqillik ruhu daim yaşamışdır. Azərbaycanın qabaqcıl adamları, mütəfəkkir şəxsiyyətləri, ziyalıları, milli şüura malik insanları Azərbaycanın öz müstəqilliyini əldə edəcəyi, milli azadlığa nail olacağı ümidilə yaşamışlar”. Beləliklə, milli şüur hər bir insanın mənsub olduğu millətə və vətənə bağlılıq hisslərini əks etdirən, öz hərəkət və davranışına, düşüncə tərzinə, baxışlarına olan münasibətlərin məcmusudur. Milli şüur mənəvi dəyərləri, milli adət-ənənələri özündə ehtiva edir. Milli şüurun formalaşmasında soy-kökə qayıdış, milli əxlaq, vətənə məhəbbət, milli vətənpərvərlik və qürur hissləri kimi mühüm göstəricilərlə yanaşı, özünüdərketmə, öz layiqli yerini müəyyənləşdirmə kimi hisslər də əsas rol oynayır. Ulu öndər milli şüurla Vətən, torpaq arasında üzvi bir bağlılıq olduğunu görür, milli şüuru milli-mənəvi bütövlüyümüz hesab edirdi. Göründüyü kimi, milli mənlik şüuru hər bir millətin varlığının, milli özünüidarə və özünütəsdiqləməsi, milli ləyaqətin və ümumbəşəri keyfiyyətlərinin təzahür formasıdır. Milli mənlik şüurunda millətin adı, varlığı, dili, dini, xarakteri, adət və ənənələri, psixologiyası, mənəviyyatı, mədəniyyəti və s. yaşayır. Məhz milli ləyaqət, torpağa bağlılıq, vətəndaşlıq dəyanəti bu qaynaqlardan nəşət edir, hər bir yeni nəsli azadlığa, müstəqilliyə, vətəni qorumağa çağırır. Hər bir insanda milli mənlik şüuru belə bir zəmin üzərində təşəkkül tapır və belə bir həqiqəti təsdiq edir ki, mədəniyyətin, elmin, ədəbiyyatın inkişafı xalqın böyüklüyü və kiçikliyindən deyil, həmin xalqın müdrikliyindən, zəngin təfəkkür tərzindən, torpağa, elə bağlılığından asılıdır. Tarix təsdiq edir ki, heç bir inkişaf, heç bir təkamül, heç bir hadisə zaman və məkan təsirindən kənarda baş vermir. Milli-mənəvi mühitin təşəkkülü, sosial mühit bütün xalqımızın, o cümlədən, gənclərin cəmiyyətdəki sosial vəziyyətinə, öncə, onların hiss və duyğularına, ictimai, həyatın hadisə və faktlarını duymaq, qavramaq və dərk etmək qabiliyyətinə əsaslı təsir göstərir. Gənclər mənsub olduğu millətə aid bütün artibutlara: milli bayrağa, gerbə, himnə, dini etiqada və s. fəal münasibət bəsləyir, qiymət verir, özlərinin əməli fəaliyyəti üçün nəticə çıxarmaq imkanı əldə edirlər. Torpaq, vətən insanın yaşayış və əbədiyyət məskəni, ulularımızın müqəddəs məbədidir. Beləliklə, vətənpərvərlik vətənə olan ülvi məhəbbətdi. Vətənpərvərlik insanın daxilində olan bir hiss-di. Bu hiss sənin daxilində yaranmayıbsa, o zaman nə vətənini, nə torpağını, nə də valideynlərini sevə bilərsən. "Vətənpərvərəm" deməklə iş bitmir. Hər bir insan vətənpərvərliyi əməlləri, gördüyü işlər ilə sübut etməlidir. Vətənpərvərlik daxildən gələn bir hissdir ki, onu da müəyyən vasitələrlə tərbiyələndirmək, düzgün istiqamətə, milli mənlik şüurunun möhkəmlənmə-sinə yönəltmək lazımdı.

Olaylar. - 2015.- 27 avqust.- S.7.